Karawata an Awtoridad ni Jehova
Karawata an Awtoridad ni Jehova
“Ini an gugma ha Dios, nga pagtumanon ta an iya mga sugo; ngan an iya mga sugo diri magbug-at.”—1 JUAN 5:3.
1, 2. (a) Kay ano nga damu yana an diri naruruyag magpasakop ha awtoridad? (b) Independente gud ba adton nag-aangkon nga diri hira nagpapasakop ha awtoridad han iba? Isaysay.
AN PULONG nga “awtoridad” diri popular yana. Damu an diri naruruyag magpasakop ha iba. “Waray katungod an bisan hin-o ha pagdikta ha akon kon ano an akon bubuhaton” nasiring an mga nag-aangkon nga diri nagpapasakop ha awtoridad han iba. Kondi, independente gud ba hira? Sigurado nga diri! Kadam-an an nasunod la ha mga disposisyon han damu hinduro nga ‘nauyon hini nga panahon’ o sistema. (Roma 12:2) Diri hira independente, lugod ‘mga uripon hira han pagkadunot,’ sumala kan apostol Pedro. (2 Ped 2:19) Hira nanggagawi “sugad han kahimtangan dinhi ha kalibotan, sugad ha prinsipe han mga kagamhanan han hangin,” hi Satanas nga Yawa.—Efe. 2:2.
2 Usa nga awtor an naghambog: “Diri ako nagpapaimpluwensya ha akon mga kag-anak o ha usa nga padi o ministro . . . o ha Biblia ha pagdesisyon kon ano an husto.” Oo, bangin inaabuso han iba an ira awtoridad ngan bangin diri hira angay naton sugton. Kondi tungod ba hito, diri na kita makarawat hin bisan ano nga giya? Nakakaguol an nababasa naton ha mga laray-ulohan han peryodiko. Makasurubo nga ha panahon nga kinahanglan gud han mga tawo an giya, kadam-an an diri nakarawat hito.
An Aton Pagtagad ha Awtoridad
3. Paonan-o ipinakita han mga Kristiano ha siyahan nga siglo nga diri hira basta la nga nagpapasakop ha mga may awtoridad?
3 Sugad nga mga Kristiano, iba an aton disposisyon kay ha mga tawo ha kalibotan. Diri ito nagpapasabot nga basta la nga nasunod kita ha anoman nga iginsusugo ha aton. Lugod, usahay kinahanglan diri kita magpasakop ha iba bisan kon may-ada hira awtoridad. Ini liwat an ginbuhat han mga Kristiano ha siyahan nga siglo. Pananglitan, han gindid-an an mga apostol ha pagsangyaw, waray hira sumugot ha hitaas nga saserdote ngan ha iba nga may katungdanan nga membro han Sanhedrin. Waray nira bayai an husto nga paggawi basi la sundon an mga may awtoridad.—Basaha an Buhat 5:27-29.
4. Ano nga mga ehemplo ha Hebreo nga Kasuratan an nagpapakita nga damu han katawohan han Dios an waray magsubad ha ginbubuhat han kadam-an?
4 Pariho hito an ginbuhat han damu nga surugoon han Dios antes han panahon ni Jesus. Pananglitan, hi Moises “diniri nga pagngaranan hiya nga anak han anak nga babaye ni Paraon; ginpili lugod niya an paghiangbit han mapait nga gin-aantos han mga tawo han Dios,” bisan kon tungod hito ‘nasina an hadi.’ (Heb. 11:24, 25, 27) Ginlikyan ni Jose an pagsulay han asawa ni Potipar, nga may gahum ha pagbulos ngan pagdaot ha iya. (Gen. 39:7-9) Hi Daniel “nagtinguha ha iya kasingkasing nga diri hiya mahugawan ha iya ngahaw han kanan hadi mga magrasa” nga pagkaon bisan kon an iya desisyon makuri karawaton han nangunguna nga opisyal ha palasyo han Babilonya. (Dan. 1:8-14) Ipinapakita han sugad nga mga ehemplo nga ha bug-os nga kasaysayan, an katawohan han Dios marig-on nga dinapig ha kon ano an husto, anoman an mahitabo. Waray hira sumugot ha iba basi la uyonan nira; sugad man kita.
