Bug-os-Kasingkasing nga Magpabilin nga Maunungon

“Maglalakat ako ha imo kamatuoran. Pag-usaha an akon kasingkasing ha kahadlok han imo ngaran.”—SAL. 86:11.

1, 2. (a) Sumala ha Salmo 86:2, 11, ano an mabulig ha aton nga magpabilin nga matinumanon kan Jehova kon naatubang hin mga pagsari o pagsulay? (b) San-o sadang kultibaron an kinasingkasing nga pagkamaunungon?

 KAY ano nga an iba nga Kristiano nga nagpapabilin nga maunungon ha damu ka tuig na bisan pa han kapriso o pagtimaraot, ha urhi nadadaog han materyalismo? An baton hito may kalabotan ha aton simboliko nga kasingkasing—kon ano gud an aton pagkatawo. Gin-uunabi ha ika-86 nga Salmo nga an pagkamaunungon may-ada kalabotan ha bug-os nga kasingkasing; nga amo an kompleto nga kasingkasing, nga diri nababahin. “Pagbantayi an akon kalag kay ako diosnon [“maunungon,” NW],” nag-ampo hi salmista David. “O nga Dios nakon, luwasa an imo surugoon nga natapod ha imo.” Nag-ampo liwat hiya: “Igtutdo ha akon an imo agian, O Jehova; maglalakat ako ha imo kamatuoran. Pag-usaha an akon kasingkasing ha kahadlok han imo ngaran.”—Sal. 86:2, 11.

² Kon diri kita sumarig kan Jehova ha aton bug-os nga kasingkasing, masayon la magluya an aton pagkamaunungon ha matuod nga Dios tungod han mga kabaraka ngan nakakadani ha aton. An hakog nga mga hingyap pariho ha mga bomba nga nakalubong ha dalan nga aton ginlalaktan. Bisan pa kon magpabilin kita nga matinumanon kan Jehova bisan ha magkuri nga kahimtang, mahimo la gihapon kita mabiktima han mga lit-ag ni Satanas. Importante gud nga kultibaron na naton yana an kinasingkasing nga pagkamaunungon  kan Jehova, antes umabot ha aton an mga pagsari o pagsulay! Labaw ha ngatanan nga kinahanglan panalipdan, “bantayi an imo kasingkasing ha bug-os nga kamaduruto,” siring han Biblia. (Prob. 4:23) Mahibabaroan naton an birilhon nga mga leksyon may kalabotan hini tikang ha eksperyensya han propeta ha Juda nga ginpakadto ni Jehova kan Hadi Jeroboam han Israel.

“Akon Ka Tatagan hin Ganti”

3. Ano an reaksyon ni Jeroboam ha mensahe han paghukom nga iginpahayag han propeta han Dios?

³ Handurawa an kahimtang. An propeta han Dios nagpahayag pa la hin mabug-at nga mensahe kan Hadi Jeroboam, an nag-establisar han pagsingba ha baka ha napulo-ka-tribo nga ginhadian han Israel ha norte. Tungod hito, nasina gud an hadi. Salit iya ginsugo an iya mga tawo nga dakpon an propeta. Kondi ginpanalipdan ni Jehova an iya surugoon. Tigda la nga nauga ha milagroso nga paagi an kamot han hadi nga iya inunat tungod ha kasina, ngan nabuka an halaran nga gin-gamit para ha palso nga pagsingba. Nagbag-o dayon hi Jeroboam. Nakimalooy hiya ha propeta han Dios: “Pakimalooy yana han pagpalabi ni Jehova nga imo Dios, ngan pag-ampo para ha akon, nga an akon kamot mahibalik ha akon liwat.” Nag-ampo an propeta ngan natambal an kamot han hadi.—1 Hadi 13:1-6.

4. (a) Kay ano nga nasarihan gud an pagkamaunungon han propeta tungod han igintanyag han hadi? (b) Ano an baton han propeta?

