Tipigi “an Imo Siyahan nga Gugma”

“Kapti hin marig-on an aada ha imo.”—PAH. 3:11.

1, 2. Ano an inabat mo han nakombinse ka nga kamatuoran an hinbaroan mo mahitungod kan Jehova?

 NAHINUNUMDOM ka ba han siyahan nga hinbaroan mo an urusahon nga paglaom nga igintatanyag ni Jehova ha masinugtanon nga katawohan? Kon iba hadto an imo relihiyon, ano an inabat mo han iginsaysay ha imo an mga katuyoan han Dios sumala ha Kasuratan o han iginpatin-aw ha imo an mga katutdoan nga makuri mo masabtan? Bangin nasantop mo nga waray igtutdo hadto ha imo an kamatuoran mahitungod han Dios. Kondi nalilipay ka gud yana nga maaram ka na han kamatuoran! Kon ginpadaku ka han Kristiano nga mga kag-anak, nahinunumdoman mo ba an inabat mo han nakombinse ka nga kamatuoran an hinbabaroan mo mahitungod kan Jehova ngan nagdesisyon ka nga magkinabuhi uyon hito?—Roma 12:2.

² Damu han imo espirituwal nga kabugtoan an magsusumat ha imo nga hira malipayon gud, duok kan Jehova, ngan mapasalamaton nga ginpahirani hira ha iya. (Juan 6:44) An ira kalipay nagpagios ha ira nga makigbahin ha Kristiano nga mga buruhaton. Malipayon gud  hira salit karuyag nira isumat ha ngatanan an ira inabat. Naeksperyensyahan mo ba liwat ito?

3. Ano an kahimtang han kongregasyon ha Efeso han ginpadad-an hira ni Jesus hin mensahe?

³ Han nagpadara hi Jesus hin mensahe ha kongregasyon han Efeso ha siyahan nga siglo, gin-unabi niya an ira “siyahan nga gugma.” Damu an ira mag-opay nga kalidad, kondi nagtikawara an ira gugma kan Jehova. Salit, hi Jesus nagsiring ha ira: “Maaram ako han imo mga buhat, ngan kabudlayan, ngan pag-ilob, ngan diri ka makakaantos ha mga magraot nga mga tawo, ngan ginproybahan mo adton mga nagpapakaaro-apostol, ngan diri man hira, ngan hin-agian mo hira nga mga buwaon; ngan nag-ilob ka ngan nagkabudlay tungod ha akon ngaran, ngan waray ka kapoya. Kondi may-ada ko kontra ha imo, nga imo binayaan an imo siyahan nga gugma.”—Pah. 2:2-4.

4. Kay ano nga angayan yana an mensahe ni Jesus ha mga taga-Efeso?

⁴ Angayan an sagdon ni Jesus ha mga taga-Efeso ngan ha iba nga kongregasyon nga iya gin-unabi ha libro han Pahayag tungod han mga kahimtang nga naeksperyensyahan han dinihogan nga mga Kristiano tikang han 1914 padayon. (Pah. 1:10) Kondi, bisan yana posible nga mawara han iba nga Kristiano an ira “siyahan nga gugma” kan Jehova ngan ha kamatuoran. Tungod hito, aton usisahon pinaagi han paghinumdom ngan pamalandong han imo mga eksperyensya, kon paonan-o mo matitipigan, mapaparig-on, ngan mapapauswag an imo siyahan nga gugma ha Dios ngan ha kamatuoran.

Ano an Nakakombinse ha Imo nga Ini an Kamatuoran?

5, 6. (a) An tagsa nga Kristiano kinahanglan makombinse han ano? (b) Ano an nakakombinse ha imo nga an mga Saksi ni Jehova nagtututdo han kamatuoran? (c) Ano an makakabulig ha usa nga maparig-on an iya siyahan nga gugma?

