Pangalimbasugi an “Pagkabaraan nga May Kahadlok ha Dios”

HA PAGDAYAW han gihitaasi nga pagkabaraan ni Jehova nga Dios, an Biblia nasiring: “Baraan, baraan, baraan, hi Jehova.” (Isa. 6:3; Pah. 4:8) An Hebreo ngan Griego nga mga pulong para ha “pagkabaraan” nangangahulogan hin kaputli o kalimpyo ha pagtoo ngan pagin waray hugaw. An pagkabaraan han Dios amo an iya pagin hingpit ha moral.

Diri ba an baraan nga Dios nga hi Jehova, naglalaom nga adton nagsisingba ha iya magin baraan—limpyo ha pisikal, moral, ngan espirituwal? Iginpapatin-aw han Biblia nga karuyag ni Jehova nga magin baraan an iya katawohan. Ha 1 Pedro 1:16 aton mababasa: “Magin baraan kamo; kay ako baraan.” Masusubad gud ba han diri-hingpit nga mga tawo an pagkabaraan ni Jehova? Oo, bisan kon diri nira bug-os nga masusubad ito. Tatagdon han Dios nga baraan kita kon singbahon naton hiya ha limpyo nga kahimtang ha espirituwal ngan kon magin duok kita ha iya.

Kon sugad, paonan-o kita makakapabilin nga limpyo ha kalibotan nga mahugaw ha moral? Ano nga mga buhat an sadang naton isalikway? Ano an bangin kinahanglan naton bag-ohon ha pagyakan ngan paggawi? Kitaon naton kon ano an aton mahibabaroan may kalabotan hini sumala ha iginsugo han Dios ha mga Judio nga binalik ha ira natawohan nga tuna tikang ha Babilonya han 537 A.K.P.

‘Magkakaada Dida Dalan ha Kabaraan’

Hi Jehova nagtagna nga an iya katawohan nga bihag ha Babilonya mahibabalik ha ira natawohan nga tuna. An tagna han pagpahiuli nagpasarig: “Maaada dida an usa nga dalan, ngan usa nga aragian, ngan ini tatawgon nga Dalan ha Kabaraan.” (Isa. 35:8a) Ipinapakita hini nga diri la kay inabrihan ni Jehova an dalan para ha mga Judio basi makabalik hira kondi ginpasarig liwat hira nga iya pananalipdan hira ha ira paglakaton.

Para ha mga surugoon ni Jehova ha moderno nga panahon, iya inabrihan an “Dalan ha Kabaraan” basi makagawas hira ha Babilonya nga Daku, an imperyo han palso nga relihiyon ha kalibotan. Han 1919 iya gintalwas an dinihogan nga mga Kristiano tikang ha espirituwal nga pagkauripon ha palso nga relihiyon, ngan an ira pagsingba padayon nga ginlimpyohan nira han ngatanan nga palso nga katutdoan. Sugad nga mga magsiringba ni Jehova yana, nagpapahimulos kita hin limpyo ngan murayaw nga kahimtang ha espirituwal nga tungod hito, nakakagsingba ngan nagkakaada kita mamurayawon nga relasyon ha iya ngan ha aton igkasi-tawo.

 An mga membro han ‘gutiay nga panon’ han dinihogan nga Kristiano ngan an nagtitikadamu nga “daku nga panon” han ‘iba nga mga karnero’ nagpili nga maglakat ha dalan nga baraan ngan nag-aaghat ha iba nga umupod ha ira. (Luk. 12:32; Pah. 7:9; Juan 10:16) An “Dalan ha Kabaraan” abrido ha ngatanan nga disidido ‘maghalad han ira mga lawas sugad han buhi nga halad, putli, naruruyagan han Dios.’—Roma 12:1.

