Mag-uswag ha Espirituwal Pinaagi han Pagsunod ha Susbaranan ni Pablo

“Nakig-away ako han maopay nga away, natapos ko an akon pakipagrumba, akon gintipigan an pagtoo.”—2 TIM. 4:7.

1, 2. Ano nga mga pagbag-o ha kinabuhi an ginhimo ni Saulo nga taga-Tarso, ngan ano nga importante nga buruhaton an iya ginkarawat?

 INTELIHENTE ngan determinado hiya. Kondi, ginios hiya uyon ha ‘kairiphon han iya unod.’ (Efe. 2:3) Ha urhi iya iginhulagway an iya kalugaringon sugad nga ‘parapasipara, paratimaraot, ngan parahibang.’ (1 Tim. 1:13) Hiya hi Saulo nga taga-Tarso.

² Inabot an panahon, hi Saulo naghimo hin dagku nga pagbag-o ha iya kinabuhi. Iginsalikway niya an iya daan nga pagkinabuhi ngan nangalimbasog gud nga diri ‘pangitaon an iya kalugaringon nga kaopayan, kondi an kaopayan han kadam-an.’ (1 Kor. 10:33) Nagin malumo ngan mahigugmaon hiya ha mga nagin biktima hadto han iya kangalas. (Basaha an 1 Tesalonika 2:7, 8.) “Nahimo ako nga ministro,” hiya nagsurat, ngan nagdugang: “Ha akon, nga ubos han mga giuubusi ha ngatanan nga mga baraan, ini nga grasya iginhatag, ha pagwali ha mga Hentil han diri sadang matugkad nga mga manggad ni Kristo.”—Efe. 3:7, 8.

3. Ha ano nga paagi makakabulig ha aton an pag-aram ha mga surat ngan rekord han ministeryo ni Pablo?

³ Hi Saulo, nga kilala liwat nga Pablo, nag-uswag  gud hin maopay ha espirituwal. (Buh. 13:9) Basi madagmit an aton pag-uswag ha kamatuoran, an usa nga paagi amo an pag-aram ha mga surat ngan rekord han ministeryo ni Pablo ngan pagsubad han iya pagtoo. (Basaha an 1 Korinto 11:1; Hebreo 13:7.) Aton kitaon kon paonan-o ito magpapagios ha aton nga magkaada maopay nga eskedyol han personal nga pag-aram, mapatubo an sinsero nga gugma ha mga tawo, ngan magkaada husto nga paghunahuna ha kalugaringon.

An Eskedyol han Pag-aram ni Pablo

4, 5. Paonan-o nagpahimulos hi Pablo han personal nga pag-aram?

⁴ Sugad nga Pariseo nga gintutdoan ‘ha tiilan ni Gamaliel, uyon ha sigpit nga Kasugoanan han mga ginikanan,’ hi Pablo may-ada na kahibaro ha Kasuratan. (Buh. 22:1-3; Fil. 3:4-6) Katapos gud han iya bawtismo, ‘kinadto hiya ha Arabia’—posible nga ha Disyerto han Sirya o ha usa nga mamingaw nga lugar ha Peninsula han Arabia nga angayan ha pamalandong. (Gal. 1:17) Matin-aw nga karuyag niya mamalandong han mga teksto nga nagpapamatuod nga hi Jesus an Mesias. Dugang pa, karuyag niya mangandam para ha buruhaton nga ihahatag ha iya. (Basaha an Buhat 9:15, 16, 20, 22.) Nangalimbasog gud hiya ha pagpamalandong han espirituwal nga mga butang.

⁵ An kahibaro ngan hilarom nga pagsabot ni Pablo ha Kasuratan pinaagi han personal nga pag-aram nakabulig ha iya ha epektibo nga pagtutdo han kamatuoran. Pananglitan, ha sinagoga han Antiokia ha Pisidia, direkta nga nagkotar hiya hin lima nga teksto ha Hebreo nga Kasuratan basi pamatud-an nga hi Jesus an Mesias. Damu ka beses liwat nga gin-unabi niya an baraan nga mga sinurat. Makakombinse gud an iya mga pangatadongan tikang ha Biblia salit “damu han mga Judio, ngan han mga nagkakabig nga mga masiningbahon an sinunod kan Pablo ngan kan Bernabe” basi mahibaro hin damu pa. (Buh. 13:14-44) Han kinadto ha urukyan ni Pablo an usa ka grupo han mga Judio ha Roma, iya iginsaysay ha ira an mga impormasyon pinaagi han bug-os nga ‘pagpamatuod mahitungod han ginhadian han Dios ngan kan Jesus tikang ha Kasugoanan ni Moises ngan ha mga Manaragna.’—Buh. 28:17, 22, 23.

