Waray Kami Mahadlok—Hi Jehova Kaupod Namon

Iginsumat ni Egyptia Petridou

Han 1972, an mga Saksi ha bug-os nga Cyprus nagkatirok ha Nicosia basi mamati ha espesyal nga pahayag ni Nathan H. Knorr nga maiha na nga nangunguna ha buruhaton han mga Saksi ni Jehova. Hinkilal-an niya dayon ako; bisan kon waray pa ako makakapagpakilala, nagpakiana na hiya: “May-ada ka ba mga sumat tikang ha Ehipto?” Nagkita na kami ni Bugto Knorr ha akon natawohan nga lugar ha Alexandria ha Ehipto, 20 ka tuig na an naglabay.

NATAWO ako ha Alexandria han Enero 23, 1914 ngan ako an suhag han upat nga anak. Nagdaku kami ha amon balay nga hirani ha dagat. Hito nga panahon an Alexandria mainuswagon nga syudad nga damu an dayo, ngan kilala ito tungod han arkitektura ngan kasaysayan. Tungod kay an mga Europeo nakikigturutarampo ha mga Arabo, kami nga kabataan nahibaro pagyakan han Arabiko, Franses, Ingles, Italyano, ngan han Griego nga yinaknan han amon pamilya.

Pakagradwar ko, nakatrabaho ako ha patahian hin mga bado nga Franses an disenyo. Nalipay gud ako ha pagdisenyo ngan pagtahi hin elegante nga mga bado hin kababayin-an nga prominente ha sosiedad. Relihiyosa liwat ako hadto ngan mahilig magbasa han Biblia, bisan kon gutiay la an akon nasasabtan.

Ha kabutngaan han dekada han 1930, nagkakilala kami ni Theodotos Petrides, buotan nga olitawo nga taga-Cyprus. Maopay gud hiya nga wrestler, kondi maaram liwat hiya maghimo hin mga dulse ngan magtam-is nga karaunon, ngan ito an iya trabaho ha usa nga kilala nga bake shop. Bisan kon gutiay ako ngan bulaw an buhok, ginhigugma niya ako. Agsob niya ako haranaan hin romantiko nga mga kanta nga Griego. Ginkasal kami han Hunyo 30, 1940. Makalilipay adto nga panahon. Nag-ukoy kami ha apartment ha ubos la han inuukyan ni Nanay. Han 1941 natawo hi John, an amon suhag.

Paghibaro han mga Kamatuoran ha Biblia

Ha sulod hin pipira ka panahon, nagin diskontento hi Theodotos ha amon relihiyon, ngan damu an iya pakiana mahitungod ha Biblia. Diri ako maaram nga nag-aaram na ngay-an hiya han Biblia ha mga Saksi ni Jehova. Usa ka adlaw, ako ngan han amon minasus-an nakadto la ha balay han may babaye nga nagtuktok ngan gindulhan ako hin kard nga may-ada mensahe tikang ha Biblia. Tungod kay diri ko karuyag magin bastos, ginbasa ko ito. Katapos nagtanyag hiya hin literatura nga basado ha Biblia. Nahipausa ako kay pariho ito ha mga libro nga gindara ni Theodotos ha balay!

“May-ada na ako hini nga mga libro,” siring ko. “Kadi, sulod anay.” Ginpauranan ko dayon  hin mga pakiana an Saksi, hi Eleni Nicolaou. Bisan pa hito, pasensyoso nga ginbaton niya ako gamit an Biblia. Naruyagan ko ito. Nasabtan ko dayon an mensahe han Biblia. Han inundang kami hin madaliay ha pag-istorya, nakita ni Eleni an retrato han akon bana. “Kilala ko ito nga tawo!” tigda nga siniring hiya. Dida hito hinbaroan ko an sekreto ni Theodotos, ngan nasurprisa ako. Nagtitinambong na ngay-an hiya ha Kristiano nga mga katirok nga diri ako upod—waray ngani niya ako sumati! Pag-uli niya hito nga adlaw, ginsidngan ko hiya: “Yana nga semana maupod ako ha imo ginkadtoan han naglabay nga Domingo!”

