Samtang Batan-on Ka, Pilia an Pag-alagad kan Jehova

“Pagrig-on ha mga bagay nga imo gintuton-an, ngan iginpatapod ha imo.”—2 TIM. 3:14.

1. Ano an pagtagad ni Jehova ha pag-alagad ha iya han batan-on nga mga Saksi?

 AN SAGRADO nga pag-alagad han mga batan-on importante gud kan Jehova salit nagtagna hiya mahitungod ha ira. “An imo katawohan naghahalad hira ngahaw hin maopay nga kaburut-on ha adlaw han imo kagamhanan,” nagkanta an salmista. “Upod an rayandayan han ira kabaraan: sugad hin tun-og nga tikang ha butnga han kaagahon amo man may-ada ha imo an tun-og han imo kabatan-on.” (Sal. 110:3) Oo, presyoso gud kan Jehova an mga batan-on nga disidido mag-alagad ha iya.

2. Ano nga impluwensya an inaatubang han mga batan-on yana may kalabotan ha ira tidaraon?

² Mga batan-on ha kongregasyon, nagdedikar na ba kamo kan Jehova? Bangin damu an nakukurian pagdesisyon ha pag-alagad ha matuod nga Dios. Gin-aaghat hira han malampuson nga mga negosyante, magturutdo, ngan usahay kapamilya ngan kasangkayan nga kab-uton an materyalistiko nga mga tumong. Kon ginkakab-ot nira an espirituwal nga mga tumong, agsob nga gintatamay hira han iba. Kondi ha pagkamatuod, an pag-alagad ha matuod nga Dios amo an gimaopayi nga paagi han pagkinabuhi nga sadang niyo kab-uton. (Sal. 27:4) May kalabotan hini, tagda an tulo nga pakiana: Kay ano nga sadang ka mag-alagad ha Dios? Paonan-o ka maglalampos ha pagkinabuhi uyon ha dedikasyon ha Dios anoman an sidngon o buhaton han iba ha imo? Ano nga mag-opay nga pribilehiyo han sagrado nga pag-alagad an abrido para ha imo?

An Pag-alagad kan Jehova Amo an Husto nga Buhaton

3. Paonan-o sadang makaapekto ha aton an mga linarang ni Jehova?

³ Kay ano nga sadang ka mag-alagad ha matuod ngan buhi nga Dios? Iginsasaysay han Pahayag 4:11 an nangunguna nga hinungdan: “Aton Ginoo, ngan aton Dios, takos ikaw ha pagkarawat han himaya, ngan han dungog ngan han gahum: kay ikaw an nagbuhat han ngatanan nga mga bagay, ngan tungod ha imo kaburut-on nagkahihimo, ngan pinanmuhat hira.” Hi Jehova an gamhanan nga Maglalarang han ngatanan nga butang. Makaruruyag gud an tuna! An kakahoyan, mga bukad, hayop, kadagatan, kabukiran, busay—ngatanan ginlarang ni Jehova. “An tuna puno han . . . mga manggad [han Dios],” nasiring an Salmo 104:24. Mapasalamaton gud kita nga mahigugmaon nga ginhatagan kita ni Jehova hin lawas ngan hunahuna nga tungod hito nagpapahimulos kita han tuna ngan han mga butang dida hito! Diri ba an aton kinasingkasing nga apresasyon ha urusahon nga mga linarang sadang magpagios ha aton nga mag-alagad ha iya?

4, 5. Ano an ginbuhat ni Jehova nga nagpagios kan Josue nga magin duok ha Iya?

⁴ Usa pa nga rason ha pag-alagad kan Jehova amo an ginsiring ni Josue nga lider han mga Israelita. Han hirani na hiya mamatay, nagsiring hiya ha katawohan han Dios: “Maaram kamo ha ngatanan niyo nga mga kasingkasing ngan ha ngatanan niyo nga mga kalag, nga waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo.” Kay ano nga nakasiring hiya hito?—Jos. 23:14.

