Mga Kalidad nga Kinahanglan Tinguhaon Naton
Mga Kalidad nga Kinahanglan Tinguhaon Naton
“Tinguhaa an pagkamatadong, diosnon nga debosyon, pagtoo, gugma, pagpailob, [ngan] pagkamalumo.”—1 TIM. 6:11, NW.
1. Ano an gintitinguha han mga tawo yana?
ANO an gintitinguha han mga tawo ha kalibotan yana? Sugad han mababasa ha Biblia, damu an nagtitinguha hin waray pulos nga mga tumong. An iba “mahigugmaon ha salapi” tungod kay natoo hira nga makakalipay ha ira an materyal nga mga panag-iya. Samtang an iba pa “mahigugmaon ha kalipayan,” ira gin-uuna ha kinabuhi an karisyohan ngan kaliawan. (2 Tim. 3:2, 4) Bisan kon nangangalimbasog gud an mga tawo ha pagtinguha hito, ha pagkamatuod ‘nananalinguha hira ha hangin.’—Ekles. 1:14.
2. (a) Ano nga balos an igin-aaghat han Dios nga tinguhaon han pipira nga Kristiano? (b) Ano nga paglaom an iginhahatag ni Jehova ha kadam-an nga Kristiano yana?
2 Kabaliktaran hito, igin-aaghat ni apostol Pablo an mapulsanon nga tumong nga sadang tinguhaon han mga Kristiano. Hiya nagsurat: “Nagpapadayon [“Nagtitinguha,” NW] ako ngadto ha kataposan tungod ha balos han hitaas nga pagtawag han Dios [pinaagi] kan Kristo Jesus.” (Fil. 3:14) Mababasa ha Biblia nga 144,000 nga dinihogan nga Kristiano, upod na hi Pablo, an makarawat hito nga balos nga kinabuhi ha langit. Maghahadi hira kaupod ni Kristo ha iya Milenyo nga Pagmando ha tuna. Makalilipay gud nga tumong an igin-aaghat han Dios ha ira nga pagtinguhaon! Kondi, an kadam-an han tinuod nga Kristiano yana may-ada iba nga paglaom o tumong. Mahigugmaon nga iginhahatag ni Jehova ha ira an waray pabilhi nira Adan ngan Eva, an paglaom nga mabuhi ha waray kataposan nga may hingpit nga kahimsog ha paraiso nga tuna.—Pah. 7:4, 9; 21:1-4.
3. Paonan-o naton maipapakita an apresasyon ha diri-takos nga pagkabuotan han Dios?
3 An makasasala nga mga tawo diri magkakaada kinabuhi nga waray kataposan pinaagi han ira diri-hingpit nga mga pangalimbasog ha pagbuhat han husto. (Isa. 64:6) Posible la an pagkaada kinabuhi nga waray kataposan pinaagi han pagtoo ha mahigugmaon nga tagana han Dios nga kaluwasan pinaagi kan Jesu-Kristo. Ano an aton bubuhaton basi ipakita an apresasyon ha diri-takos nga pagkabuotan han Dios? An usa nga paagi amo an pagsugot ha iya sugo: “Tinguhaa an pagkamatadong, diosnon nga debosyon, pagtoo, gugma, pagpailob, [ngan] pagkamalumo.” (1 Tim. 6:11, NW) Kon pamalandungon naton ini nga mga kalidad, makakabulig ini ha tagsa ha aton nga magin mas determinado ha pagtinguha hini hin “[labi] pa gud.”—1 Tes. 4:1.
“Tinguhaa an Pagkamatadong”
4. Kay ano nga sigurado kita nga importante an pagtinguha han “pagkamatadong,” ngan ano an kinahanglan buhaton anay han usa?
4 Ha duha nga surat ni apostol Pablo kan Timoteo, iya gin-unabi an mga kalidad nga sadang tinguhaon, ngan ha tagsa hito, siyahan nga gin-unabi niya an “pagkamatadong.” (1 Tim. 6:11, NW; 2 Tim. 2:22) Dugang pa, ha iba nga teksto ha Biblia pauroutro nga gin-aaghat kita nga tinguhaon an pagkamatadong. (Prob. 15:9; 21:21; Isa. 51:1) An usa nga paagi ha pagbuhat hito amo an ‘pagkilala ha amo la nga matuod nga Dios, ngan kan Jesu-Kristo nga iya ginpakanhi.’ (Juan 17:3) Magpapagios ito ha usa nga magbasol ha naglabay nga mga sala ngan ‘bumalik’ basi buhaton an kaburut-on han Dios.—Buh. 3:19.
