Hi Jehova Diri Magpapasibaya ha Iya mga Maunungon

“Hi Jehova . . . diri nagpapasibaya ha iya mga baraan [“maunungon,” NW]; hira ginbabantayan hin waray kataposan.”—SAL. 37:28.

1, 2. (a) Ano nga mga panhitabo han ikanapulo ka siglo A.K.P. an nagsari han pagkamaunungon han mga surugoon han Dios? (b) Ha ano nga tulo nga kahimtang ginpanalipdan ni Jehova an iya mga maunungon?

 IKANAPULO ka siglo A.K.P. adto ngan hito nga panahon kinahanglan magdesisyon an mga surugoon ni Jehova. Magkakagirra sibil na unta kon waray hatagi hin independensya an diri-kontento nga mga tribo ha norte han Israel. Ginparig-on dayon han ira bag-o la nga pinili nga hadi, hi Jeroboam, an iya pagmando pinaagi ha pag-establisar hin bag-o nga relihiyon han Estado. Gin-obligar niya an iya mga sakop nga magin bug-os nga maunungon. Ano an bubuhaton han magtinumanon nga surugoon ni Jehova? Magpapabilin ba hira nga maunungon ha Dios nga ira ginsisingba? Yinukot an nagmaunungon, ngan ginbantayan hira ni Jehova samtang gintitipigan nira an ira integridad.—1 Hadi 12:1-33; 2 Kron. 11:13, 14.

² An pagkamaunungon han mga surugoon han Dios ginsasarihan liwat ha aton panahon. “Magbuotan, ngan mag-agma kamo,” nagpapahamangno an Biblia. “An iyo kaaway nga amo an Yawa, sugad hin maaringasa nga leon, naglilinakatlakat pagpinamiling hin iya lalamyon.” Maglalampos ba kita ha ‘aton pag-ato ha iya, nga marig-on ha pagtoo’? (1 Ped. 5:8, 9) Aton usisahon an pipira nga panhitabo ha tinikangan han pagmando ni Hadi Jeroboam han 997 A.K.P. ngan kitaon kon ano an mahibabaroan naton tikang hito. Durante hiton peligroso nga panahon, gintalumpigos an magtinumanon nga surugoon ni Jehova. Nameligro liwat hira ha impluwensya han apostasya samtang gintutuman nira an magkuri nga toka. Ha tagsa hini nga kahimtang, waray pasibay-i ni Jehova an iya mga maunungon hadto, ngan diri liwat niya hira pasisibay-an yana.—Sal. 37:28.

Han Gintatalumpigos Hira

3. Kay ano nga an pagmando ni Hadi David diri matalumpiguson?

³ Aton usisahon siyahan an mga kahimtang han nagin hadi na hi Jeroboam. An Proberbios 29:2 nasiring: “Kon an tawo nga maraot an nagdadara han kaladnganan, an katawohan nanhahayhay.” Han hi Hadi David pa an nagmamando ha Israel, an katawohan waray manhayhay. Diri hiya hingpit, kondi maunungon hiya ha Dios ngan nasarig ha Iya. Diri matalumpiguson an iya pagmando. Hi Jehova naghimo hin kauyonan kan David, nasiring: “An imo balay ngan an imo ginhadian magmamarig-on ha waray kataposan ha imo atubangan; an imo lingkuranan nga hadianon matutukod ha waray kataposan.”—2 Sam. 7:16.

4. Ha ano nadepende an mga bendisyon nga naeksperyensyahan durante han pagmando ni Salomon?

⁴ Ha tinikangan, an pagmando han anak ni David nga hi Salomon mamurayawon ngan mainuswagon gud, salit nagpapadagaw ito han tidaraon nga Milenyo nga Pagmando ni Kristo Jesus. (Sal. 72:1, 17) Waray gud hinungdan nga magrebelde an bisan usa han 12 nga tribo han Israel hadto. Kondi, may kondisyon an mga bendisyon kan Salomon ngan ha iya mga sakop. Hi Jehova nagsiring kan Salomon: “Kon ikaw maglakat ha akon mga kasugoan, ngan magbuhat han akon mga lagda, ngan magbantay han ngatanan ko nga sugo ha paglakat dida ha ira; dida hito tutumanon ko ha imo an akon pulong nga akon ipinamulong  kan David nga imo amay. Ngan maukoy ako sakot han mga anak ni Israel, ngan diri ko babayaan an akon katawohan an Israel.”—1 Hadi 6:11-13.