6. Ano an nakabulig kan Pablo nga magpabilin nga marig-on kon nag-aantos hin kasakitan?

⁶ Han nag-aantos hi Pablo hin kasakitan, nagpadayon hiya ha pag-aram ha Kasuratan ngan naparig-on hiya han mga mensahe hito. (Heb. 4:12) Samtang priso hiya ha Roma antes hiya patayon, ginhangyo niya hi Timoteo nga dad-on ha iya “an mga basahon” ngan “an mga anit nga mga sinuratan.” (2 Tim. 4:13) Ito nga mga dokumento posible nga bahin han Hebreo nga Kasuratan nga gin-gamit ni Pablo ha maduruto nga pag-aram. Importante gud ha iya an pagkaada kahibaro ha Kasuratan pinaagi han regular nga pag-aram ha Biblia basi makapabilin hiya nga marig-on.

7. Ano an imo mapapahimulsan tikang ha regular nga pag-aram ha Biblia?

⁷ An regular nga pag-aram ha Biblia, upod an may-katuyoan nga pamalandong, mabulig ha aton nga mag-uswag ha espirituwal. (Heb. 5:12-14) Mahitungod ha kapulsanan han Pulong han Dios, an salmista nagkanta: “Maoroopay pa ha akon an balaud han imo baba kay han yinukot-yukot nga bulawan ngan salapi. An imo mga sugo nakapanginaadman ha akon kapin pa kay ha akon mga kaaway; kay ha gihapon bunyog nakon. Gindid-an ko an akon mga tiil ha mga magraot nga dalan, basi ako magbantay han imo pulong.” (Sal. 119:72, 98, 101) May-ada ka ba eskedyol han personal nga pag-aram ha Biblia? Nag-aandam ka ba para ha tidaraon nga mga toka ha pag-alagad ha Dios pinaagi han adlaw-adlaw nga pagbasa han Biblia ngan pamalandong han imo nabasa?

Hi Saulo Nahibaro ha Paghigugma ha mga Tawo

8. Paonan-o gintratar ni Saulo adton diri membro han Judaismo?

⁸ Antes magin Kristiano hi Saulo, aktibo hiya ha iya relihiyon, kondi waray hiya pagtagad ha mga tawo nga diri membro han Judaismo. (Buh. 26:4, 5) May pag-uyon nga iya ginkinita an pagbato kan Esteban han pipira nga Judio. Kombinsido hi Saulo nga husto an iya ginbubuhat tungod kay ha iya paghunahuna takos hi Esteban han sirot nga kamatayon. (Buh. 6:8-14; 7:54–8:1) An  giniyahan nga asoy nasiring: “Ginwakay ni Saulo an singbahan, ngan sinulod hiya ha tagsa nga balay, ngan han pananasa han mga kalalakin-an ngan kababayin-an ipinamutang hira ha bilanggoan.” (Buh. 8:3) Iya “gintimaraot hira tubtob gud ha iba nga mga kaburubungtohan.”—Buh. 26:11.

9. Ano nga eksperyensya ni Saulo an nagpagios ha iya nga pamurubuoton an iya pagtratar ha mga tawo?

⁹ Han an Ginoo nga hi Jesus nagpakita kan Saulo, tipakadto hiya ha Damasko basi timarauton an mga disipulo ni Kristo didto. Tungod han milagroso nga kasilaw han Anak han Dios, nabuta hi Saulo ngan nagkinahanglan han bulig han iba. Ha panahon nga ginsugo ni Jehova hi Ananias nga igpahiuli an pagkita ni Saulo, nabag-o na gud an iya pagtagad ha mga tawo. (Buh. 9:1-30) Han magin sumurunod na hiya ni Kristo, nangalimbasog gud hiya nga subaron an pagtratar ni Jesus ha ngatanan nga tawo. Nangahulogan ini hin pagsalikway han kamadarahog ngan pagin ‘mamurayawon ha ngatanan nga tawo.’—Basaha an Roma 12:17-21.

