Paonan-o Naton Sadang Trataron an Iba?

“Sugad han iyo karuyag, nga buhaton ha iyo han mga tawo, buhata man ha ira an sugad.”—LUK. 6:31.

1, 2. (a) Ano an Sermon ha Bukid? (b) Ano an paghihisgotan naton hini nga artikulo ngan ha masunod?

 HI Jesu-Kristo gud an Bantogan nga Magturutdo. Han an mga lider han relihiyon nga nakontra ha iya nagsugo hin mga sundalo basi arestuhon hiya, waray nira hiya arestoha ngan hira nagsiring: “Waray pa tawo nga nagyakan sugad hini.” (Juan 7:32, 45, 46) An Sermon ha Bukid usa han maopay hinduro nga mga diskurso ni Jesus. Iginrekord ito ha kapitulo 5 tubtob 7 han Ebanghelyo ni Mateo, ngan haros pariho liwat hito an mababasa ha Lukas 6:20-49. a

² Posible nga an popular gud nga puplunganon hito nga sermon amo an tinatawag nga Bulawanon nga Surundon. May kalabotan ito ha paagi han pagtratar naton ha iba. “Sugad han iyo karuyag, nga buhaton ha iyo han mga tawo, buhata man ha ira an sugad,” siring ni Jesus. (Luk. 6:31) Ngan mag-opay gud an iya ginbuhat ha mga tawo! Iya gintambal an magsakit ngan ginbanhaw pa ngani an mga patay. Kondi, nagpahimulos hira labi na han ginkarawat nira an maopay nga sumat nga iya igintutdo ha ira. (Basaha an Lukas 7:20-22.) Sugad nga mga Saksi ni Jehova, nalilipay kita makigbahin ha pariho hito nga buruhaton nga pagsangyaw han Ginhadian. (Mat. 24:14; 28:19, 20) Hini nga artikulo ngan ha masunod, aton paghihisgotan an ginsiring ni Jesus mahitungod hini nga buruhaton ngan an iba nga punto ha Sermon ha Bukid nga nagsasaysay kon paonan-o naton sadang trataron an iba.

Magin Maaghop

 3. Ano an kahulogan han kaaghop?

³ Hi Jesus nagsiring: “Bulahan an mga maaghop, kay hira makakapanunod han tuna.” (Mat. 5:5) Ha Kasuratan, an kaaghop diri usa nga kaluyahan. Pagkamalumo ito nga aton ipinapakita sugad nga pagsunod ha mga kasugoanan han Dios. Ini nga paggawi makikita ha aton pagtratar ha igkasi-tawo. Pananglitan, diri kita nabulos hin “maraot ha maraot.”—Roma 12:17-19.

 4. Kay ano nga malipayon an mga maaghop?

⁴ Malipayon an mga maaghop tungod kay “hira makakapanunod han tuna.” Hi Jesus, nga “maaghop ngan mapainubsanon ha kasingkasing,” amo an ‘ginpili nga manurunod han ngatanan nga butang.’ Kon sugad, hiya an nangunguna nga Manurunod han tuna. (Mat. 11:29; Heb. 1:2; Sal. 2:8) Igintagna nga an Mesias nga “anak han tawo” magkakaada kaupod nga mga magmarando ha langitnon nga Ginhadian. (Dan. 7:13, 14, 21, 22, 27) Sugad nga “mga manurunod upod ni Kristo,” an maaghop nga 144,000 nga dinihogan magigin iya igkasi-manurunod han tuna. (Roma 8:16, 17; Pah. 14:1) An iba nga mga maaghop bibendisyonan hin kinabuhi nga waray kataposan ha tuna ilarom han Ginhadian.—Sal. 37:11.