⁴ Katapos, hi Jeroboam nagsiring ha propeta han matuod nga Dios: “Kadi ha puroy-anan upod ha akon, ngan pagpahagnaw ha imo ngahaw, ngan akon ka tatagan hin ganti [“regalo,” NW].” (1 Hadi 13:7) Ano yana an bubuhaton han propeta? Kakarawaton ba niya an imbitasyon han hadi katapos magpahayag hin mensahe ha paghukom ha iya? (Sal. 119:113) O diri niya kakarawaton ito, bisan kon baga hin nagbabasol gud an hadi? Maaakos gud ni Jeroboam an paghatag hin marahalon nga mga regalo ha iya kasangkayan. Salit, kon an propeta han Dios tago nga naghiningyap hin materyal nga mga butang, posible nga masulay gud hiya ha igintatanyag han hadi. Kondi, ginsugo ni Jehova an propeta: “Diri ka kumaon hin tinapay o uminom hin tubig ngan diri bisan ha pagbalik pinaagi han dalan nga imo inagian pagkanhi.” Salit an propeta marig-on ngan matin-aw nga binaton: “Kon imo ihatag ha akon an katunga han imo balay, diri ako masulod upod ha imo, ngan diri ako makaon hin tinapay bisan pag-inom hin tubig dida hini nga lugar.” Ngan an propeta binaya ha Betel pinaagi ha lain nga dalan. (1 Hadi 13:8-10) Ano nga leksyon mahitungod han kinasingkasing nga pagkamaunungon an igintututdo ha aton han nagin desisyon han propeta?—Roma 15:4.

“Magin Kontento”

5. Paonan-o masasarihan an aton pagkamaunungon pinaagi han materyalismo?

⁵ An materyalismo baga hin waray kalabotan ha pagkamaunungon, kondi may epekto ito. Nasarig ba kita ha saad ni Jehova nga itatagana niya kon ano gud an aton ginkikinahanglan? (Mat. 6:33; Heb. 13:5) Imbes nga himoon an ngatanan basi magkaada han “maoroopay” nga mga butang nga diri naton naaakos yana, kontento ba kita bisan waray hito? (Basaha an Filipos 4:11-13.) Nasusulay ba kita nga diri karawaton an teokratiko nga mga pribilehiyo basi magkaada han karuyag naton yana? Inuuna ba naton ha aton kinabuhi an maunungon nga pag-alagad kan Jehova? An aton mga baton madepende gud kon bug-os-kasingkasing an aton pag-alagad ha Dios o diri. Hi apostol Pablo nagsurat: “Daku nga pagtubo [“kapulsanan,” NW] an pagtahod ha Dios upod ha kalipay: Kay waray ta gindara nga bisan ano nganhi ha kalibotan, ngan diri sadang ta pagdadad-on nga bisan ano ha paggowa; kondi nga may-ada ta kinakaon ngan igintatabon maglipay [“magin kontento,” NW] kita tungod hini.”—1 Tim. 6:6-8.

6. Ano nga mga “regalo” an bangin itanyag ha aton, ngan ano an mabulig ha aton ha pagdesisyon kon sadang ba ito karawaton?

⁶ Pananglitan, bangin tanyagan kita han aton agaron hin promosyon nga may daku nga sweldo ngan iba pa nga benepisyo. O bangin hunahunaon naton nga mahimo kita kumita hin daku kon magtatrabaho kita ha iba nga nasud o lugar. Ha siyahan, an sugad nga mga oportunidad baga hin bendisyon ni Jehova. Kondi antes kita magdesisyon, diri ba sadang naton usisahon an aton mga motibo? Sadang naton tagdon ini nga pakiana, “Paonan-o an akon desisyon makakaapekto ha akon relasyon kan Jehova?”

