Pasidunggi hi Jehova Pinaagi ha Pagpakita hin Dignidad

‘An buhat ni Jehova dungganon ngan harangdon.’—SAL. 111:3.

1, 2. (a) Ano an kahulogan han “dignidad”? (b) Ano nga mga pakiana an paghihisgotan hini nga artikulo?

 HAN ginpakianhan an dyes-anyos nga hi Madison kon ano an kahulogan han “may dignidad,” binaton dayon hiya nga, “Desente mamado.” Posible nga diri maaram ito nga bata nga an Dios gin-uunabi han Biblia sugad nga ‘putos hin kadungganan’ o dignidad. (Sal. 104:1) Ha panhunahuna han tawo, an pagpakita hin dignidad mahimo usahay mangahulogan hin pagin desente mamado. Pananglitan, karuyag ni apostol Pablo nga an Kristiano nga kababayin-an “magpakaopay ha ira ha mga kaangayan nga panapton, mahadong ngan maligdong; diri nga may tinalonay nga buhok, ngan bulawan, o mutya, o mahal nga panapton.” (1 Tim. 2:9) Kondi labaw pa hito an may dignidad nga paggawi nga naghahatag hin kadayawan ha ‘pagkadungganon ngan pagkaharangdon’ ni Jehova.—Sal. 111:3.

² Ha Biblia, an Hebreo nga pulong para ha “dignidad” mahimo liwat hubaron nga “pagkaharangdon,” “kabantogan,” “himaya,” ngan “dungog.” Sumala ha usa nga diksyonaryo, an “dignidad” amo an “kalidad o kahimtang han pagin takos, dungganon, o talahuron.” Waray bisan hin-o nga takos han gihitaasi nga pagpasidungog ngan pagtahod kay ha kan Jehova. Salit, sugad nga iya dedikado nga mga surugoon, sadang naton pasidunggan hiya ha pulong ngan buhat. Kondi, kay ano nga nakakapagpakita an mga tawo hin dignidad o dungog? Paonan-o naipapakita an pagkadungganon ngan pagkaharangdon ni Jehova? Paonan-o kita sadang maapektohan han pagkadungganon han Dios? Ano an maitututdo ha aton ni Jesu-Kristo mahitungod ha pagpakita hini nga kalidad? Ngan paonan-o kita magawi ha dungganon nga paagi ha aton pagsingba ha Dios?

Kon Kay Ano nga Makakapakita Kita hin Dignidad

3, 4. (a) Paonan-o naton sadang tagdon an dignidad nga iginhahatag ha aton? (b) Hin-o an matagnaon nga gintutudlok han Salmo 8:5-9? (Kitaa an footnote.) (c) Hin-o an gintagan ni Jehova hin dignidad ha naglabay?

³ Tungod kay an ngatanan nga tawo ginlarang ha dagway han Dios, may-ada hira kapas ha pagpakita hin dignidad. Ginpasidunggan ni Jehova an siyahan nga tawo pinaagi ha pagtoka ha iya sugad nga paraataman han tuna. (Gen. 1:26, 27) Bisan han nakasala an tawo ngan nagin diri hingpit, iginsaysay utro ni Jehova an responsabilidad han tawo may kalabotan han tuna. Hito nga paagi, ‘ginbabalarawan’ o ginkukoronahan pa gihapon han Dios an tawo hin dignidad. (Basaha an Salmo 8:5-9.) a Salit an dignidad nga iginhahatag ha aton takos han dungganon nga pagtagad—pinaagi han matinalahuron ngan may dignidad nga pagdayaw ha harangdon nga ngaran ni Jehova.

⁴ Gintatagan ni Jehova hin dignidad labi na adton nagbubuhat hin sagrado nga pag-alagad ha iya. Ginpasidunggan niya hi Abel pinaagi ha pagkarawat  han iya halad, ngan pagsalikway ha halad han iya bugto nga hi Kain. (Gen. 4:4, 5) Hi Moises ginsugo nga ‘ibutang an iya dungog’ kan Josue, an masaliwan ha iya ha pagpanguna ha mga Israelita. (Num. 27:20) Mahitungod kan Salomon nga anak ni David, an Biblia nasiring: “Ginpadaku gud ni Jehova hi Salomon ha atubangan han bug-os nga Israel, ngan ihinatag ha iya an kagamhanan nga hadianon nga waray pa ihatag ha bisan hin-o nga hadi nga una ha iya dida ha Israel.” (1 Kron. 29:25) Tatagan han Dios hin hitaas nga kadungganan an binanhaw nga Kristiano nga mga dinihogan, nga matinumanon nga nagpahayag han “kahimayaan han kaharangdon han iya ginhadian.” (Sal. 145:11-13) May-ada liwat sagrado ngan dungganon nga pribilehiyo an nagtitikadamu nga ‘iba nga mga karnero’ ni Jesus tungod han ira madasigon nga pagdayaw kan Jehova.—Juan 10:16.