10, 11. Paonan-o hi Pablo nagpakita hin sinsero nga gugma ha mga tawo?

¹⁰ Hi Pablo waray makontento ha pakigmurayaw la ha iba. Nagpakita hiya hin sinsero nga gugma ha ira, ngan nagkaada hiya higayon para hito pinaagi han Kristiano nga ministeryo. Ha iya siyahan nga pagbiyahe sugad nga misyonero, iginsangyaw niya an maopay nga sumat ha Asia Minor. Bisan pa han duro nga pagkontra, hi Pablo ngan an iya mga kaupod maduruto nga binulig ha mga maaghop nga magin Kristiano. Ginbisita utro nira an Listra ngan Ikonio, bisan kon an mga parakontra didto nangalimbasog pagpatay kan Pablo.—Buh. 13:1-3; 14:1-7, 19-23.

¹¹ Katapos hito, ginpamiling ni Pablo ngan han iya mga kaupod adton naruruyag magin duok ha Dios ha syudad han Filipos ha Masedonia. An Judio nga nakombirte nga hi Lydia namati han pulong ngan nagin Kristiano. Ginkastigo hira Pablo ngan Silas han mga may-awtoridad ngan ginpriso hira. Kondi, nagsangyaw hi Pablo ha gwardya han prisohan, salit hiya ngan an iya pamilya nabawtismohan sugad nga magsiringba ni Jehova.—Buh. 16:11-34.

12. Ano an nagpagios ha waray-kalooy nga hi Saulo nga magin mahigugmaon nga apostol ni Jesu-Kristo?

¹² Kay ano nga ginkarawat han paralutos hadto nga hi Saulo an pagtoo han iya mga biktima? Ano an nagpagios hiton waray-kalooy nga tawo nga magin buotan ngan mahigugmaon nga apostol, nga disidido isakripisyo an iya kinabuhi basi mahibaro an iba han kamatuoran mahitungod ha Dios ngan kan Kristo? Hi Pablo mismo an nagsaysay: “Tungod ha kaburut-on han Dios, . . . iya ako gintawag pinaagi ha iya grasya, ha pagpahayag ha iya Anak dinhi ha akon.” (Gal. 1:15, 16) Hi Pablo nagsurat kan Timoteo: ‘Nakarawat ko an kalooy basi pinaagi ha akon maipakilala ni Jesu-Kristo an iya pagkamapailubon nga susbaranan han mga matoo ha iya ngadto ha kinabuhi nga waray kataposan.’ (1 Tim. 1:16) Ginpasaylo ni Jehova hi Pablo, ngan ha pakakarawat han diri-takos nga pagkabuotan ngan kalooy nagpakita hiya hin gugma ha iba pinaagi ha pagsangyaw ha ira han maopay nga sumat.

13. Ano an sadang magpagios ha aton nga magpakita hin gugma ha iba, ngan paonan-o naton ito bubuhaton?

¹³ Hi Jehova nagpapasaylo liwat han aton mga sala ngan kasaypanan. (Sal. 103:8-14) “Kon imo panginanoon, O Jehova, an mga karat-an, O Ginoo, hin-o pa an matindog?” nagpakiana an salmista. (Sal. 130:3) Kon diri tungod han kalooy han Dios, diri kita malilipay ha sagrado nga  pag-alagad, o makakalaom ha pagkarawat han kinabuhi nga waray kataposan. Daku hinduro an diri-takos nga pagkabuotan han Dios ha aton ngatanan. Salit, pariho kan Pablo, sadang hingyapon naton nga higugmaon an iba pinaagi han pagsangyaw ngan pagtutdo ha ira han kamatuoran, ngan pagparig-on ha aton mga igkasi-tumuroo.—Basaha an Buhat 14:21-23.