7. Kay ano nga importante nga isalikway an materyalistiko nga mga hingyap?

⁷ Padayon nga igin-aaghat han sistema ni Satanas an materyalismo. (Basaha an 1 Juan 2:15, 16.) Tumong han Yawa nga madaot an aton kasingkasing.  Salit, kinahanglan magbantay kita pirme ha pagkilala ngan bug-os nga pagsalikway han materyalistiko nga mga hingyap han aton kasingkasing. (Pah. 3:15-17) Hi Jesus waray makurii ha pagsalikway, han igintanyag ni Satanas ha iya an ngatanan nga ginhadian ha kalibotan. (Mat. 4:8-10) Hiya nagpahamangno: “Pagmatngon kamo ngan maglikay kamo ha ngatanan nga kahikaw: Kay an kinabuhi han usa nga tawo diri ha kahuraan han mga butang, nga iya gintatag-iya.” (Luk. 12:15) Salit an pagkamaunungon mabulig ha aton nga sumarig kan Jehova imbes nga ha aton kalugaringon.

An Lagas nga Propeta “Nagbuwa ha Iya”

8. Paonan-o nasarihan an pagkamaunungon han propeta han Dios?

⁸ Naghikaopay unta an propeta han Dios kon nagpadayon hiya pag-uli. Kondi inatubang dayon hiya hin usa pa nga pagsari. “May nag-uukoy nga tigurang nga manaragna didto ha Betel,” siring han Biblia, “ngan . . . [an] iya mga anak nga kalalakin-an nakada ngan nagsumat ha iya” han ngatanan nga nahitabo temprano hito nga adlaw. Han makabati han sumat, naghangyo hiya ha ira nga butangan hin muntora an asno para ha iya basi hiabotan niya an propeta han Dios. Waray pag-iha, hin-agian niya an propeta nga napahuway ha ilarom han daku nga kahoy ngan iya ginsidngan: “Kadi ha puroy-anan upod ha akon ngan kumaon hin tinapay.” Han an propeta han Dios nagdumiri ha imbitasyon, an lagas binaton: “Ako liwat manaragna sugad ha imo; ngan usa nga anghel naghimangraw ha akon han pulong ni Jehova, nga nasiring: Dad-a hiya pabalik upod ha imo ngadto ha imo balay, nga hiya makakaon hin tinapay ngan makainom hin tubig.” Kondi an Kasuratan nasiring: “Hiya nagbuwa ha iya.”—1 Hadi 13:11-18.

9. Ano an ginsisiring han Kasuratan mahitungod han maglimbong, ngan hin-o an ira gindadaot?

⁹ Diri kita maaram kon ano an motibo han lagas nga propeta, kondi nagbuwa hiya. Hadto, bangin matinumanon hiya nga propeta ni Jehova. Kondi hito nga takna, nanlilimbong hiya. An sugad nga paggawi ginkukondenar gud han Kasuratan. (Basaha an Proberbios 6:16, 17.) Gindadaot han maglimbong diri la an ira relasyon kan Jehova kondi agsob nga ha iba liwat.

“Binalik Hiya Upod” han Lagas nga Propeta

10. Ano an ginbuhat han propeta han Dios han gin-imbitar hiya han lagas nga propeta, ngan ano an nagin resulta?

¹⁰ Nasabtan unta nga daan han propeta tikang ha Juda an tuso nga paagi ha paglimbong han lagas nga manaragna. Ginpakianhan unta niya an iya kalugaringon, ‘Kay ano nga magsusugo hi Jehova hin anghel ngadto ha iba basi maghatag hin bag-o nga mga instruksyon para ha akon?’ Nagpakiana unta hiya kan Jehova basi siguruhon ito, kondi waray unabiha ha Kasuratan nga ginbuhat niya ito. Lugod, “binalik hiya upod han [lagas nga propeta] ngan kinaon hin tinapay didto ha iya balay, ngan ininom hin tubig.” Waray malipay hito hi Jehova. Han tipabalik na ha Juda an  nalimbongan nga propeta, nakit-an hiya hin leon ngan ginpatay hiya. Makangingirhat gud ito nga kataposan han iya pag-alagad sugad nga propeta!—1 Hadi 13:19-25. a

