An Pagsangyaw ha Kada Balay—Kay Ano nga Importante Yana?

“Nagpadayon hira kada adlaw didto ha templo ngan ha mga balay han mga tawo hin pagtutdo ngan pagwali han maopay nga sumat mahitungod kan Jesus nga Mesias.”—BUH. 5:42, Maopay nga Sumat.

1, 2. (a) Ha ano nga paagi han pagsangyaw kilala an mga Saksi ni Jehova? (b) Ano an paghihisgotan naton hini nga artikulo?

 HA HAROS ngatanan nga nasud, makakakita ka hin duha nga tawo nga desente an pamado nga nabisita hin balay ngan nangangalimbasog pagsumat ha tagbalay hin halipot nga mensahe tikang ha Biblia mahitungod han Ginhadian han Dios. Kon an tagbalay interesado ha mensahe, nagtatanyag hira hin literatura ngan hin libre nga pag-aram ha Biblia. Katapos napakadto hira ha sunod nga balay. Kon nakikigbahin ka hini nga buruhaton, bangin maobserbahan mo nga agsob nga ginkikilala ka na han mga tawo sugad nga usa han mga Saksi ni Jehova bisan kon waray ka pa ginyayakan. Oo, an pagsangyaw ha kada balay nagin pangirilal-an na naton.

² Magkalain-lain an aton paagi ha pagtuman han sugo ni Jesus nga pagsangyaw ngan paghimo hin disipulo. (Mat. 28:19, 20) Nagsasangyaw kita ha mga merkado, kakalsadahan, ngan iba pa nga panpubliko nga lugar. (Buh. 17:17) Nakikigkomunikar kita ha damu nga tawo pinaagi ha pagtawag ha telepono ngan pagsurat ha ira. Iginsusumat naton an mga kamatuoran han Biblia ha mga nakakaistorya naton ha trabaho kada adlaw. May-ada pa ngani kita opisyal nga Web site nga nagtatagana hin basado ha Biblia nga impormasyon ha sobra 300 nga yinaknan. a Ini ngatanan nga paagi mag-opay an resulta. Kondi, ha kadam-an nga lugar, an aton nangunguna nga paagi ha pagpasamwak han maopay nga sumat amo an pagsangyaw ha kada balay. Ano an basihan hini nga paagi han pagsangyaw? Kay ano nga ini an ginagamit han katawohan han Dios yana ha haros bisan diin? Ngan kay ano nga importante ini yana?

An Paagi han mga Apostol

3. Ano nga instruksyon ha pagsangyaw an iginhatag ni Jesus ha mga apostol, ngan ano an iginpapasabot hini mahitungod ha paagi han ira pagsangyaw?

³ An paagi han pagsangyaw ha kada balay iginbasar ha Kasuratan. Han ginsugo ni Jesus an mga apostol ha pagsangyaw, hiya nagsiring: “Bisan diin nga bungto ngan baryo nga iyo sudlan, usisaha niyo kon hin-o didto an takos.” Paonan-o nira pamimilngon an mga takos? Ginsugo hira ni Jesus nga kumadto ha kabalayan han mga tawo: “Ha pagsulod niyo ha balay, tahora niyo ito. Ngan kon an balay takos, an iyo kamurayaw madida [hito].” Kinahanglan ba nga maghulat pa hira hin imbitasyon antes bumisita? Tigamni an sunod nga ginsiring ni Jesus: “Bisan hin-o an diri makarawat ha iyo, bisan pamati han iyo mga pulong, ha iyo paggowa hito nga balay o bungto, taktaka niyo an tapotapo ha iyo mga tiil.” (Mat. 10:11-14) Iginpapatin-aw hini nga instruksyon nga samtang ‘naagi hira ha mga barubaryo ngan nanunumat han maopay nga sumat,’ kinahanglan hira an mag-una ha pagbisita ha mga tawo ha ira balay.—Luk. 9:6.