Iginpapakita an Pagkadungganon Ngan Pagkaharangdon ni Jehova

5. Mationan-o kadungganon hi Jehova?

⁵ Ha usa nga kanta ni salmista David diin gin-uunabi an kaibahan han pagkaharangdon han Dios ha pagkaubos han tawo, hiya nagkanta: “O Jehova, nga amon Ginoo, pagkadaku nga waray tupong iton imo ngaran ha bug-os nga tuna, nga iginbutang mo an imo kahimayaan ha igbaw han mga langit!” (Sal. 8:1) Antes pa larangon an ‘mga langit ngan an tuna’ tubtob ha lahos pa han daku nga katumanan han katuyoan han Dios nga himoon an tuna nga paraiso ngan ibalik ha kahingpitan an katawohan—tikang ha waray tinikangan tubtob ha waray kataposan—hi Jehova nga Dios an pinakaharangdon ngan pinakadungganon nga Persona ha uniberso.—Gen. 1:1; 1 Kor. 15:24-28; Pah. 21:1-5.

6. Kay ano nga an salmista nagsiring nga hi Jehova napuputos hin kadungganan?

⁶ Sigurado nga nabantad gud an mahadlukon-ha-Dios nga salmista han makita niya ha mamingaw nga kagab-ihon an makatarag-ob ngan maanyag nga langit nga puno hin bitoon nga nagraranggat sugad hin “mga hiyas”! Nahipausa gud hiya kon paonan-o han Dios ‘ginbuklad sugad hin biray an kalangitan,’ salit iya iginhulagway hi Jehova nga napuputos hin kadungganan tungod han Iya urusahon nga kaabtik ha paglarang. (Basaha an Salmo 104:1, 2.) An pagkadungganon ngan pagkaharangdon han diri-nakikita ngan makagarahum-ha-ngatanan nga Maglalarang, nakikita ha iya mga linarang.

7, 8. Ano nga ebidensya han pagkadungganon ngan pagkaharangdon ni Jehova an aton nakikita ha langit?

⁷ Pananglitan, tagda an Milky Way nga galaksi. Hinin haluag hinduro nga hinmumutangan han mga bitoon, planeta, ngan sistema solar, an planeta nga Tuna baga hin sugad la kaguti ha usa nga baras ha haluag gud nga baybayon. Tigamni nga inin usa la nga galaksi may-ada sobra 100 bilyon nga bitoon! Kon ha kada segundo usa nga bitoon an imo maiihap hin durodiretso ha sulod hin 24 oras kada adlaw, matatapos mo pag-ihap an 100 bilyon paglabay hin sobra 3,000 ka tuig.

⁸ Kon ha Milky Way nga galaksi la may-ada na 100 bilyon nga bitoon, kumusta man ha iba pa nga bahin han uniberso? Ginbabana-bana han mga astronomo nga an Milky Way usa la han mga 50 bilyon tubtob 125 bilyon nga galaksi. Kon sugad, mationan-o kadamu an bitoon ha bug-os nga uniberso? Makuri gud ito matugkad han aton hunahuna. Kondi, ‘gin-iihap ni Jehova an kadamuon han mga bitoon; ngatanan tinatawag niya ha ira mga ngaran.’ (Sal. 147:4) Yana nga nasabtan mo na nga hi Jehova napuputos han sugad nga kadungganan ngan pagkaharangdon, diri ka ba napapagios nga dayawon an iya bantogan nga ngaran?

9, 10. Paonan-o an pagtagana hin tinapay naghihimaya han kinaadman han aton Maglalarang?

⁹ Tikang ha maanyag hinduro nga kalangitan, aton yana balhinon an aton atensyon ngada ha ordinaryo nga butang sugad han pagkaon. Hi Jehova diri la kay an “naghimo han langit ngan han tuna” kondi hiya liwat an “nahatag hin karan-on ha mga ginugutom.” (Sal. 146:6, 7) An iya ‘pagkadungganon ngan pagkaharangdon’ nakikita ha iya dagku nga mga buhat, upod na an iya pagtagana hin mga tanom diin nagtitikang an ginhihimo nga tinapay. (Basaha an Salmo 111:1-5.) Gintutdoan ni Jesus an iya mga sumurunod nga mag-ampo: “Tagan mo kami niyan hin kan-on namon ha ikinaadlaw.” (Mat. 6:11) An tinapay amo an nangunguna nga pagkaon han damu nga tawo ha kadaan nga panahon, upod na an mga Israelita. Bisan kon gintatagad ito nga simple nga pagkaon, diri gud simple an kemikal nga proseso nga nakakahimo han pipira nga sakot nga magin marasa nga tinapay.

