Nagyayakan Ka ba hin Maopay han ‘Putli nga Yinaknan’?

I-PLAY

Nagyayakan Ka ba hin Maopay han ‘Putli nga Yinaknan’?

“Akon pakakadaon ha mga katawohan an uray [“putli,” NW] nga yinaknan, nga hira ngatanan makatawag han ngaran ni Jehova.”—SEP. 3:9.

1. Ano nga maopay nga regalo an iginhatag ha aton ni Jehova?

AN ABILIDAD ha pagyakan diri tikang ha katawohan, kondi regalo ito tikang ha Maglalarang han tawo, hi Jehova nga Dios. (Eks. 4:11, 12) Gintagan niya an siyahan nga tawo, hi Adan, hin abilidad diri la ha pagyakan kondi ha pag-imbento liwat hin bag-o nga mga pulong ngan hito nga paagi nadudugangan an iya bokabularyo. (Gen. 2:19, 20, 23) Maopay gud ini nga regalo! Tungod hini nakakagkomunikar an katawohan ha ira Amay ha langit ngan nakakagdayaw han iya mahimayaon nga ngaran.

2. Kay ano nga nagdamu an yinaknan han mga tawo?

² Durante han 17 ka siglo tikang nga iniksister an tawo, an ngatanan nagyayakan hin “uusa la [nga] pinulongan.” (Gen. 11:1) Katapos, nahitabo an pagrebelde ha panahon ni Nimrod. Imbes nga sundon an instruksyon ni Jehova, an mga matinalapason nagtirirok ha lugar nga ha urhi gintawag nga Babel, tungod kay determinado hira mag-ukoy ha usa la nga dapit. Nagtikang hira pagtukod hin daku nga torre, diri basi maghimaya kan Jehova, kondi basi ‘maghimo hin [bantog nga] ngaran’ para ha ira. Salit ginsamok ni Jehova an orihinal nga yinaknan hito nga mga rebelde ngan nakayakan hira hin magkalain-lain nga pinulongan. Tungod hito, nagsarang hira ha bug-os nga tuna.—Basaha an Genesis 11:4-8.

3. Ano an nahitabo han ginsamok ni Jehova an yinaknan han mga rebelde ha Babel?

³ Yana, literal nga yinukot na an yinaknan ha bug-os nga kalibotan—sobra 6,800 na siring han iba. An tagsa hini may-ada iba-iba nga sistema ha pagpahayag han mga ideya. Kon sugad, posible nga han ginsamok ni Jehova nga Dios an yinaknan hito nga mga rebelde, iya ginpara ha ira hunahuna an ira yinaknan hadto. Diri la kay ginpahinabo niya nga mahibaro hira hin bag-o nga mga pulong kondi ginbag-o liwat niya an ira sistema ha pagpahayag han mga ideya ngan nakahimo hin bag-o nga mga gramatika. Diri urusahon nga an lugar diin gintukod ito nga torre gintawag nga Babel, nangangahulogan nga kasamok! (Gen. 11:9) Makapainteres nga an Biblia la an may-ada makapatagbaw nga pagsaysay han gintikangan han magkalain-lain nga yinaknan yana.

Usa nga Bag-o, Putli nga Yinaknan

4. Ano an igintagna ni Jehova nga mahitatabo ha aton panahon?

⁴ Bisan kon makapainteres an asoy han Biblia mahitungod ha paghilabot han Dios ha Babel, may-ada pa mas makapainteres ngan importante nga hitabo ha aton panahon. Pinaagi kan propeta Sepania, hi Jehova nagtagna: “Akon pakakadaon ha mga katawohan an uray nga yinaknan, nga hira ngatanan makatawag han ngaran ni Jehova, ha pag-alagad ha iya ha usa nga pagkahiringyon.” (Sep. 3:9) Ano ito nga ‘putli nga yinaknan,’ ngan paonan-o kita mahibabaro ha pagyakan hito hin maopay?