 5. Kon maaghop kita pariho kan Jesus, ano an maibubulig hito ha aton?

⁵ Kon magigin mapintas kita, posible nga diri makig-upod ha aton an iba ngan maglikay hira ha aton. Kondi kon maaghop kita pariho kan Jesus, magigin makaruruyag ngan makaparig-on kita ha aton mga kakongregasyon. An kaaghop usa han mga bunga han aktibo nga pwersa han Dios nga nagtutubo ha aton kon ‘mag-ukoy kita ngan manggawi’ uyon ha espiritu. (Basaha an Galasia 5:22-25.) Syempre karuyag gud naton nga magin usa han mga maaghop nga ginigiyahan han baraan nga espiritu ni Jehova!

 Malipayon Gud an Maloloy-on!

 6. Ano an mag-opay hinduro nga kalidad han “mga maloloy-on”?

⁶ Ha Sermon ha Bukid, hi Jesus nagsiring: “Bulahan [“Malipayon,” NW] an mga maloloy-on kay hira makakakarawat hin kalooy.” (Mat. 5:7) “An mga maloloy-on” may-ada pagpaid ngan mahigugmaon nga konsiderasyon ha mga pobre. Milagroso nga ginpagaan ni Jesus an ira pag-antos tungod kay “nalooy” hiya ha ira. (Mat. 14:14; 20:34) Salit an kalooy ngan konsiderasyon sadang magpagios ha aton nga buligan an iba.—Jak. 2:13.

 7. Tungod kay nalooy hi Jesus, ano an iya ginbuhat?

⁷ Han gintapo hi Jesus han damu hinduro nga tawo han tipakadto hiya ha pagpahuway, “hiya nalooy ha ira, kay sugad hin mga karnero hira nga waray magbarantay.” Salit, “nagtikang hiya hin pagpanutdo ha ira hin damu nga mga bagay.” (Mar. 6:34) Sugad man, nalilipay gud kita kon iginsusumat naton ha iba an mensahe han Ginhadian ngan an daku nga kalooy han Dios!

 8. Kay ano nga malipayon an mga maloloy-on?

⁸ Malipayon an mga maloloy-on tungod kay hira “makakakarawat hin kalooy.” Kon maloloy-on kita ha mga tawo, kasagaran nga nalolooy liwat hira ha aton. (Luk. 6:38) Dugang pa, hi Jesus nagsiring: “Kon kamo magpasaylo han mga tawo han ira mga kasaypanan, an iyo Amay, nga aadto ha langit, mapasaylo man han iyo mga kasaypanan.” (Mat. 6:14) Adton maloloy-on la an malipayon tungod kay pasasayloon hira han ira mga sala ngan uuyonan han Dios.

Kon Kay Ano nga Malipayon “an mga Makigdaiton”

 9. Paonan-o kita magios kon makimurayawon kita?

⁹ Ha pag-unabi ni Jesus han usa pa nga hinungdan han kalipay, hiya nagsiring: “Bulahan an mga makigdaiton, kay hira pagngangaranan nga mga anak han Dios.” (Mat. 5:9) An Griego nga pulong nga iginhubad dinhi nga “makigdaiton” literal nga nangangahulogan hin “makimurayawon.” Kon makimurayawon kita, diri kita makonsinter o makikigbahin ha bisan ano nga ‘nakakapagburublag han magsarangkay,’ sugad han nagpapakaraot nga iristorya. (Prob. 16:28) Ha pulong ngan ha buhat, padayon nga makikigmurayaw kita ha mga tawo ha sulod ngan ha gawas han Kristiano nga kongregasyon. (Heb. 12:14) Bubuhaton naton an bug-os nga mahihimo naton labi na gud ha pakigmurayaw kan Jehova nga Dios.—Basaha an 1 Pedro 3:10-12.