⁵ Kinahanglan mapamatud-an anay han tagsa nga nagdidedikar kan Jehova kon ano ‘an maopay ngan makaruruyag ngan hingpit nga kaburut-on han Dios.’ (Roma 12:1, 2) Usa han mga nahiuupod hito amo an paghibaro han kamatuoran ha Biblia. An nakakombinse ha usa nga an mga Saksi ni Jehova nagtututdo han kamatuoran bangin diri pariho han nakakombinse ha iba. Nahinunumdoman han iba nga nagbag-o hira han nabasa nira an ngaran han Dios ha Biblia o han nasabtan nira an totoo nga kahimtang han mga patay. (Sal. 83:18; Ekles. 9:5, 10) Nakabantad ha iba an paghigugmaay han katawohan ni Jehova. (Juan 13:34, 35) Ngan an iba nakombinse han kahulogan han pagin diri bahin han kalibotan. Nasabtan nira nga an tinuod nga mga Kristiano diri naghihilabot ha mga araway ha politika o ha mga girra han bisan ano nga nasud.—Isa. 2:4; Juan 6:15; 17:14-16.

⁶ Para ha damu, an paghibaro han mga impormasyon nga gin-unabi na ngan iba pa nga  kamatuoran amo an nakaaghat han ira siyahan nga gugma ha Dios. Hunahunaa kon ano an nakakombinse ha imo nga ini an kamatuoran. An tagsa nga tawo naiiba an personalidad ngan an kahimtang ha kinabuhi, salit an imo importante nga mga hinungdan ha paghigugma kan Jehova ngan pagtoo ha iya mga saad bangin diri pariho ha iba. Posible gud nga tubtob yana ito pa gihapon an imo mga hinungdan tikang nga hinbaroan mo ito. An kamatuoran waray mabag-o. Salit, an pagrepaso hito nga mga panhunahuna ngan pagbati makakaparig-on han imo siyahan nga gugma ha kamatuoran.—Basaha an Salmo 119:151, 152; 143:5.

Parig-ona an Imo Siyahan nga Gugma

7. Kay ano nga kinahanglan parig-unon naton an aton siyahan nga gugma ha kamatuoran, ngan paonan-o?

⁷ Bangin damu na an nabag-o ha imo kinabuhi tikang nga nagdedikar ka kan Jehova. Importante an imo siyahan nga gugma ha kamatuoran, kondi samtang nalabay an panahon, kinahanglan parig-unon mo ito basi makaatubang ka ha bag-o nga mga pagsari ha imo pagtoo. Pero ginbuligan ka ni Jehova. (1 Kor. 10:13) Salit, an imo mga eksperyensya ha naglabay nga katuigan presyoso liwat ha imo. Nakabulig ito ha imo nga maparig-on an imo siyahan nga gugma, ngan usa pa ito nga paagi nga mapapamatud-an mo an maopay ngan makaruruyag nga kaburut-on han Dios.—Jos. 23:14; Sal. 34:8.

8. Paonan-o nagpakilala hi Jehova kan Moises, ngan paonan-o Hiya mas nakilala han mga Israelita?

⁸ Sugad nga ehemplo, tagda an kahimtang han mga Israelita han iginsaysay ni Jehova an iya katuyoan nga tatalwason hira ha pagkauripon ha Ehipto. Nagpakilala an Dios kan Moises, nasiring: “Ako magigin sugad han anoman nga ako magigin sugad.” (Eks. 3:7, 8, 13, 14, NW) Nangangahulogan ini nga hi Jehova puydi magin bisan ano nga ginkikinahanglan basi talwason an iya katawohan. Ha sumunod nga mga hitabo ngan han ginkinahanglan han kahimtang, nakita han mga Israelita nga iginpahayag ni Jehova an magkalain-lain nga bahin han iya personalidad—sugad nga Makagarahum-ha-ngatanan, Hukom, Lider, Paratalwas, Girriro, ngan Paratagana.—Eks. 12:12; 13:21; 14:24-31; 16:4; Neh. 9:9-15.

