An Pulong ni Jehova Buhi

Importante nga mga Punto Tikang ha mga Surat ha mga Taga-Korinto

HI APOSTOL Pablo nababaraka gud ha kahimtang ha espirituwal han kongregasyon ha Korinto. Hinbatian niya nga diri nagkakauruyon an kabugtoan didto. Ginkukonsinter la nira an imoralidad. Ngan may-ada liwat hira iginpakiana kan Pablo salit nagsurat hira. Tungod hini, ginsurat ni Pablo an siyahan han iya duha nga surat ha mga taga-Korinto han nakadto hiya ha Efeso durante han iya ikatulo nga pagbiyahe sugad nga misyonero han mga 55 K.P.

An ikaduha nga surat nga dugtong han siyahan, posible gud nga ginsurat paglabay hin pipira la ka bulan. Ngan tungod kay an mga kahimtang ha sulod ngan ha gawas han kongregasyon ha Korinto ha siyahan nga siglo damu an kaparihoan ha aton panahon, makakabulig gud ha aton an mensahe han surat ni Pablo ha mga taga-Korinto.—Heb. 4:12.

‘MAGBANTAY, MAGMARIG-ON, MAGMAKUSOG’

(1 Kor. 1:1–16:24)

“Magyakan kamo ngatanan hin sugad la nga bagay” o magkaada pagkauruyon, nagsagda hi Pablo. (1 Kor. 1:10) ‘Waray iba nga patukoranan gawas kan Jesu-Kristo,’ nga dida hito ‘gintitindog’ an Kristiano nga mga kalidad. (1 Kor. 3:11-13) Mahitungod ha makihilawason ha kongregasyon, hi Pablo nagsiring: “Kuhaon niyo an maraot nga tawo tikang ha iyo ngahaw.” (1 Kor. 5:13) “An lawas diri ha mga pakighilawas, kondi kanan Ginoo,” hiya nagsiring.—1 Kor. 6:13.

Sugad nga baton ni Pablo ha “mga bagay nga [ira] iginsurat,” naghatag hiya hin maopay nga sagdon mahitungod ha pag-asawa ngan pagpabilin nga solo. (1 Kor. 7:1) Katapos paghisgotan an prinsipyo han pagkaulo, pagin organisado han Kristiano nga mga katirok, ngan pagkasigurado han pagkabanhaw, hiya nagsagdon: “Magbantay kamo, magrig-on kamo ha pagtoo, panggawi kamo sugad hin mga lalaki, magmakusog kamo.”—1 Kor. 16:13.

Mga Baton ha mga Pakiana Mahitungod ha Kasuratan:

1:21—Ginagamit gud ba ni Jehova an “waray kahimurulsan” nga mensahe basi maluwas adton natoo? Diri. Kondi, tungod kay ‘an Dios waray kilalaha han kalibotan tungod ha kaaram hito,’ sugad hin waray kahimurulsan ha kalibotan an ginagamit han Dios ha pagtalwas ha mga tawo.—Juan 17:25.

5:5—Ano an kahulogan han “itubyan [an maraot nga tawo] kan Satanas basi paglaglagon an lawas, basi nga an espiritu maluwas unta”? Kon ginpapaiwas  ha kongregasyon an diri nagbabasol nga nakakasala hin seryoso, nagigin bahin utro hiya han maraot nga kalibotan ni Satanas. (1 Juan 5:19) Salit, masisiring nga igintutubyan hiya kan Satanas. An pagpaiwas ha iya nagriresulta ha kawara, o kakuha han maraot nga impluwensya ha kongregasyon, salit natitipigan an “espiritu” o an nakakaimpluwensya nga disposisyon.—2 Tim. 4:22.

7:33, 34—Ano an iginpapasabot han “mga butang ha kalibotan” nga ginkakabarak-an han inasaw-an? An ginhihisgotan ni Pablo amo an adlaw-adlaw nga panginahanglan nga sadang tagdon han inasaw-an nga mga Kristiano. Nag-uupod ini han pagkaon, panapton, ngan balay, kondi diri han magraot nga butang hini nga kalibotan nga sadang likyan han mga Kristiano.—1 Juan 2:15-17.

11:26—Mationan-o kaagsob sadang isaurog an paghinumdom ha kamatayon ni Jesus, ngan “ngada” o tubtob san-o? Diri karuyag sidngon ni Pablo nga isasaurog hin agsob an paghinumdom ha kamatayon ni Jesus. Lugod, karuyag niya ipasabot nga ha kada panahon nga nakikigbahin an mga dinihogan ha mga emblema ha Memoryal—usa la ka beses ha kada tuig, ha Nisan 14—ira “iginwawali an kamatayon han Ginoo.” Ginbubuhat nira ini “ngada ha iya pagkanhi,” nangangahulogan nga tubtob nga hira karawaton niya ha langit pinaagi han pagkabanhaw.—1 Tes. 4:14-17.

