Nahibubulag Kondi Diri Hinngangalimtan

HI APOSTOL Pablo nagsagdon ha iya mga igkasi-Kristiano: “Magbuhat kita han maopay ha ngatanan nga mga tawo, labi na gud ha panimalay han pagtoo.” (Gal. 6:10) Ginsusunod pa gihapon naton ito yana ngan namimiling kita hin mga paagi ha pagbuhat hin maopay ha aton mga igkasi-Saksi. Kaupod ha mga nanginginahanglan ngan takos han aton mahigugmaon nga pagtagad amo an aton hinigugma nga lagas nga kabugtoan ha kongregasyon nga naukoy ha mga nursing home (balay para ha marangnoan na nga kalagasan).

Nabatasan na ha pipira nga nasud nga an pamilya an nag-aataman han ira lagas nga mga kag-anak ha balay. Kondi, ha iba nga nasud damu nga kalagasan an naukoy ha nursing home ngan didto hira gin-aataman. Kumusta man an kalagasan nga Kristiano nga naukoy didto? Ano nga kakurian an ira gin-aantos? Paonan-o hira nakakalampos kon waray nasuporta ha ira nga mga kapamilya? Ano an maibubulig ha ira han kongregasyon? Ngan ano an aton napapahimulosan kon binibisita naton hira pirme?

Mga Problema ha Nursing Home

Kon an lagas nga mga Kristiano nabalhin ha nursing home, bangin hingadto hira ha teritoryo han iba nga kongregasyon nga diri nakilala ha ira. Salit, an mga Saksi didto bangin diri bumisita ha ira hin agsob. Dugang pa, kasagaran nga iba-iba an relihiyon han mga kaupod nira didto.  Tungod hito, posible nga makurian gud hira han kahimtang.

Pananglitan, may mga nursing home nga naghihimo hin mga seremonya han relihiyon dida mismo ha ira pasilidad. Usa nga caregiver an nagsiring: “An pipira nga kalagasan nga Saksi nga diri na nakakayakan hin maopay, naka-wheelchair nga gindadara ngadto ha pagsingba nga diri na ginpapakianhan kon ano an ira karuyag.” Dugang pa, an mga kompleanyo, Pasko, o Easter agsob nga ginsasaurog han mga nagtatrabaho didto basi maiba an rutina han ira mga gin-aataman. An pipira nga Saksi didto ginpapakaon liwat hin diri itinutugot han ira konsensya. (Buh. 15:29) Kon pirme naton hira ginbibisita, mabubuligan naton hira ha sugad nga mga problema.

Bulig Tikang ha Kongregasyon

Ginsisiguro han siyahan nga mga Kristiano nga namamangnoan an kalagasan nga waray kapamilya nga nag-aataman. (1 Tim. 5:9) Ha pariho nga paagi, ginsisiguro liwat han mga paramangno yana nga diri napapasibay-an an kalagasan nga naukoy ha mga nursing home ha ira lugar. a An tigurang nga hi Robert nagsiring: “Maopay unta kon an Kristiano nga mga paramangno personal nga mabisita ha kalagasan basi makita an ira kahimtang ngan mag-ampo kaupod nira. Daku gud an maibubulig han kongregasyon ha ira.” Kon nabisita kita pirme ha kalagasan, ipinapakita naton nga nasabot kita nga importante gud kan Jehova  an pag-ataman ha mga nanginginahanglan.—Jak. 1:27.

Kon kinahanglan, an mga tigurang kinaburut-on nga naghihikay hin bulig ha kabugtoan ha mga nursing home ha ira teritoryo. Naobserbahan ni Robert an usa han kinahanglan buhaton, “Sadang naton aghaton an lagas nga kabugtoan nga tumambong ha mga katirok kon mahihimo nira.” Kondi, para ha mga diri na makakaakos pagkadto ha Kingdom Hall, mahimo maghikay hin iba nga paagi an mga tigurang. Hi Jacqueline nga sobra 80 anyos na ngan may osteoarthritis, namamati han katirok pinaagi han telepono. Hiya nagsiring: “Daku gud an akon napapahimulosan ha pagpamati han mga katirok samtang ginhihimo ito. Diri gud ako mapalya hito anoman an mahitabo!”