5. Kay ano nga an aton pagtagad ha awtoridad naiiba kay ha mga tawo ha kalibotan?
5 An aton maisugon nga disposisyon diri sadang sidngon nga katig-a la han ulo; diri liwat kita nasubad ha iba nga nagrirebelde basi la ipakita nga nadiri hira ha sistema han politika. Lugod, determinado kita nga karawaton an awtoridad ni Jehova kay ha awtoridad han bisan hin-o nga tawo. Kon an balaud han tawo nakontra ha balaud han Dios, diri makuri an pagdesisyon kon ano an aton bubuhaton. Pariho ha mga apostol ha siyahan nga siglo, aton ginsusugot an Dios sugad nga magmarando imbes nga an mga tawo.
6. Kay ano nga gimaopayi pirme an pagsugot ha mga sugo ni Jehova?
6 Ano an nakabulig ha aton nga karawaton an awtoridad han Dios? Ginsusunod naton an ginsisiring han Proberbios 3:5, 6: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot: Ha ngatanan mo nga dalan kilalaha hiya, ngan hiya magtututdo han imo mga agianan.” Natoo kita nga bisan ano nga iginpapatuman ha aton han Dios, para ha aton kaopayan. (Basaha an Deuteronomio 10:12, 13.) Oo, iginpakilala ni Jehova an iya kalugaringon ha mga Israelita sugad nga an Usa nga ‘nagtututdo ha ira basi magpahimulos hira, nga nagmamando ha ira ha dalan nga sadang nira paglaktan.’ Ngan nagsiring pa hiya: ‘Oh kon mamati ka la unta han akon mga sugo! Dida hito an imo kamurayaw masusugad hin usa nga salog, ngan an imo pagkamatadong masusugad han mga balud ha dagat.’ (Isa. 48:17, 18) Nasarig kita hito. Kombinsido kita nga para ha aton kaopayan pirme an pagsugot ha mga sugo han Dios.
7. Ano an sadang naton buhaton kon diri naton nasasabtan hin maopay an usa nga sugo nga aada ha Pulong han Dios?
7 Kinakarawat naton an awtoridad ni Jehova ngan ginsusugot hiya bisan kon diri naton nasasabtan hin maopay an katuyoan han pipira nga surundon nga aada ha iya Pulong. Diri ini basta la pagkarawat han gintotoohan; pagsarig ini. Pagpakita ini han kinasingkasing nga pagsarig nga hi Jehova maaram kon ano an maopay para ha aton. An aton pagsugot nagpapakita liwat han aton gugma, kay hi apostol Juan nagsurat: “Amo ini an gugma ha Dios, nga pagtumanon ta an iya mga sugo.” (1 Juan 5:3) Kondi may-ada usa pa nga bahin han aton pagsugot nga diri naton sadang hingalimtan.
Pagbansay han Aton Abilidad ha Pagsabot
8. Paonan-o an pagkaada nabansay nga abilidad ha pagsabot, may kalabotan ha pagkarawat han awtoridad ni Jehova?
8 An Biblia nag-aaghat ha aton nga sadang naton bansayon an aton abilidad ha pagsabot ha “pagkilala han maopay ngan han maraot.” (Heb. 5:14) Kon sugad, an aton tumong diri la kay pagsugot ha mga balaud han Dios nga diri ginhuhunahuna ito; lugod, karuyag naton mahibaro ha “pagkilala han maopay ngan han maraot” sumala ha mga prinsipyo ni Jehova. Karuyag naton masabtan an kinaadman ni Jehova, basi makasiring kita sugad han salmista: “An imo balaud aadi ha sakob han akon kasingkasing.”—Sal. 40:8.