10. Kay ano nga malipayon “an mga makigdaiton”?

¹⁰ Hi Jesus nagsiring nga malipayon “an mga makigdaiton, kay hira pagngangaranan nga mga anak han Dios.” Tungod ha pagpakita han mga dinihogan hin pagtoo kan Jesus sugad nga Mesias, nakarawat nira an “gahum basi nga mahimo hira nga mga anak han Dios.” (Juan 1:12; 1 Ped. 2:24) Kumusta man an makimurayawon nga ‘iba nga mga karnero’? Ira magigin ‘Amay ha Kadayonan’ hi Jesus durante han iya Usa ka Yukot ka Tuig nga Pagmando upod an iya mga igkasi-manurunod ha langit. (Juan 10:14, 16; Isa. 9:6; Pah. 20:6) Ha kataposan han iya Milenyo nga Pagmando, an sugad nga mga makimurayawon magigin mga anak han Dios ha tuna.—1 Kor. 15:27, 28.

11. Paonan-o naton tatrataron an iba kon magpagiya kita han “kinaadman nga tikang ha kahitas-an”?

¹¹ Basi magpahimulos hin duok nga relasyon kan Jehova, “an Dios han kamurayaw,” kinahanglan subaron naton an iya mga kalidad upod na an pagin mamurayawon. (Fil. 4:9) Kon magpagiya kita ha “kinaadman nga tikang ha kahitas-an,” tatrataron naton an iba ha mamurayawon  nga paagi. (Jak. 3:17) Oo, magigin malipayon kita ha pagin makimurayawon.

“Iglawag Niyo an Iyo mga Suga”

12. (a) Ano an ginsiring ni Jesus mahitungod han espirituwal nga kahayag? (b) Paonan-o naton maipapasanag an aton kalamrag?

¹² Gintatratar naton an mga tawo ha gimaopayi nga paagi kon binubuligan naton hira nga makarawat an kahayag han espirituwal nga kamatuoran tikang ha Dios. (Sal. 43:3) Ginsumatan ni Jesus an iya mga disipulo nga hira “an kalamrag han kalibotan” ngan iya ginsagda hira nga ipasanag ito basi makita han mga tawo an ira “mag-opay nga buhat.” Magriresulta ini hin pagpahayag han kamatuoran “ha atubangan han mga tawo,” o ha kaopayan han katawohan. (Basaha an Mateo 5:14-16.) Yana, iginpapasanag naton an kalamrag pinaagi han pagbuhat hin maopay ha aton mga igkasi-tawo ngan pagsangyaw han maopay nga sumat “ha bug-os nga kalibotan,” o “ha ngatanan nga mga nasud.” (Mat. 26:13; Mar. 13:10) Daku gud nga pribilehiyo an aton pagbuhat hini!

13. Nakikilala kita tungod han ano?

¹³ “An bungto nga nahimutang ha bawbaw han bukid diri matatago,” siring ni Jesus. Makikita dayon an bisan ano nga syudad ha bukid. Ha pariho nga paagi, nakikilala kita tungod han aton mag-opay nga buhat sugad nga mga parasamwak han Ginhadian ngan han mga kalidad sugad han pagkamakatadunganon ngan kaputli.—Tito 2:1-14.

14. (a) Paonan-o mo ihuhulagway an mga lampara ha siyahan nga siglo? (b) Kay ano nga diri naton gintatago an aton espirituwal nga suga ha sulod han “banga”?

¹⁴ Hi Jesus naghisgot mahitungod han pagdagkot hin lampara ngan pagbutang hito, diri ha sulod han banga, kondi ha burutangan han lampara basi makalamrag ha bug-os nga balay. Ha siyahan nga siglo, komon an lampara nga hinimo ha galot nga may pabilo ngan lana han olibo basi padayon nga maglaga. Kasagaran nga an burutangan hito hinimo ha kahoy o metal, ngan ito “makakalamrag ha ngatanan ha balay.” An mga tawo diri magdadagkot hin lampara ngan ibutang ito ha sulod han “banga”—daku nga surudlan nga an kapasidad mga 9 ka litro. Diri karuyag ni Jesus nga tagoon han iya mga disipulo an ira espirituwal nga suga ha sulod han simboliko nga banga. Salit sadang naton ipasanag an aton kalamrag, ngan diri gud tagoon o hilumon an kamatuoran tikang ha Kasuratan tungod han pagkontra o paglutos.