13:13—Kay ano nga an gugma mas labaw kay ha pagtoo ngan paglaom? Kon an “mga bagay nga ginlalaoman” naton matuman na, ngan kon an ‘marig-on’ nga ginpapamulat naton umabot na, an nahihimo han pagtoo ngan paglaom natatapos na. (Heb. 11:1) Salit an gugma mas labaw kay ha pagtoo ngan paglaom tungod kay nagpapadayon ito.

15:29—Ano an kahulogan han pagin ‘nabawtismohan basi magin mga minatay’? Diri iginpapasabot ni Pablo nga an mga buhi sadang magpabawtismo para hadton namatay nga waray pa magpabawtismo. Ginhihisgotan niya dinhi an pagbawtismo ha mga dinihogan han espiritu ngadto ha paagi han pagkinabuhi diin nagpapabilin hira nga maunungon tubtob ha ira kamatay ngan katapos mababanhaw sugad nga espiritu.

Mga Leksyon Para ha Aton:

1:26-31; 3:3-9; 4:7. Kon mapainubsanon nga iginhahambog naton hi Jehova, diri an aton kalugaringon, natitipigan an pagkaurosa ha kongregasyon.

2:3-5. Han nagsasangyaw hi Pablo ha Korinto, an sentro han pilosopiya ngan edukasyon ha Gresya, posible nga nabaraka hiya kon makukombinse niya an mga mamarati. Kondi, waray niya pasagdi an anoman nga kaluyahan o kahadlok nga bangin inabat niya nga makaulang ha pagtuman han ministeryo nga hatag han Dios ha iya. Ha pariho nga paagi, diri naton sadang tugotan an kakurian nga makaulang ha aton nga maipasamwak an maopay nga sumat han Ginhadian. Pariho kan Pablo, makakasarig kita han bulig ni Jehova.

2:16. An pagkaada han “hunahuna ni Kristo” amo an paghibaro han iya paagi han paghunahuna, pagsubad hito, pakasabot hin bug-os han iya personalidad, ngan pagsubad han iya susbaranan. (1 Ped. 2:21; 4:1) Salit, importante gud nga pag-adman naton hin maopay an iya kinabuhi ngan ministeryo!

3:10-15; 4:17. Sadang naton usisahon ngan pauswagon an aton abilidad ha pagtutdo ngan paghimo hin disipulo. (Mat. 28:19, 20) Kon diri maopay an aton pagtutdo, bangin diri malamposan han aton estudyante an mga pagsari ha pagtoo, ngan mag-aantos kita han masakit hinduro nga kawad-i salit an aton kaluwasan sugad hin “nag-agi ha kalayo.”

6:18. An ‘pagpalagiw ha [sayop nga] pakighilawas’ amo an paglikay diri la ha mga buhat han por·neiʹa kondi pati ha pornograpiya, kahugaw ha moral, malaw-ay nga mga pantasya, pagpikat—bisan ano nga mahimo magresulta ha pornikasyon.—Mat. 5:28; Jak. 3:17.

7:29. Kinahanglan magin alerto an mga mag-asawa nga diri magin ikaduha na la an buruhaton han Ginhadian tungod han sobra nga pagtagad ha usa kag usa.

10:8-11. Nasubo gud hi Jehova han nagngurutob o nagreklamo an Israel kanda Moises ngan Aaron. Salit maaramon kita kon diri naton batasanon an pagreklamo.

16:2. Magigin regular an aton pinansyal nga bulig para ha pagpauswag han buruhaton han  Ginhadian kon paplanuhon naton ito hin abanse ngan sistematiko nga buhaton ito.

PADAYON NGA SUMUNOD HA PAGTADONG

(2 Kor. 1:1–13:14)

Ginsidngan ni Pablo an mga taga-Korinto nga kinahanglan ‘pasayloon ngan lipayon’ nira an mabinasulon nga nakasayop nga ginsaway. Bisan kon nakapasubo ha ira an iya siyahan nga surat, nalipay hiya tungod kay “nagkasusubo [hira] ngadto ha paghinulsol” o pagbasol.—2 Kor. 2:6, 7; 7:8, 9.