5. Ano an kinahanglan buhaton naton basi magin matadong ha paniplatan han Dios ngan matipigan ito?
5 Minilyon nga sinsero nga nagtitinguha han pagkamatadong an nagdedikar han ira kinabuhi kan Jehova ngan ginsimbolohan ito pinaagi han pagpabawtismo ha tubig. Kon bawtismado ka na yana, nahunahuna mo na ba nga kinahanglan makita ha imo pagkinabuhi nga padayon nga gintitinguha mo an pagkamatadong? An usa nga paagi ha pagbuhat hito amo an pagsabot kon ano an “maopay ngan maraot” sumala ha Biblia kon nagdidesisyon ka. (Basaha an Hebreo 5:14.) Pananglitan, kon solo ka nga Kristiano nga angay na mag-asawa, determinado ka gud ba nga likyan an pagkaada romantiko nga pagbati ha usa nga diri bawtismado nga Kristiano? Oo, kon gintitinguha mo an pagkamatadong.—1 Kor. 7:39.
6. Ano an nahiuupod ha kinasingkasing nga pagtinguha han pagkamatadong?
6 An pagin matadong iba ha pagpakamatadong ha kalugaringon o sobra nga pagpakamatadong. (Ekles. 7:16) Hi Jesus nagpahamangno kontra han sugad nga pakita la nga pagpakamatadong basi sidngon nga mas maopay hiya kay ha iba. (Mat. 6:1) Kinahanglan nga tikang gud ha kasingkasing an pagtinguha han pagkamatadong—an pagtadong han sayop nga mga panhunahuna, paggawi, motibo, ngan hingyap. Kon padayon nga pangalimbasogan naton ini, posible gud nga diri kita makasala hin seryoso. (Basaha an Proberbios 4:23; itanding an Jakobo 1:14, 15.) Dugang pa, bibendisyonan ngan bubuligan kita ni Jehova ha pagtinguha han iba pa han importante nga Kristiano nga kalidad.
“Tinguhaa an . . . Diosnon nga Debosyon”
7. Ano an “diosnon nga debosyon”?
7 An debosyon nag-uupod hin sinsero nga pagin dedikado ngan maunungon. Nagkomento an usa nga diksyonaryo han Biblia nga an Griego nga pulong nga iginhubad nga “diosnon nga debosyon,” naghuhulagway han “gimaopayi ngan sinsero nga pagpabili han kahadlok ha Dios.” Agsob nga napakyas an mga Israelita ha pagpakita hito nga debosyon, sugad han ira mga pagtalapas bisan han natapos pa la hira talwason han Dios tikang ha Ehipto.
8. (a) Ano nga pakiana an binangon tungod han pakasala ni Adan? (b) Paonan-o iginpahayag an baton ha sagrado nga “tinago”?
8 Ha sulod hin yinukot ka tuig tikang nga nakasala an hingpit nga hi Adan, waray mabaton ini nga pakiana, “May-ada ba tawo nga makakapakita hin hingpit nga diosnon nga debosyon?” Durante hito, waray makasasala nga tawo an nagkinabuhi nga may hingpit nga diosnon nga debosyon. Kondi ha itinanda nga panahon ni Jehova, iya iginpahayag an baton hinin sagrado nga “tinago.” Iginbalhin niya an kinabuhi han iya bugtong nga Anak ha langit ngadto ha tagoangkan ni Maria basi ig-anak sugad nga hingpit nga tawo. Ha bug-os nga kinabuhi ni Jesus ha tuna upod na an iya makaarawod nga kamatayon, ipinakita niya kon ano an kahulogan han sinsero nga pagin dedikado ngan bug-os nga maunungon ha matuod nga Dios. Iginpahayag han iya mga pag-ampo an hilarom nga pagpasidungog ha iya mahigugmaon nga Amay ha langit. (Mat. 11:25; Juan 12:27, 28) Salit, gin-giyahan ni Jehova hi Pablo nga hisgotan an “pagkadiosnon [“diosnon nga debosyon,” NW]” ha paghulagway han susbaranan nga pagkinabuhi ni Jesus.—Basaha an 1 Timoteo 3:16.