15. Paonan-o nakakaapekto ha iba an aton “mag-opay nga buhat”?

¹⁵ Katapos unabihon ni Jesus an malamrag nga lampara, hiya nagsiring ha iya mga disipulo: “Sugad man hini iglawag niyo an iyo mga suga ha atubangan han mga tawo, basi hira kumita han iyo mga mag-opay nga buhat, ngan maghimaya hira ha iyo Amay nga aadto ha langit.” Tungod han aton “mag-opay nga buhat,” an iba ‘naghihimaya’ ha Dios pinaagi han ira pagin surugoon niya. Nagdadasig gud ito ha aton nga magpadayon nga nasanag ‘sugad nga mga kalamrag han kalibotan’!—Fil. 2:15.

16. Ano an ginkikinahanglan ha aton sugad nga mga “kalamrag han kalibotan”?

¹⁶ Sugad nga mga “kalamrag han kalibotan,” kinahanglan magin aktibo kita ha pagsangyaw han Ginhadian ngan paghimo hin mga disipulo. Kondi may-ada pa usa nga ginkikinahanglan ha aton. “Manggawi kamo sugad ha  mga anak han kalamragan. Kay an bunga han kalamrag aada ha ngatanan nga kaopayan ngan katadongan, ngan kamatuoran,” nagsurat hi apostol Pablo. (Efe. 5:8, 9) Kinahanglan magin susbaranan kita han diosnon nga paggawi. Oo, kinahanglan sundon naton an sagdon ni apostol Pedro: “Manggawi kamo hin maopay ha butnga han mga Hentil, nga, bisan kon naglilibak hira ha iyo nga baga magburuhat kamo hin maraot, ha pagtan-aw ha iyo mga mag-opay nga mga binuhatan, ira unta paghimayaon an Dios ha adlaw ha pagduaw.” (1 Ped. 2:12) Kondi ano an sadang buhaton kon nadaot an relasyon han mga tumuroo?

‘Makighiuli ha Imo Bugto’

17-19. (a) Ano an “halad” nga gin-unabi ha Mateo 5:23, 24? (b) Mationan-o kaimportante an pakighiuli ha usa nga bugto, ngan paonan-o ini iginpatin-aw ni Jesus?

¹⁷ Ha Sermon ha Bukid, hi Jesus nagpahamangno ha iya mga disipulo nga diri magtipig hin kasina ngan kangalas ha usa nga bugto. Lugod, kinahanglan makigmurayaw dayon hira. (Basaha an Mateo 5:21-25.) Hunahunaa hin maopay ini nga sagdon ni Jesus. Kon maghahalad ka ha halaran ngan didto nahinumdoman mo nga an imo bugto may-ada reklamo ha imo, ano an imo bubuhaton? Kinahanglan bayaan mo anay an imo halad ha halaran ngan makighiuli ha iya. Katapos hito, mahimo ka na bumalik ngan maghalad.

¹⁸ An “halad” agsob nga usa nga regalo nga mahimo ihalad ha templo ni Jehova. Importante hinduro an paghalad hin mga hayop tungod kay iginsugo ito ni Jehova sugad nga bahin han pagsingba han Israel ilarom han Mosaiko nga Balaud. Kondi kon mahinumdoman mo nga an imo bugto may-ada reklamo ha imo, an pagsulbad hito mas importante gud kay han imo paghalad. “Bayai didto an imo halad ha atubangan han halaran, ngan lakat,” siring ni Jesus. “Pakighiuli siyahan ha imo bugto, ngan niyan balik, ngan paghalad han imo halad.” Importante an pakighiuli ha usa nga bugto antes tumanon an obligasyon nga ginkikinahanglan ha Balaud.