4. Diin espisipiko nga gin-unabi ha Biblia an pagsangyaw ha kada balay?

⁴ Espisipiko nga gin-uunabi ha Biblia nga an mga apostol nagsangyaw ha kada balay. Pananglitan, an Buhat 5:42 (Maopay nga Sumat)  nasiring: “Nagpadayon hira kada adlaw didto ha templo ngan ha mga balay han mga tawo hin pagtutdo ngan pagwali han maopay nga sumat mahitungod kan Jesus nga Mesias.” Paglabay hin mga 20 ka tuig, ginpahinumdom ni apostol Pablo an mga tigurang ha kongregasyon ha Efeso: “Waray ako paglikay ha panumat ha iyo han bisan ano nga bagay nga may kapulsanan, ngan ha panutdo ha iyo ha kadaygan, ngan . . . ha tagsa-tagsa nga balay.” Ginbisita ba ni Pablo ito nga mga tigurang antes hira nagin tumuroo? Oo, tungod kay ipinapakita han ebidensya nga gintutdoan niya hira, ngan an pipira hito amo an “pagbasol ngadto ha Dios, ngan pagtoo ha aton Ginoo nga hi Jesu-Kristo.” (Buh. 20:20, 21) Sugad nga komento ha Buhat 20:20, an Robertson’s Word Pictures in the New Testament nasiring: “Makatirigamnan gud nga inin gimaopayi han mga magwarali nagsangyaw ha kada balay.”

Panon han mga Duron Yana

5. Paonan-o iginhulagway ha tagna ni Joel an pagsangyaw?

⁵ An pagsangyaw ha siyahan nga siglo abanse la nga pagpakita han mas daku nga buruhaton ha aton panahon. Iginpariho ni propeta Joel an pagsangyaw han mga dinihogan ha nakakadaot nga peste han mga insekto, upod na an mga duron. (Joel 1:4) Nasulong ito sugad hin kasundalohan, nalalamposan an mga ulang, nasulod ha kabalayan, ngan naglalamoy han ngatanan nga inaagian hito. (Basaha an Joel 2:2, 7-9.) Matin-aw gud ito nga paghulagway han pagin mapinadayunon ngan waray ginlalaktawan han katawohan han Dios ha pagsangyaw yana! An nangunguna nga paagi nga ginagamit han mga dinihogan ngan han ira kaupod nga ‘iba nga mga karnero’ ha pagtuman hini nga tagna amo an pagsangyaw ha kada balay. (Juan 10:16) Paonan-o naton nasubad an paagi han mga apostol ha pagsangyaw?

6. Han 1922, ano an igin-aghat may kalabotan ha pagsangyaw ha kada balay, kondi ano an ginbuhat han iba?

⁶ Tikang han 1919, ginpabug-atan an responsabilidad han tagsa nga Kristiano nga personal nga makigbahin ha pagsangyaw. Pananglitan, ha artikulo nga “Service Essential” ha Watch Tower han Agosto 15, 1922, ginpahinumdom an mga dinihogan han pagkaimportante han “aktibo nga pagdara han nakaimprinta nga mensahe ngadto ha mga tawo ngan pakiistorya ha ira didto ha ira balay, basi magpamatuod nga an ginhadian han langit hirani na.” Nagtagana liwat hin  detalyado nga mga presentasyon an Bulletin (An Aton Ministeryo ha Ginhadian na yana). Kondi, ha tinikangan gutiay la an aktuwal nga nagsangyaw ha kada balay. An iba diniri na ha pagsangyaw. Damu an ira reklamo, kondi ha pagkamatuod nadiri hira tungod kay naghunahuna hira nga nakakaminos ito. Samtang mas ginpapabug-atan an pagsangyaw ha teritoryo, damu an hinay-hinay nga binulag ha organisasyon ni Jehova.

