Makusog Bisan Pa han mga Kaluyahan

MAHIMO ka madaog han imo mga kaluyahan. Nadukot ito sugad hin mga linta. Bangin maghunahuna ka nga diri mo gud ito malalamposan, o bangin abaton mo nga diri mo ito maaakos kon itanding ha iba ngan nahuhunahuna mo nga mas maopay hira ha imo. O bangin may-ada ka nakakapaluya nga sakit nga nakakaubos han imo kusog ngan nakakawara han imo kalipay ha kinabuhi. Ano man an hinungdan hito, baga hin waray ka na mahihimo. Bangin abaton mo an inabat ni Job, nga nagsiring ha Dios: “O nga imo pa unta ako tagoon didto ha Sheol, nga imo ako tipigan ha tago, ngada nga an imo kapungot lumabay, nga ikaw magtagal ha akon hin usa nga panahon, ngan panumdumon ako!”—Job 14:13.

Paonan-o mo malalamposan an sugad nga pagbati hin kawaray paglaom? Bisan kon makuri hinduro, kinahanglan diri mo anay paghinunahunaon an imo mga problema. Pananglitan, mahimo mo pamalandungon an pakiana ni Jehova ha iya matinumanon nga surugoon nga hi Job: “Nakain ka han pagpahamutang ko han mga patukoranan han tuna? Pag-asoy kon may-ada ka sarabotan. Hin-o an nag-igo han mga sukol hini, kon maaram ka? O hin-o an inmunat han kutod ha bawbaw hini?” (Job 38:4, 5) Kon hunahunaon naton an kahulogan hito nga mga pakiana, posible nga mapapagios kita nga kilalahon an diri-matupngan nga kinaadman ngan gahum ni Jehova. May-ada hiya maopay nga hinungdan kon kay ano nga gintutugotan niya nga magpadayon an kahimtang ha kalibotan yana.

“Usa nga Tunok ha Unod”

Usa pa nga matinumanon nga surugoon nga hi apostol Pablo an naghangyo kan Jehova nga kuhaon an “usa nga tunok ha unod,” nga nagpapadayon nga problema. Tulo ka beses nga nanginyupo hiya ha Dios nga kuhaon ito. Anoman ito, pariho ito hin natusok nga tunok nga makakawara unta han iya kalipay ha  pag-alagad kan Jehova. Iginpariho ni Pablo an tunok ha unod ha padayon nga pagtampalo ha iya. Hi Jehova binaton: “Iton akon grasya igo ha imo: kay iton akon gahum mahihingpit ha kamaluya.” Waray ito kuhaa ni Jehova. Kinahanglan ilubon ito ni Pablo, kondi hiya nagdugang: “Kon ako maluya, niyan makusog ako.” (2 Kor. 12:7-10) Ano an iya karuyag sidngon?

Waray mawara an problema ni Pablo ha milagroso nga paagi. Kondi, waray ito makapugong ha iya ha pagtuman han importante nga buruhaton ha pag-alagad kan Jehova. Sinarig hiya han suporta ni Jehova ngan naghangyo pirme han Iya bulig. (Fil. 4:6, 7) Ha ikatarapos han kinabuhi ni Pablo ha tuna, hiya nakasiring: “Nakig-away ako han maopay nga away, natapos ko an akon pakipagrumba, akon gintipigan an pagtoo.”—2 Tim. 4:7.

Ginagamit ni Jehova an diri-hingpit nga kalalakin-an ha pagtuman han iya kaburut-on bisan pa han ira kasaypanan ngan problema, ngan husto la nga pasidunggan hiya tungod hito. Makakahatag hiya ha ira hin giya ngan kinaadman basi malamposan an ira kakurian ngan matipigan an ira kalipay ha pag-alagad ha iya. Oo, mahimo niya gamiton an diri-hingpit nga mga tawo ha pagbuhat han importante nga buruhaton bisan pa han ira mga kaluyahan.

Iginsaysay ni Pablo kon kay ano nga waray kuhaa han Dios an iya tunok ha unod: “Basi diri ako magpakahitaas hin labi.” (2 Kor. 12:7) An “tunok” ni Pablo nagpahinumdom ha iya han iya limitasyon ngan nakabulig ha iya nga magpabilin nga mapainubsanon. Uyon ito ha igintutdo ni Jesus: “Bisan hin-o an nagpapakahitaas, mahiuubos, ngan bisan hin-o an magpapaubos, mahihitaas.” (Mat. 23:12) An mga pagsari makakagtutdo ha mga surugoon han Dios nga magpaubos ngan makakabulig ha ira nga masantop nga basi makapailob nga matinumanon, kinahanglan sumarig hira kan Jehova. Salit, pariho han apostol, ‘makakaghimaya hira kan Jehova.’—1 Kor. 1:31.