9. Paonan-o naton maipapahiuyon an aton konsensya ha mga prinsipyo ni Jehova, ngan kay ano nga importante ito?
9 Basi masabtan an pagkabirilhon han mga balaud han Dios sugad han pagpabili han salmista, kinahanglan pamalandungon naton an aton binabasa ha Biblia. Pananglitan, kon hinbabaroan naton an usa nga sugo ni Jehova, mahimo kita magpakiana: ‘Kay ano nga praktikal ini nga sugo o prinsipyo? Kay ano nga para ha akon kaopayan kon sugton ko ini? Ano an magraot nga nahitabo ha mga nagbalewaray han sagdon han Dios?’ Kon an aton konsensya nauyon ha mga paagi ni Jehova, posible gud nga magdesisyon kita uyon ha iya kaburut-on. Padayon nga ‘mahibabaroan naton kon ano an kaburut-on ni Jehova’ ngan susundon ito. (Efe. 5:17) Diri ini masayon pirme.
Nangangalimbasog hi Satanas ha Pagsalikway han Awtoridad han Dios
10. Ano an usa nga paagi han pagsalikway ni Satanas ha awtoridad han Dios?
10 Maiha na nga nangangalimbasog hi Satanas ha pagsalikway han awtoridad han Dios. An iya independente nga disposisyon matin-aw nga nakikita ha damu nga paagi. Pananglitan, tagda an kawaray pagtahod ha kahikayan han Dios ha pag-asawa. An iba nagtatampo nga diri kasal, samtang an iba nagbibiling hin mga paagi nga makigbulag. Adton nagbubuhat hito bangin umuyon ha sikat nga artista nga nagsiring: “Imposible an pagkaada usa la nga padis.” Nagsiring pa hiya: “Waray ako kilala nga maunungon ha iya padis o naruruyag nga magin maunungon.” Han ginhuhunahuna han sikat nga artista nga lalaki an iya waray maglampos nga pakigrelasyon, hiya nagsiring liwat: “Diri ako sigurado kon kinaiya gud ba naton nga usa la an aton padis ha bug-os nga kinabuhi.” Sadang naton pakianhan an aton kalugaringon, ‘Kinakarawat ko ba an awtoridad ni Jehova may kalabotan ha pag-asawa, o nakakaapekto na ha akon an kalibotanon nga panhunahuna nga an pag-asawa diri permanente?’
11, 12. (a) Kay ano nga bangin makuri sundon han mga batan-on an balaud ni Jehova? (b) Pagsaysay hin eksperyensya nga nagpapakita nga kalurongan an pagbalewaray ha mga balaud ngan mga prinsipyo ni Jehova.
11 Usa ka ba nga batan-on ha organisasyon ni Jehova? Mahimo nga ikaw an siyahan nga puntirya ni Satanas ha iya pangalimbasog nga isalikway an awtoridad ni Jehova. An hingyap han mga batan-on upod na an pag-ipit han imo mga kaedad bangin makaimpluwensya ha imo nga maghunahuna nga an mga balaud han Dios makuri sundon. (2 Tim. 2:22) Ayaw tuguti nga mahitabo ito. Pangalimbasog nga masabtan an kinaadman han Dios pinaagi han pagsunod ha iya mga prinsipyo. Pananglitan, an Biblia nagsasagdon ha imo nga ‘pumalagiw tikang ha pakighilawas.’ (1 Kor. 6:18) Pakianhi utro an imo kalugaringon: ‘Kay ano nga maaramon an pagsunod hito nga sugo? Paonan-o ako magpapahimulos kon sundon ko ito?’ Bangin may kilala ka nga nagbalewaray han sagdon han Dios ngan nag-antos han maraot nga mga resulta hito nga sayop. Malipayon gud ba hira yana? Mas maopay ba an ira kinabuhi yana kay han nakada pa hira ha organisasyon ni Jehova? Nabilngan gud ba nira an sekreto ha kalipayan nga waray mabilngi han mga surugoon han Dios?—Basaha an Isaias 65:14.
