Pagsangyaw han Maopay nga Sumat ha Kabukiran han Andes

DISIOTSO kami nga nahigda ha salog. Samtang ginkakadal kami ha hagkot ha sakob han amon sleeping bag, pinamamatian namon an makusog hinduro nga uran ha yero nga atop. Tungod han diri maopay nga kahimtang hinin gutiay hinduro nga payag, nahunahuna namon nga bangin kami la an tawo nga nag-ukoy hito.

Kay ano nga binisita kami hini nga lugar? Hingyap namon nga sundon an sugo ni Jesus nga igsangyaw an maopay nga sumat “ngadto ha sidsid gud han kalibotan.” (Buh. 1:8; Mat. 24:14) Kinadto kami basi magsangyaw ha hirayo nga lugar ha kabukiran han Andes ha Bolivia.

An Pagbiyahe Ngadto

Ha tinikangan pa la makuri na an biyahe. Nahibaroan namon nga makuri an transportasyon didto hiton higrayo nga lugar tungod kay waray permanente nga nabiyahe. Pag-abot han bus nga amon sasakyan, nakita namon nga mas gutiay ito kay ha amon ginlalaoman, salit an iba ha amon waray na makalingkod. Bisan pa hito, kami ngatanan nakaabot gihapon ngadto.

Tumong namon nga masangyawan an mga baryo ha kabukiran han Andes. Salit, katapos han biyahe ha bus, hinay-hinay nga nagbaktas kami nga nagsusurunod ha sagkahon nga aragian han bukid dara an amon mga gamit ngan pagkaon.

 Bisan kon baga hin diri haluag an mga baryo, higrayo an lat-ang han mga balay salit maiha kami makatapos ha pagsangyaw ha tagsa nga baryo. Mationan-o man kahirayo an amon ginbaktas, baga hin may-ada la gihapon balay ha unhan. Agsob kami mawara ha nakakawurok nga mga dalan ha kaumhan.

“Kay Ano nga Yana la Kamo Kumanhi?”

Gin-apresyar gud han usa nga babaye an kahirayo han amon ginbaktas, salit iginpagamit niya ha amon an iya kusina ngan sungo ha pagluto han amon paniudto. Han mahibaroan liwat han usa nga lalaki an igintututdo han Biblia mahitungod ha kahimtang han mga patay, nagpakiana hiya, “Kay ano nga yana la kamo kumanhi?” Interesado gud hiya, ngani han bumaya kami ha ira baryo inupod hiya ha amon basi makagpakiana pa samtang nagbabaktas. Usa liwat nga lalaki nga waray pa makabati mahitungod han mga Saksi ni Jehova an naruyag gud han mga publikasyon. Nagpasalamat gud hiya ha amon pagbisita, ngan iginpahuram niya an yawi han balay nga amon makakaturogan ha gab-i.

Usa ka gab-i, tungod kay masirom hinduro, didto kami nakagtolda ha butnga han balay han mga hamtik. Tungod kay nadisturbo, ginkagat kami. Waray na kami bumalhin kay makapoy na hinduro; maopay na la nga pagtikaiha, waray na kami kagata.

Ha siyahan, nagsuol an amon likod ngan mga gusok tungod han amon pagkaturog ha tuna, kondi nahiara na la kami hito. Pagkakaaga, nakakalimtan namon an bisan ano nga kasakit o kaul-ol, samtang gintatan-aw an  mag-opay nga walog nga may-ada mga dampog nga hinay-hinay nga nagtatabon ha mga bakilid hito, ngan an makatarag-ob nga pungkay han mga bukid nga napuputos han niebe. Mamingaw hinduro didto, an mababatian la haganas han sapa ngan huni han katamsihan.

Katapos mangarigo ha sapa, tarampo nga amon ginhihisgotan an inadlaw nga teksto, namamahaw, katapos, hinay-hinay nga nagsasagka pakadto ha iba pa nga higrayo nga baryo. Waray gud makawang an amon pagkadto. Iginkaistorya kami hin lagas nga babaye nga nagtangis han mahibaroan niya nga an ngaran han Dios, nga Jehova, aada ha Biblia. Nalipay hinduro hiya. Yana makakag-ampo na hiya nga ginagamit an ngaran han Dios!

