Paglampos ha mga Kakurian han Pagsangyaw ha Kada Balay

“Nagtirok kami hin kaisog pinaagi ha aton Dios basi maisumat ha iyo an maopay nga sumat han Dios nga may daku nga pangalimbasog.”—1 TES. 2:2, NW.

1. Ano nga mga kakurian an gin-atubang ni Jeremias, ngan paonan-o niya ito nalamposan?

 HI Jeremias may-ada mga pagbati pariho ha aton. Han ginpahibaro hiya ni Jehova nga hiya magigin “manaragna ha mga nasud,” hiya nagsiring: “Ah, Ginoo nga hi Jehova! Kitaa, diri ako maaram kon inoonan-o an pagyakan; kay ako usa nga bata.” Kondi, tungod kay nasarig hiya kan Jehova, ginkarawat niya an toka. (Jer. 1:4-10) Ha sulod hin sobra 40 ka tuig, nag-ilob hiya han kawaray-pagtagad, pagsalikway, pagtamay, ngan pagkastigo pa ngani. (Jer. 20:1, 2) May mga panahon nga karuyag na niya umundang. Kondi, nagpadayon hiya ha pagpasamwak han mensahe nga diri naruruyagan han kadam-an. Ha bulig han Dios, natuman ni Jeremias an diri gud unta niya mahihimo kon hiya la.—Basaha an Jeremias 20:7-9.

2, 3. Paonan-o gin-aatubang han mga surugoon han Dios yana an mga kakurian nga pariho han kan Jeremias?

² Damu han surugoon han Dios yana an  napaid kan Jeremias. Han pinamamalandong naton hadto an pagsangyaw ha kada balay, damu ha aton an naghunahuna nga, ‘Diri ko gud ito mahihimo.’ Kondi, han nasantop naton nga kaburut-on ni Jehova nga ipasamwak an maopay nga sumat, nalamposan naton an kabaraka ngan nagin aktibo ha pagsangyaw. Bisan pa hito, may mga panahon nga tungod han magkuri nga kahimtang, nakukurian an damu ha aton ha pagpadayon han pagsangyaw. Oo, makuri an pagtikang ha pagsangyaw ha kada balay ngan an pagpadayon hito tubtob ha kataposan.—Mat. 24:13.

³ Kumusta man kon nag-aaram ka na han Biblia kaupod han mga Saksi ni Jehova ngan natambong na ha mga katirok kondi nag-aalang ha pagsangyaw? O kumusta man kon bawtismado ka na nga nakukurian ha pakigbahin hito nga buruhaton, bisan kon maopay an imo kahimtang ha pisikal? Ayaw kahulop tungod kay an mga tawo ha iba-iba nga kahimtang nangangalimbasog liwat ha paglampos ha mga kakurian ha pagbalay-balay nga ministeryo. Ha bulig ni Jehova, mahihimo mo liwat ito.

Pagtirok hin Kaisog

4. Ano an nakabulig kan Pablo basi maisugon nga makagsangyaw han maopay nga sumat?

⁴ Sigurado nga nasasantop mo nga an bug-os-kalibotan nga pagsangyaw natutuman, diri tungod ha gahum o kinaadman han tawo, kondi tungod ha espiritu han Dios. (Sak. 4:6) Ha sugad liwat nga paagi natutuman an ministeryo han tagsa nga Kristiano. (2 Kor. 4:7) Tagda hi apostol Pablo. Han ginmaltrato hiya ngan an iya kaupod nga misyonero, hiya nagsurat mahitungod hito: “Matapos kami mag-antos anay ngan maltratuhon . . . ha Filipos, nagtirok kami hin kaisog pinaagi ha aton Dios basi maipahayag ha iyo an maopay nga sumat han Dios nga may daku nga pangalimbasog.” (1 Tes. 2:2, NW; Buh. 16:22-24) Bangin waray gud naton mahunahuna nga an madasigon nga magwarali pariho kan Pablo, nakurian usahay ha pagsangyaw. Kondi, pariho ha aton ngatanan, kinahanglan sumarig hiya kan Jehova basi maisugon nga makagsangyaw han maopay nga sumat. (Basaha an Efeso 6:18-20.) Paonan-o naton masusubad hi Pablo?