⁵ Sugad nga bata nga nagtubo ha Ehipto, sigurado nga hinbaroan ni Josue an saad ni Jehova nga hahatagan hin kalugaringon nga tuna an mga Israelita. (Gen. 12:7; 50:24, 25; Eks. 3:8) Katapos, nakita niya nga gintutuman na ni Jehova an Iya saad pinaagi ha pagpadapat han Napulo nga Peste ha Ehipto ngan pagpirit ha matig-a nga hi Paraon nga palakton an mga Israelita. Usa hi Josue han mga ginluwas ha Dagat nga Pula, ngan nakita niya nga nagkalumos hira Paraon  ngan an iya kasundalohan. Durante han ira maiha nga paglakaton ha “daku ngan makalilisang nga kamingawan” ha Disyerto han Sinai, nakita niya kon paonan-o hira gintagan ni Jehova han ngatanan nga ira kinahanglanon. Waray bisan usa nga namatay ha uhaw o gutom. (Deut. 8:3-5, 14-16; Jos. 24:5-7) Han inabot an panahon nga kinahanglan sakupon na nira an gamhanan nga mga nasud han Kanaan ngan umukoy ha Tuna nga Iginsaad, nakita niya nga ginsuportahan gud hira han Dios nga ginsisingba niya ngan han iba nga Israelita.—Jos. 10:14, 42.

6. Ano an mabulig ha imo nga makultibar an hingyap nga mag-alagad ha Dios?

⁶ Maaram hi Josue nga gintuman ni Jehova an Iya mga saad. Salit, hiya nagsiring: “Ha akon ngan ha akon panimalay, mag-aalagad kami kan Jehova.” (Jos. 24:15) Kumusta ka man? Kon ginhuhunahuna mo an mga saad han matuod nga Dios nga natuman na ngan adton waray pa matuman, naghihingyap ka ba nga mag-alagad ha iya sugad kan Josue?

7. Kay ano nga importante nga desisyon an pagpabawtismo ha tubig?

⁷ An pagpamalandong ha mga linarang ni Jehova ngan ha iya urusahon ngan masasarigan gud nga mga saad, diri la sadang magpagios ha imo nga magdedikar ha Iya kondi simbolohan liwat ito hin bawtismo ha tubig. An bawtismo importante nga desisyon nga sadang himoon hadton naruruyag mag-alagad ha Dios. Iginpakita ini han aton Susbaranan, hi Jesus. Antes hiya magtikang ha iya buruhaton sugad nga Mesias, nagpakadto hiya kan Juan nga Parabaptis basi magpabawtismo. Kay ano nga ginbuhat ito ni Jesus? “Ako nakanhi tikang ha langit, diri pagbuhat han akon kalugaringon nga kaburut-on, kondi an kaburut-on han nagpakanhi ha akon,” nagsiring hiya ha urhi. (Juan 6:38) Basi ipakita nga iginpresentar niya an iya kalugaringon ha pagbuhat han kaburut-on han iya Amay, nagpabawtismo hiya.—Mat. 3:13-17.

8. Kay ano nga ginpili ni Timoteo nga mag-alagad ha Dios, ngan ano an bangin kinahanglan mo buhaton?

⁸ Tagda liwat an kahimtang ni Timoteo, usa nga batan-on nga Kristiano nga pag-abot han panahon ginhatagan ni Jehova hin damu nga buruhaton ngan pribilehiyo. Kay ano nga nagdesisyon hiya nga magsingba ha matuod nga Dios? An Biblia nagsusumat ha aton nga iya hinbaroan an mga butang nga iya ‘ginton-an ngan iginpatapod [‘nakakombinse,’ NW] ha iya.’ (2 Tim. 3:14) Kon nag-aaram ka han Pulong han Dios ngan nakombinse nga kamatuoran an igintututdo hito, pariho an imo kahimtang kan Timoteo. Yana, kinahanglan ka magdesisyon. Kay ano nga diri ka makiistorya ha imo mga kag-anak mahitungod han imo karuyag buhaton? Makakabulig hira ngan an mga tigurang nga masabtan mo an mga ginkikinahanglan ha Kasuratan para ha bawtismo.—Basaha an Buhat 8:12.