12 Tagda an ginsiring hadto han Kristiano nga hi Sharon: “Tungod han pagtalapas ha balaud ni Jehova, may-ada na ako yana sakit nga AIDS. Agsob nga nahinunumdoman ko an makalilipay nga katuigan han akon pag-alagad kan Jehova.” Nasantop niya nga kalurongan an pagtalapas ha mga balaud ni Jehova ngan pinabilhan gud unta niya ito tungod kay an Iya mga balaud nagpapanalipod ha aton. Namatay hi Sharon paglabay hin pito ka semana tikang nga iginsurat ito nga iya ginsiring. Ipinapakita han iya makasurubo nga eksperyensya nga waray gud maopay nga maihahatag hi Satanas ha nagigin bahin hinin maraot nga sistema. Sugad nga ‘amay han buwa,’ damu an iya iginsasaad, kondi diri niya natutuman ito, sugad han iya iginsaad kan Eva. (Juan 8:44) Oo, maopay gud nga sundon pirme an balaud ni Jehova.
Maglikay ha Independente nga Disposisyon
13. Ha ano nga sitwasyon kinahanglan likyan naton an independente nga disposisyon?
13 Ha pagkarawat han awtoridad ni Jehova, kinahanglan likyan naton an independente nga disposisyon. Kon magpahitaas kita, mahimo nga maghunahuna kita nga diri naton ginkikinahanglan an giya han bisan hin-o. Pananglitan, bangin diri naton karawaton an sagdon han mga nangunguna ha katawohan han Dios. Naghikay an Dios ha pagtagana hin espirituwal nga pagkaon ha husto nga panahon pinaagi han iya matinumanon ngan maaramon nga uripon. (Mat. 24:45-47, NW) Mapainubsanon nga kilalahon naton nga ini an paagi ni Jehova ha pagmangno ha iya katawohan yana. Subaron naton an magtinumanon nga apostol. Han an iba nga disipulo inundang ha pagsunod kan Jesus, nagpakiana hiya ha mga apostol: ‘Karuyag ba niyo nga bumulag liwat ha akon?’ Hi Pedro binaton: “Ginoo, hin-o an amon kakadtoan pa? Ikaw an may mga pulong han kinabuhi nga waray kataposan.”—Juan 6:66-68.
14, 15. Kay ano nga kinahanglan mapainubsanon nga sundon naton an sagdon han Biblia?
14 Kon kinakarawat naton an awtoridad ni Jehova, susundon naton an sagdon nga iginbasar ha iya Pulong. Pananglitan, an matinumanon ngan maaramon nga uripon nagpapahamangno ha aton nga ‘mag-agma ngan magmaligdong.’ (1 Tes. 5:6) Ito nga sagdon angayan gud durante hinin kataposan nga mga adlaw tungod kay damu an ‘mahigugmaon ha ira kalugaringon ngan ha salapi.’ (2 Tim. 3:1, 2) Makakaimpluwensya ba ha aton inin kalyap nga paggawi? Oo. Mahimo nga magluya an aton espirituwalidad o magin materyalistiko kita kon tinguhaon naton an sekular nga mga tumong. (Luk. 12:16-21) Salit, maaramon gud nga sundon an sagdon han Biblia ngan likyan an hakugnon nga paagi han pagkinabuhi nga kalyap ha kalibotan ni Satanas!—1 Juan 2:16.
15 An espirituwal nga pagkaon tikang ha matinumanon ngan maaramon nga uripon iginhahatag ha mga kongregasyon pinaagi han pinili nga mga tigurang. An Biblia nagsasagdon ha aton: “Magtuman ngan magpasakop kamo ha iyo mga magmarando: kay nagmamangno hira tungod ha iyo mga kalag, sugad nga hira an maghahatag hin kahusayan; basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.” (Heb. 13:17) Nangangahulogan ba ini nga an mga tigurang ha kongregasyon diri na nagsasayop? Syempre nagsasayop hira! Mas nakikita han Dios an ira mga kaluyahan kay ha bisan hin-o. Bisan pa hito, ginlalaoman kita niya nga magin mapinasakupon. Kon nakooperar kita ha mga tigurang, bisan kon hira diri-hingpit, nagpapamatuod ito nga kinakarawat naton an awtoridad ni Jehova.
