Usa nga Importante Hinduro nga Pakigsabot

USA ako nga batan-on nga iroy nga Katsila, ngan may-ada ako importante hinduro nga pakigsabot. Susumatan ko kamo mahitungod hito.

Ha amon panimalay, waray kamurayawan ngan pagkaurosa. Han mamatay an akon manghod tungod han makangingirhat nga aksidente han kwatro anyos hiya, nabug-atan han duro nga kasubo an amon pamilya. Dugang pa, an bisyo ni Tatay nagin hinungdan nga magin diri bug-os nga malipayon hi Nanay ha iya pag-asawa. Kondi, bisan pa hito, naipasilsil niya ha akon ngan ha akon magurang an mag-opay nga prinsipyo.

Inabot an panahon, nag-asawa an akon magurang, pati liwat ako. Waray pag-iha, nagkaada kanser hi Nanay, ngan ha urhi namatay hiya. Kondi antes hiya mamatay, iya iginpasa ha amon an usa nga bahandi.

Usa han kasangkayan ni Nanay an nag-istorya ha iya mahitungod han Kasuratanhon nga paglaom han pagkabanhaw, ngan inuyon hiya nga dumarahan hin pag-aram ha Biblia. Durante han ultimo nga takna han iya kinabuhi, an Kasuratanhon nga mensahe han paglaom nakahatag ha iya hin kalipay ngan hinungdan nga mabuhi.

Han nakita ko ngan han akon magurang an maopay nga epekto han mensahe han Biblia kan Nanay, nagtikang kami pag-aram han Pulong han Dios. Nabawtismohan ako usa ka bulan antes ko ipanganak an akon ikaduha nga anak, usa nga mahusay nga bata nga amon ginngaranan hin Lucía.

Importante hinduro ha akon an adlaw han akon bawtismo. Usa nga hinungdan hito amo an kamatuoran nga yana, panag-iya na ako ni Jehova kay igindedikar ko na an akon kalugaringon ha pag-alagad ha iya tubtob ha waray kataposan. An usa pa nga hinungdan amo an kaikag nga maipaangbit an akon gintotoohan ha akon hinigugma nga mga anak.

Waray pag-iha, naulang iton ikaduha nga hinungdan han akon kalipay. Han kwatro anyos hi Lucía, may mga panahon nga nasakit hinduro an iya tiyan. Ginpaeksamin namon hiya ha mga doktor, ngan nagsiring an radiologist nga may tumor ha iya atay nga pariho kadaku hin aranghita. Nagsiring an doktor nga may-ada hiya neuroblastoma, usa nga kanseros nga tumor nga madagmit dumaku. Hito nga paagi nagtikang an iya pito-ka-tuig nga pakig-away ha kanser, ngan usahay nahuhospital hiya hin maiha.

An May Pagsakripisyo nga Disposisyon ni Lucía

Durante hinin puno hin problema nga katuigan, agsob nga gindadasig ngan ginliliaw ako ni Lucía pinaagi han iya mga hangkop ngan mga harok nga nagpapakita hin gugma. An iya diri mareklamuhon nga pag-antos han iya sakit positibo nga nakaapekto ha mga nagtatrabaho ha hospital. Andam hiya pirme ha pagbulig ha mga nars ha pagdul-ong hin yogurt, juice, ngan iba pa, ha kabataan ha kahirani nga mga kwarto. Gintagan pa ngani hiya han mga nars hin busag nga uniporme ngan I.D. nga nagpapakilala nga “assistant” hiya han mga nars.

“Nabantad gud ni Lucía an akon kasingkasing,” siring han usa nga nagtatrabaho ha hospital. “Matibaksi hiya, artistiko, ngan mahilig mag-drawing. Iya iginpapahayag an iya inaabat ngan hamtong, hamtong hinduro.”

Tikang ha Pulong han Dios an kusog ngan karig-on ni Lucía. (Heb. 4:12) Kombinsido hiya nga ha bag-o nga kalibotan, “mawawaray na kamatayon; ngan mawawaray na an kabidoan, bisan pagtangis, bisan kasakit pa gud,” sugad han iginsaad hito. (Pah. 21:4) Tungod kay interesado hiya ha mga tawo, iya ginsalingabot an mga higayon ha pagsumat ha iba han mensahe ha Biblia. An iya marig-on nga paglaom ha pagkabanhaw nakabulig ha iya nga makontrol an iya emosyon ngan magpabilin nga malipayon bisan pa han gutiay  hinduro nga posibilidad nga maopáy. (Isa. 25:8) Nagpabilin hiya nga positibo ngan malipayon tubtob han hiya mamatay.