5. Ano an usa nga paagi nga makakabulig ha aton ha pagtirok hin kaisog ha pagsangyaw?

⁵ An usa nga paagi nga makakabulig ha aton ha pagtirok hin kaisog ha pagsangyaw amo an pag-ampo. Usa nga payunir an nagsiring: “Nag-aampo ako nga makayakan nga may kompyansa, makabantad han kasingkasing han mga tawo, ngan magkaada kalipay ha ministeryo. Tutal, buruhaton ini hi Jehova, diri aton, salit waray kita mahihimo kon waray han iya bulig.” (1 Tes. 5:17) Kita ngatanan kinahanglan padayon nga mag-ampo han bulig han baraan nga espiritu han Dios basi maisugon nga makagsangyaw.—Luk. 11:9-13.

6, 7. (a) Ano nga bisyon an nakarawat ni Esekiel, ngan ano an kahulogan hito? (b) Ano nga leksyon an igintatagana han bisyon ni Esekiel para ha mga surugoon han Dios yana?

⁶ An libro han Esekiel may-ada iginsusumat nga makakabulig ha aton basi maisugon nga makayakan. Ha usa nga bisyon, tinagan ni Jehova hi Esekiel hin linukot nga basahon nga ha paluyo-luyo ginsuratan hin ‘mga pagtangis ngan kasub-anan ngan kagol-anan,’ ngan ginsugo hiya nga kaunon ito: “Anak han tawo, himoa nga an imo tiyan makakaon, ngan sudli an imo mga tinai hini nga likid nga akon ihinatag ha imo.” Ano an kahulogan hini? Kinahanglan masabtan hin maopay ni Esekiel an mensahe nga iya isusumat. Magigin bahin ito niya, siring pa, salit makakaapekto ito han iya gihilarumi nga mga pagbati. Hiya nagpadayon: “Dida hito kinaon ko ini; ngan ini nakadto ha akon baba sugad hin dugos hin katam-is.” Para ha iya, makalilipay an pagpasamwak han mensahe han Dios—pariho ha pagkaon hin dugos. Inabat niya nga daku gud nga pribilehiyo an pagrepresentar kan Jehova ngan an pagtuman han toka ha iya, bisan kon nangangahulogan ito hin pagpahayag hin mapwersa nga mensahe ha diri-makinarawaton nga mga tawo.—Basaha an Esekiel 2:8–3:4, 7-9.

⁷ Ini nga bisyon may-ada birilhon nga leksyon para ha mga surugoon han Dios yana. Kita liwat may-ada mapwersa nga mensahe ha mga diri naapresyar ha aton pangalimbasog. Basi padayon nga matagad naton an aton ministeryo sugad nga pribilehiyo nga hatag han Dios, kinahanglan regular nga basahon ngan adman naton an Biblia. An pahapyaw la o diri-regular nga pag-aram diri makakabulig ha aton nga masabtan ito hin bug-os.  Mapapauswag mo ba an kalidad han imo personal nga pagbasa ngan pag-aram ha Biblia o mahihimo mo ba ito hin regular? Mapapamalandong mo ba hin agsob an imo nabasa?—Sal. 1:2, 3.

Pagtikang ha Pakiistorya Mahitungod ha Biblia

8. Ano nga paagi an nakakabulig ha iba nga magwarali ha pagtikang ha pakiistorya mahitungod ha Biblia ha pagbalay-balay nga ministeryo?

⁸ Para ha damu nga magwarali, an pinakamakuri nga bahin han pagbalay-balay nga ministeryo amo an pagtikang ha pakiistorya ha tagbalay. Ha pagkamatuod, may-ada mga teritoryo diin makuri gud an pagtikang hin pakiistorya. An iba nga magwarali mas komportable makiistorya ha mga tawo ha purtahan kon natitikangan nira an ira presentasyon pinaagi hin pinili gud nga mga pulong ngan katapos naghahatag hin tract ha tagbalay, sugad han mababasa ha kahon ha ubos. Bangin magkainteres an tagbalay ha ulohan han tract o ha de-kolor nga retrato hito, ngan dida hito makakahigayon kita nga unabihon hin madaliay an aton tuyo ha pagbisita ngan makagbangon hin pakiana. Usa pa nga paagi amo an pagpakita ha tagbalay hin tulo o upat nga iba-iba nga tract ngan pagpapili han iya karuyag. Syempre, an aton tumong diri la an paghatag hin tract o paggamit hito ha kada tagbalay, kondi an pagtikang ha pakiistorya mahitungod ha Biblia nga magriresulta ha pag-aram.