9. Paonan-o naton titinguhaon an diosnon nga debosyon?
9 Tungod kay makasasala kita, diri naton maipapakita an hingpit nga diosnon nga debosyon. Kondi mahimo naton tinguhaon ito. Basi mahimo ito, kinahanglan sundon gud naton an susbaranan ni Kristo. (1 Ped. 2:21) Salit diri naton susubaron an mga salingkapaw nga ‘may dagway han [diosnon nga debosyon] kondi ginwawara an gahum hito.’ (2 Tim. 3:5) Diri ini nangangahulogan nga an tinuod nga diosnon nga debosyon waray kalabotan ha hitsura. Nahiuupod liwat ito. Pananglitan, nagpipili man kita hin bado para ha kasal o nagdidesisyon kon ano an isusul-ot ha pamalit, an aton hitsura kinahanglan nga angayan pirme ha aton pagpamatuod sugad nga “nagtatahod ha Dios.” (1 Tim. 2:9, 10) Oo, ha aton pagtinguha han diosnon nga debosyon, kinahanglan sundon naton an matadong nga mga prinsipyo han Dios ha aton adlaw-adlaw nga pagkinabuhi.
“Tinguhaa an . . . Pagtoo”
10. Ano an kinahanglan buhaton naton basi matipigan nga marig-on an aton pagtoo?
10 Basaha an Roma 10:17. Basi mapauswag ngan magpabilin nga marig-on an pagtoo, kinahanglan padayon nga pamalandungon han usa nga Kristiano an birilhon nga mga kamatuoran ha Pulong han Dios. Nagtatagana “an matinumanon ngan maaramon nga uripon” hin damu nga mag-opay nga publikasyon. Tulo han maopay gud nga libro amo an The Greatest Man Who Ever Lived, Mahibaro Tikang ha Bantogan nga Magturutdo, ngan “Kadi, Sunod ha Akon,” nga nabulig ha aton nga mas makilala pa hi Kristo ngan masubad hiya. (Mat. 24:45-47, NW) An uripon nga klase naghihikay hin mga katirok, asembleya, ngan kombensyon, nga ha damu hito pinabubug-atan an “pulong [mahitungod kan] Kristo.” Naghihimo ka ba hin mga paagi basi mas magpahimulos hini samtang ‘naghahatag hin labaw ha kasagaran nga pagtagad’ ha mga igintatagana han Dios?—Heb. 2:1, NW.
11. Ano an naibubulig han pag-ampo ngan pagsunod ha aton pagtinguha han pagtoo?
11 An pag-ampo usa pa nga bulig ha pagkaada marig-on nga pagtoo. Makausa, an mga sumurunod ni Jesus naghangyo: “Dugangi an amon pagtoo.” Mahimo liwat naton mapainubsanon nga hangyoon ito ha Dios. (Luk. 17:5) Basi madugangan pa an aton pagtoo, sadang kita mag-ampo han bulig han baraan nga espiritu han Dios tungod kay an pagtoo usa han “bunga han espiritu.” (Gal. 5:22) Dugang pa, an pagsunod ha mga sugo han Dios nagpaparig-on han aton pagtoo. Pananglitan, mahimo naton dugangan pa an panahon ha pagsangyaw. Sigurado nga makakahatag ito ha aton hin duro nga kalipay. Ngan samtang ginpapamalandong naton an mga bendisyon tungod ha ‘pamiling siyahan han ginhadian han Dios ngan han iya pagkamatadong,’ mag-uuswag an aton pagtoo.—Mat. 6:33.
“Tinguhaa an . . . Gugma”
12, 13. (a) Ano an bag-o nga sugo ni Jesus? (b) Ano an importante nga mga paagi ha pagtinguha han gugma nga sugad han kan Kristo?