5, 6. Ano an nagin resulta han pagkadiri-maunungon ni Salomon ha Dios?

⁵ Han lagas na hi Salomon, nagin diri matinumanon hiya kan Jehova ngan nakigbahin ha palso nga pagsingba. (1 Hadi 11:4-6) Hinay-hinay nga waray na hiya sumugot ha mga balaud ni Jehova ngan nagtikaduro an iya panalumpigos. Sobra adto nga iya panalumpigos kay bisan han patay na hiya, an katawohan padayon nga nagreklamo mahitungod ha iya ngadto ha iya anak ngan manurunod nga hi Rehoboam, ngan naghangyo hira hin katalwasan. (1 Hadi 12:4) Ano an reaksyon ni Jehova han nagin diri matinumanon hi Salomon?

⁶ An Biblia nagsusumat ha aton: ‘Nasina hi Jehova kan Salomon, tungod kay an iya kasingkasing sinimang tikang ha Dios ha Israel, nga pinmakita ha iya ha nakaduha.’ Hi Jehova nagsiring kan Salomon: “Sanglit kay . . . waray ka magbantay han akon kauyonan ngan han akon kasugoan, nga akon iginsugo ha imo, ha waray ruhaduha lalakniton ko an ginhadian tikang ha imo, ngan ihahatag ini ha imo surugoon.”—1 Hadi 11:9-11.

7. Bisan kon iginsalikway hi Salomon, paonan-o ginmangnoan ni Jehova an Iya mga maunungon?

⁷ Katapos, ginsugo ni Jehova hi propeta Ahias nga magdihog hin magigin magtaralwas. Ito nga magtaralwas amo hi Jeroboam, usa nga kwalipikado nga lalaki nga nagtrabaho kan Salomon han hadi pa hiya. Bisan kon nagpabilin hi Jehova nga maunungon ha kauyonan han Ginhadian nga ginhimo niya kan David, Iya gintugotan nga mabahin ha duha an 12 nga tribo. An napulo nga tribo ihahatag kan Jeroboam; an duha magpapabilin ha pamilya ni David, nga ginrirepresentaran yana ni Hadi Rehoboam. (1 Hadi 11:29-37; 12:16, 17, 21) Hi Jehova nagsiring kan Jeroboam: “Mahinanabo, kon ikaw mamati han ngatanan nga isusugo ko ha imo, ngan maglakat ha akon mga dalan, ngan magbuhat hadton matadong ha akon mga mata, ha pagbantay han akon mga kasugoan ngan han akon mga sugo, sugad han binuhat ni David nga akon surugoon; nga ako maupod ha imo, ngan magtutukod ha imo [hin] usa ka balay nga marig-on, sugad han akon gintukod para kan David, ngan ihahatag an Israel ha imo.” (1 Hadi 11:38) Hi Jehova ginios para ha iya katawohan ngan gintalwas hira tikang ha panalumpigos.

8. Ano nga mga pagsari an nagpapakuri ha katawohan han Dios yana?

⁸ Kalyap yana an panalumpigos ngan kawaray-hustisya. “An usa ka tawo may gahum labaw han iba ha iya karaotan,” siring han Eklesiastes 8:9. An hakog nga komersyo ngan maraot nga pagmando mahimo magresulta hin makuri nga kahimtang ha ekonomiya. An mga lider ha gobyerno, komersyo, ngan relihiyon agsob magpakita hin diri-maopay nga ehemplo ha moral. Salit, pariho ha matinumanon nga hi Lot, an mga maunungon han Dios yana ‘nasasakit gud ha maglaw-ay nga ginawian han magraot.’ (2 Ped. 2:7) Dugang pa, bisan kon mamurayawon nga nangangalimbasog kita ha pagsugot ha mga prinsipyo han Dios, agsob nga nagigin puntirya kita han pagtimaraot han mapahitas-on nga mga magmarando.—2 Tim. 3:1-5, 12.

9. (a) Ano an ginbuhat na ni Jehova ha pagtalwas ha iya katawohan? (b) Kay ano nga makakasiguro kita nga hi Jesus magigin maunungon pirme ha Dios?