5. Ano an putli nga yinaknan, ngan ano an nagin resulta hini nga pagbag-o hin pinulongan?

⁵ An putli nga yinaknan amo an kamatuoran mahitungod kan Jehova nga Dios ngan ha iya mga katuyoan nga mababasa ha iya Pulong, an Biblia. Ito nga “yinaknan” nag-uupod han husto nga pagsabot ha kamatuoran mahitungod ha Ginhadian han Dios ngan kon paonan-o ito magbabaraan han ngaran ni Jehova, magbibindikar han iya pagkasoberano, ngan maghahatag hin waray kataposan nga mga bendisyon ha matinumanon nga katawohan. Ano an resulta hini nga pagbag-o hin yinaknan? Ginsumatan kita nga an mga tawo ‘matawag han ngaran ni Jehova’ ngan ‘hiringyon nga mag-aalagad ha iya.’ Kabaliktaran ha panhitabo ha Babel, ini nga pagbag-o ngadto ha putli nga yinaknan nagresulta hin pagdayaw ha ngaran ni Jehova ngan pagkaurosa han iya katawohan.

Pag-aram han Putli nga Yinaknan

6, 7. (a) Ano an ginkikinahanglan ha pag-aram hin bag-o nga yinaknan, ngan paonan-o ini naaplikar ha pag-aram han putli nga yinaknan? (b) Ano an paghihisgotan naton yana?

⁶ Kon an usa nag-aaram hin iba nga yinaknan, diri igo an pagmemorya la hin bag-o nga mga pulong. Kinahanglan mahibaro liwat hiya hin bag-o nga paagi han paghunahuna ngan bag-o nga sistema ha pagpahayag han mga ideya. Ha iba nga yinaknan, bangin iba an paagi ha pangatadongan ngan pagpatawa. Ngan an pagluwas han bag-o nga mga tunog, magkikinahanglan hin iba-iba nga paggamit han dila. Sugad liwat hito an pag-aram han putli nga yinaknan han kamatuoran ha Biblia. Nagkikinahanglan ito hin labaw pa ha pag-aram la hin pipira nga basihan nga mga katutdoan. Basi magin maopay gud magyakan hinin bag-o nga yinaknan, kinahanglan mahibaro kita ha pagpahiuyon ngan pagbag-o han aton panhunahuna.—Basaha an Roma 12:2; Efeso 4:23.

⁷ Ano an mabulig ha aton nga masabtan an putli nga yinaknan ngan makayakan liwat hito hin maopay? Pariho ha pag-aram hin bisan ano nga yinaknan, may-ada pipira nga pamaagi nga makakabulig ha aton nga magin maopay gud magyakan han kamatuoran ha Biblia. Paghisgotan naton an pipira nga paagi nga ginagamit han mga tawo ha pag-aram hin iba nga yinaknan ngan kitaon naton kon paonan-o ito makakabulig ha aton nga mahibaro hinin bag-o nga simboliko nga yinaknan.

Nagyayakan hin Maopay han Putli nga Yinaknan

8, 9. Ano an kinahanglan naton buhaton basi mahibaro han putli nga yinaknan, ngan kay ano nga importante gud ini?

⁸ Pamati hin maopay. Ha siyahan, an bag-o nga yinaknan bangin imposible masabtan han waray pa makabati hito. (Isa. 33:19) Kondi samtang nahibabaro hiya ha pamati hin maopay, hinay-hinay nga masasabtan niya an pipira nga pulong ngan an paagi han pagyakan. Ha pariho nga paagi, ginsasagda kita: “Kinahanglan maghatag kita hin labaw ha kasagaran nga atensyon ha mga butang nga aton hinbatian, basi diri gud kita ig-anod pahirayo.” (Heb. 2:1, NW) Pauroutro nga nagsagdon hi Jesus ha iya mga sumurunod: “An may-ada mga talinga ha pamati, mamati.” (Mat. 11:15; 13:43; Mar. 4:23; Luk. 14:35) Oo, kinahanglan naton ‘pamatian ngan masabtan’ an aton hinbabatian basi mag-uswag an aton pagsabot ha putli nga yinaknan.—Mat. 15:10; Mar. 7:14.

