Magin Makatadunganon ha Imo Ginlalaoman, Ngan Magin Malipayon

“NAPAKYAS na liwat ako!” Pira ka beses mo na ginsiring ito tungod kay waray matuman an imo ginplano? Bangin sugad liwat hito an igsiring han usa nga batan-on nga iroy tungod han iya duro nga kakapoy ha pag-ataman han iya minasus-an ngan han iya pag-abat hin kapakyas tungod kay gutiay la an iya nahihimo ha espirituwal nga mga buruhaton. An usa pa nga Kristiano bangin apektado han pagtratar ha iya han bata pa hiya salit naabat nga kulang gud an iya ginbubuhat ha kongregasyon. Bangin masubo hinduro an usa nga lagas tungod kay gutiay na la an iya nahihimo ha Kristiano nga mga buruhaton nga iya gud nalilipayan han mas makusog ngan mas malaksi pa hiya gumios. “An pagpamati la ha mga pahayag nga nag-aaghat hin pagpayunir usahay nakakapatuok na ha akon,” siring ni Christiane, nga limitado na an nahihimo ha pag-alagad kan Jehova tungod han kahimtang han iya pamilya.

Ano an mahimo naton buhaton kon sugad hito an aton inaabat? Paonan-o an iba nga Kristiano nahibaro nga magin makatadunganon ha ira panlantaw ha ira kahimtang? Ano an mga kapulsanan han pagin timbang ha aton ginlalaoman?

Magin Makatadunganon

Iginsaysay ni apostol Pablo kon paonan-o kita padayon nga magigin malipayon han hiya magsiring: “Magkalipay kamo gihapon ha Ginoo: liwat masiring ako, Magkalipay kamo. Ipahayag niyo an iyo kaaghop [“pagkamakatadunganon,” NW] ha ngatanan.” (Fil. 4:4, 5) Basi magin malipayon ngan kontento ha aton pag-alagad ha Dios, kinahanglan magin makatadunganon kita ha aton ginlalaoman ha aton kalugaringon uyon ha aton mga abilidad ngan kahimtang. Kon mangalimbasog kita ha pagkab-ot hin diri makatadunganon nga mga tumong anoman an mahitabo, mag-aantos kita hin diri kinahanglanon nga tensyon. Ha luyo nga bahin, kinahanglan mag-ikmat kita nga diri maghunahuna nga waray kita kapas ngan himoon nga pasangilan an aton ginhuhunahuna nga mga limitasyon basi ibanan an mga buruhaton ha Kristiano nga ministeryo bisan kon diri kinahanglanon.

Anoman an aton kahimtang, hi Jehova naglalaom nga ihahatag naton ha iya an aton gimaopayi—an aton bug-os-kalag ngan bug-os-kasingkasing nga pag-alagad. (Kol. 3:23, 24) Kon diri naton iginhahatag kan Jehova an aton gimaopayi, diri naton gintutuman an aton dedikasyon ha iya. (Roma 12:1) Dugang pa, diri naton maieksperyensyahan an duro nga katagbaw, tinuod nga kalipay, ngan iba pa nga hura nga bendisyon nga resulta han bug-os-kalag nga pag-alagad.—Prob. 10:22.

Ha Biblia, an pulong nga iginhubad nga “makatadunganon” nangangahulogan liwat han pagin makonsiderasyon. “Mapauyon-uyon” an literal nga kahulogan hito. Nagpapasabot liwat ito han diri pagin duro kaistrikto. Salit kon makatadunganon kita, magigin timbang an aton panlantaw ha aton kahimtang. Makuri ba ito? Para ha iba makuri ito, bisan kon bangin makonsiderasyon hira ha ira panlantaw ha iba. Pananglitan, kon naoobserbahan naton nga an aton duok nga sangkay kapoy  na hinduro tungod kay sobra kadamu an iya ginbubuhat, diri ba kita mabulig ha iya nga masabtan nga maaramon an paghimo hin mga pagbag-o ha iya kinabuhi? Ha pariho nga paagi, kinahanglan mahibaro kita ha pagkilala han mga sinyales nga nalahos na kita ha aton maaakos.—Prob. 11:17.

Mas makuri an pagin makatadunganon ha aton panlantaw ha aton mga limitasyon kon ginpadaku kita hin mga kag-anak nga sobra an ginlalaoman ha aton. May-ada mga tawo nga han bata pa hira inabat na nira nga kinahanglan pirme mas damu ngan mas maopay an ira buhaton basi higugmaon han ira mga kag-anak. Kon sugad hito an nahitabo ha aton, bangin magin sayop an aton panhunahuna ha panlantaw ni Jehova ha aton. Hinigugma kita ni Jehova tungod han aton bug-os-kasingkasing nga pag-alagad ha iya. An Pulong han Dios nagpapasarig ha aton nga hi Jehova “nakilala han aton panlawas; nahinunumdom hiya nga mga tapotapo kita.” (Sal. 103:14) Maaram hiya han aton mga limitasyon ngan nahigugma ha aton kon madasigon nga nag-aalagad kita ha iya bisan pa hito. An paghinumdom nga an Dios diri sugad hin sobra kaistrikto nga agaron mabulig ha aton nga magin makatadunganon ha aton ginlalaoman ha aton kalugaringon ngan kilalahon an aton mga limitasyon.—Mika 6:8.