9. Ano an magigin reaksyon han iba kon magpabawtismo ka?

⁹ Kon magpabawtismo ka, maopay ini nga tinikangan ha pag-alagad ha matuod nga Dios. Pinaagi hini, naapi ka ha hirayo nga rumba, nga an premyo amo an kinabuhi nga waray kataposan ngan an kalipay yana tungod ha pagbuhat han kaburut-on han Dios. (Heb. 12:2, 3) Mapapalipay mo liwat an imo mga kapamilya nga kaapi na ha rumba ngan an imo kasangkayan ha kongregasyon. Labaw ha ngatanan, mapapalipay mo hi Jehova. (Basaha an Proberbios 23:15.) Oo, bangin diri masabtan han iba kon kay ano nga ginpili mo nga singbahon hi Jehova, ngan bangin hunahunaon nira nga sayop an imo desisyon. Bangin kontrahon ka pa ngani nira. Kondi, malalamposan mo ini nga mga pagsari.

 Kon Pakianhan o Kontrahon Ka han Iba

10, 11. (a) Ano an bangin igpakiana ha imo han mga tawo mahitungod han imo desisyon nga mag-alagad ha Dios? (b) Ano an imo hibabaroan ha paagi han pagbaton ni Jesus ha mga pakiana mahitungod han tinuod nga pagsingba?

¹⁰ Bangin mahipausa an imo mga kaeskwela, amyaw, ngan paryente ha imo desisyon nga mag-alagad kan Jehova. Posible nga magpakiana hira kon kay ano nga ito an imo ginpili ngan kon ano an imo gintotoohan. Paonan-o ka mabaton? Syempre, kinahanglan usisahon mo an imo hunahuna ngan inaabat basi maisaysay mo an imo mga rason. Ngan kon nabaton ka ha mga pakiana mahitungod han imo gintotoohan, hi Jesus an gimaopayi nga susbaranan nga mahimo mo sundon.

¹¹ Han ginpakianhan hi Jesus han Judio nga mga lider han relihiyon mahitungod han pagkabanhaw, iya iginpatin-aw ha ira an teksto nga waray nira tagda. (Eks. 3:6; Mat. 22:23, 31-33) Han an usa nga eskriba nagpakiana ha iya kon ano an gidadakui nga sugo, iya ginkotar an angayan nga teksto ha Biblia. Nagpasalamat ito nga tawo ha iya. (Leb. 19:18; Deut. 6:5; Mar. 12:28-34) Tungod han paggamit ni Jesus han Kasuratan ngan han iya paagi han pagyakan, ‘nagkabahin-bahin an kadam-an tungod ha iya,’ ngan waray hiya madaot han mga nakontra ha iya. (Juan 7:32-46) Kon binabaton mo an mga pakiana mahitungod han imo pagtoo, gamita an Biblia ngan bumaton nga “may kaaghop ngan pagtahod.” (1 Ped. 3:15) Kon diri ka maaram han baton, sumati hiya nga diri ka maaram ngan sidnga nga magsasaliksik ka. Katapos, bilnga an topiko ha Watch Tower Publications Index o Watchtower Library ha CD-ROM. Pinaagi ha pag-andam hin maopay, ‘mahibabaro ka kon paonan-o ka sadang bumaton.’—Kol. 4:6.

12. Kay ano nga diri mo sadang tugotan an paglutos nga magpaluya ha imo?

¹² Bangin diri la mga pakiana an imo atubangon mahitungod han imo pag-alagad ngan gintotoohan. Diri ito urusahon tungod kay an kalibotan kontrolado ni Satanas nga Yawa nga kaaway han Dios. (Basaha an 1 Juan 5:19.) Diri ka makakalaom nga kukumendasyonan o uuyonan ka han ngatanan, ngan posible nga kontrahon ka. Bangin an iba ‘magyakan hin maraot’ ha imo, ngan magpadayon hira ha pagbuhat hito. (1 Ped. 4:4) Kondi hinumdumi nga diri ka nag-uusahan. Ginlutos liwat hi Jesu-Kristo. Sugad man hi apostol Pedro, salit hiya nagsurat: “Mga hinigugma, diri kamo magdumdom nga makatitingala an pagsulaya nga mapaso ha butnga niyo, nga nahinabo ha iyo ha pagproyba ha iyo, sugad nga daw usa nga makatitingala nga butang an nahinabo ha iyo: kondi amo an kaagi nga mga kaangbit kamo han kan Kristo mga pag-antos, magkalipay kamo.”—1 Ped. 4:12, 13.