Ha siyahan nga katirok nga akon gintambongan, usa ka grupo hin mga napulo ka tawo an naghisgot mahitungod ha libro han Biblia nga Mika. Interesado gud ako ha ngatanan nga ginhisgotan! Tikang hadto, kada Biernes nga gab-i ginbibisita kami nira George ngan Katerini Petraki basi dumarahan hin pag-aram ha Biblia. Diniri gud hi Tatay ngan haros ngatanan han akon kabugtoan ha amon pag-aram, kondi waray reklamo an akon manghod nga babaye, ugaring la kay waray hiya magin Saksi. Pero hi Nanay kinarawat han kamatuoran. Han 1942, nagpabawtismo kami nira Nanay ngan Theodotos ha dagat ha Alexandria sugad nga simbolo han amon dedikasyon kan Jehova.

Nagin Masamok an Amon Panginabuhi

Han 1939, nagtikang an Girra ha Kalibotan II, ngan madagmit nga nagtikaduro ito. Temprano han dekada han 1940, an Aleman nga hi Heneral Erwin Rommel ngan an iya kasundalohan nga may mga tangke nakadto ha hirani nga El Alamein, ngan an Alexandria puno hin kasundalohan han Britanya. Nag-istak kami hin damu nga ginpauga nga pagkaon. Hito nga panahon, gintaporan hi Theodotos han iya agaron hin bag-o nga bake shop ha Port Taufiq hirani ha Suez, salit binalhin kami ngadto. Didto, ginbiniling kami hin mag-asawa nga Saksi nga Griego an yinaknan. Bisan kon diri hira maaram han amon adres, nagsangyaw hira ha kada balay tubtob nga nabilngan kami.

Han nakadto kami ha Port Taufiq, gindumarahan namon hin pag-aram ha Biblia hira Stavros ngan Giula Kypraios upod an ira mga anak nga hira Totos ngan Georgia, ngan nagin duok hira ha amon. Naruyagan gud ni Stavros an pag-aram salit iya pa ngani gin-aatras hin usa ka oras an ngatanan nga relo ha ira balay basi diri kami makasakay ha ultimo nga biyahe han tren, tungod hito diri kami nakakauli dayon. Nagpapadayon an amon pag-aram tubtob ha katutnga han gab-i.

Nag-ukoy kami ha Port Taufiq hin 18 ka bulan, katapos binalik kami ha Alexandria han nagkasakit hi Nanay. Han 1947, namatay hiya nga matinumanon kan Jehova. Makausa pa, inabat namon nga gindasig gud kami ni Jehova pinaagi han makaparig-on nga pakig-upod ha hamtong  nga Kristiano nga kasangkayan. Nakapag-abiabi liwat kami hin mga misyonero nga tipakadto ha ira mga toka ha iba nga nasud kon an ira barko naduong hin madaliay ha Alexandria.

Mga Kalipay Ngan Problema

Han 1952, natawo an amon ikaduha nga anak, hi James. Sugad nga mga kag-anak, nakita namon nga importante nga magtubo an amon mga anak kaupod han kabugtoan nga hamtong ha espirituwal, salit iginpagamit namon an amon balay para ha regular nga mga katirok ha pag-aram ha Biblia, ngan agsob kami mag-imbitar hin bug-os-panahon nga mga ministro. Tungod hito, nagtubo kan John an gugma ha kamatuoran, salit tinedyer pa la, payunir na hiya. Samtang nagpapayunir, naeskwela liwat hiya ha gab-i basi makagradwar.

Waray pag-iha, hinbaroan namon nga hi Theodotos may-ada grabe nga sakit ha kasingkasing ngan ginsagdonan hiya nga umundang na ha trabaho. Kwatro anyos pa la hadto hi James. Ano an amon bubuhaton? Diri ba hi Jehova nagsaad: “Diri ka mahadlok, kay ako upod ha imo”? (Isa. 41:10) Han 1956, ginhangyo kami nga magpayunir ha Ismailia, hirani ha Suez Canal. Handurawa la an amon kasurprisa ngan kalipay! Han sumunod nga mga tuig, nagin masamok gud an kahimtang ha Ehipto, ngan kinahanglan parig-unon an Kristiano nga kabugtoan.

Han 1960, kinahanglan bumaya kami ha Ehipto nga tag-usa la nga maleta an dara. Binalhin kami ha Cyprus, ha lugar ni Theodotos. Hito nga panahon, grabe na an iya sakit ngan diri hiya nakakatrabaho. Maopay na la kay ginpaukoy kami hin buotan nga kabugtoan nga mag-asawa ha balay nga ira gintatag-iya. Makasurubo la nga paglabay hin duha ka tuig namatay an akon bana; ginbayaan ako ngan hi James nga gutiay pa. Binalhin liwat hi John ha Cyprus, nag-asawa ngan nagkaada na pamilya nga aatamanon.