Bisan pa hito, an iba nakukurian ha pagkaada han sugad nga timbang nga panhunahuna. Kon ito an imo inaabat, kay ano nga diri mangaro hin bulig ha eksperyensyado nga Kristiano nga nakilala gud ha imo? (Prob. 27:9) Pananglitan, karuyag mo ba magin regular payunir? Maopay gud ito nga tumong! Nakukurian ka ba pagkab-ot hito? Bangin nagkikinahanglan ka hin bulig ha pagpasimple han imo kinabuhi. O an imo tinataporan nga Kristiano nga sangkay mahimo makiistorya ha imo kon praktikal ba ini nga tumong yana nga damu an imo responsabilidad ha pamilya. Mabubuligan ka niya nga turotimbangon kon mahihimo mo gud ba an dugang nga mga buruhaton nga nahiuupod ha pagpayunir o kon ano nga pagbag-o an puydi mo himoon basi makagbuhat hin dugang pa. An bana makakabulig gud liwat ha iya asawa nga hibaroan kon ano la nga mga buruhaton an iya maaakos. Pananglitan, mahimo hiya magsuhestyon ha iya asawa nga pumahuway antes dugangan an iya buruhaton ha sunod nga bulan. Hito nga paagi magkakaada hiya igo nga kusog ngan magpapabilin nga malipayon ha ministeryo.

Pamiling hin mga Buruhaton nga Imo Mahihimo

An kalagas o pagkasakit mahimo magin hinungdan nga malimitahan an aton mahihimo ha pag-alagad kan Jehova. Kon usa ka nga kag-anak, bangin umabat ka nga gutiay la an imo napapahimulosan ha personal nga pag-aram o ha Kristiano nga mga katirok tungod kay an kadak-an han imo panahon ngan kusog nauubos ha pag-ataman ha kabataan. Kondi, posible ba nga tungod kay ginhihinunahuna mo an imo mga limitasyon, usahay diri mo nakikita kon ano an puydi mo pa himoon?

Yinukot ka tuig na an naglabay, usa nga Lebihanon an nagpahayag hin hingyap nga imposible gud matuman. Pribilehiyo niya nga mag-alagad ha templo hin duha ka semana kada tuig. Kondi, iginpahayag niya an darayawon nga hingyap nga umukoy hin permanente hirani ha halaran.  (Sal. 84:1-3) Ano an nakabulig hinin matinumanon nga lalaki nga makontento? Iya nasantop nga bisan an usa la ka adlaw ha bungsaran han templo espesyal hinduro nga pribilehiyo. (Sal. 84:4, 5, 10) Ha pariho nga paagi, imbes nga paghinunahunaon an aton mga limitasyon, sadang naton hibaroan ngan igpasalamat kon ano an aton nahihimo pa.

Sugad nga ehemplo, tagda hi Nerlande, usa nga bugto ha Canada. Aada na la hiya pirme ha lingkoran nga de-kaliding ngan inabat nga gutiay gud la an iya nahihimo ha ministeryo. Kondi ginbag-o niya an iya panhunahuna ngan ginhimo nga personal nga teritoryo ha pagsangyaw an shopping mall nga hirani ha iya gin-uukyan. Siring niya: “Iginpupwesto ko an akon lingkoran nga de-kaliding hirani ha usa nga lingkoran ha mall. Nalilipay ako pagsangyaw ha mga tawo nga nanlilingkod basi pumahuway hin madaliay.” Tagbaw gud hi Nerlande ha pakigbahin hinin importante nga paagi han pagministeryo.

Pagpahiuyon kon Ginkikinahanglan

An usa nga sakayan nga de-layag bangin malaksi gud magbiyahe samtang ginduduso han hangin an mga layag hito. Kondi kon magsubasko, kinahanglan bag-ohon han timonel an posisyon han mga layag. Diri niya kontrolado an subasko, kondi pinaagi han pagpahiuyon ha kahimtang, makukontrol pa gihapon niya an sakayan. Pariho hito nga timonel, agsob nga diri naton kontrolado an makuri nga sugad-subasko nga mga kahimtang nga aton naieksperyensyahan. Kondi kon ipahiuyon naton ha aton kahimtang an paggamit han aton lawas, hunahuna, ngan emosyon, may-ada pa gihapon kita mahihimo ha pagkontrol han aton kinabuhi. Kon aton gintatagad an aton bag-o nga mga kahimtang, magpapabilin kita nga tagbaw ngan malipayon ha pag-alagad ha Dios.—Prob. 11:2.