9. Kay ano nga importante an maopay nga pangandam?

 ⁹ Anoman nga paagi an imo gamiton, magigin kalmado ngan madasigon ka ha pagsangyaw kon nag-andam ka hin maopay. Usa nga payunir an nagsiring: “Mas malipayon ako kon nag-andam ako hin maopay. Nakakaaghat ito ha akon nga gamiton an akon gin-andam nga presentasyon.” Usa pa nga payunir an nagsiring, “Kon maaram ako han mga sulod han publikasyon nga akon itatanyag, nadadasig ako nga gamiton ito.” Bisan kon mapulsanon an paghunahuna han imo isisiring, damu an nakaobserba nga mas nakakabulig an pagbansay han ira presentasyon ha daku nga tingog. Nabulig ito ha ira nga maihatag kan Jehova an ira gimaopayi.—Kol. 3:23; 2 Tim. 2:15.

10. Ano an mahimo buhaton basi magin praktikal ngan mapulsanon an mga katirok antes magsangyaw?

¹⁰ An praktikal nga mga katirok antes magsangyaw ha teritoryo nakakabulig nga malipay ngan magin epektibo kita ha pagbalay-balay. Kon mahitungod ha pagsangyaw an ginhihisgotan han teksto hito nga adlaw, mahimo ito basahon ngan paghisgotan hin madaliay. Kondi, sadang tagdon han nagdudumara han katirok nga magkaada igo nga panahon ha paghisgot o pagpasundayag hin simple nga presentasyon nga angayan gud ha teritoryo, o ha paghisgot hin iba nga mapulsanon nga impormasyon nga magagamit hito nga adlaw. Mas masasangkapan hini adton presente basi epektibo nga makagsangyaw. Pinaagi han abanse nga pangandam hin maopay, mahihimo ini han mga tigurang ngan han iba nga nagdudumara hini nga katirok ngan matatapos pa gihapon nira ito ha eksakto nga oras.—Roma 12:8.

An Nahihimo han Pagpamati

11, 12. Paonan-o an mapinairon nga pagpamati nakakabulig ha aton nga maisangyaw an maopay nga sumat? Paghatag hin mga ehemplo.

¹¹ Nakakabulig ha aton diri la an maopay nga pangandam kondi an sinsero liwat nga interes ha mga tawo basi makagtikang hin pakiistorya mahitungod ha Biblia ngan makabantad han ira kasingkasing. An usa nga paagi ha pagpakita han sugad nga interes amo an pagpamati. Usa nga nagbibiyahe nga paramangno an nagsiring: “An aton pagin mapailubon ngan pagkadisidido mamati ha mga tawo nakakadani ha ira nga mamati ha maopay nga sumat ngan maopay gud ito nga kapahayagan han mahigugmaon nga personal nga interes.” Tungod han mapinairon nga pamati mahimo maaghat an tagbalay nga makiistorya mahitungod ha Biblia, sugad han iginpapakita han masunod nga eksperyensya.

¹² Ha usa nga surat nga iginpublikar ha peryodiko nga Le Progrès han Saint-Étienne ha Fransia, iginsaysay han usa nga babaye an pagbisita ha iya han duha nga Saksi han namatay pa la an iya tulo ka bulan nga anak. “Nakilala ko dayon nga mga Saksi ni Jehova hira,” siring niya ha surat. “Andam na ako nga hangyoon hira nga bumaya, kondi nakita ko an brosyur nga ira igintatanyag. Mahitungod ito ha kon kay ano nga gintutugotan han Dios an pag-antos. Salit nagdesisyon ako nga pasudlon hira basi pamatud-an nga sayop hira. . . . An mga Saksi nagpabilin ha sulod hin sobra usa ka oras. Namati hira ha akon nga may daku nga pagpaid, ngan han tilakat na hira, mas maopay na gud an akon inabat salit inuyon ako nga bumalik hira.” (Roma 12:15) Waray pag-iha, ginkarawat niya an pag-aram ha Biblia. Mahibabaroan naton dinhi nga an iya nahinumdoman mahitungod han siyahan nga pagbisita, diri an ginsiring han mga Saksi, kondi an ira pagpamati.