⁹ An pagpamati nagkikinahanglan hin bug-os nga atensyon, kondi takos gud ito pangalimbasogan. (Luk. 8:18) Durante han aton mga katirok, namamati ba kita hin maopay ha iginsasaysay, o nagpapatlaag an aton hunahuna? Importante gud nga pangalimbasogan naton nga mamati hin maopay ha iginsasaysay. Kon diri, magigin sugad kita hin bungol.—Heb. 5:11.

10, 11. (a) Dugang pa ha pagpamati hin maopay, ano an kinahanglan naton buhaton? (b) Ano pa an nahiuupod ha pagyakan han putli nga yinaknan?

¹⁰ Subara an mag-opay magyakan. Gindadasig an mga nag-aaram hin bag-o nga pinulongan nga diri la mamati hin maopay kondi mangalimbasog liwat nga subaron an pagluwas ngan an paagi ha pagyakan han mag-opay magyakan. Nakakabulig ini ha ira nga diri mahiara ha sayop nga pagluwas nga bangin diri masabtan han iba. Ha pariho nga paagi, kinahanglan mahibaro kita tikang ha mga maaram gud magtutdo han bag-o nga yinaknan. (2 Tim. 4:2) Pangaro hin bulig. Kinaburut-on nga karawata an pagtadong kon nagsasayop.—Basaha an Hebreo 12:5, 6, 11.

¹¹ An pagyakan han putli nga yinaknan diri la nag-uupod han pagtoo ha kamatuoran ngan pagtutdo hito ha iba, kondi pagpahiuyon liwat han aton paggawi ha mga balaud ngan prinsipyo han Dios. Basi mabuligan kita nga mahimo ini, kinahanglan subaron naton an iba. Upod na hini an pagsubad han ira pagtoo ngan kadasig. Nag-uupod liwat ito han pagsubad ha bug-os nga pagkinabuhi ni Jesus. (1 Kor. 11:1; Heb. 12:2; 13:7) Kon padayon nga buhaton naton ini, magriresulta ini ha pagkaurosa han katawohan han Dios, ngan pagkapapriho han ira paagi ha pagyakan.—1 Kor. 4:16, 17.

12. Paonan-o nakakabulig an pagmemorya ha pag-aram hin bag-o nga yinaknan?

¹² Pagmemorya. An mga nag-aaram hin yinaknan kinahanglan maduruto magmemorya. Upod na hini an bag-o nga mga pulong ngan termino. Para ha mga Kristiano, makakabulig an pagmemorya basi magin maopay gud magyakan han putli nga yinaknan. Mapulsanon gud kon memoryahon naton an pagkasunod-sunod han mga libro han Biblia. Nagin tumong han iba nga magmemorya hin mga teksto. Para ha iba pa, mapulsanon an pagmemorya hin mga kanta han Ginhadian, mga ngaran han tribo han Israel ngan han 12 nga apostol, ngan han mga kalidad nga nagkukompwesto han bunga han espiritu. Ha kadaan nga panahon, memoryado han damu nga Israelita an mga salmo. Ha moderno nga panahon, memoryado han usa nga bata nga lalaki an ngatanan nga pulong han sobra 80 nga bersikulo ha Biblia han sais anyos pa la hiya. Magagamit ba naton hin mas maopay inin birilhon nga abilidad?

13. Kay ano nga importante gud an pag-utro?

¹³ An pag-utro nakakabulig ha paghinumdom, ngan an pauroutro nga pahinumdom importante gud ha aton Kristiano nga edukasyon. Hi apostol Pedro nagsiring: “Andam ako gihapon ha pagpahinumdom ha iyo hini nga mga bagay, bisan kon maaram na kamo hadto, ngan magrig-on ha kamatuoran nga aada ha iyo.” (2 Ped. 1:12) Kay ano nga kinahanglan naton an pahinumdom? Tungod kay nagpapahilarom ito han aton pagsabot, nagpapahaluag han aton panhunahuna, ngan nagpaparig-on han aton determinasyon nga sundon hi Jehova. Pinaagi han padayon nga pagrepaso han mga suruklan ngan prinsipyo han Dios, nabubuligan kita ha pag-usisa ha aton kalugaringon ngan pag-ato han tendensya nga magin “mamarati nga lilimuton.” (Jak. 1:22-25) Kon diri naton pahinumdumon pirme an aton kalugaringon han kamatuoran, an aton kasingkasing maiimpluwensyahan han iba nga butang ngan posible nga diri na kita makayakan hin maopay han putli nga yinaknan.

