Pag-asawa Ngan Pagkaada Anak Hinin Panahon han Kataposan
Pag-asawa Ngan Pagkaada Anak Hinin Panahon han Kataposan
“An panahon ginpahalipot.”—1 KOR. 7:29.
1. (a) Ano nga mga pagbag-o han kahimtang an makuri pakibagayan? (b) Kay ano nga sadang kita mabaraka ha pagbag-o han mga prinsipyo ha pamilya?
IGINTAGNA han Pulong han Dios nga ha “panahon han kataposan” magkakaada mga girra, linog, gutom, ngan sakit. (Dan. 8:17, 19; Luk. 21:10, 11) Nagpapahamangno liwat ito nga hinin makuri nga peryodo han kasaysayan han tawo magkakaada dagku nga pagbag-o ha katawohan. An kasamok ha pamilya magigin usa han mga kahimtang nga makuri pakibagayan durante hinin “kataposan nga mga adlaw.” (2 Tim. 3:1-4) Kay ano nga sadang kita mabaraka han sugad nga mga pagbag-o? Tungod kay kalyap ngan gamhanan ito hinduro ngan makakaimpluwensya ito ha panhunahuna han mga Kristiano yana mahitungod han pag-asawa ngan pagkaada anak. Ha ano nga paagi?
2. Ano an panhunahuna han kadam-an ha kalibotan mahitungod ha pag-asawa ngan pagbulag?
2 Yana nga panahon, masayon na la ngan kalyap an pagdiborsyo, ngan nagtitikadamu ito ha damu nga nasud. Kondi, sadang gud naton hinumdoman nga an panhunahuna ni Jehova nga Dios ha pag-asawa ngan pagbulag naiiba gud kay ha panhunahuna han kadam-an ha kalibotan. Kon sugad, ano an panhunahuna ni Jehova?
3. Ano an pagtagad ni Jehova ngan ni Jesu-Kristo ha pag-asawa?
3 Ginlalaoman ni Jehova nga Dios an mga may asawa nga magpapadayon ha pagtuman han ira panumpa ha pag-asawa. Han gintig-ob ni Jehova an siyahan nga lalaki ngan babaye, nagsiring Hiya nga an lalaki ‘matampo ha iya asawa ngan hira magigin usa nga unod.’ Ha urhi, gin-unabi utro ito ni Jesu-Kristo ngan nagsiring: “Busa kon ano an gintig-ob han Dios, diri pagbulagon han tawo.” Hiya nagdugang: “Bisan hin-o an mabulag ha iya asawa nga babaye kon diri tungod la ha pakighilawas, ngan mangasawa hin iba, nakakagbuhat hin panlibog.” (Gen. 2:24; Mat. 19:3-6, 9) Salit, gintatagad ni Jehova ngan ni Jesus an pag-asawa sugad nga bug-os-kinabuhi nga pagkaupod nga matatapos la kon mamatay an usa. (1 Kor. 7:39) Tungod kay sagrado nga kahikayan an pag-asawa, sadang tagdon hin seryoso an pagdiborsyo. Ha pagkamatuod, an Pulong han Dios nasiring nga nangangalas hi Jehova han pagdiborsyo nga waray Kasuratanhon nga hinungdan. a—Basaha an Malakias 2:13-16; 3:6.