13. Paonan-o naton maipapahiuyon ha mga nakakaistorya naton an pagpresentar han maopay nga sumat?

¹³ Kon mapinairon nga namamati kita, nahahatagan naton hin higayon an mga tawo nga mag-istorya ha aton kon kay ano nga kinahanglan nira an Ginhadian. Hini nga paagi nagigin mas posible nga maipahayag naton ha ira an maopay nga sumat. Posible nga naobserbahan mo nga an epektibo nga mga ebanghelisador kasagaran nga maopay nga parapamati. (Prob. 20:5) May-ada hira sinsero nga interes ha mga nakakaistorya nira. Iginsusurat nira diri la an ngaran ngan adres han ira nakaistorya kondi an ira liwat nahihiligan ngan panginahanglan. Kon may-ada nag-iistorya hin espisipiko nga problema, nagsasaliksik hira ngan nabalik dayon basi isumat ito. Pariho kan apostol Pablo, iginpapahiuyon nira ha ira nakakaistorya an ira pagpresentar han mensahe han Ginhadian. (Basaha an 1 Korinto 9:19-23.) Ito nga sinsero nga interes nakakadani ha mga tawo nga mamati han maopay nga sumat ngan mamalandong gud han mahigugmaon nga “kalooy han aton Dios.”—Luk. 1:78.

 Magin Positibo Pirme

14. Paonan-o naton maipapakita an mga kalidad ni Jehova samtang gintutuman naton an aton ministeryo?

¹⁴ Ginpapasidunggan kita ni Jehova pinaagi ha paghatag ha aton hin kagawasan ha pagbuot. Bisan kon hiya an Dios nga Makagarahum-ha-ngatanan, diri niya ginpipirit an bisan hin-o nga mag-alagad ha iya kondi tungod han iya gugma nadadani an mga tawo ha iya, ngan ginbibendisyonan adton nakarawat han iya mag-opay hinduro nga tagana. (Roma 2:4) Sugad nga iya mga ministro, kinahanglan magin andam kita ha pagpresentar han maopay nga sumat ha paagi nga angayan ha aton maloloy-on nga Dios ha kada pagsasangyaw naton. (2 Kor. 5:20, 21; 6:3-6) Basi matuman ini, kinahanglan magin positibo pirme kita ha pagtagad ha mga tawo ha teritoryo. Ano an makakabulig ha aton ha pagbuhat hini?

15. (a) Ano an iginpapabuhat ni Jesus ha iya mga apostol kon diri karawaton han mga tawo an mensahe? (b) Ano an makakabulig ha aton nga isentro an atensyon ha pamiling hin mga takos?

¹⁵ Gintugon ni Jesus an iya mga sumurunod nga diri sobra nga mabaraka kon may-ada diri kumarawat han mensahe kondi isentro lugod an atensyon ha pamiling hin mga takos. (Basaha an Mateo 10:11-15.) Basi mahimo ini, makakabulig an pagkaada hin simple ngan makakab-ot nga mga tumong. Iginpariho han usa nga bugto an iya kalugaringon ha usa nga namimiling hin nalubong nga mga bahandi. Agsob hiya magsiring nga, “Naglalaom ako ha pakabiling hin bulawan yana nga adlaw.” Tumong han usa pa nga bugto nga “makaistorya hin interesado kada semana ngan mabisita utro hiya ha sulod hin pipira ka adlaw basi makultibar an iya interes.” Nangangalimbasog an iba nga magwarali nga mabasahan hin bisan usa la nga teksto an tagsa nga tagbalay. Ano nga makakab-ot nga tumong an imo mahihimo?