7. Han dekada han 1950, ano an naobserbahan nga kinahanglan buhaton?

⁷ Ha sumunod nga mga dekada, nagtikadamu an nakigbahin ha pagsangyaw. Kondi, naobserbahan nga kinahanglan hin dugang nga personal nga pagbansay ha pagbalay-balay. Tagda pananglitan an kahimtang ha Estados Unidos. Temprano han dekada han 1950, 28 porsyento han mga Saksi didto an nanaltag la hin handbill o nanindog la ha kakalsadahan dara an mga magasin. Sobra 40 porsyento an diri regular ha pagsangyaw, ngan waray ngani surusangyaw hin pipira ka bulan. Ano an ginhimo basi mabuligan an ngatanan nga dedikado nga Kristiano ha pagsangyaw ha kada balay?

8, 9. Ano nga programa ha pagbansay an gintikangan han 1953, ngan ano an mga resulta?

⁸ Ha internasyonal nga kombensyon ha New York City han 1953, ginpabug-atan an pagbalay-balay nga ministeryo. Nagpahayag hi Bugto Nathan H. Knorr nga an nangunguna nga buruhaton han ngatanan nga paramangno amo an pagbulig ha tagsa nga Saksi nga magin regular ha pagbalay-balay. Hiya nagsiring: “Kada tagsa kinahanglan nga maaram magsangyaw han maopay nga sumat ha kada balay.” Gintikangan an bug-os-kalibotan nga programa ha pagbansay basi madangat ini nga tumong. Adton diri pa nagsasangyaw ginbansay ha pagbisita ha mga tawo ha ira balay, ha pangatadongan ha ira tikang ha Biblia, ngan ha pagbaton han ira pakiana.

⁹ Maopay hinduro an mga resulta hini nga pagbansay. Ha sulod hin napulo ka tuig, nag-uswag hin 100 porsyento an magwarali ha bug-os nga kalibotan, 126 porsyento an pagbalik bisita, ngan 150 porsyento an pag-aram ha Biblia. Yana, haros pito ka milyon nga magwarali han Ginhadian an nagsasangyaw ha bug-os nga kalibotan. Inin makatirigamnan nga pag-uswag usa nga ebidensya han bendisyon ni Jehova ha mga pangalimbasog han iya katawohan ha pagbalay-balay.—Isa. 60:22.

Pagtigaman ha mga Tawo Para ha Kaluwasan

10, 11. (a) Ano an nakita ni Esekiel ha bisyon nga nakarekord ha kapitulo 9? (b) Paonan-o ito nga bisyon natutuman ha aton panahon?

¹⁰ Masasabtan an pagkaimportante han pagbalay-balay pinaagi ha bisyon ni propeta Esekiel. Hito nga bisyon, iya nakita an unom nga lalaki nga may dara nga hinganiban ngan an ikapito nga lalaki nga nakabado hin lino nga may surudlan hin tinta han parasurat ha iya kagiliran. Ginsugo an ikapito nga lalaki nga ‘latason an bungto’ ngan ‘butangan hin tigaman an agtang han mga nanhahayhay ngan nagsisinggit tungod han ngatanan nga kangil-aran nga ginbuhat dida hito.’ Katapos hito nga pagtigaman, an unom nga lalaki nga may dara nga hinganiban ginsugo nga poohon an ngatanan nga waray tigaman.—Basaha an Esekiel 9:1-6.

¹¹ Nasasabtan naton nga ha katumanan hini nga tagna, an tawo nga “nagbisti hin lino” nagrirepresentar ha mga dinihogan han espiritu nga nanhibilin. Pinaagi han pagsangyaw ngan paghimo hin disipulo, ginbubutangan nira hin simboliko nga tigaman adton nagigin membro han ‘iba nga mga karnero.’ (Juan 10:16) Ano ito nga tigaman? Ito an ebidensya—nga baga hin aada ha ira waray tabon nga agtang—nga hira dedikado ngan bawtismado na nga disipulo ni Jesu-Kristo ngan nagsusul-ot na han sugad-Kristo nga bag-o nga personalidad. (Efe. 4:20-24) Inin sugad-karnero nga mga tawo nagigin usa nga panon kaupod han mga dinihogan ngan nabulig ha ira ha importante nga buruhaton nga pagtigaman ha iba pa.—Pah. 22:17.

