Ika-124 Nga Gradwasyon Han Gilead

An mga Misyonero Pariho ha mga Duron

KADA unom ka bulan, an Watchtower Bible School of Gilead nagdudumara hin gradwasyon diin imbitado an bug-os nga pamilya han Bethel han Estados Unidos. Han Marso 8, 2008, dugang pa ha pamilya han Bethel, tinambong liwat an mga bisita tikang ha sobra 30 nga nasud ha gradwasyon han ika-124 nga klase hito. An 6,411 nga tinambong nakigbahin ha kalipay han mga estudyante ha ira espesyal nga adlaw.

Gintikangan han tsirman nga hi Stephen Lett han Nagmamando nga Lawas an programa pinaagi han pahayag nga may ulohan, “Upod ha Simboliko nga mga Duron ni Jehova.” Ha Pahayag 9:1-4, iginpapariho an gutiay nga grupo han dinihogan nga Kristiano nga nagin aktibo utro ha pag-alagad kan Jehova han 1919 ha daku nga panon han duron nga tigda nga nagin aktibo. Ginpahinumdom an mga estudyante nga sugad nga membro han ‘iba nga karnero,’ nakikig-upod na hira hinin simboliko nga panon han duron.—Juan 10:16.

Katapos, hi Lon Schilling, membro han Komite han Sanga ha Estados Unidos, nagpahayag ha ulohan nga “Magbinuligay ha Usa kag Usa.” Iginbasar ito ha Kasuratanhon nga ehemplo nira Akila ngan Prisila (o, Prisca)—Kristiano nga mag-asawa ha siyahan nga siglo. (Roma 16:3, 4) Ginpahinumdoman an 28 nga mag-asawa nga nagkukompwesto hini nga klase nga basi magin malampuson nga misyonero, kinahanglan tipigan nira nga marig-on an ira pag-asawa. Ha Biblia, kon gin-uunabi hi Akila, gin-uunabi liwat hi Prisila. Tungod hito, gintagad hira ni apostol Pablo ngan han kongregasyon nga uusa la. Ha pariho nga paagi, an mga misyonero nga mag-asawa yana sadang magkaupod ha pagbuhat, pagsingba, ngan pag-atubang ha naiiba nga mga ayat ha langyaw nga teritoryo, hito nga paagi nabubuligan nira an usa kag usa.—Gen. 2:18.

An sunod nga pahayag nga “Pagbuhat Uyon ha Pagkamaopay ni Jehova,” iginpresenta ni Guy Pierce han Nagmamando nga Lawas. Iya iginsaysay nga an maopay nga tawo diri la naglilikay ha pagbuhat hin maraot. Nagbubuhat liwat hiya hin maopay ha iba. Kondi, waray gud katupong an pagkamaopay ni Jehova nga Dios. (Sak. 9:16, 17) Ngan an Iya pagkamaopay ngan gugma makakaaghat ha aton nga magbuhat hin maopay ha iba. Ha pag-ikatarapos han pahayag, ginkumendasyonan ni Bugto Pierce an mga nagradwar: “Nagbubuhat na kamo hin maopay. Sigurado kami nga magpapadayon kamo ha pagbuhat uyon ha pagkamaopay han Dios pinaagi ha paghimo hin maopay anoman an iya itoka ha iyo.”

Katapos hito, iginpresenta ni Michael Burnett, misyonero hadto ngan bag-o la nga instruktor han Gilead, an pahayag nga may ulohan, “Isul-ot Ito Sugad hin Butok ha Butnga han Imo mga Mata.” Ha mga Israelita ha naglabay, kinahanglan tipigan nga sugad hin nakikita nira pirme an milagroso nga pagtalwas ni Jehova ha ira ha Ehipto, pariho hin “butok” ha butnga han ira mga mata. (Eks. 13:16) Ha pariho nga paagi, ginsagdonan an mga estudyante nga tipigan nira sugad  nga nakikita an damu nga instruksyon nga nakarawat ha Gilead School sugad hin nakasul-ot ito ha butnga han ira mga mata. Ginpabug-atan ni Bugto Burnett nga ginkikinahanglan an pagpaubos ngan pag-aplikar han mga prinsipyo ha Biblia kon nagsusulbad hin diri-pagsinabtanay ha igkasi-misyonero ngan ha iba.—Mat. 5:23, 24.