“An mga Mahugaw Diri Maagi Dida Hini”

Han 537 A.K.P., an tibalik nga mga Judio kinahanglan magtuman han importante nga surundon. Mahitungod hadton kwalipikado maglakat ha “Dalan ha Kabaraan,” an Isaias 35:8b nasiring: “An mga mahugaw diri maagi dida hini.” Tungod kay an katuyoan han mga Judio ha pagbalik ha Jerusalem amo an pagpahiuli han putli nga pagsingba, diri kwalipikado adton hakugnon an motibo, waray pagtahod ha sagrado nga mga butang, o mahugaw ha espirituwal. Kinahanglan padayon nga sundon nira an kan Jehova hitaas nga mga prinsipyo ha moral. Adton naghihingyap nga uyonan han Dios yana kinahanglan magtuman liwat hito nga surundon. Kinahanglan pangalimbasogan nira an “pagkabaraan nga may kahadlok ha Dios.” (2 Kor. 7:1, NW) Kon sugad, ano nga maghugaw nga buhat an sadang isalikway naton?

Hi apostol Pablo nagsurat: “Madayag an mga buhat han unod nga amo ini: pakighilawas, kahugawan, kalaw-ayan.” (Gal. 5:19) An pakighilawas o pornikasyon nag-uupod han ngatanan nga seksuwal nga buhat han diri mag-asawa upod na an paggamit han ikinatawo. An kalaw-ayan nangangahulogan hin “pagpatakas; pagpasobra; waray kaawod nga panggawi; malaw-ay nga panggawi.” Matin-aw nga an pornikasyon ngan kalaw-ayan nakontra ha pagkabaraan ni Jehova. Salit, adton padayon nga nagbubuhat hito diri tinutugotan nga magin membro han Kristiano nga kongregasyon o ginpapaiwas tikang hito. Sugad liwat hito an sadang himoon ha mga nagbubuhat hin duro nga kahugawan, nga amo an “ngatanan nga mahugaw ha kahikaw,” o may kahakog.—Efe. 4:19.

An “kahugawan” nag-uupod hin damu nga klase han sala. An Griego nga pulong para hito nagtutudlok ha ngatanan nga klase han kahugaw—ha paggawi, pagyakan, ngan pakig-upod ha mga diri-tumuroo. Nag-uupod ito han maghugaw nga buhat nga bangin diri magkinahanglan hin hudisyal nga aksyon. a Kondi adton nagbubuhat ba han sugad nga kahugaw nangangalimbasog nga magin baraan?

Pananglitan an usa nga Kristiano patago nga nagkikita hin pornograpiya. Samtang hinay-hinay nga napupukaw an iya maghugaw nga hingyap, nagluluya an iya determinasyon nga magpabilin nga limpyo ha paniplatan ni Jehova. An iya paggawi bangin diri pa masisiring nga duro na kahugaw, kondi waray na hiya magpadayon ha paghunahuna la han ‘anoman nga butang nga putli, dungganon, may-ada pagkamaopay, ngan darayawon.’ (Fil. 4:8) An pornograpiya mahugaw ngan nakakadaot gud ha relasyon han usa ha Dios. Anoman nga kahugaw diri ngani sadang unabihon naton.—Efe. 5:3.

Tagda an usa pa nga ehemplo. Pananglitan, nabatasan na han usa nga Kristiano an masturbasyon—tinuyo nga ginpupukaw an iya seksuwal  nga hingyap—pinaagi man han pornograpiya o diri. Bisan kon an pulong nga “masturbasyon” waray ha Biblia, sigurado nga nakakahugaw ito ha hunahuna ngan emosyon. Kon an usa magpapadayon ha pagbuhat hito, diri ba madadaot gud an iya relasyon kan Jehova ngan magigin mahugaw hiya ha Iya paniplatan? Sinsero nga sundon naton an sagdon ni Pablo nga “maglinis kita tikang ha ngatanan nga mga hugaw han unod ngan han espiritu” ngan ‘pakamatyon an aton mga bahin nga tungod ha tuna: pagpakighilawas, pagkamahugaw, pag-abat nga mapaso, maraot nga tinguha, ngan pagkaipa.’—2 Kor. 7:1; Kol. 3:5.