Kon an lagas nga Kristiano diri makakapamati han mga katirok pinaagi han telepono, mahimo hikayon han mga tigurang nga irekord ito. An nadul-ong hito ha bugto ha nursing home, makakahigayon nga magkaada makapadasig nga pakiistorya ha iya. “Kon ginsusumatan an lagas nga kabugtoan mahitungod han mga kakongregasyon, inaabat nira nga membro pa gihapon hira han espirituwal nga pamilya,” siring han usa nga paramangno.

Ipadayon an Komunikasyon

Natural la nga kinukurian gud ngan diri komportable an damu nga lagas kon nahingangadto hira ha nursing home. Salit an iba ha ira diri na naruruyag makiistorya. Kondi, kon bisitahon dayon naton hira katapos nira bumalhin ngan ipakita an aton padayon nga suporta, mabubuligan gud naton hira nga magkaada utro hin kalipay ngan murayaw nga hunahuna.—Prob. 17:22.

Kon nagluluya na an ira abilidad ha paghunahuna o pagpamati o kon may-ada iba pa nga problema nga nakakaapekto han ira pakiistorya, bangin hunahunaon han iba nga waray pulos an pagbisita ha ira. Kondi, an aton pagbisita pirme, bisan kon makuri gud an pakiistorya ha ira, nagpapakita nga padayon nga nangunguna kita ha ‘pagpasidungog’ ha aton mga igkasi-Saksi. (Roma 12:10) Kon nagigin limtanon na an bugto, mahimo naton hiya aghaton nga hinumdoman an iya mga eksperyensya hadto—bisan tikang ha pagkabata—o isumat ha aton kon paonan-o hiya nahibaro han kamatuoran. Ano an aton bubuhaton kon nakukurian hiya pagyakan han husto nga mga pulong? Mapailubon nga pamati, ngan kon angayan, pag-unabi hin duha o tulo nga pulong nga bangin amo an iya iginpapasabot, o isumaryo an iya karuyag sidngon ngan aghata hiya nga magpadayon. Kon nawuwurok hiya o may depekto ha pagyakan ngan makuri ito masabtan, pamatian naton hin maopay an tono han iya tingog basi kita makasabot.

Kon diri na hiya nakakaistorya, mahimo gamiton an iba nga paagi. Pananglitan, pirme nabisita an payunir nga hi Laurence ha 80 anyos nga hi Madeleine, nga diri na nakakayakan. Iginsaysay ni Laurence kon paonan-o hiya nakikigkomunikar: “Ginkakaptan ko an kamot ni Madeleine samtang nag-aampo kami. Mahinay nga gin-gugumo niya an akon kamot ngan ginpipirok-pirok an iya mga mata basi ipakita an pagpasalamat hinin presyoso nga takna.” Nakakaliaw gud ha aton lagas nga kasangkayan an pagkapot han ira kamot o an kinasingkasing nga paghangkop ha ira.

Importante an Imo Pagbisita

An imo pagbisita pirme ha kalagasan mahimo makapauswag ha kalidad han pag-ataman ha ira. Hi Danièle, nga nabisita ha mga igkasi-Saksi ha mga nursing home hin 20 ka tuig na, nagsiring, “Kon nakikita han mga empleyado ha nursing home nga binibisita pirme an usa nga lagas, mas gin-aataman nira hiya.” Hi Robert, nga gin-unabi kanina, nagsiring: “An mga empleyado ha nursing home mas namamati ha nabisita pirme. Posible nga diri sugad hito an ira pagtahod ha panalagsa la bumisita.” Tungod kay an mga nag-aataman agsob umatubang hin makuri pakibagayan nga mga pamilya, ginpapabilhan gud nira an pagpasalamat han mga nabisita. Dugang pa, kon maopay an aton pagtratar ha mga nagtatrabaho didto, mas gintatahod nira an mga prinsipyo ngan gintotoohan han lagas nga Saksi nga ira gin-aataman.

Mapapatubo liwat naton an maopay nga relasyon ha mga empleyado pinaagi ha pagbulig ha ira ha simple nga mga trabaho. Ha pipira nga  lugar, diri naaataman hin maopay an kalagasan tungod kay pirme kulang hin kwalipikado nga mga empleyado. An nars nga hi Rébecca nagsuhestyon: “Damu an trabaho ha oras han pangaon. Salit ito an maopay nga panahon para bisitahon an usa nga sangkay ngan pakaunon hiya.” Diri kita mag-alang ha pangaro hin suhestyon ha mga nagtatrabaho didto kon ano an aton maibubulig.