Nakatago nga mga Kaluyahan

An iba bangin diri nakakasantop han ira mga kaluyahan o ginbabalewaray la ito. Pananglitan, an usa bangin sobra an kompyansa ngan pagsarig ha iya kalugaringon. (1 Kor. 10:12) Usa pa nga kaluyahan nga komon ha diri-hingpit nga mga tawo amo an hingyap nga magin prominente.

Hi Joab, nga nagin heneral han kasundalohan ni Hadi David, maisugon, determinado ngan may kapas ha pagsulbad han mga problema. Kondi, nagbuhat hi Joab hin seryoso nga sala nga nagpakita nga paragbuot ngan ambisyoso hiya. Madarahog nga ginpatay niya an duha nga heneral. Siyahan, binulos hiya pinaagi ha pagpatay kan Abner. Sunod, nagpasangil hiya ha pangumusta han iya patod nga hi Amasa. Ginkaptan niya ha too nga kamot an barangas ni Amasa nga baga hin tiharok ha iya ngan ginbuno hiya hin espada ha wala nga kamot. (2 Sam. 17:25; 20:8-10) Ginsaliwnan hi Joab ni Amasa sugad nga heneral han kasundalohan salit ginsalingabot ni Joab ini nga higayon ha pagpatay han iya karibal tungod kay bangin naglalaom hiya nga mahibabalik hiya ha pagin heneral. Imo hinbaroan nga waray niya pugngi an iya hilig ngan pagin ambisyoso. Waray hiya malooy ngan waray gud magpakita hin pagbasol. Han hirani na mamatay hi Hadi David, gintugon niya an iya anak nga hi Salomon nga siguruhon nga patayon hi Joab tungod han iya kamaraot.—1 Hadi 2:5, 6, 29-35.

Diri gud kita sadang magpadaog ha aton sayop nga mga hingyap; mapupugngan naton an aton mga kaluyahan. Siyahan, kinahanglan naton kilalahon ngan karawaton ito. Sunod, himoon naton an paagi nga malamposan ito. Pinaagi ha pag-ampo pirme, makakaaro kita hin bulig kan Jehova basi maatohan ito, ngan pinaagi ha maduruto nga pag-aram ha Biblia, makakabiling kita hin paagi ha pagpugong hito. (Heb. 4:12) Bangin kinahanglan padayon nga mangalimbasog kita ha paglampos han aton mga kaluyahan ngan diri sadang mawad-an hin paglaom. Posible pa ngani nga magpadayon kita ha pakig-away hito tubtob nga diri pa kita hingpit. Inuyon hini hi Pablo, ngan hiya nagsurat: “An buot ko, waray ko pagbuhata; kondi an akon kinangangalasan, amo an ginbuhat ko.” Kondi, sugad han imo hinbabaroan, waray magpadaog hi Pablo ha iya mga kaluyahan, nga baga hin diri niya napupugngan an iya paggios. Ha kabaliktaran, padayon nga gin-atohan niya ito ngan sinarig ha bulig han Dios pinaagi kan Jesu-Kristo. (Roma 7:15-25) Salit, hi Pablo nagsiring: “Ginpapaantos ko inin akon lawas,  ngan iginbutang ko ha pagkauripon: bangin tingali, ha kahuman ko na magwali ha iba, ako lugod isikway.”—1 Kor. 9:27.

An mga tawo may-ada tendensya nga pakamatadungon an ira kalugaringon. Mapupugngan naton ito kon subaron naton an panhunahuna ni Jehova ngan sundon an sagdon ni Pablo ha mga Kristiano: “Kangalasan niyo an maraot; kupkop kamo ha maopay.” (Roma 12:9) Ha aton pangalimbasog nga malamposan an aton mga kaluyahan, kinahanglan kita magin tangkod, determinado ngan may-ada disiplina ha kalugaringon. Naghangyo hi David kan Jehova: “Susiha inin akon kasingkasing ngan akon [hilarom] nga pamurubuot.” (Sal. 26:2) Maaram hiya nga husto nga makakag-usisa an Dios kon ano gud an aton mga hilig, ngan mabulig Hiya ha aton kon kinahanglan naton ito. Kon susundon naton an giya ni Jehova pinaagi han iya Pulong ngan baraan nga espiritu, malalamposan naton an aton mga kasaypanan.

Bangin nababaraka an iba tungod han mga problema nga ha ira pag-abat, diri nira masusulbad. Sigurado nga mahigugmaon nga mabulig ngan magpaparig-on an mga tigurang. (Isa. 32:1, 2) Kondi maaramon an pagkaada makatadunganon nga ginlalaoman. May-ada mga problema nga diri bug-os nga masusulbad hini nga sistema. Kondi, damu an nahibaro ha pag-ilob, ngan ito an nakabulig ha ira nga magin tagbaw ha kinabuhi.