9, 10. Ha ano nga kahimtang mabubuligan an usa nga makilala an Dios, ngan kay ano nga maopay hinumdoman ito nga mga eksperyensya?

⁹ An imo kahimtang naiiba ha mga Israelita hadto. Bisan pa hito, posible nga may-ada ka mga eksperyensya nga nakakombinse ha imo nga an Dios nagtatagad ha imo, nga nagparig-on han imo pagtoo. Bangin ha pipira nga paagi hi Jehova nagin Paratagana, Paraliaw, o Magturutdo. (Basaha an Isaias 30:20b, 21.) O bangin inabat mo nga ginbaton gud an imo pag-ampo. Bangin nakaeksperyensya ka hin kakurian, ngan binuligan ka han imo Kristiano nga bugto. O ha imo personal nga pag-aram nakabasa ka hin mga teksto nga angayan ha imo kahimtang.

¹⁰ Kon isumat mo ha iba ito nga mga eksperyensya, an pipira bangin diri maaghat tungod kay diri man ito milagroso. Kondi para ha imo, birilhon gud ito. Oo, pinamatud-an ni Jehova nga karuyag niya magin bisan ano para ha imo kon ginkikinahanglan han kahimtang. Hunahunaa an naglabay nga mga tuig tikang nga nahibaro ka han kamatuoran. Nahinunumdoman mo ba an damu nga higayon han inabat mo an pagmangno ni Jehova ha imo? Makakaaghat utro ito han imo gugma kan Jehova nga inabat mo hadto. Pabilhi ito nga mga eksperyensya. Pamalandonga ito. Ebidensya ito nga hi Jehova nagtatagad ha imo, ngan waray bisan hin-o nga makakapaundang ha imo ha pagtoo hito.

Usisaha an Imo Kalugaringon

11, 12. Kon nagtitikawara an gugma ha kamatuoran han usa nga Kristiano, ano an posible nga hinungdan, ngan ano an iginsagdon ni Jesus?

¹¹ Kon an imo gugma yana ha Dios ngan ha kamatuoran diri na pariho hadto, diri ito tungod kay nagbag-o hiya. Hi Jehova diri gud nagbabag-o. (Mal. 3:6; Jak. 1:17) Tikang hadto tubtob yana, nagtatagad hiya ha imo. Salit, kon may-ada nabag-o ha imo relasyon kan Jehova, ano an hinungdan hito? Tungod ba kay mas naguguol ka ngan mas nababaraka ha kinabuhi? Bangin hadto mas sinsero ka mag-ampo, mas  maduruto mag-aram, ngan mas agsob mamalandong. Mas madasigon ka ba ha ministeryo ngan regular nga natambong ha mga katirok hadto kay ha yana?—2 Kor. 13:5.

¹² Bangin diri mo inaabat ito nga mga pagbag-o, kondi kon usisahon mo an imo kalugaringon, ano an hinungdan hito? Tungod ba han makatadunganon nga mga responsabilidad, sugad han igo nga pagtagana para ha imo pamilya, pagmangno han imo kahimsog, o iba pa nga obligasyon, naibanan an imo pag-abat hin pagkaapurado may kalabotan ha pagkahirani han adlaw ni Jehova? Hi Jesus nagsiring ha iya mga apostol: “Pagmatngon kamo ha iyo kalugaringon, bangin an iyo mga kasingkasing mabug-atan han kahakog, ngan kaparahubog, ngan mga pangarit hini nga kinabuhi; ngan ito nga adlaw ha kadagmitan maabot ha iyo sugad hin lit-ag. Kay ito maabot ha ngatanan nga maukoy ha bayhon han bug-os nga tuna. Busa, pag-agmahi niyo ha ngatanan nga panahon, ngan mag-ampo basi kamo magpakapalagiw ha ngatanan hini nga mga bagay nga maabot.”—Luk. 21:34-36.

