Andam Ka ba Depensahan an Imo Gintotoohan?

INATUBANG ka na ba hin sitwasyon diin kinahanglan mo depensahan an imo gintotoohan? Tagda an nahitabo kan Susana nga 16-anyos nga Saksi ni Jehova ha Paraguay. Ha iya klase, may-ada nagsiring nga diri kinakarawat han mga Saksi hi Jesu-Kristo, hi Maria, o an “Daan nga Tugon.” Nagsiring liwat an iba nga iya kaklase nga panatiko an mga Saksi, salit mas naruruyag lugod hira mamatay imbes nga magpadoktor. Kon ikaw an aada hito nga kahimtang, ano an imo bubuhaton?

Nag-ampo hi Susana, katapos iya gin-alsa an iya kamot. Pero hirani na magkagawas an klase, salit nagsarit na la hiya ha maestra kon puydi hiya magreport mahitungod han iya gintotoohan sugad nga usa han mga Saksi ni Jehova. Inuyon dayon an maestra. Durante han sumunod nga duha ka semana, nag-inandam hiya gamit an brosyur nga Mga Saksi ni Jehova—Hin-o Hira? Ano an Ira Gintotoohan?

Inabot na an adlaw han pagreport ni Susana. Iya ginhisgotan an hinungdan kon kay ano nga gintawag kita nga Mga Saksi ni Jehova. Iya liwat iginsaysay kon ano an aton ginlalaoman ha tidaraon ngan kon kay ano nga diri kita nagpapaabuno hin dugo. Katapos iya gin-aghat an klase nga magpakiana, ngan haros ngatanan nakigbahin. Diri makatoo an maestra nga ginbabaton ni Susana an mga pakiana pinaagi han Kasuratan.

Usa nga estudyante an nagsiring, “Nahingadto na ako ha Kingdom Hall, ngan waray gud imahen didto.” Karuyag hibaroan han maestra kon kay ano. Ginbasa ni Susana an Salmo 115:4-8 ngan Eksodo 20:4. Nahipausa an maestra, salit hiya nakagpakiana, “Kay ano nga puno hin imahen an amon mga singbahan kon igindidiri man ngay-an ito han Biblia?”

An paghisgot inabot hin 40 minutos. Han ginpakianhan ni Susana an klase kon karuyag nira magkita han video nga No Blood—Medicine Meets the Challenge, positibo nga binaton an ngatanan. Salit kinabuwasan, iginpadayon han maestra an sesyon. Katapos han ira pagkita han video, iginsaysay ni Susana an mga paagi ha pagtambal nga diri nagamit hin dugo nga kinakarawat han iba nga Saksi. May kalabotan hito, an maestra nagsiring: “Diri ako maaram nga damu an alternatibo nga paagi ha pagtambal; diri man liwat ako maaram han kapulsanan hito. Kondi, para la ba ini ha mga Saksi ni Jehova?” Han hibatian han maestra nga puydi ito ha ngatanan, hiya nagsiring, “Ha sunod nga higayon nga bisitahon ako han mga Saksi ni Jehova, makikiistorya ako ha ira.”

An 20-minutos nga report nga gin-andam ni Susana inabot hin tulo ka oras. Paglabay hin usa ka semana, nagreport liwat an iba nga estudyante mahitungod han ira relihiyon. Ha  kada pagtapos hin report, damu an nagbabangon hin pakiana, kondi waray ito mabaton han mga estudyante nga nagreport. Ginpakianhan hira han maestra, “Kay ano nga diri niyo nadidepensahan an iyo relihiyon sugad han iyo kaklase nga Saksi ni Jehova?”

An baton: “Nag-aaram gud hira han Biblia kondi diri namon nabubuhat ito.”

Katapos, liningi an maestra kan Susana ngan siniring: “Gin-aadman gud niyo an Biblia ngan nangangalimbasog ha pagbuhat han ginsisiring hito. Takos kamo hin kumendasyon.”

Mahimo unta diri depensahan ni Susana an iya gintotoohan. Kondi, pinaagi ha pagyakan basi matadong an sayop nga opinyon han iba, iya ginsubad an susbaranan han waray ngarani nga bata nga Israelita nga ginbihag han mga taga-Sirya. Ito nga bata nagin uripon ha balay han heneral han Sirya nga hi Naaman nga may-ada makangingirhat nga sakit ha panit. Waray mag-alang an bata ha pakiistorya ha asawa ni Naaman, hiya nagsiring: “Kon igkaupod pa unta an akon ginoo han manaragna nga aadto ha Samaria! Dida hito iya hiya pagtatambalon ha iya sanla.” Diri gud mapugngan han bata an iya kalugaringon ha pagsangyaw mahitungod han tinuod nga Dios. Tungod hini, an iya agaron nga hi Naaman nagin magsiringba ni Jehova.—2 Hadi 5:3, 17.

Ha pariho nga paagi, diri liwat mapugngan ni Susana an iya kalugaringon ha pagsangyaw mahitungod kan Jehova ngan han Iya katawohan. Ha pagyakan basi madepensahan an iya gintotoohan han ginkwestyon ito, ginsunod ni Susana an sugo han Kasuratan: “Pagbaraanon niyo ha iyo mga kasingkasing hi Kristo nga Ginoo: ngan mag-andam kamo gihapon ha pagbaton, nga may kaaghop ngan pagtahod, ha ngatanan nga mga tawo nga mapakiana ha iyo, kon ano an katungdanan han pagtoo nga aada ha iyo.” (1 Ped. 3:15) Andam ka ba ha pagdepensa han imo gintotoohan ngan pagyakan kon may-ada higayon?

[Retrato ha pahina 17]

Makakabulig ini ha pagdepensa han imo gintotoohan