16. Kay ano nga kinahanglan magpadayon kita ha pagsangyaw?

¹⁶ An kalamposan han pagbalay-balay nga ministeryo diri la nadepende ha pagkarawat han mga tawo. Oo, daku gud an nahihimo han pagsangyaw para ha kaluwasan han mga tangkod-an-kasingkasing, kondi may-ada liwat ito iba pa nga importante nga katuyoan. Naghahatag ito ha aton hin higayon nga maipakita an aton gugma kan Jehova. (1 Juan 5:3) Nabulig ito ha aton nga diri magin salaan ha dugo. (Buh. 20:26, 27) Nagpapahamangno ito ha mga diri-diosnon nga ‘an oras han paghukom han Dios iini na.’ (Pah. 14:6, 7) Labaw ha ngatanan, pinaagi hito nadadayaw an ngaran ni Jehova ha bug-os nga tuna. (Sal. 113:3) Salit, mamati man o diri an mga tawo, kinahanglan magpadayon kita ha pagsangyaw han mensahe han Ginhadian. Oo, an ngatanan nga pangalimbasog naton ha pagpasamwak han maopay nga sumat makaruruyag ha paniplatan ni Jehova.—Roma 10:13-15.

17. Diri mag-iiha, mapipiritan an mga tawo nga kilalahon an ano?

¹⁷ Bisan kon damu yana an diri naapresyar ha aton pagsangyaw, diri mag-iiha mababag-o an ira pagtagad hito. (Mat. 24:37-39) Ginpasarig ni Jehova hi Esekiel nga kon matuman na an mga paghukom nga iya iginpahayag, an rebelyoso nga nasud han Israel ‘mahibabaro gud nga may-ada usa nga manaragna dida ha ira.’ (Esek. 2:5) Ha pariho nga paagi, kon paghukman na han Dios inin presente nga sistema, mapipiritan an mga tawo nga kilalahon nga an mensahe nga iginsasangyaw han mga Saksi ni Jehova ha panpubliko nga mga lugar ngan ha kada balay nagtikang gud ha uusa nga matuod nga Dios, hi Jehova, ngan masasantop nira nga an mga Saksi gud an Iya mga representante. Daku gud an aton pribilehiyo ha pagdara han iya ngaran ngan pagpasamwak han iya mensahe durante hinin peligroso nga panahon! Pinaagi han iya bulig, hinaot padayon nga malamposan naton an mga kakurian han pagsangyaw ha kada balay.

[Mga Pakiana]

Ano an Imo Baton?

• Paonan-o kita makakatirok hin kaisog basi makagsangyaw?

• Ano an makakabulig ha aton ha pagtikang ha pakiistorya mahitungod ha Biblia ha pagbalay-balay nga ministeryo?

• Paonan-o naton maipapakita an sinsero nga interes ha mga tawo?

• Ano an makakabulig ha aton nga magin positibo pirme ha pagtagad ha mga tawo ha teritoryo?

[Kahon/Retrato ha pahina 9]

Paagi ha Pagtikang han Pakiistorya Mahitungod ha Biblia

Ha pagtikang:

◼ Katapos mangumusta ha tagbalay, mahimo ka maghatag hin tract ngan magsiring, “Nabisita ako yana basi isumat ha imo an makapainteres nga punto mahitungod hinin importante nga topiko.”

◼ O mahimo ka maghatag hin tract ngan magsiring, “Nabisita ako hin madaliay yana tungod kay interesado ako mahibaro han imo opinyon mahitungod hini nga topiko.”

Kon karawaton an tract:

◼ Pakianhi dayon an tagbalay kon ano an iya masisiring mahitungod ha ulohan han tract.

◼ Pamati hin maopay ngan pangalimbasog nga masabtan an iya opinyon. Pasalamati hiya han iya komento.

Ha pagpadayon han paghisgot:

◼ Basaha ngan hisguti an usa o sobra pa nga teksto, ipahiuyon an imo presentasyon ha iya mga nahihiligan ngan panginahanglan.

◼ Kon interesado, pagtanyag hin literatura ngan ipasundayag an pag-aram ha Biblia kon posible. Pakigsabot para ha pagbalik.