12. Paonan-o an bisyon ni Esekiel mahitungod han pagtigaman ha mga agtang nagpapatin-aw han pagkaimportante han aton padayon nga pagpamiling hin sugad-karnero nga mga tawo?

 ¹² Iginpapatin-aw han bisyon ni Esekiel an usa nga hinungdan kon kay ano nga apurado gud an aton padayon nga pagpamiling hin mga ‘nanhahayhay ngan nagsisinggit.’ Nakadepende hito an ira kinabuhi. Diri mag-iiha, adton waray simboliko nga tigaman pupoohon han mga anghel ni Jehova—ginrirepresentaran han unom nga lalaki nga may hinganiban. Mahitungod hiton tiarabot nga paghukom, hi apostol Pablo nagsurat nga an Ginoo nga hi Jesus, kaupod an iya ‘gamhanan nga mga anghel, mabulos ha mga waray kumilala ha Dios ngan ha waray pagtuman han maopay nga sumat mahitungod ha aton Ginoo nga hi Jesus.’ (2 Tes. 1:7, 8) Tigamni nga an mga tawo paghuhukman depende ha ira pagkarawat han maopay nga sumat. Salit, an pagpasamwak han mensahe han Dios kinahanglan magpadayon nga waray pagluya tubtob ha kataposan. (Pah. 14:6, 7) Nangangahulogan ini nga daku hinduro an responsabilidad han ngatanan nga dedikado nga surugoon ni Jehova.—Basaha an Esekiel 3:17-19.

13. (a) Ano nga responsabilidad an inabat ni apostol Pablo, ngan kay ano? (b) Ano nga responsabilidad an imo inaabat ha mga tawo ha iyo teritoryo?

¹³ Inabat ni apostol Pablo nga may-ada hiya responsabilidad ha pagsangyaw han maopay nga sumat. Hiya nagsurat: “May utang ako ha mga Gresyahanon ngan ha mga Barbaro, ha mga makinaadmananon ngan ha mga diri-makinaadmananon. Ngani, sugad han akon mahimo, andam ako ha pagwali han maopay nga sumat ha iyo man nga aada ha Roma.” (Roma 1:14, 15) Tungod han pagpasalamat ha kalooy nga ipinakita ha iya, inabat niya an obligasyon nga buligan an mga tawo basi magpahimulos han diri-takos nga pagkabuotan han Dios sugad han iya pagpahimulos hito. (1 Tim. 1:12-16) Gintagad niya nga baga hin utangan hiya ha tagsa nga iya nakakaistorya, utang nga mababaydan la kon iya sasangyawan han maopay nga sumat ito nga tawo. Inaabat mo ba nga may-ada ka pariho hito nga utang ha mga tawo ha iyo teritoryo?—Basaha an Buhat 20:26, 27.

14. Ano an aton nangunguna nga hinungdan ha pagsangyaw ha kadaygan ngan ha kada balay?

¹⁴ Bisan kon importante an pagluwas ha kinabuhi han tawo, may-ada mas importante pa nga hinungdan han pagsangyaw ha kada balay. Ha tagna ha Malakias 1:11, hi Jehova nagpahayag: “Tikang ha pagsirang han adlaw bisan ngada ha pagkatunod hini an akon ngaran madadaku dida ha mga Hentil; ngan . . . ighahalad ngada ha akon ngaran, [an] usa nga uray nga halad: kay an akon ngaran madadaku dida ha mga Hentil.” Ha pagtuman hini nga tagna, dayag nga gindadayaw han dedikado nga mga surugoon ni Jehova an iya ngaran ha bug-os nga tuna samtang mapainubsanon nga gintutuman nira an ira ministeryo. (Sal. 109:30; Mat. 24:14) An aton nangunguna nga hinungdan ha pagsangyaw ha kadaygan ngan ha kada balay amo an paghatag kan Jehova “hin halad han pagdayeg.”—Heb. 13:15.