Responsable nga Pag-asawa
4. Kay ano nga nagbabasol an iba nga batan-on nga nag-asawa hira dayon?
4 An diri-diosnon nga kalibotan nga aton gin-uukyan duro gud an hingyap ha sekso. Kada adlaw damu hinduro nga maglaw-ay nga retrato an aton nakikita. Diri gud naton sadang igbalewaray an mahimo magin epekto hito ha aton, labi na ha aton hinigugma nga mga batan-on ha kongregasyon. Ano an reaksyon han batan-on nga mga Kristiano hinin diri-maopay nga impluwensya nga mahimo makaaghat hin hingyap ha pakighilawas bisan kon diri nira karuyag? An iba nangangalimbasog ha pagsulbad hito pinaagi ha pag-asawa nga batan-on pa hinduro tungod kay kahuna nira nga makakalikay hira ha imoral nga pakighilawas. Kondi, waray pag-iha damu an nagbasol hito nga ira desisyon. Kay ano? Tungod kay paglabay hin pipira ka panahon katapos han kasal, nasantop nira nga damu an diri nira ginkakauyonan may kalabotan ha adlaw-adlaw nga pagkinabuhi. Natural la nga seryoso an problema han sugad nga mga mag-asawa.
5. Ano an mabulig ha mag-asawa nga padayon nga magin matinumanon ha ira ginsumpaan ha kasal? (Kitaa liwat an footnote.)
5 Makuri an pakaasawa hin kaiba gud kay han imo ginlalaoman, bisan pa kon igkasi-Kristiano hiya. (1 Kor. 7:28) Pero, bisan kon makuri an sitwasyon, maaram an tinuod nga mga Kristiano nga an pagbulag nga waray Kasuratanhon nga hinungdan diri amo an solusyon ha mga problema han diri malipayon nga pag-asawa. Salit, adton padayon nga nangangalimbasog ha pagtipig han ira pag-asawa tungod kay karuyag nira magin matinumanon ha ira ginsumpaan ha kasal, takos han pagtahod ngan mahigugmaon nga bulig han Kristiano nga kongregasyon. b
6. Paonan-o sadang tagdon han batan-on nga mga Kristiano an posibilidad nga makaasawa?
6 Batan-on ka ba ngan waray pa asawa? Kon amo, paonan-o mo tatagdon an posibilidad nga makaasawa? Malilikyan mo an duro nga kasubo kon maghuhulat ka tubtob nga andam ka na ha pisikal, mental, ngan espirituwal antes ka makigrelasyon ha usa nga Kristiano. Waray mag-unabi an Kasuratan hin angayan nga edad ha pag-asawa. c Kondi, iginpapakita han Biblia nga maopay kon imo anay palabyon an panahon diin an hingyap ha sekso makusog gud. (1 Kor. 7:36) Kay ano? Tungod kay nakakaapekto ito ha maopay nga pagturutimbang ngan nagigin hinungdan ha pakahimo hin diri maaramon nga mga desisyon nga ha urhi bangin magresulta hin kasubo. Hinumdumi nga para ha imo kaopayan ngan kalipayan an maaramon nga sagdon ni Jehova nga aada ha Biblia may kalabotan ha pag-asawa.—Basaha an Isaias 48:17, 18.
Pagin Responsable nga Kag-anak
7. Ano an naieksperyensyahan han iba nga batan-on nga mag-asawa ngan kay ano nga nakakatensyon ito ha ira?
7 An iba nga temprano nag-asawa, nagin mga kag-anak na nga batan-on pa. Waray nira makilala hin maopay an usa kag usa antes ipanganak an bata, nga kinahanglan mangnoan hin 24 ka oras kada adlaw. Kon an atensyon han asawa aadto na pirme ha minasus-an, bangin mangabugho an batan-on nga bana. Dugang pa, an kakulang hin pagkaturog tungod ha pagbinantay han bata nakakapaaringit ngan nakakatensyon ha mag-asawa. Tigda nga nasasantop nira nga gutiay na la an ira kagawasan. Yana, diri na hira makakapamasyada ngan makakagbuhat han mga nahihimo nira hadto. Ano an ira magigin pagtagad ha ira nabag-o nga kahimtang?