Gindasig ni Pablo an mga taga-Korinto nga “mahura” ha paghatag ‘sugad nga hura hira han ngatanan nga bagay.’ Katapos niya batunon an mga nakontra, nagsagdon hiya ha ngatanan: “Magkalipay kamo, magkahihingpit [sumunod ha pagtadong] kamo; paglipayon kamo; magkaurosa kamo ha hunahuna; magdait kamo ha kamurayawan.”—2 Kor. 8:7; 13:11.

Mga Baton ha mga Pakiana Mahitungod ha Kasuratan:

2:15, 16—Kay ano nga sugad kita hin mahamot nga alimyon o “maopay nga rasa ni Kristo”? Tungod ini kay nasunod kita ha Biblia ngan nakikigbahin ha pagsangyaw han mensahe hito. Bisan kon nangangalas ha sugad nga “hamot” an diri-magtadong, mahamot ito kan Jehova ngan ha mga tangkod-an-kasingkasing.

5:16—Kay ano nga an mga dinihogan ‘diri nakilala hin bisan hin-o nga tawo uyon ha unod’? Tungod kay diri nira ginkikita an mga tawo ha unudnon nga paagi; pananglitan, diri hira nagpapasulabi tungod han karikohan, katulinan, tribo o nasud nga gintikangan. An importante ha ira amo an ira espirituwal nga relasyon ha mga igkasi-tumuroo.

11:1, 16; 12:11—Nagin diri makatadunganon ba hi Pablo ha mga taga-Korinto? Waray. Kondi, bangin para ha iba nagin mapahitas-on ngan diri makatadunganon hiya tungod han iya kinahanglan isiring basi depensahan an iya pagkaapostol.

12:1-4—Hin-o an “gin-agaw . . . ngadto ha paraiso”? Tungod kay an Biblia waray maghisgot hin iba nga may-ada sugad nga bisyon ngan tungod kay ini nga punto ginhisgotan ni Pablo katapos niya depensahan an iya pagkaapostol, posible nga an iya iginsasaysay dinhi amo an iya kalugaringon nga eksperyensya. An iya ginhanduraw posible gud nga an espirituwal nga paraiso nga ginpapahimulosan han Kristiano nga kongregasyon ha “panahon ha kataposan.”—Dan. 12:4.

Mga Leksyon Para ha Aton:

3:5. Ini nga bersikulo nagsusumat ha aton nga binubuligan ni Jehova an mga Kristiano nga magin kwalipikado gud ha ministeryo pinaagi han iya Pulong, baraan nga espiritu, ngan organisasyon dinhi ha tuna. (Juan 16:7; 2 Tim. 3:16, 17) Salit, sadang kita magin maduruto ha pag-aram han Biblia ngan han aton mga publikasyon, padayon nga mag-ampo han bulig han baraan nga espiritu, ngan regular nga tumambong ngan makigbahin ha Kristiano nga mga katirok.—Sal. 1:1-3; Luk. 11:10-13; Heb. 10:24, 25.

4:16. Tungod kay ginbabag-o ni Jehova ‘an aton pagkatawo ha sulod ha adlaw-adlaw,’ sadang naton salingabuton pirme an iya mga tagana, ngan diri naton pasagdan nga matapos an adlaw nga waray kita ginhimo ha pagparig-on han aton espirituwalidad.

4:17, 18. An paghunahuna nga ‘an kagol-anan madaliay la ngan magaan’ makakabulig ha aton nga magpabilin nga matinumanon kan Jehova durante han kakurian.

5:1-5. Maopay gud an pagkasaysay ni Pablo han inaabat han dinihogan nga mga Kristiano may kalabotan ha ira paglaom nga kinabuhi ha langit!

10:13. Kon waray kita itoka ha pagbulig ha lugar nga nanginginahanglan hin dugang nga magwarali, magsasangyaw kita dida la ha teritoryo nga igintoka ha aton kongregasyon.

13:5. Basi naton ‘maproybahan kon aada kita ha pagtoo,’ kinahanglan siguruhon naton nga an aton paggawi nauyon ha hinbabaroan naton ha Biblia. Basi naton ‘maproybahan an aton kalugaringon’ kon ano gud kita, kinahanglan usisahon naton an kalidad han aton espirituwalidad, upod na an paagi ha paggamit han aton “mga balatian” o abilidad ha pagsabot, ngan an pagkaiba-iba ngan kadamuon han aton buhat han pagtoo. (Heb. 5:14; Jak. 1:22-25) Kon susundon naton an maopay nga sagdon ni Pablo, makakapadayon kita ha paglakat dida ha dalan han kamatuoran.

[Retrato ha pahina 26, 27]

Ano an kahulogan han ‘ha kada pangangaon niyo hini nga tinapay ngan pag-inom hini nga tagayan’?—1 Kor. 11:26