Usa nga lagas nga lalaki an nagsiring nga nahinumdoman hiya han Dios, ngan tigda nga nagkanta nga iginpadara kami han mga anghel. Usa pa nga lalaki nga diri na nakakagawas ha balay tungod han grabe nga sakit an nagsiring nga waray pa gud binisita ha iya nga iya amyaw. Salit, nahipausa hiya han hinbaroan niya nga tikang pa kami ha La Paz. Gindayaw gud han usa nga lalaki an mga Saksi ni Jehova tungod ha pagbisita ha mga tawo ha ira balay, diri sugad han iba nga relihiyon nga gindadapit an mga tawo pinaagi la han bagting ha singbahan.

Waray koryente didto, salit nagsisirom pa la nangangaturog na an mga tawo, ngan nabangon pagsidlit han adlaw. Salit, basi maabtan hira, kinahanglan makagsangyaw na kami ha alas sais pa la ha aga tungod kay kadam-an ha ira nakadto na ha uma. An iba nga nagtatrabaho na, naundang basi mamati ha amon mensahe nga tikang ha Pulong han Dios, ngan basi liwat makapahuway an baka ha pag-arado. Damu nga amon nasangyawan ha balay an nagbabanig hin anit hin karnero basi lingkoran namon ngan gintatawag an bug-os nga pamilya basi mamati. May-ada mga parauma nga naghatag ha amon hin damu nga mais ha pagpasalamat han amon iginbilin nga literatura han Biblia.

“Waray Ako Niyo Hingalimti”

Syempre, basi mag-uswag an mga tawo ha kahibaro ha Biblia, kinahanglan bisitahon utro hira. Damu an naghangyo nga bumalik kami basi tutdoan hira hin dugang pa. Tungod hito, damu ka beses nga binalik kami hini nga kabukiran.

Ha urhi nga amon pagkadto, nalipay an usa nga lagas nga babaye nga binalik kami, ngan nagsiring: “Sugad hin mga anak ko na kamo. Waray ako niyo hingalimti.” Usa nga lalaki an nagpasalamat tungod ha amon pagsangyaw, ngan gin-imbitar kami pag-ukoy ha iya balay ha sunod nga amon pagbalik. Hinbaroan namon nga an babaye nga amon nasangyawan ha naglabay nga mga pagbisita, binalhin na ha syudad ngan nagsasangyaw na han maopay nga sumat. Ito an gidadakui nga balos han amon pangalimbasog.

Han ultimo nga adlaw han amon siyahan nga pagkadto, naubosan kami hin gamit para ha pagluto ngan haros ubos na an amon dara nga pagkaon. Tungod hito, nagtirok kami hin igo nga sungo ngan ginluto an nahisalin nga pagkaon, ngan katapos nagbaktas kami tipauli. Hirayo kami hinduro ha bungto nga may masasakyan nga bus. Salit, masirom na han pag-abot namon didto.

An Pagbiyahe Tipauli

Nagkaproblema han tipauli kami tungod kay waray na umandar an bus. Nag-iha-iha pa antes kami makasakay hin trak nga puno hin mga tawo. Hini nga biyahe, nakahigayon kami pagsangyaw ha amon mga igkasi-pasahero nga nagpakiana kon kay ano nga kinadto kami. Bisan kon mga awdanon, maabiabihon ngan makisangkayon hira.

Katapos han siyam ka oras nga pagbiyahe ha trak, nakauli kami ha balay—mahulos ngan ginhahagkot hinduro. Bisan pa hito, mapulsanon an amon pagbiyahe. Nakag-eskedyol kami hin pag-aram ha Biblia ha kasakay namon nga babaye nga naukoy ha syudad.

Makalilipay gud nga pribilehiyo an pagpasamwak han maopay nga sumat ha mga tawo hito nga higrayo nga lugar. Nasangyawan namon an upat nga baryo ngan damu nga sityo. Nahinumdoman namon an mga pulong: “Pagkamaanyag dida ha kabukiran an mga tiil niya nga nagdadara han mag-opay nga mga sumat, nga nagpapasangyaw han pagdait, nga nagdadara han mag-opay nga mga sumat han kaopayan, nga nagpapasangyaw han kaluwasan.”—Isa. 52:7; Roma 10:15.

[Retrato ha pahina 17]

Andam na ha pagsangyaw han maopay nga sumat