Ginmangnoan Durante han Kakurian

Katapos, kami ni James ginpalungon nira Stavros ngan Dora Kairis ha ira balay. Linuhod ako ngan nagpasalamat kan Jehova tungod kay makausa pa, nagtagana hiya han amon panginahanglan. (Sal. 145:16) Han nagdesisyon hira Stavros ngan Dora nga ibaligya an ira balay ngan magtukod hin bag-o nga an ubos hihimoon nga Kingdom Hall, ginpasuy-aban nira ito hin duha nga kwarto para ha amon ni James tungod kay nalooy hira ha amon.

Pag-abot han panahon, nag-asawa hi James ngan nagpayunir hira tubtob han matawo an suhag  han ira upat nga anak. Han 1974, duha ka tuig an naglabay katapos han diri-mahingangalimtan nga pagbisita ni Bugto Knorr, masamok an kahimtang ha Cyprus tungod han politika. a Damu an binaya ha ira balay, upod na an iba nga Saksi, ngan binalhin ha iba nga lugar. Usa ha ira an akon anak nga hi John. Binalhin hiya ngan an iya pamilya ngadto ha Canada. Pero bisan kon damu an nagkabaya, nalipay kami tungod kay nagtikadamu pa gihapon an magwarali han Ginhadian ha Cyprus.

Han nakarawat na ako hin pensyon, mas nakahimo ako pakigbahin ha ministeryo. Kondi pipira ka tuig an naglabay, naistrok ako pero diri grabe; tungod hito linungon ako kanda James ngan han iya pamilya. Han nagtikagrabe an akon sakit, nahospital ako hin pipira ka semana ngan iginbalhin ha nursing home. Bisan pa han padayon nga kaul-ol ha lawas, nagsasangyaw ako ha mga empleyado, pasyente, ngan bisita didto. Damu ka oras liwat an akon nauubos ha pag-inaram, ngan tungod han bulig han akon espirituwal nga kabugtoan, nakakatambong ako ha pinakahirani nga Pag-aram ha Libro han Kongregasyon.

Pakabiling hin Kalipay Bisan Pa han Kalagas

Nalilipay ako kon nakakabati ako hin sumat mahitungod han nabuligan namon ni Theodotos. Damu han ira mga anak ngan kaapohan, bug-os-panahon nga ministro na—an iba adto ha Australia, Canada, Gresya, Inglatera, ngan Switzerland. Yana, hi John ngan an iya asawa ngan usa nga anak nga lalaki naukoy ha Canada. An ira suhag ngan han iya bana, mga payunir. Samtang an ira putó, hi Linda, ngan han iya bana, hi Joshua Snape, gin-imbitar pag-eskwela ha ika-124 nga klase han Gilead School.

Hi James ngan an iya asawa naukoy yana ha Alemanya. Duha han ira anak nga lalaki an nagtatrabaho ha Bethel ha Atenas, Gresya, ngan ha Selters, Alemanya. An ira putó nga lalaki, ngan an ira anak nga babaye ngan an iya bana, mga payunir ha Alemanya.

Damu gud an amon ig-iistorya kan Nanay ngan ha akon hinigugma nga hi Theo kon banhawon na hira! Sigurado nga malilipay hira ha paghibaro nga nakabilin hira hin maopay gud nga panurundon ha ira pamilya. b

[Mga footnote]

[Blurb ha pahina 24]

Makausa pa, inabat namon nga gindasig gud kami ni Jehova pinaagi han makaparig-on nga pakig-upod ha hamtong nga Kristiano nga kasangkayan

[Mapa/Retrato ha pahina 24]

(Para ha aktuwal nga format, kitaa an publikasyon)

CYPRUS

NICOSIA

DAGAT MEDITERANYO

EHIPTO

CAIRO

El Alamein

Alexandria

Ismailia

Suez

Port Taufiq

Suez Canal

[Ginkuhaan han Retrato]

Based on NASA/Visible Earth imagery

[Retrato ha pahina 23]

Kami ni Theodotos han 1938

[Retrato ha pahina 25]

Hi James ngan an iya asawa

[Retrato ha pahina 25]

Hi John ngan an iya asawa