‘An Dios an Nagpapatubo Hito’!
‘An Dios an Nagpapatubo Hito’!
‘Hiya nga nagtatanom, hiya nga nagbibisibis waray bisan ano; kondi an Dios an nagpapatubo hito.’—1 KOR. 3:7.
1. Ha ano nga paagi kita nagigin “mga kabulig han Dios ha pagbuhat”?
“MGA kabulig han Dios ha pagbuhat.” Ito an paghulagway ni apostol Pablo ha pribilehiyo nga mahimo pahimulosan naton ngatanan. (Basaha an 1 Korinto 3:5-9.) An buruhaton nga iya ginhisgotan amo an paghimo hin mga disipulo. Iginpariho niya ito ha pagsabwag ngan pagbisibis ha “gahi” o binhi. Basi magin malampuson kita hiton importante nga buruhaton, kinahanglan naton an bulig ni Jehova. Ginpapahinumdoman kita ni Pablo nga an ‘Dios an nagpapatubo hito.’
2. Kay ano nga an paghibaro nga an ‘Dios an nagpapatubo,’ nakakabulig nga magkaada kita husto nga pagtagad ha aton ministeryo?
2 An kamatuoran nga kinahanglan naton an suporta ni Jehova nakakabulig ha aton nga magkaada husto nga pagtagad ha aton ministeryo. Bangin maduruto kita ha pagsangyaw ngan pagtutdo, kondi hi Jehova gud la an angay kumarawat han ngatanan nga kadayawan kon may-ada nagigin disipulo. Kay ano? Tungod kay bisan kon nangangalimbasog gud kita, diri naton bug-os nga nasasabtan kon paonan-o nagigin disipulo an usa, salit matin-aw nga waray kita mahihimo may kalabotan hito. Husto nga iginsaysay ito ni Hadi Salomon han hiya nagsurat: “Diri ka mahibabaro han buhat han Dios nga nagbubuhat han ngatanan.”—Ekles. 11:5.
3. Ano an pagkapariho han literal nga pagsabwag hin binhi ngan han paghimo hin disipulo?
3 Nanluluya ba kita ha aton buruhaton tungod kay waray kita abilidad ha pagsabot kon paonan-o an usa nagigin disipulo? Diri. Lugod, nakakapainteres ngan nakakapalipay ito. Hi Hadi Salomon nagsiring: “Ha aga pagsabwag han imo liso, ngan ha kulop ayaw hawiri an imo kamot; kay diri ka maaram kon hain an mauswag, kon ini ba o adto, o kon hira ba nga duha magpapariho kamaopay.” (Ekles. 11:6) Oo, ha literal nga pagsabwag hin binhi, diri kita maaram kon diin ito maturok o kon maturok gud ba ito. Damu nga butang an diri naton kontrolado. Pariho liwat hito an masisiring ha paghimo hin disipulo. Ginpabug-atan ini ni Jesus ha duha nga ilustrasyon nga iginsurat para ha aton ha kapitulo 4 han Ebanghelyo ni Markos. Kitaon naton kon ano an aton hibabaroan hinin duha nga ilustrasyon.
Magkalain-lain nga Klase hin Tuna
4, 5. Isumaryo an ilustrasyon ni Jesus mahitungod han magsarabwag nga nagsasabwag hin binhi.
4 Sugad han nakarekord ha Markos 4:1-9, iginhulagway ni Jesus an parauma nga nagsasabwag hin binhi nga nahingadto ha magkalain-lain nga dapit: “Pamatii niyo: Kitaa, usa nga magsarabwag naglakat ha pagsabwag. Ngan nahinabo, han hiya nagsasabwag, nga an usa ka bahin han gahi nahulog ha ligid han dalan, ngan nanaop an mga tamsi ha langit, ngan ira gintuktok. Ngan an usa nga bahin nahulog ha kabatohan, didto ha waray damu nga tuna; ngan ha gilayon nanubo, tungod kay waray hilarom nga tuna. Ngan han pagsirang han adlaw, nagkauuga; ngan tungod nga waray gamot, nagkalalaya. Ngan an usa ka bahin nahulog ha kasapinitan, ngan nanubo an mga sapinit, ngan pinanlumsan ito, ngan waray makapamunga. Ngan an usa ka bahin nahulog ha maopay nga tuna; ngan namunga, ngan tinubo, ngan dinaku, ngan nagdara an usa hin katloan; ngan an usa, kaunman; ngan an usa, usa ka gatos.”