Tagda an pipira nga ehemplo. Kon madagmit kita kapuyon, bangin angayan nga temprano ha adlaw likyan na naton an makapoy nga mga buruhaton basi may-ada kita kusog ha pagtambong ha katirok ha gab-i. Maghahatag ini ha aton hin higayon nga bug-os nga magpahimulos ha pakig-upod ha mga igkasi-Kristiano. O kon an usa nga iroy diri nakakaupod ha pagbalay-balay tungod kay masakit an iya anak, bangin praktikal nga mag-imbitar hiya hin Kristiano nga bugto nga babaye ha ira balay basi magsangyaw hira pinaagi han telepono samtang nakaturog an bata.

Kon tungod han imo kahimtang diri mo abanse nga maaadman an ngatanan nga paghihisgotan ha mga katirok, ano an mahimo mo buhaton? Maopay nga hibaroan kon mationan-o kadamu an imo maiaandam ngan buhaton an imo gimaopayi. Pinaagi ha pagpahiuyon han aton mga tumong ha aton presente nga kahimtang, makakapabilin kita nga aktibo ngan malipayon.

 Mahimo magkinahanglan hin determinasyon ngan pangalimbasog an pagpahiuyon han aton mga tumong ha aton kahimtang. An mag-asawa nga hira Serge ngan Agnès ha Fransia kinahanglan maghimo hin daku nga pagbag-o ha ira mga plano. “Han amon hinbaroan nga burod hi Agnès, maaram kami nga diri na namon makakab-ot an amon tumong nga magmisyonero,” siring ni Serge. Yana nga may-ada na hiya duha nga mahimsog nga mga anak nga babaye, iginsaysay niya kon paonan-o hira nga mag-asawa naghimo hin bag-o nga tumong. Siring niya: “Tungod kay diri na kami makakag-alagad ha iba nga nasud, nagdesisyon kami nga magin mga ‘misyonero’ ha amon nasud. Binulig kami ha usa nga grupo nga iba an yinaknan.” May kapulsanan ba ha ira an paghimo hinin bag-o nga tumong? Hi Serge nagsiring: “Naabat kami nga nakakabulig gud kami ha kongregasyon.”

Hi Odile, usa nga bugto nga babaye ha Fransia nga sobra 70 anyos na ngan may-ada osteoarthritis ha tuhod, diri nakakailob pagtukdaw hin maiha. Nasubo hiya nga diri hiya nakakaupod pagbalay-balay tungod han iya sakit. Kondi waray hiya umundang. Iginpahiuyon niya an iya mga buruhaton ha iya kahimtang ngan nakigbahin ha pagsangyaw pinaagi han telepono. Hiya nagsiring: “Mas masayon ngan mas makalilipay ito kay han akon ginhunahuna!” Tungod hini nga paagi han pagsangyaw, nahibalik an iya kadasig ha ministeryo.

Mga Kapulsanan han Pagin Makatadunganon ha Aton Ginlalaoman

An paghibaro ha pagin makatadunganon ha kon ano an aton mahihimo mabulig ha aton nga malikyan an damu nga kapakyasan. Pinaagi ha paghimo hin timbang nga mga tumong, naabat kita nga malampuson kita bisan pa han aton mga limitasyon. Hito nga paagi nalilipay kita ha aton nahihimo, bisan kon baga hin gutiay la ito.—Gal. 6:4.

Samtang nahibabaro kita ha pagin timbang ha aton ginlalaoman ha aton kalugaringon, magigin mas makonsiderasyon kita ha mga igkasi-Kristiano. Tungod kay maaram kita han ira mga limitasyon, pirme kita magigin mapasalamaton ha ira ginbubuhat para ha aton. Pinaagi ha pag-apresyar han bisan ano nga bulig nga iginhahatag ha aton, makakabulig kita ha pagkaada kooperasyon ngan pagsinabtanay ha kongregasyon. (1 Ped. 3:8) Hinumdumi nga hi Jehova usa nga mahigugmaon nga Amay nga diri gud naglalaom ha aton hin labaw pa kay han aton maihahatag. Ngan kon timbang an aton ginlalaoman ngan makatadunganon an aton mga tumong, magigin mas tagbaw ngan malipayon kita ha aton espirituwal nga mga buruhaton.

[Blurb ha pahina 29]

Basi magin malipayon ngan kontento ha aton pag-alagad ha Dios, kinahanglan magin makatadunganon kita ha aton ginlalaoman ha aton kalugaringon uyon ha aton mga abilidad ngan kahimtang

[Retrato ha pahina 30]

Hi Nerlande nalilipay ha pagbuhat han iya mahihimo ha ministeryo

[Retrato ha pahina 31]

Mahibaro ha ‘pagbag-o han posisyon han mga layag,’ siring pa

[Ginkuhaan han Retrato]

© Wave Royalty Free/age fotostock

[Retrato ha pahina 32]

Nagin mapulsanon kanda Serge ngan Agnès an paghimo hin bag-o nga mga tumong