8. Paonan-o sadang tagdon an pagin kag-anak, ngan kay ano?
8 Sugad la nga kinahanglan an pagin responsable ha pag-asawa, kinahanglan liwat hunahunaon an pagin kag-anak sugad nga hatag han Dios nga responsabilidad ngan pribilehiyo. Anoman nga pagbag-o an himoon han Kristiano nga mag-asawa tungod han pag-abot han bata, kinahanglan buhaton gud nira ito ha responsable nga paagi. Tungod kay ginhatagan ni Jehova an tawo hin kapasidad nga manganak, kinahanglan hunahunaon han mga kag-anak nga “panurundon tumikang kan Jehova” an natatawo pa la nga bata. (Sal. 127:3) Salit nangangalimbasog an Kristiano nga mga kag-anak nga tumanon an ira responsabilidad sugad nga “mga kag-anak ha Ginoo.”—Efe. 6:1.
9. (a) Ano an nahiuupod ha pagpadaku hin bata? (b) Ano an maibubulig han bana basi magpabilin nga marig-on ha espirituwal an iya asawa?
9 An pagpadaku hin anak nagkikinahanglan hin damu ka tuig nga pagsakripisyo ngan daku nga panahon ngan kusog. Kinahanglan masabtan han bana nga pipira ka tuig katapos manganak an iya asawa, posible nga diri na hiya makapamati hin maopay ha mga katirok ngan bangin gutiay na la an iya panahon ha personal nga pag-aram han Biblia ngan pamalandong. Mahimo ini magpaluya han iya relasyon ha Dios. An pagin responsable nga kag-anak nagkikinahanglan nga himoon han bana an ngatanan nga iya maibubulig ha pagmangno ha bata. Mahimo niya igsumat an mga punto nga waray hibatii han iya asawa ha katirok pinaagi han paghisgot hito ha ira balay. Mahimo liwat hiya sumaliwan ha pagbantay han bata basi an iya asawa magkaada higayon ha madasigon nga pagsangyaw han Ginhadian.—Basaha an Filipos 2:3, 4.
10, 11. (a) Paonan-o padadakuon an kabataan uyon ha “paglaygay” ni Jehova? (b) Kay ano nga takos hin kumendasyon an damu nga Kristiano nga kag-anak?
10 An pagin responsable nga kag-anak labaw pa kay ha pagtagana la ha bata hin pagkaon, panapton, urukyan, ngan ha pag-ataman han iya kahimsog. Labi na hinin peligroso nga panahon han kataposan, kinahanglan mahibaroan han mga batan-on tikang ha ira kabata an mga prinsipyo ha moral nga maggigiya ha ira. Sadang hira padakuon uyon ha “pagturon-an ngan paglaygay han Ginoo.” (Efe. 6:4) Ini nga “paglaygay” nag-uupod han pagpasilsil ha hunahuna han bata han mga katutdoan ni Jehova tikang ha iya pagin minasus-an tubtob ha peligroso nga panahon han iya pagin tinedyer.—2 Tim. 3:14, 15.
11 Han magsiring hi Jesus ha iya mga sumurunod nga sadang hira ‘manhimo hin mga tinon-an ha ngatanan nga nasud,’ sigurado nga iginpapasabot niya nga sadang buligan han mga kag-anak an ira mga anak nga magin mga disipulo. (Mat. 28:19, 20) Makuri ito tungod han mga pag-ipit hini nga kalibotan ha mga batan-on. Salit, an mga kag-anak nga naglampos ha pagpadaku ha ira mga anak nga magin dedikado nga Kristiano takos gud han mahigugmaon nga kumendasyon han ngatanan ha kongregasyon. Ira ‘nadaog’ an impluwensya han kalibotan pinaagi han ira pagtoo ngan pagin matinumanon sugad nga responsable nga mga kag-anak.—1 Juan 5:4.