5 An pagsabwag hin binhi kasagaran nga pinaagi ha pagsaburak. Iginbubutang ito han magsarabwag ha pilo han iya bado o ha surudlan ngan iginsasabwag ito. Salit hini nga ilustrasyon, diri gintutuyo han parauma nga isabwag an binhi ha magkalain-lain nga klase hin tuna. Lugod, an iginsabwag nga binhi nahingangadto ha iba-iba nga dapit.
6. Paonan-o iginsaysay ni Jesus an ilustrasyon mahitungod han magsarabwag?
6 Iginsaysay ni Jesus an kahulogan hito nga ilustrasyon ha Markos 4:14-20: “An magsarabwag nagsasabwag han pulong. Ngan ini hira amo an mga ha ligid han dalan, nga didto iginsabwag an pulong; kondi han ira pagkabati, ha gilayon inabot hi Satanas, ngan ginkuha niya an pulong nga iginsabwag ha ira. Ngan sugad man hira amo an mga iginsabwag ha mga kabatoan, nga ha pakabati nira han pulong, ha gilayon kinarawat nira an pulong nga malipayon. Ngan waray hin gamot ha ira kalugaringon, kondi ha gutiay nga panahon la; niyan kon umabot an kagol-anan, o pagtimaraot tungod han pulong, ha gilayon makakaagi hira hin katigayonan ha paghipakdol. Ngan an iba amo an iginsabwag ha mga kasapinitan; ini amo an mga nagpakabati han pulong; ngan ha pagsulod ha ira an mga pangarit han kalibotan, ngan an limbong han mga manggad, ngan an karuyag mahitungod ha iba nga mga butang, nalumsan an pulong, ngan waray magmabungahon. Ngan ini amo an iginsabwag ha tuna nga maopay: an mga nanmamati han pulong, ngan ira kinakarawat, ngan binunga an usa, katloan; an usa, kaunman; ngan an usa, usa ka gatos.”
7. Ano an ginrirepresentaran han binhi ngan han magkalain-lain nga klase hin tuna?
7 Tigamni nga waray magsiring hi Jesus nga iba-iba nga klase hin binhi an gin-gamit. Lugod, naghisgot hiya hin usa nga klase hin binhi nga nahingadto ha magkalain-lain nga klase hin tuna, nga an tagsa hito iba-iba an resulta. An siyahan nga klase hin tuna matig-a; an ikaduha hamabaw; an ikatulo may-ada mga “sapinit” o tunok; ngan an ikaupat maopay nga tuna nga mahimo magresulta hin damu nga bunga. (Luk. 8:8) Ano an binhi? Ito an mensahe han Ginhadian nga mababasa ha Pulong han Dios. (Mat. 13:19) Ano an ginrirepresentaran han magkalain-lain nga klase hin tuna? Nagrirepresentar ito ha mga tawo nga iba-iba an kahimtang han kasingkasing.—Basaha an Lukas 8:12, 15.
8. (a) Hin-o an ginrirepresentaran han magsarabwag? (b) Kay ano nga iba-iba an reaksyon han nasasangyawan?
8 Hin-o an ginrirepresentaran han magsarabwag? Nagrirepresentar hiya ha mga kabulig han Dios ha pagbuhat—adton nagpapasamwak han maopay nga sumat han Ginhadian. Pariho kanda Pablo ngan Apolo, nagtatanom ngan nagbibisibis hira. Kondi bisan kon nangangalimbasog gud hira, iba-iba an resulta hito. Kay ano? Tungod kay iba-iba an kahimtang han kasingkasing han mga namamati han mensahe. Ha ilustrasyon, an magsarabwag waray mahihimo ha magigin resulta. Nakakaliaw gud ini, labi na ha aton matinumanon nga kabugtoan nga nagin maduruto ha damu ka tuig na, an iba mga dekada pa ngani, kondi baga hin gutiay la an bunga! a Kay ano nga nakakaliaw ini?