Nagpapasarig hi Jehova han Iya Suporta

Anoman nga problema an aton inaatubang hinin makuri nga panahon, makakasarig kita nga gigiyahan ngan bubuligan kita ni Jehova. An Biblia nagsasagda ha aton: “Busa, magmapaubsanon kamo ha ilarom han makagagahum nga kamot han Dios, basi pagpahitas-on kamo niya ha igo nga panahon; nga ibutang niyo ha iya an ngatanan niyo nga pangarit, kay hiya nagmamangno ha iyo.”—1 Ped. 5:6, 7.

Han nasabtan ni Kathy, nga maiha na nga boluntaryo ha Bethel, nga may-ada Alzheimer’s disease an iya bana, inabat niya nga diri niya maiilob an mga kakurian tungod hito. Salit nanginyupo hiya kan Jehova kada adlaw nga hatagan hiya hin kinaadman ngan karig-on. Samtang nagtitikaluya an iya bana, nangalimbasog an mahigugmaon nga kabugtoan nga mahibaro mahitungod ha pagmangno han may-ada hito nga sakit, ngan naghatag hin moral nga suporta an mapinairon nga kabugtoan nga  kababayin-an. Kaupod hira han makaparig-on nga bulig nga iginhahatag ni Jehova, salit namangnoan ni Kathy an iya bana tubtob ha kamatay paglabay hin mga 11 ka tuig. Hiya nagsiring: “Nagtatangis nga sinsero nga ginpasalamatan ko hi Jehova han ngatanan nga iya bulig; nakailob ako tungod hito. Waray ko mahunahuna nga makakailob ako hin sugad kaiha bisan han duro nga kakapoy!”

Bulig ha Paglampos han Nakatago nga mga Kaluyahan

Kon an mga tawo naabat hin kawaray pulos, bangin maghunahuna hira nga diri mamamati ha ira hi Jehova kon mangaro hira hin bulig ha panahon han ira kasakitan. Hito nga takna, maopay nga hunahunaon an ginsiring ni David han nagbasol hiya han ira seryoso nga sala ni Bath-sheba: “An ruba ngan an mabinasulon nga kasingkasing, O Dios, diri mo pagtamayon.” (Sal. 51:17) Sinsero nga nagbasol hi David, ngan maaram hiya nga makakadaop hiya ha Dios ngan makakasarig han iya kalooy. Ipinakita ni Jesus an pagkamahigugmaon ni Jehova. Ginkotar han parasurat han Ebanghelyo nga hi Mateo, an ginsiring ni Isaias mahitungod kan Jesus: “An bagakay nga basag diri niya pagbabarion; ngan an pabilo nga nag-aaso, diri niya paparungon.” (Mat. 12:20; Isa. 42:3) Han nakanhi pa ha tuna hi Jesus, pinaid hiya ha mga pobre ngan tinalumpigos. Waray niya paronga an tikaparong na nga laga han kinabuhi han usa, siring pa, nga iginpariho ha pabilo han tikaparong nga lampara. Lugod, mahigugmaon nga ginmangnoan niya an mga nag-aantos pinaagi ha pagbulig ha ira nga mahibaro nga hinigugma hira han Dios. Sugad hiya hito han nakanhi pa hiya ha tuna. Natoo ka ba nga sugad pa gihapon hito hi Jesus ngan napaid hiya ha imo mga kaluyahan? Tigamni nga an Hebreo 4:15, (NW) nasiring nga hiya an Usa nga “napaid ha aton mga kaluyahan.”

Han nagsurat hi Pablo mahitungod han iya “tunok ha unod,” naobserbahan niya nga an gahum ni Kristo sugad hin tolda nga nagpapanalipod ha iya. (2 Kor. 12:7-9) Inabat niya an panalipod han Dios pinaagi kan Kristo, sugad la han panalipod nga inaabat han aadto ha tolda kon maraot an klima. Pariho kan Pablo, diri kita sadang magpadaog ha aton mga kaluyahan ngan problema. Basi magpabilin nga marig-on ha espirituwal, mahimo naton gamiton an ngatanan nga igintatagana ni Jehova pinaagi han iya tunan-on nga kongregasyon. Mahimo naton buhaton an ngatanan nga aton mahihimo, katapos sumarig hin bug-os kan Jehova nga gigiyahan niya an aton mga pitad. Tungod ha pakaeksperyensya kon paonan-o binulig ha aton an gahum han Dios ha paglampos han aton mga kaluyahan, makakasiring liwat kita han ginsiring ni Pablo: “Kon ako maluya, niyan makusog ako.”—2 Kor. 12:10.

[Retrato ha pahina 3]

Padayon nga nag-ampo hi Pablo kan Jehova nga giyahan hiya ha pagtuman han iya ministeryo

[Retrato ha pahina 5]

Igintapod ni Hadi David kan Joab an kasundalohan

[Retrato ha pahina 5]

Ginpatay ni Joab an iya karibal nga hi Amasa

[Retrato ha pahina 6]

An mga tigurang naghahatag hin mahigugmaon nga giya tikang ha Kasuratan nga makakabulig ha aton nga malamposan an aton mga problema