14. Paonan-o naton mapapauswag an kalidad han aton pagsangyaw?

¹⁴ Nangalimbasog hi Pablo nga mag-uswag sugad nga parasangyaw han maopay nga sumat, ngan nakabantad han iya kasingkasing an susbaranan ni Jesus. Ha usa nga paagi, ipinakita han Anak han Dios an iya diri-matupngan nga gugma ha mga tawo pinaagi han pagsangyaw. Hi Jesus nagsiring: “An babrion banos, kondi an magbabari talagsa. Busa mag-ampo kamo ha Ginoo han babrion, basi hiya magsugo hin mga magbabari ha iya babrion.” (Mat. 9:35-38) Nagbuhat hi Pablo uyon ha anoman nga bangin ginhangyo niya nga dugang nga magwarali pinaagi ha pagin aktibo ha buruhaton. Kumusta ka man? Mapapauswag mo ba an kalidad han imo pagsangyaw? O madudugangan mo ba an oras han imo pagsangyaw ngan naghihimo pa ngani hin paagi basi makagpayunir? Ipakita naton an sinsero nga gugma ha iba pinaagi han pagbulig ha ira nga kumapot hin marig-on ha “pulong han kinabuhi.”—Fil. 2:16.

An Paghunahuna ni Pablo ha Iya Kalugaringon

15. Paonan-o ginhunahuna ni Pablo an iya kalugaringon kon itanding ha iya mga igkasi-Kristiano?

¹⁵ Sugad nga Kristiano nga ministro, nagpakita hi Pablo hin usa pa nga maopay hinduro nga susbaranan para ha aton. Bisan kon damu an iya pribilehiyo ha kongregasyon, maaram gud hiya nga nakarawat niya ito ngan nagin takos hiya hito diri tungod han iya mga abilidad. Nasabtan niya nga an mga bendisyon ha iya, mga kapahayagan han diri-takos nga pagkabuotan han Dios. Maaram hiya nga an iba nga Kristiano epektibo liwat nga parasangyaw han maopay nga sumat. Bisan pa han iya responsabilidad ha katawohan han Dios, nagpabilin hiya nga mapainubsanon.—Basaha an 1 Korinto 15:9-11.

16. Paonan-o ipinakita ni Pablo an pagpaubos may kalabotan ha isyu han pagturi?

¹⁶ Tagda kon paonan-o ginsulbad ni Pablo an problema nga nahitabo ha syudad han Antiokia ha Sirya. Nagkabahin-bahin an kongregasyon didto tungod ha isyu han pagturi. (Buh. 14:26–15:2) Tungod kay hiya an ginpili ha pagpanguna han pagsangyaw ha diri-turi nga mga Hentil, bangin naghunahuna hiya nga eksperto hiya ha pagtratar ha mga diri-Judio salit kwalipikado gud ha pagsulbad han problema. (Basaha an Galasia 2:8, 9.) Kondi han waray niya masulbad ito, mapainubsanon nga ginsunod niya an mga kahikayan ha pagdaop ha nagmamando nga lawas ha Jerusalem basi paghisgotan ito. Bug-os nga nagkooperar hiya samtang an mga membro hito namati ha ginhisgotan, naghimo hin desisyon, ngan nagpili ha iya nga magin usa han ira mga mensahero. (Buh. 15:22-31) Hito nga paagi nanguna hi Pablo ha ‘pagpasidungog’ ha iya mga igkasi-surugoon.—Roma 12:10b.

17, 18. (a) Ano an inabat ni Pablo para ha kabugtoan ha mga kongregasyon? (b) Ano an iginpapasabot ha aton han nagin reaksyon han mga tigurang ha Efeso han tilakat na hi Pablo?

¹⁷ An mapainubsanon nga hi Pablo waray bumulag ha iya kabugtoan ha mga kongregasyon. Lugod, nagin duok hiya ha ira. Ha kataposan han  iya surat ha mga taga-Roma, ginkumusta niya an sobra 20 ka tawo nga iya ginngaranan. An kadam-an ha ira waray unabiha ha iba nga libro han Kasuratan, ngan gutiay la ha ira an may-ada espesyal nga pribilehiyo. Kondi maunungon hira nga surugoon ni Jehova, ngan hinigugma gud hira ni Pablo.—Roma 16:1-16.