⁹ Kondi, makakasiguro kita hinin importante nga kamatuoran: Hi Jehova diri magpapasibaya ha iya mga maunungon! Hunahunaa la an iya ginbuhat basi saliwnan an magraot nga magmarando han kalibotan. Naestablisar na an Mesianiko nga Ginhadian han Dios pinaagi kan Kristo Jesus. Nagmamando hiya ha langit hin haros usa ka gatos ka tuig na. Diri mag-iiha, iya tatalwason adton nahahadlok ha ngaran han Dios. (Basaha an Pahayag 11:15-18.) Pinamatud-an na ni Jesus nga maunungon hiya ha Dios tubtob ha kamatayon. Diri gud niya papakyason an iya mga sakop, diri sugad han ginbuhat ni Salomon.—Heb. 7:26; 1 Ped. 2:6.

10. (a) Paonan-o naton maipapakita nga pinabibilhan naton an Ginhadian han Dios? (b) Ha ano kita makakasarig kon nag-aantos hin mga pagsari?

¹⁰ An Ginhadian han Dios usa ka tinuod nga gobyerno nga magtatapos han ngatanan nga panalumpigos. Maunungon kita kan Jehova nga Dios gud la ngan ha iya Ginhadian. Tungod kay bug-os nga nasarig kita ha Ginhadian, iginsasalikway naton an pagkadiri-diosnon han kalibotan, ngan madasigon nga nagbubuhat han maopay.  (Tito 2:12-14) Nangangalimbasog kita nga magpabilin nga waray buring hini nga kalibotan. (2 Ped. 3:14) Anoman nga pagsari an aton atubangon yana, makakasarig kita nga hi Jehova magpapanalipod ha aton kon ginsasarihan an aton pagtoo. (Basaha an Salmo 97:10.) Dugang pa, an Salmo 116:15 nagpapasarig ha aton: “Minahal ha mga mata ni Jehova an kamatayon han iya mga baraan [“maunungon,” NW].” Minahal gud ni Jehova an iya mga surugoon salit diri niya tutugotan nga mapoo hira sugad nga grupo.

Samtang Namimeligro ha Impluwensya han Apostasya

11. Paonan-o hi Jeroboam nagin diri-maunungon?

¹¹ An pagmando ni Hadi Jeroboam nakaghatag unta hin katalwasan ha katawohan han Dios. Kondi tungod han iya mga buhat, mas nasarihan lugod an ira pagkamaunungon ha Dios. Waray hiya makontento ha kadungganan ngan pribilehiyo nga iginhatag ha iya, salit namiling hiya hin mga paagi ha pagparig-on han iya katungdanan. Nangatadongan hiya: “Kon ini nga katawohan makadto paghalad han mga halad ha balay ni Jehova didto ha Jerusalem, dida hito an kasingkasing hini nga katawohan mabalik liwat ngadto ha ira ginoo, . . .  ngadto kan Rehoboam an hadi ha Juda; ngan ira ako papatayon, ngan mamalik ngadto kan Rehoboam an hadi ha Juda.” Salit hi Jeroboam nag-establisar hin bag-o nga relihiyon nga nakasentro ha pagsingba ha duha nga baka nga bulawan. “Ngan iya iginpahamutang an usa didto ha Betel, ngan an ikaduha iya ibinutang didto ha Dan. Ngan ini nga butang nahimo nga sala; kay an katawohan nakadto pagsingba ha atubangan han usa, bisan ngadto ha Dan. Ngan hiya naghimo hin kabalayan ha higtaas nga mga lugar, ngan naghimo hin mga saserdote tikang dida ha bug-os nga katawohan, nga diri mga anak ni Lebi.” Naghimo-himo pa ngani hi Jeroboam hin iya kalugaringon nga “pyesta para han kabataan ha Israel,” ngan padayon nga “nakadto ha halaran, pagsunog hin insenso.”—1 Hadi 12:26-33.

12. Ano an ginbuhat han mga maunungon han Dios ha norte nga ginhadian han gin-establisar ni Jeroboam an pagsingba ha baka ha Israel?