11. Ano nga maopay nga susbaranan an ipinakita ni Ahias?

¹¹ Ha luyo nga bahin, hi propeta Ahias, nga ginsugo pagdihog kan Jeroboam sugad nga hadi, nagpabilin nga maunungon tubtob ha iya kalagas. Han lagas ngan harap na hi Ahias, ginsugo ni Jeroboam an iya asawa nga magpakiana kan Ahias mahitungod han mahitatabo ha iya masakit nga anak nga lalaki. Maisugon nga nagtagna hiya nga mamamatay an anak ni Jeroboam. (1 Hadi 14:1-18) Usa han damu nga bendisyon nga nakarawat ni Ahias amo an pribilehiyo han pakabulig ha pagsurat han Pulong han Dios. Paonan-o? Ha urhi, an iya mga sinurat gin-gamit sugad nga reperensya han saserdote nga hi Esra.—2 Kron. 9:29.

12-14. (a) Ano nga leksyon an mahibabaroan naton ha nahitabo ha burobata nga propeta? (b) Iilustrar an pagkaimportante han paghatag hin seryoso ngan sinsero nga pagtagad ha basado-ha-Biblia nga iginsasagdon han mga tigurang.

¹² An Biblia waray mag-unabi kon kay ano nga an burobata nga propeta waray magpakiana kan Jehova antes hiya bumalik basi kumaon ngan uminom upod han lagas nga propeta. Tungod ba kay bangin ginsumatan hiya han lagas nga propeta han karuyag niya hibatian? Ano an leksyon hini para ha aton? Kinahanglan bug-os nga magin kombinsido kita nga husto gud an kasugoanan ni Jehova. Ngan kinahanglan magin determinado kita nga sundon ito anoman an mahitabo.

¹³ Pinamamatian la han iba adton karuyag nira hibatian ha sagdon. Pananglitan, an usa nga magwarali bangin tanyagan hin trabaho nga makakaiban han iya panahon para ha pamilya ngan ha teokratiko nga buruhaton. Bangin maghangyo hiya hin sagdon ha tigurang. Ha pagtikang, bangin magsiring an tigurang nga waray hiya katungod nga sidngan an bugto kon paonan-o niya susuportahan an iya pamilya. Katapos, mahimo repasuhon han tigurang an mga peligro ha espirituwal kon karawaton han bugto an trabaho nga igintatanyag ha iya. Dudumdumon la ba han bugto adton ginsiring han tigurang ha tinikangan, o tatagdon niya hin seryoso an dugang nga sagdon? Kinahanglan magdesisyon hiya kon ano an gimaopayi para ha iya espirituwalidad.

¹⁴ Tagda an usa pa nga ehemplo. An usa nga bugto nga babaye bangin magpakiana ha tigurang kon sadang ba niya bulagan an iya diri-tumuroo nga bana. Sigurado nga isasaysay han tigurang nga an bugto an magdidesisyon kon mabulag hiya o diri. Katapos, mahimo repasuhon han tigurang an sagdon han Biblia mahitungod  hito. (1 Kor. 7:10-16) Tatagdon ba han bugto an sagdon han tigurang? O nagdesisyon na hiya nga bulagan an iya bana? Ha pagdesisyon, maopay gud nga tagdon niya hin sinsero an basado-ha-Biblia nga sagdon.

Magin Mapainubsanon

15. Ano an hinbaroan naton tikang ha sayop han propeta han Dios?

¹⁵ Ano pa an mahibabaroan naton tikang ha sayop han propeta ha Juda? An Proberbios 3:5 nasiring: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot.” Imbes nga padayon nga sumarig kan Jehova sugad han iya ginbuhat ha naglabay, hini nga higayon an propeta ha Juda sinarig ha iya kalugaringon nga pagsabot. Tungod han iya sayop, namatay hiya ngan nadaot an iya maopay nga ngaran ha Dios. Pinabubug-atan gud hini nga iya eksperyensya an pagkaimportante han mapainubsanon ngan maunungon nga pag-alagad kan Jehova!

16, 17. Ano an mabulig ha aton nga magpabilin nga maunungon kan Jehova?