Hito nga adlaw naghimo ako hin importante nga pakigsabot. Haros diri na mapukrat ni Lucía an iya mga mata. Kinakaptan han iya tatay an iya usa nga kamot samtang kinakaptan ko liwat an kaluyo. “Ayaw kahadlok, diri ko ikaw babayaan,” ginhuringan ko hiya. “Ginhawa la hin mahinay. Pagmata mo, waray ka na sakit. Diri ka na mauul-olan pa, ngan aadto ako ha pagtapo ha imo.”

Yana, kinahanglan ko tumanon an amon sabot. Maaram ako nga diri masayon an paghulat. Kondi maaram liwat ako nga kon padayon ako nga sumarig kan Jehova ngan magtipig hin integridad ha Iya, aadto ako ha pagbanhawa ha iya.

An Iginbilin ni Lucía

An pagin maisugon ni Lucía, ngan an daku nga suporta han kongregasyon, nakaapekto gud ha akon bana nga iba an relihiyon. Han mamatay hi Lucía, ginsidngan ako han akon bana nga kinahanglan niya mamalandong. Paglabay hin pipira ka semana, ginhangyo niya an usa ka tigurang nga dumarahan hiya hin pag-aram ha Biblia. Waray pag-iha natambong na hiya ha ngatanan nga katirok. Ha bulig ni Jehova nakaundang hiya ha pagsigarilyo, usa nga bisyo nga diri gud niya mabayaan hadto.

Nasusubo pa gihapon ako tungod han kamatay ni Lucía, kondi mapasalamaton ako kan Jehova han iginbilin ni Lucía. Yana, ginliliaw namon nga mag-asawa an kada tagsa pinaagi han makalilipay nga paglaom han pagkabanhaw, ginhahanduraw pa ngani namon an panahon nga makita utro hi Lucía—an iya sugad hin pirme nahiyom nga nawong tungod han iya malidong nga mga mata ngan may kalundiis nga bayhon.

An makasurubo nga nahitabo ha akon anak nakaapekto liwat ha usa han amon amyaw. Usa ka mauran nga Sabado nga aga, ginbisita kami hin babaye nga may anak nga kaeskwela ni Lucía. Namatayan ngay-an hiya hin 11 anyos nga anak tungod hin pariho nga sakit. Han nahibaro hiya mahitungod kan Lucía, ginbiling niya an amon adres ngan ginbisita kami. Karuyag niya kumustahon ako katapos han panhitabo ngan nagsuhestyon nga magporma kami hin grupo han mga iroy nga parapriho an sitwasyon basi maliaw namon an kada tagsa.

Iginsumat ko ha iya nga nakabiling na ako hin tinuod nga kaliawan ha usa han saad han Biblia, usa nga labaw gud kay ha bisan ano nga maitatanyag han tawo. Nakita ko ha iya mata an paglaom samtang binabasa ko ha iya an ginsiring ni Jesus ha Juan 5:28, 29. Ginkarawat niya an pag-aram ha Biblia ngan waray pag-iha nagkaada han “kamurayawan han Dios, nga labaw ha ngatanan nga hibabroan.” (Fil. 4:7) Agsob nga kon nag-aaram kami han Biblia, naundang kami hin madaliay ngan amon ginhuhulagway nga aadto kami ha bag-o nga kalibotan ngan natapo han amon binanhaw nga mga hinigugma.

Oo, an halipot nga kinabuhi ni Lucía nagbilin hin panurundon nga magpapadayon ha waray kataposan. An iya pagtoo nakabulig ha amon pamilya nga magkaurosa ha pag-alagad ha Dios, ngan nakaaghat ha akon nga magin mas determinado ha pagpabilin nga marig-on ha pagtoo. Waray ruhaduha, an ngatanan ha aton nga namatayan hin mga hinigugma nga bangin banhawon naghimo hin importante hinduro nga pakigsabot.

[Retrato ha pahina 20]

“Drawing” ni Lucía nga paraiso