Ini nga kalibotan nga ginmamandoan ni Satanas nakonsinter han mahugaw nga paggawi, igin-aaghat pa ngani ito. Salit, makuri gud an pag-ato ha pagsulay nga buhaton ito. Kondi an tinuod nga mga Kristiano kinahanglan diri “manggawi sugad man han panggawi han mga Hentil, ha kalabyawan han ira hunahuna.” (Efe. 4:17) Tutugotan la kita ni Jehova nga maglakat ha “Dalan ha Kabaraan” kon maglikay kita ha mahugaw nga buhat, patago man ito o dayag.

“Waray Leon nga Mangangada”

Basi uyonan han baraan nga Dios nga hi Jehova, an iba bangin kinahanglan maghimo hin dagku nga pagbag-o ha paggawi ngan pagyakan. An Isaias 35:9 nasiring: “Waray leon nga mangangada, o waray man bisan ano nga hamas nga mananap nga makada dida,” ha amo nga “Dalan ha Kabaraan.” Ha simboliko nga pagkayakan, an mga tawo nga madarahog ngan mapintas ha buhat ngan pagyakan iginpariho ha magbangis nga hayop. Waray gud hira lugar ha matadong nga bag-o nga kalibotan han Dios. (Isa. 11:6; 65:25) Salit, importante gud nga bayaan hadton naghihingyap han pag-uyon han Dios an sugad nga hayupnon nga mga kinaiya ngan pangalimbasogan nga magin baraan.

“An ngatanan nga kapaitan, ngan kangalas, ngan kasina, ngan pagbusa, ngan paglibak ngan an ngatanan nga maraot ipahirayo ha iyo,” nagsasagdon ha aton an Kasuratan. (Efe. 4:31) Ha Kolosas 3:8 aton mababasa: “Bumulag man kamo hini ngatanan: an kasina, an kapungot, an pagkamaraot, an paglibak, an maglaw-ay nga mga pulong ha iyo baba.” An pulong nga “paglibak” nga gin-gamit dinhi ha duha nga teksto nangangahulogan hin nakakadaot, nakakaminos, o nagpapasipara nga istorya.

Yana, an nakakasakit ngan maglaw-ay nga pulong kalyap na gud bisan ha panimalay. An mga mag-asawa nagyayakan hin nakakainsulto, nakakasakit, o nakakatamay ha usa kag usa ngan ha ira mga anak. Ini nga klase hin mga pulong diri sadang mabatian ha panimalay han mga Kristiano.—1 Kor. 5:11.

An Pangalimbasog han “Pagkabaraan nga May Kahadlok ha Dios”—Usa nga Bendisyon!

Daku gud nga pribilehiyo an pag-alagad ha baraan nga Dios, hi Jehova! (Jos. 24:19) Presyoso hinduro an espirituwal nga paraiso diin gindara kita ni Jehova. Salit, an aton pagpadayon ha baraan nga paggawi ha paniplatan ni Jehova amo an gimaopayi nga paagi han pagkinabuhi.

Diri mag-iiha, matutuman na an iginsaad han Dios nga Paraiso nga tuna. (Isa. 35:1, 2, 5-7) Adton naghihingyap hito ngan padayon nga nangangalimbasog han diosnon nga paggawi bibendisyonan hin lugar didto. (Isa. 65:17, 21) Salit, magpadayon gud kita ha pagsingba ha Dios nga may limpyo nga kahimtang ha espirituwal ngan magtipig hin duok nga relasyon ha iya.

[Footnote]

[Retrato ha pahina 26]

Ano an ginkinahanglan ha mga Judio basi makaglakat ha “Dalan han Kabaraan”?

[Retrato ha pahina 27]

Gindadaot han pornograpiya an relasyon han usa kan Jehova

[Retrato ha pahina 28]

‘An ngatanan nga pagbusa ngan paglibak ipahirayo ha iyo’