Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan ngan The Watchtower? Sarihi kon mababaton mo an masunod nga mga pakiana:

• Ano nga seryoso nga problema an inaatubang han iba nga Kristiano paglabay hin pipira ka panahon katapos han kasal, ngan sadang mangalimbasog hira nga buhaton an ano?

Bangin masantop han iba nga Kristiano nga damu an diri ginkakauyonan nira nga magpadis. Tungod kay maaram hira nga diri solusyon an diri-Kasuratanhon nga pagdiborsyo, kinahanglan nga mangalimbasog hira ha pagtipig han ira pag-asawa.—4/15, pahina 17.

• Ano nga kakurian an bangin gin-aantos han usa nga Kristiano ha nursing home?

Bangin hingadto hiya ha nursing home nga teritoryo hin kongregasyon nga diri nakilala ha iya. Kasagaran nga iba-iba an relihiyon han iya mga kaupod didto ngan bangin paapihon hiya ha ira relihiyoso nga mga buruhaton. Ini nga problema sadang hibaroan han Kristiano nga mga paryente ngan membro han lokal nga kongregasyon ngan sadang hira sumuporta ngan bumulig ha iya.—4/15, pahina 25-27.

• Ano an upat nga paagi nga makakabulig ha mag-asawa nga masulbad an mga problema?

Magkaada panahon ha pag-istorya han problema. (Ekles. 3:1, 7) Ipahayag an imo opinyon ha tangkod ngan matinalahuron nga paagi. (Efe. 4:25) Pamatii ngan sabota an imo padis kon nagsasaysay hiya han iya mga pagbati. (Mat. 7:12) Magkauyon ha solusyon, ngan magbinuligay ha pagtuman hito. (Ekles. 4:9, 10)—5/1-E, pahina 10-12.

• Han gin-aghat kita ni Jesus nga mag-ampo nga wad-on an aton utang, ano nga utang an iya iginpapasabot?

Kon itanding an Mateo 6:12 ha Lukas 11:4, matin-aw nga diri utang nga kwarta an iginpapasabot ni Jesus. An iya gin-unabi amo an mga sala. Kinahanglan subaron naton an Dios pinaagi han pagin andam ha pagpasaylo.—5/15, pahina 9.

• Ha ano nga mga komite may-ada buruhaton an mga membro han Nagmamando nga Lawas?

Coordinators’ Committee; Personnel Committee; Publishing Committee; Service Committee; Teaching Committee; Writing Committee.—5/15, pahina 29.

• Paonan-o kita makakasiguro nga bug-os-kalibotan an Delubyo ha panahon ni Noe?

Natoo hi Jesus nga nagkaada Delubyo ngan nahitabo ito ha bug-os nga kalibotan. An mga pahamangno ha Biblia nagpapamatuod nga nahitabo gud an bug-os kalibotan nga Delubyo.—6/1-E, pahina 8.

• Kan kanay paggawi an ginhuhulagway ha Roma 1:24-32, kanan mga Judio o mga Hentil?

Mahimo nga mga Judio ngan Hentil an ginhuhulagway ni apostol Pablo, kondi espisipiko nga ginhisgotan niya an mga Israelita ha kadaan nga panahon nga waray magsunod ha Balaud. Maaram hira han matadong nga balaud han Dios, kondi waray hira magkinabuhi uyon hito.—6/15, pahina 29.

• Hain an Tel Arad, ngan kay ano nga importante ito?

Ini nga bungtod ha Israel nga nagtitigaman han kadaan nga syudad han Arad nahimumutang ha weste han Patay nga Dagat. Hini nga bungtod, nadiskobrehan han mga arkeologo an damu nga koleksyon han tibod nga gin-gamit nga sururatan. An pipira hito may-ada mga ngaran nga mababasa ha Biblia, ngan ipinapakita hito nga gin-gamit an personal nga ngaran han Dios ha sekular nga mga dokumento.—Hul.-Sept., pahina 23-24.

• Kay ano nga an pagin makatadunganon ha aton ginlalaoman nakakadugang han aton kalipay?

Kon mangalimbasog kita ha pagkab-ot hin diri makatadunganon nga mga tumong anoman an mahitabo, mag-aantos kita hin diri kinahanglanon nga tensyon. Kondi, kinahanglan nga diri kita maghunahuna nga waray kita kapas, ngan diri naton himoon nga pasangilan an aton ginhuhunahuna nga mga limitasyon basi ibanan an mga buruhaton ha ministeryo.—7/15, pahina 29.

• Ano an posible makaulang ha pakiistorya han mga kag-anak ha ira mga tin-edyer nga anak?

Posible nga makaulang an kaawod han tin-edyer, ngan an iya hingyap nga magin independente ngan mag-usahan. Mahimo magsari an mga kag-anak nga makiistorya ha diri pormal nga kahimtang ngan mangalimbasog nga masabtan diri la an ginsisiring kondi an pagbati liwat han ira anak.—8/1-E, pahina 10-11.