13. Kay ano nga mahimo magmalipayon an mga Kristiano kon ginlulutos hira?

¹³ An pagpailob ha paglutos o pagkontra sugad nga Kristiano usa nga hinungdan han kalipay. Kay ano? Tungod kay kon gin-uuyonan ka han kalibotan, nangangahulogan ito nga nagkikinabuhi ka uyon ha suruklan ni Satanas—diri han Dios. Hi Jesus nagpahamangno: “Kairo niyo, kon an ngatanan nga mga tawo magdayaw ha iyo! Kay amo man an ginbuhat han ira mga ginikanan ha ira maglimbong nga mga manaragna.” (Luk. 6:26) An paglutos nagpapasabot nga nasisina ha imo hi Satanas ngan an iya kalibotan tungod kay nag-aalagad ka kan Jehova. (Basaha an Mateo 5:11, 12.) Ngan usa nga hinungdan han kalipay “kon mga ginpasipara kamo tungod ha ngaran ni Kristo.”—1 Ped. 4:14.

14. Ano an maopay nga resulta kon an usa nagpapabilin nga matinumanon kan Jehova bisan pa han paglutos?

 ¹⁴ Kon nagpapabilin ka nga matinumanon kan Jehova bisan pa han pagkontra, may-ada diri maminos ha upat nga maopay nga resulta. Nakakagtestigo ka mahitungod ha Dios ngan ha iya Anak. Napaparig-on mo an imo Kristiano nga kabugtoan tungod han imo matinumanon nga pagpailob. Mahimo nga maaghat mo an mga nag-oobserba nga diri nakilala kan Jehova nga pamilngon Hiya. (Basaha an Filipos 1:12-14.) Ngan samtang naieksperyensyahan mo nga ginpaparig-on ka ni Jehova basi makailob ha mga pagsari, nagtutubo an imo gugma ha iya.

Usa nga “Daku nga Ganghaan” an Abrido Para ha Imo

15. Ano nga “daku nga ganghaan” an inabrihan para kan apostol Pablo?

¹⁵ May kalabotan ha ministeryo ni apostol Pablo ha Efeso, hiya nagsurat, “binuksan ha akon an daku nga ganghaan” nga naggigiya ngadto ha buruhaton. (1 Kor. 16:8, 9) Ito an ganghaan nga naggigiya ngadto ha daku nga buruhaton ha pagsangyaw han maopay nga sumat ngan panhimo hin disipulo hito nga syudad. Pinaagi ha pagkarawat hito, damu an nabuligan ni Pablo nga mahibaro mahitungod kan Jehova ngan magsingba ha Iya.

16. Han 1919, paonan-o sinulod an dinihogan nga nanhibilin ha “ganghaan nga inabrihan”?

¹⁶ Han 1919, an ginhimaya nga hi Jesu-Kristo nagbutang hin “ganghaan nga inabrihan” ha atubangan han mga dinihogan nga nanhibilin. (Pah. 3:8) Sinulod hira hito nga ganghaan ngan nagtikang magsangyaw han maopay nga sumat ngan magtutdo han kamatuoran han Biblia, nga mas madasigon kay ha kan-o pa man. Ano an resulta? Naipasamwak na yana an maopay nga sumat ha sidsid han tuna, ngan haros pito ka milyon na an may-ada paglaom nga makapahimulos han kinabuhi nga waray kataposan ha bag-o nga kalibotan han Dios.

17. Paonan-o ka makakasulod ha “daku nga ganghaan” nga naggigiya ngadto ha buruhaton?

¹⁷ Abrido pa gihapon para ha ngatanan nga surugoon ni Jehova an “daku nga ganghaan” nga naggigiya ngadto ha buruhaton. An mga nasulod hito malipayon ngan kontento samtang mas maduruto nga nagsasangyaw hira han maopay nga sumat. Mga batan-on nga surugoon ni Jehova, mationan-o niyo pinabibilhan an waray-kapariho nga pribilehiyo ha pagbulig ha iba nga “tumoo . . . ha maopay nga sumat”? (Mar. 1:14, 15) Naghunahuna na ba kamo nga magregular o mag-auxiliary payunir? Abrido liwat para ha iyo an pribilehiyo ha pagtukod hin Kingdom Hall, pag-alagad ha Bethel, ngan pagmisyonero. Tungod kay hirani na matapos an maraot nga kalibotan ni Satanas, an pakigbahin hini nga buruhaton han pag-alagad ha Ginhadian nagtitikaapurado kada adlaw. Masulod ba kamo ha “daku nga ganghaan” samtang may panahon pa?