 ¹⁰ Ha kadaan nga panahon, ginagamit han mga Israelita an harina han trigo o sebada ngan an tubig ha paghimo hin tinapay. Usahay ginsasalaktan ito hin libadura o ipaturubo. Nagsasaralakot inin simple nga mga sangkap basi makahimo hin urusahon nga kadamu han kombinasyon han mga kemikal nga may epekto ha usa kag usa. Diri nasasabtan hin bug-os kon paonan-o gud nagigin tinapay ini nga mga sangkap. Dugang pa, an paagi ha pagtunaw han tinapay ha lawas, usa pa han urusahon ngan komplikado nga proseso. Salit, diri urusahon nga an salmista nagkanta: “O Jehova, hin pagkadirodilain ngan hin pagkadamu han imo mga buhat! Pinaagi han kaaram imo ito ngatanan ginhimo”! (Sal. 104:24) Naaaghat ka ba liwat nga dayawon hi Jehova?

Ano an Epekto ha Imo han Pagkadungganon Ngan Pagkaharangdon han Dios?

11, 12. Ano an mahimo magin epekto ha aton han pagpamalandong ha mga linarang han Dios?

¹¹ Diri na kinahanglan nga magin astronomo kita basi mahipausa ha puno hin bitoon nga kalangitan ha gab-i, o magin kemiko basi maapresyar an tinapay. Kondi, basi maapresyar an pagkaharangdon han aton Maglalarang, kinahanglan magkaada kita hin panahon ha pagpamalandong han iya mga binuhat. Ano an epekto hito ha aton? Pariho an epekto hito ha aton kon pinamamalandong naton an iba pa nga mga buhat ni Jehova.

¹² Mahitungod ha urusahon nga mga binuhat ni Jehova para ha Iya katawohan, hi David nagkanta: “An katahom han himaya han imo kabantogan [“kadungganan,” NW], Ngan han imo makatitingala nga mga buhat, mamamalandong ako.” (Sal. 145:5) Ipinapakita naton nga nagtatagad kita hini nga mga buhat pinaagi ha pag-aram ngan pagpamalandong han aton ginbasa ha Biblia. Ano an resulta hini? Nadudugangan an aton apresasyon ha pagkadungganon ngan pagkaharangdon han Dios. Salit, naaaghat gud kita nga dumuyog kan David ha pagpasidungog kan Jehova ngan ha pagsiring: “Magpapahayag ako han imo pagkadaku.” (Sal. 145:6) An pagpamalandong ha urusahon nga mga buhat ni Jehova sadang magparig-on han aton relasyon ha iya ngan magpagios ha aton nga madasigon ngan determinado nga sumatan an mga tawo mahitungod ha iya. Madasigon ka ba nga nagsasangyaw han maopay nga sumat ngan nabulig ha mga tawo nga maapresyar an pagkadungganon, pagkabantogan, ngan pagkaharangdon ni Jehova nga Dios?

Hingpit nga Iginpapakita ni Jesus an Pagkadungganon han Dios

13. (a) Sumala ha Daniel 7:13, 14, ano an iginhatag ni Jehova ha iya Anak? (b) Sugad nga Hadi, paonan-o gintatratar ni Jesus an iya mga sakop?

¹³ An Anak han Dios, hi Jesu-Kristo, madasigon nga nagpasamwak han maopay nga sumat ngan nagdayaw han iya dungganon ngan harangdon nga Amay ha langit. Labi nga ginpasidunggan ni Jehova an iya bugtong nga Anak pinaagi ha paghatag ha iya han ‘kagamhanan ngan ginhadian.’ (Basaha an Daniel 7:13, 14.) Kondi, hi Jesus diri mapahitas-on o malabyaw. Kabaliktaran gud hito—hiya mapinairon nga Magmarando nga nasabot ha mga limitasyon han iya mga sakop ngan nagpapasidungog ha ira. Tagda an usa nga ehemplo kon paonan-o gintratar ni Jesus sugad nga Pinili  nga Hadi an mga tawo nga iya nakaistorya, labi na adton sinalikway ngan diri naruruyagan han iba.