9. Ano nga nakakaliaw nga mensahe an ginpabug-atan ni apostol Pablo ngan ni Jesus?
9 An pagin matinumanon han magsarabwag diri nasusukol sumala ha resulta han iya ginbuhat. Gin-unabi ito ni Pablo han hiya nagsiring: “An tagsa-tagsa makarawat han iya kalugaringon nga balos sumala han iya kalugaringon nga buhat.” (1 Kor. 3:8) An balos nadepende ha buhat, diri ha mga resulta han ginbuhat. Ginpabug-atan liwat ini ni Jesus han binalik an iya mga disipulo tikang ha pagsangyaw. Malipayon hinduro hira tungod kay an mga demonyo nagpasakop pinaagi han ira paggamit han ngaran ni Jesus. Bisan kon makalilipay gud ito, hi Jesus nagsiring ha ira: “Ayaw kamo kalipay hini, nga an mga espiritu napasakop ha iyo; kondi magkalipay kamo kay an iyo mga ngaran nahisurat ha langit.” (Luk. 10:17-20) Kon an ginbuhat han magsarabwag waray magresulta hin damu nga bag-o nga disipulo, diri ito nangangahulogan nga diri hiya sugad kamaduruto o kamatinumanon ha iba. Ha kadak-an nga bahin, an resulta nadepende ha kahimtang han kasingkasing han namamati. Kondi ha kabug-osan, an Dios gud an nagpapatubo hito!
An Responsabilidad Hadton Namamati han Mensahe
10. Ha ano nadepende kon magigin sugad han maopay nga tuna o diri, an namamati han mensahe?
10 Kumusta man an mga namamati han mensahe? Itinanda na ba nga daan an ira reaksyon? Waray. Magin sugad man hira han maopay nga tuna o diri, ira na ito pagbuot. Ha pagkamatuod, an kahimtang han kasingkasing han tawo mahimo magbag-o para ha kaopayan o karat-an. (Roma 6:17) Ha ilustrasyon ni Jesus, hiya nagsiring nga ‘ha pakabati’ han iba han mensahe, naabot hi Satanas ngan ginkukuha ito. Kondi mahimo ini diri mahitabo. Ha Jakobo 4:7, gin-aaghat an mga Kristiano nga ‘tigion an Yawa,’ ngan mapalagiw hiya ha ira. Iginhulagway ni Jesus an iba pa sugad nga malipayon nga nakarawat han mensahe ha tinikangan pero nahipakdol tungod kay ‘waray ito makagamot ha ira kalugaringon.’ Kondi ginsagdonan an mga surugoon han Dios nga ‘manggamot ngan manrig-on’ ha pundasyon basi masabtan nira “kon ano an kahiluag, ngan kahilaba, ngan kahitaas, ngan kahilarom, ngan pagkilala han gugma ni Kristo nga labaw ha ngatanan nga kinaadman.”—Efe. 3:17-19; Kol. 2:6, 7.
11. Paonan-o malilikyan han usa nga an mensahe diri malumsan han pangarit ngan manggad?
11 Ginpasagdan han iba nga nakabati han mensahe “an mga pangarit han kalibotan, ngan an limbong han mga manggad” nga makasulod ngan ‘makalumos’ han mensahe. (1 Tim. 6:9, 10) Paonan-o ini malilikyan? Hi apostol Pablo binaton: “Mahigawas unta kamo ha paghigugma ha salapi; magmalipayon kamo ha mga bagay nga aada ha iyo, kay hiya ngahaw nagsiring: Diri ko gud ikaw bibilinan, ngan diri ko gud ikaw babayaan.”—Heb. 13:5.
12. Kay ano nga adton ginrirepresentaran han maopay nga tuna iba-iba an kadamu han bunga?
12 Ha kataposan, nagsiring hi Jesus nga adton nahisabwag ha maopay nga tuna ‘binunga hin katloan, kaunman, ngan usa ka gatos.’ Bisan kon an iba nga namati han mensahe maopay an kahimtang han kasingkasing ngan namunga, an ira nabubuhat ha pagpasamwak han maopay nga sumat nagkakaiba-iba depende ha ira kahimtang. Pananglitan, bangin naiibanan an pakigbahin han iba ha pagsangyaw tungod han kalagas o nakakapaluya nga sakit. (Itanding an Markos 12:43, 44.) Hini liwat nga kahimtang, posible nga gutiay la o waray mahihimo an magsarabwag, kondi nalilipay hiya kon nakikita niya nga ginpapatubo ito ni Jehova.—Basaha an Salmo 126:5, 6.