12 Basaha an 1 Timoteo 5:1, 2. Hi Pablo naghatag hin praktikal nga sagdon kon paonan-o maghihigugmaay an mga Kristiano. Kinahanglan nga kaupod han aton diosnon nga debosyon an pagsugot ha bag-o nga sugo ni Jesus nga “maghigugmaay an usa kag usa” sugad han paghigugma niya ha aton. (Juan 13:34) Hi apostol Juan nagsiring: “Kon hin-o an may bahandi nga kalibotanon, ngan makita niya an iya bugto nga aada ha kakablasan, ngan diri niya kalooyan an iya bugto, oonan-on an pagbilin han gugma han Dios dida ha iya?” (1 Juan 3:17) May-ada ka ba nahinunumdoman nga mga higayon diin naipakita mo an gugma ha praktikal nga paagi?
13 An usa pa nga paagi ha pagtinguha han gugma amo an pagin mapinasayloon, diri nagdudumot ha aton kabugtoan. (Basaha an 1 Juan 4:20.) Lugod, ginsusunod naton ini nga giniyahan nga sagdon: “Mag-inantusay kamo an usa kag usa, ngan magpinasayloay kamo an usa kag usa, kon may-ada usa ka tawo nga may igsusumbong kontra ha iba; sugad nga an Ginoo nagpasaylo ha iyo, sugad man buhaton ini niyo.” (Kol. 3:13) Maiaaplikar mo ba ini nga sagdon ha imo relasyon ha usa dida ha kongregasyon? Pasasayloon mo ba hiya?
“Tinguhaa an . . . Pagpailob”
14. Ano an mahibabaroan naton tikang ha kongregasyon ha Piladelpia?
14 Maopay gud an pangalimbasog basi matuman an masayon kab-uton nga mga tumong kondi mas maopay an pangalimbasog nga makab-ot an mga tumong nga mas makuri o mas maiha kab-uton kay ha aton ginlalaoman. Matin-aw, nagkikinahanglan hin pagpailob an pagtinguha han tumong nga kinabuhi nga waray kataposan. “Tungod kay gintuman mo an akon ginsiring mahitungod han pagpailob, pagbabantayan ko man liwat ikaw ha oras ha pagsulay,” siring han Ginoo nga hi Jesus ha kongregasyon ha Piladelpia. (Pah. 3:10; Rbi8-E ftn.) Oo, hi Jesus nagtutdo mahitungod han pagkaimportante han pagpailob—usa nga kalidad nga nabulig ha aton nga diri magpadaog kon naatubang hin mga pagsari ngan pagsulay. An kabugtoan ha kongregasyon ha Piladelpia han siyahan nga siglo sigurado nga nagpakita hin diri-ordinaryo nga pagpailob ha damu nga pagsari han pagtoo. Salit, ginpasarig hira ni Jesus nga padayon nga bubuligan hira ha tiarabot nga mas daku nga pagsari.—Luk. 16:10.
15. Ano an igintutdo ni Jesus mahitungod han pagpailob?
15 Maaram hi Jesus nga an iya mga sumurunod kangangalasan han diri-tumuroo nga mga paryente ngan han kalibotan ha kabug-osan, salit diri maminos ha duha nga okasyon, iya ginsidngan hira: “An magpadayon tubtob ha kataposan, ini amo an maluluwas.” (Mat. 10:22; 24:13) Iginsaysay liwat niya ha ira hito nga panahon kon paonan-o an iya mga disipulo magkakaada han kinahanglanon nga kusog basi makailob. Ha usa nga ilustrasyon, iya iginpariho an batoon nga tuna ha mga tawo nga ‘malipayon nga nakarawat han pulong’ han Dios pero binabayaan ito kon ginsasarihan an ira pagtoo. Kondi, iginpariho niya an iya magtinumanon nga sumurunod ha maopay nga tuna tungod kay ‘nagpapadayon’ hira ha pagtipig han pulong han Dios ngan ‘namumunga nga may pagpailob.’—Luk. 8:13, 15.
16. Ano nga mahigugmaon nga tagana an nakakabulig ha minilyon nga makapailob?
16 Hinbaroan mo ba an sekreto ha pagpailob? Kinahanglan ‘padayon’ nga tipigan naton ha kasingkasing ngan hunahuna an pulong han Dios. Mahihimo ngan posible ito tungod kay iginhuhubad na ha mas damu nga yinaknan an New World Translation of the Holy Scriptures—an husto ngan masayon masabtan nga hubad han Biblia. Kon aton pamalandungon an pipira nga teksto han Pulong han Dios kada adlaw, mabulig ito ha aton nga magkaada han kinahanglanon nga kusog basi makapadayon ha pamunga ‘nga may pagpailob.’—Sal. 1:1, 2.
