Mga Pakiana Tikang ha mga Magbarasa

Hi apostol Pablo nagsiring nga ‘an bug-os nga Israel maluluwas.’ (Roma 11:26) An iya ba iginpapasabot nga an ngatanan nga Judio makukombirte ha Kristianidad?

Diri, diri ito an iginpapasabot ni Pablo. Sugad nga nasud, an katulinan ni Abraham nagdumiri pagkarawat kan Jesus sugad nga Mesias. Ngan ha mga tuig katapos mamatay hi Jesus, nagin matin-aw nga diri makukombirte ha Kristianidad an mga Judio sugad nga grupo. Bisan pa hito, tinuod an siring ni Pablo nga ‘an bug-os nga Israel maluluwas.’ Ha ano nga paagi?

Hi Jesus nagsiring ha Judio nga mga lider han relihiyon ha iya panahon: ‘An ginhadian han Dios kukuhaon ha iyo, ngan ihahatag ha usa nga nasud, nga magbubunga hin mga bunga hini.’ (Mat. 21:43) Tungod kay nagdumiri ha pagkarawat kan Jesus an nasud han Israel ha kabug-osan, magpipili hi Jehova hin bag-o nga nasud nga pagkukompwestohon hin indibiduwal nga gindihogan han espiritu han Dios. Gintawag ito ni Pablo nga ‘Israel han Dios.’—Gal. 6:16.

Ginpapamatud-an han iba nga teksto ha Kristiano Griego nga Kasuratan nga an ‘Israel han Dios’ ginkukompwesto han 144,000 nga dinihogan ha espiritu nga mga Kristiano. (Roma 8:15-17; Pah. 7:4) Ginparig-on han Pahayag 5:9, 10 nga ini nga grupo nag-uupod hin mga diri Judio nga nagpapakita nga an dinihogan nga mga Kristiano “tikang ha tagsa-tagsa nga panon, ngan yinaknan, ngan katawohan, ngan nasud.” An mga membro han espirituwal nga Israel espesyal nga ginpili basi magin “ginhadian ngan mga saserdote; ngan naghahadi hira ha tuna.” Bisan kon iginsalikway ni Jehova an Israel sugad nga pinili nga nasud, an mga indibiduwal mahimo magkaada maopay nga relasyon ha iya. Ito an kahimtang han mga apostol ngan han iba nga Kristiano ha siyahan nga siglo. Syempre, ito nga mga Judio, pariho han iba nga katawohan, kinahanglan malukat han dugo ni Jesu-Kristo.—1 Tim. 2:5, 6; Heb. 2:9; 1 Ped. 1:17-19.

Nawara han kadam-an nga unudnon nga Judio han siyahan nga siglo an ira higayon nga magin igkasi-magmarando ni Jesus, kondi bisan pa hito waray ini makapugong han kaburut-on han Dios. Diri gud ito mapupugngan, tungod kay hi Jehova nagsiring pinaagi han iya propeta: “Maaamo man an akon pulong nga magawas ha akon baba: diri ini mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.”—Isa. 55:11.

Tinuod ito may kalabotan ha katuyoan han Dios ha pag-establisar han 144,000 nga magmamando kaupod han iya Anak ha langit. Iginpapatin-aw han Biblia nga didihogan han Dios an kompleto nga numero nga 144,000. Waray usa an sadang makulang tikang hito!—Pah. 14:1-5.

Kon sugad, han iginsurat ni Pablo nga ‘an bug-os nga Israel maluluwas,’ diri hiya nagtatagna nga an ngatanan nga Judio magigin Kristiano. Lugod, iginpapasabot niya nga matutuman an katuyoan han Dios nga magkaada 144,000 nga espirituwal nga Israelita nga magmamando upod han iya Anak, hi Jesu-Kristo, ha langit. Ha itinanda nga panahon han Dios, an kompleto nga numero—“bug-os nga Israel”—magigin aada ha talwas nga kahimtang nga ha urhi magmamando sugad nga mga hadi ngan saserdote ha Mesianiko nga Ginhadian.—Efe. 2:8.

[Mga Retrato ha pahina 28]

An dinihogan “tikang ha tagsa-tagsa nga panon, ngan yinaknan, ngan katawohan, ngan nasud”