Iginpahayag ni Mark Noumair, maiha na nga instruktor han Gilead, an ulohan nga “Ano nga Kanta an Kakantahon Mahitungod ha Imo?” Ha kadaan nga panahon, kustomre an pagsaurog han kadaogan ha girra pinaagi hin kanta. Usa han sugad nga kanta nagbubuhayhag han pagin diri disidido ha pagsakripisyo han mga tribo ni Ruben, Dan, ngan Aser, samtang nagdayaw ito han tribo ni Sabulon tungod han pagin andam ha pagsakripisyo. (Huk. 5:16-18) Pariho ha liriko hin kanta, an panggawi han tagsa nga Kristiano hinay-hinay nga hibabaroan han iba. Kon madasigon an usa ha buruhaton han Ginoo ngan  maunungon ha teokratiko nga kahikayan makakagtirok hiya hin maopay nga rekord kan Jehova ngan magigin susbaranan ha kabugtoan. Samtang pinamamatian han iba ha kongregasyon an simboliko nga kanta nga naisusurat pinaagi han aton panggawi, napapagios hira nga subaron ito nga ehemplo.

Sugad nga bahin han pagbansay ha Gilead, naggamit ini nga klase hin mga 3,000 ka oras ha pagsangyaw. Ha pahayag nga may ulohan, “Pagsunod ha Giya han Baraan nga Espiritu” ni Sam Roberson han Theocratic Schools Department, iginsumat han mga estudyante an pipira han ira makapadasig nga eksperyensya ha kanataran ngan iginpasundayag an iba hito. Katapos hito, may gin-interbyu hi Patrick LaFranca han Komite han Sanga ha Estados Unidos nga mga naggradwar hadto nga nag-aalagad yana ha iba-iba nga nasud. Gin-apresyar han mga estudyante an praktikal nga sagdon hini nga kabugtoan.

Hi Anthony Morris han Nagmamando nga Lawas an nagpresenta han ultimo nga pahayag nga “Hinumdumi, Temporaryo La an mga Butang nga Nakikita.” Ginsasagdonan kita han Kasuratan nga isentro an aton atensyon ha mga bendisyon ni Jehova ha tidaraon imbes ha temporaryo nga kasakitan nga bangin aton naieksperyensyahan. (2 Kor. 4:16-18) An duro nga kapobrehan, kawaray-hustisya, panalumpigos, sakit, ngan kamatayon nahitatabo gud yana. Posible nga maeksperyensyahan han mga misyonero an pipira hini nga kakurian. Kondi an paghinumdom nga temporaryo la ini mabulig ha aton nga makagpabilin nga positibo ngan timbang ha espirituwal.

Ha ultimo nga bahin han programa, an ngatanan nga naggradwar namati ha pangataposan nga mga pulong ni Bugto Lett samtang nalingkod hira ha entablado. Iya gindasig hira nga magpadayon: “Diri mabubungkag an aton integridad kon kaupod naton hi Jehova.” Ginsagda niya an bag-o nga mga misyonero nga magin pariho ha mga duron, nagpapadayon ha pag-alagad kan Jehova ngan nagpapabilin nga madasigon, maunungon, ngan masinugtanon tubtob ha kadayonan.

[Kahon ha pahina 30]

ESTADISTIKA HAN KLASE

Kadamu han nasud nga ginrepresentaran: 7

Kadamu han nasud nga gintokahan: 16

Kadamu han estudyante: 56

Aberids nga edad: 33.8

Aberids nga mga tuig ha kamatuoran: 18.2

Aberids nga mga tuig ha bug-os panahon nga ministeryo: 13.8

[Retrato ha pahina 31]

Ika-124 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Retrato ha pahina 32]

An Gilead School nahimumutang ha Watchtower Educational Center