An Magsarabwag nga Nakaturog
13, 14. (a) Isumaryo an ilustrasyon ni Jesus mahitungod han tawo nga nagsasabwag hin binhi. (b) Hin-o an ginrirepresentaran han magsarabwag, ngan ano an binhi?
13 Ha Markos 4:26-29, may-ada usa pa nga ilustrasyon mahitungod han magsarabwag: “Amo man an ginhadian han Dios, sugad nga kon an usa ka tawo igsabwag niya an gahi ha tuna. Ngan kumaturog, ngan magbangon ha gab-i, ngan ha adlaw, ngan an gahi maturok, ngan magtitinubo, nga diri niya hibabaroan kon naoonan-o. Kay an tuna ha iya kalugaringon namumunga; an siyahan, dahon; sunod, an puso; ha urhi, amo an bug-os nga matimgas nga puso; ngan kon an bunga hinog na, ha gilayon padadad-an han tawo hin garab, kay inabot na an pag-ani.”
14 Hin-o ini nga magsarabwag? An iba ha Kakristianohan natoo nga nagtutudlok ini mismo kan Jesus. Kondi paonan-o masisiring nga nakaturog hi Jesus ngan diri maaram kon paonan-o nagtutubo an binhi? Sigurado nga maaram hi Jesus han proseso han pagtubo! Kon sugad, ini nga magsarabwag, pariho han gin-unabi na, nagrirepresentar ha tagsa nga magwarali han Ginhadian—adton nagsasabwag han binhi han Ginhadian pinaagi han ira madasigon nga pagsangyaw. An binhi nga iginsasabwag ha tuna amo an mensahe nga ira iginsasangyaw. b
15, 16. Ano an ginpabug-atan ni Jesus ha iya ilustrasyon mahitungod han literal ngan espirituwal nga pagtubo?
15 Nagsiring hi Jesus nga an magsarabwag ‘nakaturog ha gab-i ngan nabangon ha adlaw.’ Diri ini pagpasibaya han magsarabwag. Naghuhulagway la ini han normal nga rutina han kadam-an. An mga pulong hini nga bersikulo nagpapasabot hin padayon nga proseso han pagtrabaho ha adlaw ngan pagkaturog ha gab-i durante ha usa ka peryodo han panahon. Iginsaysay ni Jesus an nahitabo durante hito nga panahon. ‘An gahi naturok, ngan nagtitinubo,’ siring niya. Katapos, hiya nagdugang: “Nga diri niya hibabaroan kon naoonan-o.” Pinabubug-atan hini an punto nga ‘naglulugaring la ito’ ha pagtubo. c
16 Ano an iginpapatin-aw dinhi ni Jesus? Tigamni nga ginpapabug-atan an pagtubo ngan an hinay-hinay nga paagi hito. “An tuna ha iya kalugaringon namumunga; an siyahan, dahon; sunod, an puso; ha urhi, amo an bug-os nga matimgas nga puso.” (Mar. 4:28) Ini nga pagtubo hinay-hinay nga nahitatabo ngan uyon ha proseso. Diri ito mapupwersa o mapapadagmit. Sugad liwat hito an pagtubo ha espirituwal. Nahitatabo ito uyon ha proseso samtang ginpapatubo ni Jehova an kamatuoran ha kasingkasing han tawo nga “tinunguran” o takos hito.—Buh. 13:48; Heb. 6:1.
17. Hin-o an nalilipay kon may-ada bag-o nga nagigin disipulo?
17 Paonan-o nakikigbahin ha pag-ani an magsarabwag “kon an bunga hinog na”? Kon patuboon ni Jehova an kamatuoran han Ginhadian ha kasingkasing han bag-o nga mga disipulo, maabot an panahon nga mapapagios hira han ira gugma ha Dios nga magdedikar han ira kinabuhi ha iya. Ginsisimbolohan nira ito pinaagi han pagpabawtismo ha tubig. An kabugtoan nga kalalakin-an nga padayon nga nag-uuswag ha pagkahamtong hinay-hinay nga nagkakaada dugang nga responsabilidad ha kongregasyon. Kon may-ada bag-o nga nagigin disipulo, nalilipay diri la an orihinal nga nagsabwag han binhi kondi adto liwat nga diri direkta nga nagsabwag, nga tungod hito nahimo ito nga disipulo. (Basaha an Juan 4:36-38.) Oo, ‘an nagtatanom ngan an nagbabari nagkakalipay hin tingob.’