13. Ha ano iginpariho ni Jakobo an Pulong han Dios?

¹³ An giniyahan nga parasurat han Biblia nga hi Jakobo nagsagda ha iya mga igkasi-tumuroo nga usisahon hin tangkod an ira kalugaringon pinaagi han Pulong han Dios. Hi Jakobo nagsurat: “Mahimo kamo nga mga magburuhat han pulong, ngan diri la mamarati, nga paglinimbungon ha iyo la ngahaw. Kay kon an usa ka tawo mamarati ha pulong ngan diri magburuhat, ini hiya sugad hin usa ka tawo nga nagtatan-aw han iya nawong nga kinaiya dida ha espiho. Kay nagtinan-aw hiya ha iya la ngahaw, ngan iniwas, ngan dayon ha kadagmitan hinkalimtan niya kon mationan-o nga tawo hiya. Kondi an nagtan-aw ha hingpit nga balaud, an balaud han kaluwasan, ngan nagpapadayon hito, nga diri mamarati nga lilimuton kondi magburuhat nga nagbubuhat, ini nga tawo mabubulahan ha iya buhat.”—Jak. 1:22-25.

14, 15. (a) Paonan-o makakabulig ha imo an Biblia ha pagpauswag han imo espirituwalidad? (b) Ano nga mga pakiana an mahimo mo pamalandungon?

¹⁴ An usa nangingispiho basi masiguro nga maopay hiya pagkit-on. Pananglitan, kon makita niya nga nahiwi an iya kurbata, gin-oopay niya ito. Kon makita han usa nga babaye nga nagunggong hiya, nanunudlay hiya. Sugad man, an Kasuratan nabulig ha aton nga usisahon kon ano kita. Kon aton itanding an aton kalugaringon ha ginsisiring han Biblia nga sadang magin personalidad naton, ginagamit naton ito sugad hin espiho. Kondi ano an kapulsanan han pangispiho kon diri naton uupayon an depekto nga aton nakita? Maaramon kita kon aton buhaton an uyon ha aton nababasa ha “hingpit nga balaud” han Dios, ngan nagigin “mga magburuhat” hito. Salit, kon masantop han bisan hin-o nga nagtitikawara na an ira siyahan nga gugma kan Jehova ngan ha kamatuoran, sadang pamalandungon nira ini nga mga pakiana: ‘Ano nga mga pag-ipit an inaatubang ko ha kinabuhi, ngan paonan-o ko ito ginsusulbad? Paonan-o ko ginsulbad ito hadto? May-ada ba nabag-o?’ Kon ha sugad nga pag-usisa ha kalugaringon may-ada ka nakita nga anoman nga kaluyahan, ayaw igbalewaray ito. Kon kinahanglanon an pagbag-o, buhata dayon ito.—Heb. 12:12, 13.

¹⁵ An pamalandong makakabulig liwat ha imo nga magkaada praktikal nga mga tumong basi mag-uswag ha espirituwal. Hi apostol Pablo  nagsagdon ha iya igkasi-magburuhat nga hi Timoteo basi mag-uswag ha iya ministeryo. Iya ginsagda hiya: “Magmaabtik ka hini nga mga bagay; buhata gud ini nga mga bagay; basi nga an imo kauswagan mahipahayag ha ngatanan.” Sadang pamalandungon liwat naton pinaagi han Pulong han Dios kon ano an mahimo naton pauswagon.—1 Tim. 4:15.