Solo o Waray-Anak Tungod ha Dungganon nga Katuyoan
12. Kay ano nga an pipira nga Kristiano nagpabilin nga solo ha pipira ka panahon?
12 Tungod kay “an panahon ginpahalipot” ngan “an dagway hini nga kalibotan maagi,” an Pulong han Dios nag-aaghat ha aton nga tagdon an mga bentaha han pagin solo. (1 Kor. 7:29-31) Salit, ginpili han iba nga mga Kristiano nga magpabilin nga solo ha bug-os nira nga kinabuhi o waray dayon hira mag-asawa. Makalilipay nga nagpapabilin hira nga solo diri para ha ira hakugnon nga mga interes. Damu an nagbubuhat hito basi mag-alagad kan Jehova nga “waray kalingawan” o nakakaulang. (Basaha an 1 Korinto 7:32-35.) An iba nga solo nga mga Kristiano nag-aalagad sugad nga payunir o Bethelite. Karuyag han iba nga mas magamit pa hira ha organisasyon ni Jehova pinaagi ha pangalimbasog nga magin kwalipikado ha pag-eskwela ha Ministerial Training School. Ha pagkamatuod, adton nag-alagad sugad nga bug-os-panahon nga mga ministro ha pipira ka panahon samtang solo ngan ha urhi nag-asawa, kasagaran nga nagpapahimulos pa gihapon han birilhon nga mga leksyon nga ira nahibaroan han solo pa hira.
13. Kay ano nga an pipira nga Kristiano nga mag-asawa nagdidesisyon nga diri manganak?
13 Ha iba nga bahin han kalibotan, may-ada iba pa nga pagbag-o ha pagpamilya—damu nga mag-asawa an nagdesisyon nga diri manganak. Ito an ginhimo han iba tungod han kakurian ha pinansyal; ngan an iba pa, basi waray makaulang ha ira dagku-an-sweldo nga trabaho. Ha mga Kristiano, may-ada liwat mga mag-asawa nga nadiri pag-anak. Kondi, kasagaran nga ginbubuhat nira ito basi diri hira maulang ha pag-alagad kan Jehova. Diri ini nangangahulogan nga diri hira nagpapahimulos han normal nga kinabuhi han mag-asawa. Nakakapahimulos hira. Kondi, andam hira nga unahon an buruhaton han Ginhadian kay ha mga bendisyon han pag-asawa. (1 Kor. 7:3-5) An pipira ha ira nag-aalagad kan Jehova ngan nagsiserbi ha ira kabugtoan ha pagmangno ha sirkito ngan distrito o ha Bethel. An iba nagpapayunir o nagmimisyonero. Diri hingangalimtan ni Jehova an ira buhat ngan an gugma nga ira iginpapakita tungod han iya ngaran.—Heb. 6:10.
“Kagol-anan ha Unod”
14, 15. Ano nga “kagol-anan ha unod” an mahimo maeksperyensyahan han Kristiano nga mga kag-anak?
14 Hi apostol Pablo nagsumat ha inasaw-an nga mga Kristiano nga magkakaada hira “kagol-anan ha unod.” (1 Kor. 7:28) Mahimo ini mag-upod hin problema tungod ha pagkasakit han mag-asawa ngan han ira mga anak, o pagtikalagas han ira mga kag-anak. Bangin mag-upod liwat ini han mga kakurian ngan kasub-anan may kalabotan ha pagpadaku han ira kabataan. Sugad han ginhisgotan ha tinikangan hini nga artikulo, igintagna han Biblia nga ha “kataposan nga mga adlaw” magkakaada “magpakalilisang nga mga panahon” nga makuri pakibagayan. Usa han mga butang nga makuri pakibagayan amo an mga anak nga “maglaris ha mga ginikanan.”—2 Tim. 3:1-3.
15 An pagpadaku ha kabataan daku gud nga ayat ha Kristiano nga mga kag-anak. Apektado kita han “magpakalilisang nga mga panahon” yana. Salit, an mga kag-anak padayon nga nakikig-away ha makamaratay nga impluwensya ‘hini nga kalibotan’ nga mahimo makaapekto ha ira mga anak. (Efe. 2:2, 3) Ngan usahay diri hira naglalampos! Kon an anak han Kristiano nga pamilya umundang ha pag-alagad kan Jehova, sigurado gud nga “kagol-anan” ito para ha mga kag-anak nga nagtalinguha ha pagpadaku ha iya uyon ha kamatuoran han Dios.—Prob. 17:25.