“Tinguhaa an . . . Pagkamalumo” Ngan Kamurayawan
17. (a) Kay ano nga importante gud an “pagkamalumo”? (b) Paonan-o ipinakita ni Jesus nga malumo hiya?
17 Waray bisan hin-o an maruruyag akusahan hin waray niya yakna o buhata. Kasagaran nga nasisina nga nagninigar adton ginpapakaraot nga waray basihan. Ha sugad nga kahimtang, maopay gud nga magpakita hin “pagkamalumo”! (Basaha an Proberbios 15:1.) Kinahanglan an duro nga pagpugong basi magin malumo kon nakakaeksperyensya hin waray basihan nga pakaraot. Hi Jesu-Kristo nagpakita hin hingpit nga susbaranan may kalabotan hini. “Han pagpakaalohi ha iya, waray hiya bulos hin pagpakaalo; han iya pag-antos, waray hiya magtarhog; kondi nga igintubyan niya an iya kalugaringon ngadto ha naghuhukom hin matadong.” (1 Ped. 2:23) Diri naton mabubuhat an pariho han ginbuhat ni Jesus may kalabotan hini, kondi mahimo ba naton pangalimbasogan nga mapauswag an aton pagpakita hin pagkamalumo?
18. (a) Ano nga kaopayan an nahihimo han pagkamalumo? (b) Ano pa nga kalidad an igin-aaghat ha aton nga tinguhaon?
18 Sugad nga pagsubad kan Jesus, hinaot magin ‘andam pirme kita ha pagbaton’ o pagdepensa han aton mga gintotoohan, ‘nga may kaaghop ngan pagtahod.’ (1 Ped. 3:15) Oo, an aton pagkamalumo makakapugong ha aton nga masina dayon kon an mga opinyon han mga nasasangyawan naton ngan han mga igkasi-tumuroo nga nakakaistorya naton, iba kay ha aton. (2 Tim. 2:24, 25) An pagkamalumo nabulig ha aton nga magkaada kamurayawan. Posible nga ito an hinungdan kon kay ano nga an ‘kamurayawan’ usa han mga kalidad nga igin-aghat ni Pablo nga tinguhaon ha iya ikaduha nga surat kan Timoteo. (2 Tim. 2:22; itanding an 1 Timoteo 6:11, NW.) Oo, an ‘kamurayawan’ usa pa nga kalidad nga igin-aaghat ha aton han Kasuratan nga tinguhaon.—Sal. 34:14; Heb. 12:14.
19. Katapos paghisgotan an pito nga Kristiano nga kalidad, ano an imo determinado nga tinguhaon, ngan kay ano?
19 Ginhisgotan pa la naton an pito nga Kristiano nga kalidad nga igin-aaghat ha aton nga tinguhaon—an pagkamatadong, diosnon nga debosyon, pagtoo, gugma, pagpailob, pagkamalumo, ngan kamurayawan. Makalilipay gud kon mangangalimbasog an kabugtoan ha tagsa nga kongregasyon nga mas maipakita inin mag-opay nga kalidad! Magpapasidungog ini kan Jehova ngan mamumolde niya an tagsa ha aton para ha iya kadayawan.
Mga Punto nga Sadang Pamalandungon
• Ano an nahiuupod ha pagtinguha han pagkamatadong ngan diosnon nga debosyon?
• Ano an mabulig ha aton nga tinguhaon an pagtoo ngan pagpailob?
• Ano an sadang magin epekto han gugma ha aton relasyon ha usa kag usa?
• Kay ano nga kinahanglan tinguhaon naton an pagkamalumo ngan kamurayawan?
[Mga Pakiana]
[Retrato ha pahina 12]
Nagpahamangno hi Jesus kontra han pakita la nga pagpakamatadong basi dayawon han mga tawo
[Retrato ha pahina 13]
Gintitinguha naton an pagtoo pinaagi han pamalandong ha mga kamatuoran ha Pulong han Dios
[Retrato ha pahina 15]
Gintitinguha naton an gugma ngan pagkamalumo