Mga Leksyon Para ha Aton Yana
18, 19. (a) Paonan-o personal nga nakadasig ha imo an pagrepaso han mga ilustrasyon ni Jesus? (b) Ano an paghihisgotan ha masunod nga artikulo?
18 Ano an aton hinbaroan ha pagrepaso hinin duha nga ilustrasyon ha Markos kapitulo 4? Matin-aw nga hinbaroan naton nga may-ada kita buruhaton—an pagsabwag. Diri gud kita sadang magpasangil ngan magpaulang ha mga problema ngan kakurian ha pagtuman hini nga buruhaton. (Ekles. 11:4) Kondi, ha pariho nga panahon, maaram kita han aton makalilipay nga pribilehiyo ha pagin kabulig han Dios ha pagbuhat. Hi Jehova an nagpapatubo han espirituwalidad ngan an nagbibendisyon han aton mga pangalimbasog ngan han panalinguha hadton nakarawat han mensahe. Nasasantop naton nga diri naton mapipirit an bisan hin-o nga magin disipulo. Diri liwat kita nanluluya o nasusubo kon mahinay o kulang an pagtubo. Nakakaliaw gud hibaroan nga an aton kalamposan nadepende ha aton pagkamatinumanon kan Jehova ngan ha iya iginhatag ha aton nga pribilehiyo nga pagsangyaw han “maopay nga sumat han ginhadian . . . ha pagpamatuod ha ngatanan nga mga nasud.”—Mat. 24:14.
19 Ano pa an igintututdo ha aton ni Jesus mahitungod han pag-uswag han bag-o nga mga disipulo ngan han buruhaton han Ginhadian? Babatunon ini nga pakiana ha iba pa nga ilustrasyon ha mga asoy han Ebanghelyo. Aton paghihisgotan an pipira hini nga ilustrasyon ha masunod nga artikulo.
[Mga footnote]
a Tagda an pagsangyaw ni Bugto Georg Fjölnir Lindal ha Iceland sugad han iginreport ha 2005 Yearbook of Jehovah’s Witnesses, pahina 210-211, ngan an eksperyensya han magtinumanon nga surugoon nga nagmapinadayunon ha Ireland ha damu nga katuigan bisan kon waray nakita dayon nga resulta sugad han mababasa ha 1988 Yearbook of Jehovah’s Witnesses, pahina 82-99.
b Iginsaysay hadto hini nga magasin nga an binhi nagrirepresentar ha mga kalidad han tawo nga kinahanglan pauswagon ha pagkahamtong tungod han mga impluwensya ha palibot. Kondi tigamni nga ha ilustrasyon ni Jesus, an binhi diri nagigin maraot nga binhi o dunot nga prutas. Basta nagtutubo la ito tubtob nga magin gurang.—Kitaa an The Watchtower, Hunyo 15, 1980, pahina 17-19.
c Gin-gamit liwat ini ha Buhat 12:10, diin an puthaw nga ganghaan ginsisiring nga awtomatiko o “naglulugaring pag-abri.”
Nahinunumdoman Mo Ba?
• Ano an kaparihoan han pagsabwag han literal nga binhi ngan pagsangyaw han mensahe han Ginhadian?
• Paonan-o ginsusukol ni Jehova an pagkamatinumanon han magsarangyaw han Ginhadian?
• Ano nga pagkapariho han literal ngan espirituwal nga pagtubo an pinabug-atan ni Jesus?
• Paonan-o ‘an nagtatanom ngan nagbabari nagkakalipay hin tingob’?
[Mga Pakiana]
[Mga Retrato ha pahina 13]
Kay ano nga iginpariho ni Jesus an magwarali han Ginhadian han Dios ha magsarabwag hin binhi?
[Retrato ha pahina 15]
Adton ginrirepresentaran han maopay nga tuna bug-os-kasingkasing nga nakikigbahin ha pagsangyaw han Ginhadian uyon ha ira kahimtang
[Retrato ha pahina 16]
An Dios an padayon nga nagpapatubo hito