¹² Ano an bubuhaton yana han mga maunungon han Dios ha norte nga ginhadian? Pariho ha ira magtinumanon nga kaapoy-apoyan, ginios dayon an mga Lebihanon nga naukoy ha mga syudad nga iginhatag ha ira ha teritoryo han norte nga ginhadian. (Eks. 32:26-28; Num. 35:6-8; Deut. 33:8, 9) Ira ginbayaan an ira mga panurundon, ngan binalhin upod han ira mga pamilya ngadto ha sur ha Juda, diin makakagpadayon hira ha pagsingba kan Jehova nga waray kaulangan. (2 Kron. 11:13, 14) An iba nga Israelita nga temporaryo la nga naukoy ha Juda, permanente nga nagpabilin didto imbes nga bumalik ha ira lugar. (2 Kron. 10:17) Ginsiguro ni Jehova nga abrido pirme an higayon ha pagbalik ha tinuod nga pagsingba basi ha urhi nga mga henerasyon, an iba tikang ha norte nga  ginhadian makabaya ha pagsingba ha baka ngan makabalik ha Juda.—2 Kron. 15:9-15.

13. Ha moderno nga panahon, paonan-o an impluwensya han apostasya nagsasari ha katawohan han Dios?

¹³ Namimeligro an katawohan han Dios yana ha mga apostata ngan ha ira impluwensya. An iba nga magmarando nangangalimbasog ha pag-establisar han ira kalugaringon nga relihiyon han Estado ngan nagpipirit ha ira mga sakop nga sundon ito. Gin-aangkon han mga klero han Kakristianohan ngan han iba nga mapahitas-on an pagkasaserdote ha espirituwal nga templo. Kondi, ha totoo la nga mga Kristiano mabibilngan naton an tinuod nga mga dinihogan nga nagkukompwesto han “hadianon nga pagkasaserdote.”—1 Ped. 2:9; Pah. 14:1-5.

14. Ano an sadang buhaton naton ha apostata nga mga ideya?

¹⁴ Pariho ha magtinumanon nga Lebihanon han ikanapulo ka siglo A.K.P., an mga maunungon ha Dios yana diri nalilimbongan han apostata nga mga ideya. Iginsasalikway dayon ito han mga dinihogan ngan han ira mga kaupod nga Kristiano. (Basaha an Roma 16:17.) Bisan kon kinaburut-on nga nagpapasakop kita ha mga awtoridad han gobyerno may kalabotan ha sekular nga mga butang ngan nagpapabilin nga neutral ha mga araway han kalibotan, maunungon kita ha Ginhadian han Dios gud la. (Juan 18:36; Roma 13:1-8) Iginsasalikway naton an mga buwa hadton nag-aangkon nga nag-aalagad ha Dios kondi nagpapasipara ha iya pinaagi han ira paggawi.—Tito 1:16.

15. Kay ano nga “an matinumanon ngan maaramon nga uripon” takos han aton pagkamaunungon?

¹⁵ Hunahunaa liwat nga ginpapahinabo ni Jehova nga makagawas an mga tangkod-an-kasingkasing tikang ha maraot nga kalibotan, ha simboliko nga paagi, basi makasulod ha espirituwal nga paraiso nga iya ginhimo. (2 Kor. 12:1-4) Kinasingkasing nga mapasalamaton gud kita ngan nagpapabilin nga duok ha “matinumanon ngan maaramon nga uripon nga gintaporan han iya agaron ha pagdumara ha iya panimalay, ha paghatag ha ira han ira pagkaon ha husto nga panahon.” Ini nga uripon gintaporan ni Kristo han “ngatanan nga iya panag-iya.” (Mat. 24:45-47, NW) Salit, bisan kon diri bug-os nga nasasabtan naton an partikular nga katungdanan han uripon nga klase, diri ito hinungdan nga isalikway naton ito o bumalik ha kalibotan ni Satanas. Lugod, an pagkamaunungon magpapagios ha aton nga mapainubsanon nga maghulat kan Jehova ha pagpatin-aw han mga butang.

Samtang Gintutuman an Hatag-han-Dios nga mga Toka

16. Ano nga toka an nakarawat han propeta tikang ha Juda?

¹⁶ Ginkondenar ni Jehova hi Jeroboam tungod han iya pag-apostata. Nagsugo Hiya hin propeta tikang ha Juda nga kumadto ha norte ha Betel basi makigkita kan Jeroboam samtang naghahalad hiya. Makabungkag nga mensahe ha paghukom an ipapahayag han propeta kan Jeroboam. Sigurado, makuri gud ito nga toka.—1 Hadi 13:1-3.