“Tilawi Niyo Ngan Kitaa nga hi Jehova Maopay”

18, 19. (a) Ano an nakabulig kan David nga maghingyap gud nga mag-alagad kan Jehova? (b) Ano an nagpapakita nga waray gud magbasol hi David ha pag-alagad ha Dios?

¹⁸ Gin-aaghat han giniyahan nga salmista an iba nga ‘tilawan ngan kitaon nga hi Jehova maopay.’ (Sal. 34:8) Han hi Hadi David han Israel parabantay pa han kakarnerohan, ginpanalipdan hiya ni Jehova tikang ha pag-atake han magbangis nga hayop. Ginbuligan hiya han Dios ha pakig-away kan Goliat ngan gintalwas hiya ha damu nga kalamidad. (1 Sam. 17:32-51; Sal. 18, superskripsyon) Tungod han duro nga mahigugmaon-nga-pagkabuotan han Dios, napagios hi David nga magsurat: “O Jehova, nga akon Dios, damu an mga urusahon nga buhat nga imo ginhimo, ngan an imo mga hunahuna nga ngadi ha amon; diri ito mahuhusay ha atubangan mo.”—Sal. 40:5.

 ¹⁹ Nagtubo gud an gugma ni David kan Jehova ngan iya gindayaw Hiya ha bug-os niya nga kasingkasing ngan hunahuna. (Basaha an Salmo 40:8-10.) Ha paglabay han katuigan, waray gud magbasol hi David nga gin-gamit niya an iya kinabuhi ha pagsingba ha matuod nga Dios. An pagkinabuhi nga may diosnon nga debosyon amo an iya gidadakui nga bahandi—an hinungdan han waray-kapariho nga kalipay. Han lagas na hi David, hiya nagsiring: “Ikaw an akon ginlalaoman, O Ginoo, Jehova: Ikaw an akon tinaporan tikang pa han akon pagkabata, oo, bisan kon ako matigurang ngan ubanon na an akon ulo, O Dios, ayaw ako bayai.” (Sal. 71:5, 18) Mas nagrig-on pa an pagsarig ngan pakigsangkay ni David kan Jehova bisan han nagtikaluya na hiya.

20. Kay ano nga an pag-alagad ha Dios amo an gimaopayi nga paagi han paggamit han imo kinabuhi?

²⁰ An kinabuhi nira Josue, David, ngan Timoteo dugang nga nagpapamatuod nga an pag-alagad kan Jehova amo an gimaopayi nga paagi han paggamit han imo kinabuhi. An temporaryo nga kalamposan ha materyal tungod han propesyon hini nga kalibotan diri makakatupong ha waray tubtoban nga mga kapulsanan han ‘pag-alagad kan Jehova ha bug-os mo nga kasingkasing ngan kalag.’ (Jos. 22:5) Kon waray ka pa magdedikar kan Jehova pinaagi ha pag-ampo, pakianhi an imo kalugaringon, ‘Ano an nakakapugong ha akon nga magin usa han mga Saksi ni Jehova?’ Kon bawtismado ka na nga surugoon ni Jehova, karuyag mo ba nga magin mas malipayon ha kinabuhi? Kon amo, magin maduruto ha imo ministeryo ngan padayon nga pauswaga an imo espirituwalidad. Paghihisgotan ha masunod nga artikulo kon paonan-o ka mahimo mag-uswag ha espirituwal pinaagi han pagsunod ha susbaranan ni apostol Pablo.

Ano an Imo Baton?

• Paghatag hin duha nga hinungdan kon kay ano nga sadang kita mag-alagad ha Dios.

• Ano an nakabulig kan Timoteo ha pagdesisyon nga mag-alagad ha Dios?

• Kay ano nga sadang ka magpabilin nga marig-on kon ginlulutos?

• Ano nga mga pribilehiyo ha pag-alagad an abrido ha imo?

[Mga Pakiana]

[Retrato ha pahina 18]

An pag-alagad kan Jehova amo an gimaopayi nga paagi han pagkinabuhi

[Retrato ha pahina 19]

Mababaton mo ba an mga pakiana may kalabotan han imo pagtoo?