Kon Paonan-o Gin-organisa an Nagmamando nga Lawas

AN Nagmamando nga Lawas han mga Saksi ni Jehova ginkukompwesto hin dedikado nga kalalakin-an nga dinihogan nga mga surugoon han Dios. Hira an representante han matinumanon ngan maaramon nga uripon, nga nagtatagana hin espirituwal nga pagkaon ngan naggigiya ngan nagsisiguro nga prayoridad han mga Saksi ni Jehova an pagsangyaw han Ginhadian ha bug-os nga tuna.—Mat. 24:14, 45-47.

An mga membro han Nagmamando nga Lawas nagkakatirok kada semana, kasagaran ha Mierkoles. Nakakabulig ini ha ira nga magkaurosa ngan magkauruyon ha ira buruhaton. (Sal. 133:1) May buruhaton liwat hira ha magkalain-lain nga komite. Basi maataman an mga buruhaton han Ginhadian, an tagsa nga komite may-ada responsabilidad sugad han iginsasaysay ha masunod nga mga parapo.

◼ COORDINATORS’ COMMITTEE: Ini nga komite ginkukompwesto han koordinetor han tagsa nga komite ngan usa nga sekretaryo nga membro liwat han Nagmamando nga Lawas. Ginsisiguro hini nga an ngatanan nga komite nagtatrabaho hin maopay ngan epektibo. Nagmamangno liwat ini ha dagku nga kasuruk-an, pagtimaraot, kalamidad, ngan iba nga butang nga sadang unahon nga makakabulig ha mga Saksi ni Jehova ha bug-os nga kalibotan.

◼ PERSONNEL COMMITTEE: An mga membro hini nga komite gintaporan ha panginano ha mga kahikayan para ha personal ngan espirituwal nga kaopayan ngan bulig ha mga membro han pamilya han Bethel ha bug-os nga kalibotan. Responsabilidad hini an pagpili ngan pag-imbitar hin bag-o nga mga membro han pamilya han Bethel ngan pagbaton ha mga pakiana mahitungod han ira pag-alagad ha Bethel.

◼ PUBLISHING COMMITTEE: Responsabilidad hini an pag-imprinta, pagpublikar, ngan pagpadara han mga literatura han Biblia ha bug-os nga kalibotan. Nanginginano ini ha mga imprintahan ngan propiedad nga gintatag-iya ngan gindudumara han mga korporasyon nga ginagamit han mga Saksi ni Jehova. Ini nga komite an naghihikay han gimaopayi nga paggamit han mga donasyon para ha buruhaton han Ginhadian ha bug-os nga kalibotan.

◼ SERVICE COMMITTEE: An mga membro hini nga komite nanginginano han pagsangyaw nga buruhaton ngan han mga butang may kalabotan ha mga kongregasyon, payunir, tigurang, ngan nagbibiyahe nga paramangno. Nag-aandam ini han An Aton Ministeryo ha Ginhadian ngan nag-iimbitar hin mga estudyante ha Gilead School ngan ha Ministerial Training School, ngan nagtutoka ha ira katapos han gradwasyon.

◼ TEACHING COMMITTEE: Ini nga komite nanginginano han mga impormasyon nga ipipresentar ha mga asembleya, kombensyon, ngan katirok ha kongregasyon. Naghihikay ini han espirituwal nga mga programa para ha mga membro han pamilya han Bethel ngan nanginginano ha magkalain-lain nga eskwelahan, sugad han Gilead School ngan Pioneer Service School, ngan nag-aandam han audio ngan video nga mga programa.

◼ WRITING COMMITTEE: Responsabilidad hini nga maisurat ngan maimprinta an espirituwal nga pagkaon basi ipublikar ngan ipanaltag ha kabugtoan ngan ha publiko. Binabaton hini an mga pakiana ha Biblia ngan inaaprobahan an mga iskrip han drama ngan outline han mga pahayag. Nagmamangno liwat ini ha buruhaton nga paghubad ha bug-os nga kalibotan.

An kongregasyon han mga dinihogan iginpariho ni apostol Pablo ha lawas han tawo ngan pinabug-atan niya an importante nga buruhaton han ngatanan nga membro ngan an ira pagdepende ha usa kag usa, paghigugmaay, ngan pagbinuligay ha pagtuman han hatag-han-Dios nga buruhaton. (Roma 12:4, 5; 1 Kor. 12:12-31) An Ulo, hi Jesu-Kristo, naghahatag ha mga bahin han lawas han ginkikinahanglan para ha maopay nga pagbinuligay, pagkauruyon, ngan espirituwal nga pagkaon. (Efe. 4:15, 16; Kol. 2:19) Ha sugad hini nga paagi gin-organisa an Nagmamando nga Lawas basi manguna uyon ha giya ni Jehova pinaagi han baraan nga espiritu.