Importante Gud nga mga Hitabo ha Tidaraon

15. (a) Paonan-o nagkaada dugang nga buruhaton an mga Israelita han nagmartsa hira ha palibot han Jeriko ha ikapito ka adlaw? (b) Ano an iginpapasabot hini mahitungod han pagsangyaw nga buruhaton?

¹⁵ Ano an posible mahitabo may kalabotan ha pagsangyaw nga buruhaton? An paglikos ha Jeriko nga mababasa ha libro han Josue, naghahatag hin ehemplo. Hinumdumi nga antes bungkagon han Dios an Jeriko, ginsugo Niya an mga Israelita nga magmartsa ha palibot han syudad hin makausa ha kada adlaw ha sulod hin unom ka adlaw. Kondi, ha ikapito ka adlaw, nagkaada hira  dugang nga buruhaton. Hi Jehova nagsiring kan Josue: “Libuton niyo an bungto makapito, ngan an mga saserdote magpatunog han mga trumpeta. Ngan mahinanabo nga ha ira pagbudyong ha makusog hinduro han mga sungay han karnero nga lalaki, . . . an bug-os nga katawohan maggugliat hin makusog hinduro; ngan an kuta han bungto mahilalaprak.” (Jos. 6:2-5) Posible nga magkakaada liwat dugang nga buruhaton ha aton pagsangyaw. Sigurado nga ha panahon han pagbungkag han presente nga sistema, makikita na naton an pinakakalyap nga pagpamatuod para ha ngaran han Dios ngan ha Ginhadian ha bug-os nga kasaysayan hini nga kalibotan.

16, 17. (a) Ano an matutuman antes matapos an “daku nga kagol-anan”? (b) Ano an aton paghihisgotan ha masunod nga artikulo?

¹⁶ Posible gud umabot an panahon nga an mensahe nga aton iginpapasamwak pariho hin ‘makusog hinduro nga guliat’ ha pakig-away. Ha Pahayag, an mapwersa nga mga mensahe ha paghukom iginhuhulagway sugad nga “daku nga uran nga yelo, nga an tag-usa ka bug-os an kabug-at sugad hin talento.” b Ngan an Pahayag 16:21 nasiring: “An peste hito daku kaopay.” Diri pa kita maaram kon ano an mahihimo han pagsangyaw ha kada balay may kalabotan ha pungkay han pagpasamwak han mga mensahe ha paghukom. Kondi makakasiguro kita nga antes matapos an “daku nga kagol-anan,” an ngaran ni Jehova naipahayag na ha paagi nga waray gud kapariho ha bug-os nga kasaysayan han tawo.—Pah. 7:14; Esek. 38:23.

¹⁷ Samtang ginpapamulat naton an importante gud nga mga hitabo, hinaot madasigon nga magpadayon kita ha pagpasamwak han maopay nga sumat han Ginhadian. Ha pagtuman hito, ano nga mga kakurian an aton naieksperyensyahan ha ministeryo, ngan paonan-o naton ito malalamposan? An baton hini nga mga pakiana paghihisgotan ha masunod nga artikulo.

[Mga footnote]

Ano an Imo Baton?

• Ano an Kasuratanhon nga basihan han pagsangyaw ha kada balay?

• Paonan-o ginpapabug-atan ha aton panahon an pagbalay-balay nga ministeryo?

• Kay ano nga responsabilidad han dedikado nga mga surugoon ni Jehova an pagsangyaw?

• Ano nga importante gud nga mga hitabo an matutuman?

[Mga Pakiana]

[Mga Retrato ha pahina 4]

Pariho kan apostol Pablo, inaabat mo ba an responsabilidad ha pagsangyaw ha mga tawo?

[Retrato ha pahina 5]

Bugto Knorr, 1953