14. Ano an makakabulig ha aton kon nag-aaram kita han putli nga yinaknan?

¹⁴ Magbasa ha daku nga tingog. (Pah. 1:3) An iba naglulugaring ngan hilom la nga nag-aaram hin bag-o nga yinaknan. Diri maopay hinduro an resulta hini. Kon nag-aaram kita han putli nga yinaknan, usahay bangin kinahanglan basahon naton ito ha mahinay nga tingog basi maisentro an aton atensyon. Salit an salmista nagsiring: “Ha balaud ni Jehova aada an iya kalipay; ngan adlaw ug gab-i hiya namamalandong [“nagbabasa ha mahinay nga tingog,” NW] ha iya balaud.” (Sal. 1:2) Kon buhaton naton ini, nahisisilsil hin maopay ha aton hunahuna an aton ginbabasa. Ha Hebreo, an ekspresyon nga “pagbasa ha mahinay nga tingog” duok nga may kalabotan ha pamalandong. Sugad la nga kinahanglan an pagtunaw han aton ginkaon basi kita magpahimulos hito, kinahanglan liwat an pagpamalandong basi masabtan naton hin maopay an aton ginbasa. May-ada ba kita igo nga panahon ha pagpamalandong han aton gin-aadman? Katapos basahon an Biblia, kinahanglan hunahunaon naton hin maopay an aton ginbasa.

15. Paonan-o naton pag-aadman an “gramatika” han putli nga yinaknan?

¹⁵ Usisaha an gramatika. Mapulsanon liwat nga pag-adman an gramatika, o pagkahan-ay han mga pulong ngan mga surundon han bag-o nga yinaknan nga aton gin-aadman. Nakakabulig ini ha aton nga masabtan an istraktura han yinaknan, basi husto an aton pagkayakan. Sugad la nga an yinaknan may-ada surubdan han mga pulong, an putli nga yinaknan han kamatuoran ha Kasuratan may-ada liwat “surubdan han mga putli nga mga pulong.” (2 Tim. 1:13) Kinahanglan subaron naton ito nga “surubdan.”

16. Ano nga tendensya an kinahanglan malamposan naton, ngan paonan-o naton bubuhaton ini?

¹⁶ Padayon nga mag-uswag. Bangin mag-aram an usa hin yinaknan tubtob la nga mahibaro hiya hin simple nga pakiistorya, kondi diri na mangalimbasog nga mag-uswag pa. Mahimo liwat magkaada sugad hini nga problema adton nagyayakan han putli nga yinaknan. (Basaha an Hebreo 5:11-14.) Ano an makakabulig ha aton nga malamposan ini nga tendensya? Magin determinado nga madugangan an imo bokabularyo, siring pa. ‘Yana nga tinalikdan na naton an siyahan nga pagturon-an mahitungod kan Kristo, magpadayon kita ha hingpit pa gud, diri ha pagbutang na liwat hin patukoranan han pagbasol tikang ha mga patay nga buhat, ngan han pagtoo ha Dios, pagturon-an ha mga pagbaptis ngan pandoon han mga kamot, pagkabanhaw han mga minatay ngan paghukom nga waray kataposan.’—Heb. 6:1, 2.

17. Kay ano nga importante an regular nga pag-aram? Iilustrar.

¹⁷ Magkaada hin regular nga eskedyol han pag-aram. Mas maopay an halipot kondi regular nga pag-aram kay ha hilawig kondi panalagsa la. Pag-aram ha panahon nga alerto ka ngan diri madali madisturbo. An pag-aram hin bag-o nga yinaknan pariho ha paghimo hin dalan ha kagurangan. Kon mas agsob nga gin-aagian ito, mas masayon na ito agian. Kon diri ito aagian hin pipira ka panahon, matatabonan dayon ito han mga banwa. Salit importante gud an determinasyon ngan pagkamapinadayunon! (Dan. 6:16, 20) Mainampoon nga “magbantay gud kamo ha bug-os nga pagpadayon” may kalabotan ha pagyakan han putli nga yinaknan han kamatuoran ha Biblia.—Efe. 6:18.