16. Ano nga peligro an kinahanglan likyan kon gin-uusisa mo an imo kalugaringon nga ginagamit an Kasuratan?

¹⁶ Kon tangkod nga uusisahon mo an imo kalugaringon, posible gud nga masantop mo nga may-ada ka pipira nga kaluyahan. Mahimo ito makapasubo ha imo, kondi ayaw padaog hito. Amo nga gin-uusisa naton an aton kalugaringon basi hibaroan kon ano an kinahanglan pauswagon. Syempre karuyag ni Satanas nga umabat an usa nga Kristiano nga waray pulos hiya tungod han iya pagkadiri-hingpit. Ha pagkamatuod, iya gin-akusahan an Dios nga ginbabalewaray Niya an ngatanan nga pangalimbasog ha pag-alagad ha Iya. (Job 15:15, 16; 22:3) Pinamatud-an gud ni Jesus nga buwa ito tungod kay hinigugma han Dios an kada usa ha aton. (Basaha an Mateo 10:29-31.) An paghibaro han imo mga kaluyahan sadang magpagios lugod ha imo nga mapainubsanon nga pauswagon an imo kalugaringon pinaagi han bulig ni Jehova. (2 Kor. 12:7-10) Kon an sakit o kalagas nakakaiban han imo mahihimo, magkaada praktikal nga mga tumong, kondi ayaw kahulop o pabay-i nga mawara an imo gugma.

Damu an Sadang Pasalamatan

17, 18. Ano an mga kapulsanan han pagparig-on han imo siyahan nga gugma?

¹⁷ Damu an kapulsanan han padayon nga pagparig-on han imo siyahan nga gugma. Mapapauswag mo an imo kahibaro ha Dios ngan an imo apresasyon ha iya mahigugmaon nga giya. (Basaha an Proberbios 2:1-9; 3:5, 6.) ‘Ha pagtuman han mga balaud ni Jehova may daku nga balos,’ siring han salmista. ‘An mga pahinumdom ni Jehova, nakakahimo ha usa nga magin makinaadmananon.’ Dugang pa, “bulahan adton mga hingpit ha dalan, ngan naglalakat ha balaud ni Jehova.”—Sal. 19:7, 11; 119:1.

¹⁸ Sigurado nga mauyon ka nga damu an maopay nga butang nga sadang mo pasalamatan. Nasasabtan mo an hinungdan han mga nahitatabo ha kalibotan. Nagpapahimulos ka han espirituwal nga pagmangno han Dios ha iya katawohan yana. Sigurado nga mapasalamaton ka liwat nga gindara ka ni Jehova ngada ha iya bug-os-kalibotan nga kongregasyon ngan tinagan ka hin pribilehiyo nga magin usa han iya mga Saksi. Pasalamati gud Hiya han damu nga bendisyon ha imo! Kon maghihimo ka hin listahan, posible nga hilaba ito. Kon agsob nga pamamalandungon mo an mga bendisyon ha imo, sigurado nga mabulig ito ha imo nga sundon an sagdon: “Kapti hin marig-on an aada ha imo.”—Pah. 3:11.

19. Dugang pa ha pamalandong han imo relasyon ha Dios, ano an kinahanglanon basi matipigan an espirituwal nga kahimsog?

¹⁹ An pamalandong kon paonan-o nag-uswag an imo pagtoo ha paglabay han katuigan usa la han mga paagi nga makakabulig ha imo nga kaptan hin marig-on an aada ha imo. Pauroutro nga iginpapatin-aw hini nga magasin an iba nga importante nga paagi nga makakabulig ha aton basi matipigan an aton espirituwal nga kahimsog. Kaupod hito an pag-ampo, pagtambong ngan pakigbahin ha Kristiano nga mga katirok, ngan madasigon nga pagsangyaw. Makakabulig ini ha imo nga padayon nga parig-unon ngan pauswagon an imo siyahan nga gugma.—Efe. 5:10; 1 Ped. 3:15; Jud. 20, 21.

Ano an Imo Baton?

• Paonan-o magpaparig-on ha imo yana an imo mga hinungdan ha paghigugma kan Jehova?

• An pamalandong ha imo mga eksperyensya ha naglabay nga katuigan makakakombinse ha imo han ano?

• Kay ano nga sadang usisahon mo an imo gugma ha Dios?

[Mga Pakiana]

[Retrato ha pahina 23]

Ano an nakadani ngan nakakombinse ha imo nga ini an kamatuoran?

[Retrato ha pahina 25]

May nakikita ka ba ha imo kalugaringon nga kinahanglan bag-ohon?