“Maabot an Daku nga Kagol-anan”
16. Ano nga “kagol-anan” an igintagna ni Jesus?
16 Bisan ano nga “kagol-anan” nga naieksperyensyahan may kalabotan ha pag-asawa ngan pagkaada anak, gutiay gud la ito kon itanding ha usa pa nga kagol-anan nga mas makuri gud. Ha tagna ni Jesus mahitungod han iya presensya ngan han kataposan han sistema, hiya nagsiring: “Maabot an daku nga kagol-anan, sugad nga waray pa mahinabo tikang ha tinikangan han kalibotan tubtob yana, ngan diri [na] gud mahinanabo.” (Mat. 24:3, 21) Ha urhi nagsumat hiya nga may-ada daku nga kadam-an nga maluluwas ha “daku nga kagol-anan.” Kondi, an sistema ni Satanas padayon nga makikig-away ha iya pinakagrabe ngan ultimo nga pag-atake ha mamurayawon nga mga Saksi ni Jehova. Sigurado nga ito nga panahon magigin makuri para ha aton ngatanan—edaran ngan kabataan.
17. (a) Kay ano nga makakasiguro kita han tidaraon? (b) Ano an sadang makaimpluwensya ha aton panhunahuna mahitungod ha pag-asawa ngan pagkaada anak?
17 Bisan pa hito, diri kita sadang mahadlok hinduro ha tidaraon. An mga kag-anak nga matinumanon kan Jehova makakalaom nga pananalipdan hira ngan an ira mga anak. (Basaha an Isaias 26:20, 21; Sep. 2:2, 3; 1 Kor. 7:14) Kondi yana nga hinbaroan naton nga aanhi na kita ha peligroso nga panahon, hinaot maggiya ito ha aton panhunahuna mahitungod han pag-asawa ngan pagkaada anak hinin panahon han kataposan. (2 Ped. 3:10-13) Hito nga paagi, an aton pagkinabuhi—solo man o inasaw-an, may-ada o waray mga anak—magpapasidungog ngan maghahatag kadayawan kan Jehova ngan ha Kristiano nga kongregasyon.
[Mga footnote]
a Kitaa an Sekreto han Kalipayan ha Pamilya, kapitulo 13, ngan An Barantayan, Mayo 1, 2007, p. 19-23.
b Adton may-ada problema ha pag-asawa mapaparig-on pinaagi ha pagrepaso han mga artikulo mahitungod han pag-asawa ha Septyembre 15, 2003, p. 3-7 ngan Marso 1, 2005, p. 15 nga An Barantayan.
c Kitaa an Sekreto han Kalipayan ha Pamilya, kapitulo 2.
Sugad nga Repaso
• Kay ano nga an batan-on nga mga Kristiano diri sadang mag-asawa dayon?
• Ano an nahiuupod ha pagpadaku hin bata?
• Kay ano nga damu nga Kristiano an nagpapabilin nga solo, o kon inasaw-an, waray anak?
• Ano nga “kagol-anan” an bangin maeksperyensyahan han Kristiano nga mga kag-anak?
[Mga Pakiana]
[Retrato ha pahina 17]
Kay ano nga maaramon para ha mga batan-on nga Kristiano nga diri mag-asawa dayon?
[Retrato ha pahina 18]
Daku an maibubulig han bana basi an iya asawa magkaada madasigon nga pakigbahin ha espirituwal nga mga buruhaton
[Retrato ha pahina 19]
Kay ano nga an pipira nga Kristiano nga mag-asawa nagdidesisyon nga diri manganak?