18. Kay ano nga sadang kita magyakan han putli nga yinaknan ha ngatanan nga higayon?

¹⁸ Magpraktis ha pagyakan. An iba nga nag-aaram hin bag-o nga yinaknan bangin nag-aalang ha pagyakan tungod kay naaawod hira o nahahadlok nga magsayop. Makakapugong ito han ira pag-uswag. May kalabotan ha pag-aram hin bag-o nga yinaknan, importante gud an pagpraktis. Kon pirme gagamiton han estudyante an bag-o nga yinaknan, mas mahibabaro hiya ha pagyakan hito. Ha pariho nga paagi, kinahanglan liwat kita magyakan han putli nga yinaknan ha ngatanan nga higayon. “Ha kasingkasing, an tawo natoo ngadto ha katadongan: ngan ha baba, ginhimo an pagtug-an ngadto ha kaluwasan.” (Roma 10:10) Dayag nga ‘nagtutug-an’ kita diri la kon ginbabawtismohan kita kondi kon nag-iistorya liwat mahitungod kan Jehova ha ngatanan nga higayon, pati na kon nagsasangyaw. (Mat. 28:19, 20; Heb. 13:15) Ha aton mga katirok, nakakahigayon liwat kita pagyakan han putli nga yinaknan ha matin-aw ngan direkta nga paagi.—Basaha an Hebreo 10:23-25.

Magkaurosa ha Paggamit han Putli nga Yinaknan ha Pagdayaw kan Jehova

19, 20. (a) Ano nga urusahon nga butang an natutuman han mga Saksi ni Jehova yana? (b) Ano an imo determinado nga buhaton?

¹⁹ Makalilipay gud unta kon nakadto kita ha Jerusalem han Domingo nga aga han Sivan 6, tuig 33 K.P.! Waray pa mag-alas noybe hito nga aga, adton nagkatirok ha usa nga kwarto ha igbaw milagroso nga “nagtikang pagyakan [hin] iba nga mga yinaknan.” (Buh. 2:4) Yana, an mga surugoon han Dios waray na regalo nga makayakan hin mga yinaknan. (1 Kor. 13:8) Bisan pa hito, an maopay nga sumat han Ginhadian iginpapasamwak han mga Saksi ni Jehova ha sobra 430 nga yinaknan.

²⁰ Mapasalamaton gud kita nga anoman an aton pinulongan, kita ngatanan nagkakaurosa ha pagyakan han putli nga yinaknan han kamatuoran ha Biblia! Kabaliktaran ini han nahitabo ha Babel. Gindadayaw han katawohan ni Jehova an iya ngaran nga baga hin uusa la an ira yinaknan. (1 Kor. 1:10) Hinaot magin determinado kita nga magpadayon ha pag-alagad nga may “pagkahiringyon” kaupod han aton kabugtoan ha bug-os nga tuna samtang mas nahibabaro kita pagyakan hin maopay hiton uusa nga yinaknan, para ha kadayawan han aton Amay ha langit, hi Jehova.—Basaha an Salmo 150:1-6.

Ano an Imo Baton?

• Ano an putli nga yinaknan?

• Ano an nahiuupod ha pagyakan han putli nga yinaknan?

• Ano an mabulig ha aton basi makayakan hin maopay han putli nga yinaknan?

[Mga Pakiana]

[Kahon ha pahina 23]

Pauswaga an Imo Pagyakan hin Maopay han Putli nga Yinaknan Pinaagi ha

◆ pagpamati hin maopay.

Luk. 8:18; Heb. 2:1

◆ pagsubad ha mag-opay magyakan.

1 Kor. 11:1; Heb. 13:7

◆ pagmemorya ngan pag-utro.