¹⁸ An pagin mapainubsanon ngan makisangkayon ni Pablo nagparig-on ha mga kongregasyon. Katapos han ultimo nga pakigkita niya ha mga tigurang tikang ha Efeso, ira “kinaptan hi Pablo ha liog, ngan hadkan hiya. Ngan nagmasakit hira hin labi tungod han pulong, nga iya ginyakan, nga diri na hira makakita han iya bayhon.” Kon hiya mapahitas-on ngan malabyaw, diri magigin sugad hito an ira reaksyon ha iya pagbaya.—Buh. 20:37, 38.

19. Paonan-o naton ipapakita an “pagpaubos han hunahuna” ha aton pagtratar ha mga igkasi-Kristiano?

¹⁹ An ngatanan nga naruruyag mag-uswag ha espirituwal kinahanglan magin mapainubsanon sugad kan Pablo. Hiya nagsagdon ha mga igkasi-Kristiano nga “diri . . . magbuhat hin bisan ano tikang ha pagkabahinbahin o tungod hin padayaw, kondi ha pagpaubos ha hunahuna an tagsa-tagsa mag-isip han iba nga maoroopay pa ha iya.” (Fil. 2:3) Paonan-o naton masusunod ito? Pinaagi han pagkooperar ha mga tigurang ha kongregasyon, pagsunod han ira giya, ngan pagkarawat han ira mga hudisyal nga desisyon. (Basaha an Hebreo 13:17.) Usa pa nga paagi amo an hitaas nga pagtahod ha ngatanan nga kabugtoan ha pagtoo. An mga kongregasyon han katawohan ni Jehova kasagaran nga ginkukompwesto hin mga tawo nga tikang ha iba-iba nga nasud, kultura, rasa, ngan tribo. Salit, diri ba sadang kita mahibaro nga trataron an ngatanan hin mahigugmaon ngan waray ginpapasulabi, sugad han ginbuhat ni Pablo? (Buh. 17:26; Roma 12:10a) Gin-aaghat kita nga ‘karawaton an usa kag usa, sugad han pagkarawat ni Kristo ha aton, tungod ha himaya han Dios.’—Roma 15:7.

‘Mapailubon nga Dalaganon Naton’ an Rumba ha Kinabuhi

20, 21. Ano an mabulig ha aton basi malampuson nga dalaganon an rumba ha kinabuhi?

²⁰ An kinabuhi han usa nga Kristiano sugad hin hirayo nga rumba. Hi Pablo nagsurat: “Natapos ko an akon pakipagrumba, akon gintipigan an pagtoo. Niyan naghuhulat ha akon an pudongpudong han katadongan, nga ihahatag ha akon hadto nga adlaw, han Ginoo nga Hukom nga matadong; diri la ha akon, kondi ha ngatanan nga naghigugma han iya pagpadayag.”—2 Tim. 4:7, 8.

²¹ An pagsunod ha susbaranan ni Pablo mabulig ha aton nga malampuson nga dalaganon an rumba ha kinabuhi nga waray kataposan. (Heb. 12:1) Labaw ha ngatanan, pangalimbasogan naton nga padayon nga mag-uswag ha espirituwal pinaagi ha pagkaada maopay nga eskedyol hin personal nga pag-aram, pagpatubo hin hilarom nga gugma ha mga tawo, ngan pagpabilin nga mapainubsanon.

Ano an Imo Baton?

• Paonan-o nagpahimulos hi Pablo han regular nga personal nga pag-aram ha Kasuratan?

• Kay ano nga an hilarom nga gugma ha mga tawo ginkikinahanglan ha tinuod nga mga Kristiano?

• Ano nga mga kalidad an mabulig ha imo ha waray-ginpapasulabi nga pagtratar ha iba?

• Paonan-o an susbaranan ni Pablo makakabulig ha imo nga magkooperar ha mga tigurang ha iyo kongregasyon?

[Mga Pakiana]

[Retrato ha pahina 23]

Sugad kan Pablo, mapaparig-on ka han Kasuratan

[Retrato ha pahina 24]

Ipakita an gugma pinaagi ha pagsangyaw han maopay nga sumat ha iba

[Retrato ha pahina 25]

Maaram ka ba kon kay ano nga hinigugma hi Pablo han kabugtoan?