Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan? Bueno, kitaa kon mababaton mo an masunod nga mga pakiana:

• Kakan-o ginbisita hi Jesus han mga astrologo?

An usa nga bersyon han Biblia nagkomento: “Diri pariho ha mga parabantay hin karnero, an mga Mago waray bumisita kan Jesus ha pasabsaban ha gab-i han iya katawo. Binisita hira paglabay hin pipira ka bulan.” Hito nga panahon gutiay na nga “bata” hi Jesus ngan naukoy na ha balay. (Mat. 2:7-11) Kon ginhatagan hi Jesus hin bulawan ngan iba pa nga birilhon nga regalo ha gab-i han iya katawo, duha la ba nga tamsi an ihahalad ni Maria ha templo paglabay hin 40 ka adlaw?—Ene.–Mar., pahina 31.

• Ano an mahimo buhaton basi magin mas may katuyoan an kinabuhi?

Bangin magpakiana an usa, ‘Mahimo ko ba bag-ohon an akon kahimtang ngan pasimplihon an akon kinabuhi?’ Ginbuhat ito ni Amy. Riko hiya kondi diri hiya malipayon. Nasantop niya nga tungod han iya pagtinguha hin propesyon hini nga kalibotan, hirani na hiya mahisimang ha pagtoo. Salit, nagdesisyon hiya nga unahon an Ginhadian ha iya kinabuhi ngan nakagpayunir hin pipira ka tuig. Hiya nagsiring, “Yana, inaabat ko an katagbaw nga waray ko gud maeksperyensyahi” han gintitinguha ko an sekular nga mga tumong.—1/15, pahina 19.

• Ano nga “henerasyon” an gin-unabi ni Jesus ha Mateo 24:34?

Gin-gamit hin agsob ni Jesus an pulong nga “henerasyon” ha negatibo nga kahulogan kon nakikiistorya ha magraot nga tawo o naghihisgot mahitungod ha ira. Kondi waray niya ito gamita ha negatibo nga paagi han nakiistorya hiya ha iya mga disipulo, nga hirani na dihogan han baraan nga espiritu. Hira gud an makakasabot hin maopay ngan makakahimo hin konklusyon han gin-unabi ha Mateo 24:32, 33. Salit, makakasiring kita nga an gin-uunabi ni Jesus amo an iya dinihogan nga mga sumurunod, ha siyahan nga siglo ngan ha moderno nga panahon.—2/15, pahina 23-4.

• Uyon ha Jakobo 3:17, ano nga mga kalidad an sadang naton ipakita?

Basi magin putli, kinahanglan isalikway dayon naton an magraot nga butang. (Gen. 39:7-9) Kinahanglan liwat kita magin makimurayawon, ngan ginlilikyan an pagin masisinahon, makiawayon, o an mga paggawi nga makakadaot han kamurayawan. Salit an tagsa ha aton sadang magpakiana ha kalugaringon: ‘Kilala ba ako nga mamurayawon, o makiawayon? Agsob ba ako makilantugi ha iba? Madali ba ako masina, o agsob ako makapasina ha iba? O andam ba ako magpasaylo ngan diri iginpipirit nga sundon an akon mga karuyag?’—3/15, pahina 24-5.

• Kay ano nga hinay-hinay nga gintambal ni Jesus an tawo nga buta? (Mar. 8:22-26)

An Biblia waray maghatag hin detalyado nga pagsaysay. Kondi, posible nga hini nga kahimtang, hinay-hinay nga gintambal hiya ni Jesus basi hatagan hiya hin panahon nga makapahiuyon ha pagkita. Usa ini nga kapahayagan han mahigugmaon nga pagtagad ni Jesus hito nga buta nga tawo.—Abr.–Hun., pahina 30.

[Kahon ha pahina 29]

Usa nga Eksperyensya ha Gresya

■ Usa nga bugto nga lalaki nga amo pirme an ruta ngadto ha iya trabaho kada adlaw an nakaobserba nga may-ada babaye nga agsob kumadto ha gutiay nga groto. Ito nga mga groto nga aada ha ligid han mga kalsada ha Gresya, kasagaran nga nagtitigaman nga may-ada namatay hito nga lugar tungod han aksidente. Basi mabuligan an babaye, an bugto naghimo hin halipot nga surat nga may nakakaliaw nga mensahe tikang ha Kasuratan mahitungod han kahimtang han mga patay ngan han paglaom nga pagkabanhaw. Katapos niya isurat an iya ngaran ngan numero han telepono, iginbutang niya ito ha sulod han groto. Kinabuwasan, gintawagan hiya han babaye nga interesado gud han maopay nga sumat. Yana, regular nga ginbabalik bisita ini nga babaye.