Maopay Gud nga Solusyon

TULO nga olitawo ha Sentral Aprika an naruyag tumambong ha distrito nga kombensyon ha ira probinsya. Problema nira an pagkadto kay haros 90 kilometro an kahirayo hito, batsihon ngan matapotapo an dalan, ngan waray hira sarakyan. Nagdesisyon hira nga humoram hin tulo nga bisikleta kondi waray hira nabilngan nga puydi gamiton.

Hinbaroan han usa nga tigurang ha kongregasyon an ira problema ngan iginpahuram an iya bisikleta—daan na kondi nagagamit pa. Nag-istorya hiya han ira ginhimo hadto basi makatambong ha kombensyon. Nagsuhestyon hiya nga hira nga tulo an magamit han usa nga bisikleta. Simple kondi makuri nga solusyon. Paonan-o nira ito mahihimo?

Basi malikyan an kapaso han adlaw, kaagahon pa hira nga linakat ngan iginkarga ha bisikleta an ira mga gamit. Nag-una an usa ha ira nga nakabisikleta samtang an duha madagmit nga nagbabaktas sunod ha iya. Pag-abot hin mga 500 metros, inundang an nagbibisikleta ngan iginsandig ha kahoy an kargado nga bisikleta. Syempre ginsiguro niya nga nakikita na ito han duha basi diri ito kawaton. Katapos, nagpadayon hiya ha pagbaktas.

Pag-abot han duha ha bisikleta, sinakay an usa samtang an usa pa nagpadayon ha pagbaktas hin 500 metros o sobra pa antes han iya turno. Salit, tungod kay may maopay nga plano ngan determinasyon, hira nga tulo nagbaktas hin 60 kilometro na la imbes nga 90 kilometro. Bawi gud an ira pangalimbasog. Iginkita nira an ira Kristiano nga kabugtoan ha kombensyon ngan malipayon nga nagpahimulos han espirituwal nga bangkete. (Deut. 31:12) Hini nga tuig, bubuhaton mo ba an bug-os nga imo mahihimo basi makatambong ha distrito nga kombensyon ha iyo probinsya?