17. Paonan-o ginpanalipdan ni Jehova an iya propeta?

¹⁷ Nasina gud hi Jeroboam han mabatian niya an paghukom ni Jehova. Inunat niya an iya kamot ngadto ha propeta han Dios ngan nagsinggit ha katawohan ha hirani: “Kapti hiya!” Kondi, waray pa hira makakakiwa, tigda la nga “an iya kamot, nga iya inunat patok ha iya, nauga, ha pagkaagi nga waray na hiya pakabutang hini liwat ngada ha iya. An halaran liwat ginmisi, ngan an agbon inmawas tikang ha halaran.” Napiritan hi Jeroboam ha paghangyo ha propeta nga makimalooy kan Jehova nga mahibalik an iya nauga nga kamot. Nag-ampo an propeta ngan natambal an kamot ni Jeroboam. Hito nga paagi ginpanalipdan ni Jehova an iya propeta.—1 Hadi 13:4-6.

18. Paonan-o kita ginpapanalipdan ni Jehova samtang waray kahadlok nga nag-aalagad ha iya?

¹⁸ Samtang maunungon nga nagsasangyaw  kita han Ginhadian ngan naghihimo hin mga disipulo, usahay nakakaeksperyensya kita hin maraot nga pagtratar, o pagkontra pa ngani. (Mat. 24:14; 28:19, 20) Kondi kinahanglan nga diri gud naton pasagdan nga magluya an aton kadasig ha ministeryo tungod ha kahadlok nga isalikway. Pariho han waray ngarani nga propeta ha panahon ni Jeroboam, pribilehiyo naton an “waray kahadlok” ngan maunungon nga pag-alagad kan Jehova. a (Luk. 1:74, 75) Bisan kon diri kita naglalaom hin milagro yana, hi Jehova nagbabantay ngan nagpapanalipod pa gihapon ha aton sugad nga iya mga Saksi pinaagi han iya baraan nga espiritu ngan mga anghel. (Basaha an Juan 14:15-17; Pahayag 14:6.) Diri gud babayaan han Dios adton waray kahadlok nga nagpapadayon ha pagyakan han iya pulong.—Fil. 1:14, 28.

Pananalipdan ni Jehova an Iya mga Maunungon

19, 20. (a) Kay ano nga makakasiguro kita nga diri gud kita pasisibay-an ni Jehova? (b) Ano nga mga pakiana an paghihisgotan ha masunod nga artikulo?

¹⁹ Hi Jehova an aton maunungon nga Dios. Hiya “maunungon ha ngatanan nga iya binuhatan.” (Sal. 145:17, NW) Ngan an Biblia nagpapasarig ha aton: “Iya babantayan an dalan han iya mga maunungon.” (Prob. 2:8, NW) Kon naatubang hin mga pagsari o impluwensya han apostasya o kon nagtutuman hin makuri nga toka, an mga maunungon han Dios makakasarig han iya giya ngan bulig.

²⁰ Kinahanglan pamalandungon ini han tagsa ha aton yana: Ano an mabulig ha akon basi matipigan an akon pagkamaunungon kan Jehova bisan pa han mga pagsari o mga pagsulay nga bangin umabot ha akon? Ha iba nga mga pulong, paonan-o ko mapaparig-on an akon pagkamaunungon ha Dios?

[Footnote]

Ano an Imo Baton?

• Paonan-o ipinapakita ni Jehova nga diri hiya nagpapasibaya ha iya mga maunungon kon gintatalumpigos hira?

• Ano an sadang buhaton naton ha mga apostata ngan ha ira mga ideya?

• Paonan-o ginpapanalipdan ni Jehova an iya mga maunungon samtang nagbubuhat han ira Kristiano nga ministeryo?

[Mga Pakiana]

[Mapa/Retrato ha pahina 5]

(Para ha aktuwal nga format, kitaa an publikasyon)

NORTE NGA GINHADIAN (Jeroboam)

Dan

SEKEM

Betel

SUR NGA GINHADIAN (Rehoboam)

JERUSALEM

[Retrato]

Waray bayai ni Jehova an iya mga maunungon han gin-establisar ni Jeroboam an pagsingba ha baka

[Retrato ha pahina 3]

May kondisyon an mga bendisyon nga nakarawat ni Salomon ngan han iya mga sakop