An Pagkaimportante han Pagpaubos
16. Paonan-o naton maipapakita an pagtahod kan Jesus sugad nga Ulo han kongregasyon?
16 Kinahanglan hinumdoman naton pirme nga hi Jesus gud an Ulo han kongregasyon. (Kol. 1:18) Ito an usa nga hinungdan kon kay ano nga mapainubsanon nga nagpapasakop kita ha giya han pinili nga mga tigurang ngan ‘minahal gud’ naton hira. (1 Tes. 5:12, 13) Syempre, maipapakita han mga tigurang ha kongregasyon nga hira liwat mapainubsanon pinaagi han pagin mahirot ngan maaramon ha pagpahayag han mensahe han Dios ha kongregasyon, diri han ira kalugaringon nga opinyon. ‘Diri hira nagtatalapas han nahisurat na’ basi la magpahayag hin kalugaringon nga ideya.—1 Kor. 4:6.
17. Kay ano nga peligroso an pagin ambisyoso?
17 An ngatanan ha kongregasyon kinahanglan diri maghingyap nga paghimayaon an ira kalugaringon. (Prob. 25:27) Matin-aw nga nakadaot ito ha usa nga disipulo nga nakilala ni apostol Juan. Hiya nagsurat: “Hi Diotrepes, nga karuyag magpangulo ha ira, waray karawat ha amon. Busa, kon ako umabot, pahihinumdumon ko hira han iya mga buhat nga iya ginhimo, nga nagyayakan hin magraot nga mga pulong kontra ha amon.” (3 Juan 9, 10) May-ada ini leksyon bisan ha aton yana. Sadang naton isalikway an anoman nga ambisyon naton. An Biblia nagpapahamangno ha aton: “An palabilabi nag-uuna han pagkagunaw, ngan an mapahitas-on nga espiritu nag-uuna han pagkahulog.” Kinahanglan atohan hadton nakarawat han awtoridad han Dios an pagin paragbuot, kay kon diri, magriresulta ito hin kaarawdan.—Prob. 11:2; 16:18.
18. Ano an mabulig ha aton nga karawaton an awtoridad ni Jehova?
18 Himoa nga tumong an pag-ato ha independente nga disposisyon han kalibotan ngan karawata an awtoridad ni Jehova. Ha pana-panahon, pamalandonga nga may apresasyon an imo daku nga pribilehiyo ha pag-alagad kan Jehova. An imo pagin usa han katawohan han Dios nagpapamatuod nga ginpahirani ka niya pinaagi han iya baraan nga espiritu. (Juan 6:44) Ayaw gud pagminosa an imo relasyon ha Dios. Pangalimbasog nga makita ha ngatanan nga bahin han imo kinabuhi nga iginsasalikway mo an independente nga disposisyon ngan kinakarawat mo an awtoridad ni Jehova.
Nahinunumdoman Mo Ba?
• Ano an nahiuupod ha pagkarawat han awtoridad ni Jehova?
• Paonan-o an pagbansay han aton abilidad ha pagsabot, may kalabotan ha pagkarawat han awtoridad ni Jehova?
• Ha ano nga mga sitwasyon nangangalimbasog hi Satanas ha pagsalikway han awtoridad han Dios?
• Kay ano nga importante an pagpaubos ha pagkarawat han awtoridad ni Jehova?
[Mga Pakiana]
[Retrato ha pahina 18]
“Kinahanglan sugton namon an Dios sugad nga magmarando imbes nga an mga tawo”
[Retrato ha pahina 20]
Maaramon pirme an pagsunod ha mga prinsipyo han Dios