¹⁶ Mahimo kita mahisimang tungod han hakugnon nga hilig han aton kasingkasing. “An kasingkasing malimbungon labaw han ngatanan nga butang, ngan labi hin kamahugaw.” (Jer. 17:9) Basi magpabilin nga maunungon kan Jehova, kinahanglan padayon nga mangalimbasog kita ha paghukas han daan nga personalidad upod an tendensya hito nga pagkaparagbuot ngan pagsarig ha kalugaringon. Ngan sumala ha Efeso 4:24, (NW), kinahanglan isul-ot naton an bag-o nga personalidad, “nga ginlarang uyon ha kaburut-on han Dios ha tinuod nga pagkamatadong ngan pagkamaunungon.”—Basaha an Efeso 4:22, 23.

¹⁷ “An kaupod han mga ubos amo an kinaadman,” siring han Proberbios 11:2. Malilikyan naton an pakabuhat hin seryoso nga mga sayop kon mapainubsanon nga sumarig kita kan Jehova. Pananglitan, an kahulop masayon la makabaliko han aton desisyon. (Prob. 24:10) Bangin makapoy kita ha pakigbahin ha sagrado nga pag-alagad ngan magtikang paghunahuna nga igo na an aton nahimo ha naglabay nga mga tuig ngan bangin panahon na nga iba naman an magbuhat han responsabilidad. O bangin naghihingyap kita hin mas “normal” nga kinabuhi. Kondi, an bug-os-kusog nga ‘panalinguha naton’ ngan an pagkaada pirme damu nga “buruhaton han Ginoo” magpapanalipod han aton kasingkasing.—Luk. 13:24; 1 Kor. 15:58.

18. Ano an bubuhaton naton kon diri kita maaram kon ano nga desisyon an hihimoon?

¹⁸ Usahay, bangin kinahanglan maghimo kita hin magkuri nga desisyon, ngan bangin diri dayon naton mahibaroan kon ano an angay buhaton. Masusulay ba kita nga sulbaron an problema ha aton kalugaringon nga paagi? Kon aada kita ha sugad nga kahimtang, maopay gud nga maghangyo kita han bulig ni Jehova. “Kon may-ada ha iyo an nakulang hin kaaram,” siring han Jakobo 1:5, “mangaro hiya ha Dios, nga mahatagon ha ngatanan.” Ihahatag han aton Amay ha langit an baraan nga espiritu nga ginkikinahanglan naton basi makahimo kita hin mag-opay nga desisyon.—Basaha an Lukas 11:9, 13.

Magin Determinado nga Magpabilin nga Maunungon

19, 20. Sadang magin determinado kita nga buhaton an ano?

¹⁹ Nasarihan gud an pagkamaunungon han mga surugoon han Dios durante han masamok nga mga tuig katapos nga binaya hi Salomon ha tinuod nga pagsingba. Oo, damu an nagkompromiso ha iba-iba nga paagi. Bisan pa hito, an iba nagpabilin gud nga maunungon kan Jehova.

²⁰ Kada adlaw, nagpipili ngan naghihimo kita hin desisyon nga nagsasari han aton pagkamaunungon. Mapapamatud-an liwat naton nga maunungon kita. Magpabilin kita nga maunungon pirme kan Jehova samtang ginhihiusa naton an aton kasingkasing ngan nasarig hin bug-os nga padayon nga bibendisyonan niya an iya mga maunungon.—2 Sam. 22:26.

[Footnote]

Ano an Imo Baton?

• Kay ano nga sadang mangalimbasog kita nga isalikway an materyalistiko nga mga hingyap han aton kasingkasing?

• Ano an mabulig ha aton ha pagpabilin nga maunungon kan Jehova?

• Paonan-o an pagpaubos makakabulig ha aton ha pagpabilin nga maunungon ha Dios?

[Mga Pakiana]

[Mga Retrato ha pahina 9]

Nakukurian ka ba ha pag-ato ha mga pagsulay?

[Mga Retrato ha pahina 10]

Sinsero nga tatagdon mo ba an basado-ha-Biblia nga sagdon?