¹⁹ Hi Jesus waray maghisgot hin partikular nga halad ngan espisipiko nga kasaypanan. Kon sugad, kinahanglan nga diri anay maghalad hin bisan ano an usa kon mahinumdoman niya nga an iya bugto may-ada reklamo ha iya. Kon buhi nga hayop an halad, babayaan ito ha “atubangan han halaran” para ha sinunog nga halad ha bungsaran han mga saserdote ha templo. Kon masulbad na an problema, mabalik an nakasala ngan maghahalad.

20. Kay ano nga sadang kita makighiuli dayon ha usa nga bugto kon nasisina kita ha iya?

²⁰ Ha panhunahuna han Dios, an aton relasyon ha aton kabugtoan importante nga bahin han tinuod nga pagsingba. An mga halad nga hayop waray bili kan Jehova kon adton naghahalad hito maraot an pagtratar ha ira igkasi-tawo. (Mika 6:6-8) Salit, ginsagda ni Jesus an iya mga disipulo nga makighiuli dayon. (Mat. 5:25) Haros pariho  hito an iginsurat ni Pablo: “Kasina, kondi ayaw pakasala: diri katunoran han adlaw an iyo kasina: Diri niyo tagan hin lugar an Yawa.” (Efe. 4:26, 27) Kon may-ada kita husto nga hinungdan han kasina, sadang naton sulbaron dayon ito basi diri kita magpabilin nga nasisina ngan makahatag hin higayon ha Yawa ha pagsulay ha aton.—Luk. 17:3, 4.

Tahora Pirme an Iba

21, 22. (a) Paonan-o naton maiaaplikar an sagdon ni Jesus nga aton pa la ginhisgotan? (b) Ano an paghihisgotan naton ha masunod nga artikulo?

²¹ An aton pagrepaso ha pipira nga ginsiring ni Jesus ha Sermon ha Bukid makakabulig ha aton nga magin buotan ngan matinalahuron ha iba. Bisan kon kita ngatanan diri-hingpit, maiaaplikar naton an sagdon ni Jesus tungod kay hiya ngan an aton langitnon nga Amay diri naglalaom hin labaw han aton mahihimo. Pinaagi ha pag-ampo, sinsero nga pangalimbasog, ngan bulig ni Jehova nga Dios, magigin maaghop, maloloy-on, ngan mamurayawon kita. Maipapasanag naton an espirituwal nga kahayag nga naglalamrag para ha himaya ni Jehova. Dugang pa, makikigmurayaw kita ha aton bugto kon kinahanglanon ito.

²² Basi karawaton ni Jehova an aton pagsingba, tatrataron naton hin maopay an aton igkasi-tawo. (Mar. 12:31) Ha masunod nga artikulo, aton paghihisgotan an iba pa nga punto ha Sermon ha Bukid nga makakabulig ha aton nga magpadayon ha pagbuhat han maopay ha iba. Kondi, katapos pamalandungon an gin-unabi na nga mga punto ha maopay hinduro nga diskurso ni Jesus, mahimo naton pakianhan an aton kalugaringon, ‘Paonan-o ko gud ba gintatratar an iba?’

[Footnote]

Ano an Imo Baton?

• Ano an kahulogan han pagin maaghop?

• Kay ano nga malipayon “an mga maloloy-on”?

• Paonan-o naton maipapasanag an aton kalamrag?

• Kay ano nga sadang kita ‘makighiuli dayon ha aton bugto’?

[Mga Pakiana]

[Retrato ha pahina 4]

An pagsangyaw han mensahe han Ginhadian importante nga paagi ha pagpasanag han aton kalamrag

[Retrato ha pahina 5]

An mga Kristiano kinahanglan magin susbaranan han diosnon nga paggawi

[Retrato ha pahina 6]

Buhata an imo mahihimo ha pakigmurayaw ha imo bugto