Kon pirme kita nabisita ha amo gihapon nga pasilidad, makikita naton kon ano an ginkikinahanglan han aton lagas nga bugto, ngan kon itutugot han mga empleyado, makakahimo kita hin paagi nga mabuligan hiya. Pananglitan, mahimo naton dekorasyonan an iya kwarto hin mga retrato han iya mga hinigugma o hin mga ginuhit han kabataan. Ha paghunahuna han makakaopay ha iya, mahimo naton hiya hatagan hin bado o personal nga mga gamit. Kon an pasilidad may-ada hardin, mahimo ba naton hiya dad-on ha gawas basi makahanggab hin presko nga hangin? Hi Laurence nga gin-unabi kanina, nagsiring: “Ginpapamulat ni Madeleine an akon pagbisita kada semana. Kon may-ada ako upod nga kabataan, nahiyom dayon hiya ngan makikita ha iya mga mata an kalipay!” Daku gud an nahihimo han pariho hito nga mga paagi ha pagbulig ha mga naukoy ha nursing home.—Prob. 3:27.

Pariho Nagpapahimulos

Masasarihan an “katangkod han [aton] gugma” pinaagi han regular nga pagbisita ha usa nga lagas. (2 Kor. 8:8) Ha ano nga paagi? Bangin masubo gud kita kon makita naton nga nagtitikaluya na an aton sangkay. Hi Laurence nagsumat: “Ha siyahan, naapektohan gud ako han maluya na hi Madeleine salit nagtatangis ako katapos han kada pagbisita ha iya. Kondi inabat ko nga an sinsero nga pag-ampo nakakabulig ha aton nga malamposan an aton mga kabaraka ngan nagigin mas makapadasig kita.” Ginbibisita ni Robert hin pipira ka tuig na an Kristiano nga bugto nga hi Larry nga may-ada Parkinson’s disease. Hi Robert nagsiring: “Naapektohan gud hi Larry han iya sakit salit diri ko na nasasabtan an iya ginyayakan. Kondi kon nag-aampo kami, inaabat ko pa gihapon an iya pagtoo.”

Kon binibisita naton an lagas nga kabugtoan, diri la naton nabubuligan hira kondi nagpapahimulos liwat kita. An ira determinasyon nga magpabilin nga duok kan Jehova bisan kon an ira mga kaupod iba-iba an relihiyon, nagtututdo ha aton nga magmarig-on ha pagtoo ngan magmaisugon. An ira pagpamulat han espirituwal nga pagkaon bisan pa han mga depekto ha pagpamati ngan pagkita, nagpapakita gud nga “diri la an tinapay an nakakabuhi han tawo, kondi an ngatanan nga pulong, nga nagowa ha baba han Dios.” (Mat. 4:4) An ira kalipay ha simple nga mga butang, sugad han hiyom han bata o pagkaada kadungan ha pagkaon nagpapahinumdom ha aton nga magin kontento ha kon ano an may-ada kita. Makakabulig ha aton an ira pagkaada maopay nga relasyon ha Dios nga mahibaro kon ano an sadang unahon naton.

Oo, an bug-os nga kongregasyon nagpapahimulos han naibubulig naton ha kalagasan. Ha ano nga paagi? Tungod kay adton magluya na mas nadepende ha gugma ha ira han kabugtoan, nahahatagan hin higayon an kongregasyon nga mas magin mapinairon. Salit, sadang hunahunaon naton ngatanan nga an pag-ataman ha kalagasan, bisan ha hilawig nga panahon, bahin han aton pagserbi ha usa kag usa. (1 Ped. 4:10, 11) Kon mangunguna an mga tigurang ha pagbuhat hini, ira mabubuligan an iba nga membro han kongregasyon nga makasabot nga diri gud igbalewaray ini nga bahin han aton buruhaton. (Esek. 34:15, 16) Pinaagi han aton kinaburut-on ngan mahigugmaon nga suporta, ginpapasarig naton an lagas nga mga igkasi-Kristiano nga diri gud hira hinngangalimtan!

[Footnote]

[Blurb ha pahina 28]

“Kon nakikita han mga empleyado ha nursing home nga binibisita pirme an usa nga lagas, mas gin-aataman nira hiya”

[Retrato ha pahina 26]

An aton sinsero nga pag-ampo makakabulig ha lagas nga igkasi-Saksi nga magkaada utro murayaw nga hunahuna

[Retrato ha pahina 26]

An aton mapinairon nga pagpakita hin gugma magpaparig-on ha lagas nga mga igkasi-Kristiano