14. Paonan-o gintratar an mga sanlahon ha kadaan nga Israel?

¹⁴ An mga sanlahon ha kadaan nga panahon agsob makaeksperyensya hin masakit nga hinay-hinay nga kamatayon. Hinay-hinay nga natapon an sanla ha iba pa nga bahin han lawas han biktima. Ginsisiring nga an pagtambal ha sanlahon sugad kakuri ha pagbanhaw han patay. (Num. 12:12; 2 Hadi 5:7, 14) An mga sanlahon iginpahayag nga mahugaw, ginkangalasan ngan iginsalikway han sosiedad. Kon mahirani hira ha mga tawo, kinahanglan suminggit hira ha pagpahamangno: “Mahugaw, mahugaw”! (Leb. 13:43-46) Pariho hin patay nga tawo an sanlahon. Sumala ha rekord han mga rabi, mga unom ka piye an pinakaduok nga distansya nga igintutugot ha sanlahon ha paghirani ha bisan hin-o. May-ada sumat nga han nakita hin lider han relihiyon an sanlahon, ginbato hiya bisan kon hirayo hiya, basi magpabilin nga hirayo.

15. Paonan-o gintratar ni Jesus an usa nga sanlahon?

¹⁵ Kondi, makatirigamnan gud an pagtratar ni Jesus ha sanlahon nga dinaop ha iya ngan nakimalooy nga tambalon hiya. (Basaha an Markos 1:40-42.) Imbes nga paiwason niya an sanlahon, nagpakita hiya hin pagpaid ngan pagtahod hini nga tawo nga iginsasalikway han iba. An nakita ni Jesus usa nga makalolooy nga tawo nga nanginginahanglan hin pagtambal. Tungod kay nabantad an iya kasingkasing, an iya pagpaid inupdan niya hin buhat. Kinaptan niya an sanlahon, ngan iya gintambal.

16. Ano an imo hinbaroan ha paagi han pagtratar ni Jesus ha mga tawo?

¹⁶ Sugad nga mga sumurunod ni Jesus, paonan-o naton masusubad an iya paagi ha pagpakita han pagkadungganon han iya Amay? An usa nga paagi amo an pagsabot nga an ngatanan nga tawo—anoman an kahimtang, panlawas, o pangidaron—takos han angayan nga pagpasidungog ngan pagtahod. (1 Ped. 2:17) Kinahanglan pasidunggan labi na gud han may-ada responsabilidad ha pagmangno, sugad han mga bana, kag-anak, ngan Kristiano nga mga tigurang, adton ira ginmamangnoan basi matipigan nira an ira pagtahod ha kalugaringon. Ha pagpabug-at nga igin-oobligar ini ha ngatanan nga Kristiano, an Biblia nasiring: “Pagsighigugmaay gud kamo hin minagburugto an usa kag usa; . . . palabihon niyo an usa kag usa ha kadungganan.”—Roma 12:10.

Ipakita an Dignidad ha Pagsingba

17. Ano an mahibabaroan naton tikang ha Kasuratan mahitungod han pagpasidungog ha pagsingba naton kan Jehova?

¹⁷ An Biblia nag-uunabi nga sadang gud tagdon labi na an pagpakita hin pagpasidungog ha pagsingba naton kan Jehova. “Bantayi an imo tiil kon makadto ka ha balay han Dios,” siring han Eklesiastes 5:1. Iginpahukas kanda Moises ngan Josue an ira sandalyas han nakada hira ha baraan nga lugar. (Eks. 3:5; Jos. 5:15) Ginbuhat nira ito sugad nga pagpakita hin hilarom nga pagtahod. An mga saserdote nga Israelita gin-obligar nga magsul-ot hin karsonsilyo nga lino “ha pagtabon han ira unod nga hubo.” (Eks. 28:42, 43) Ha pagsunod nira hini, nalikyan an paghuwaw kon naghahalad hira. Kinahanglan sundon liwat han tagsa nga membro han pamilya han saserdote an suruklan han Dios ha dungganon nga paggawi.

18. Paonan-o naipapakita an dignidad ha aton pagsingba kan Jehova?

 ¹⁸ Salit, an pagpakita hin dignidad ha pagsingba nag-uupod han pagpasidungog ngan pagtahod. Basi magin takos han pagpasidungog ngan pagtahod, kinahanglan matinalahuron kita. An dignidad nga aton ipinapakita kinahanglan diri salingkapaw o sugad la hin iginsul-ot nga uniporme. Diri ito tubtob la ha nakikita han mata han tawo kondi tubtob gud ha nakikita han Dios—an aton kasingkasing. (1 Sam. 16:7; Prob. 21:2) An dignidad sadang magin bahin naton ngan makaimpluwensya ha aton pamatasan, disposisyon, relasyon ha iba, bisan ha aton paghunahuna ngan pag-abat mahitungod ha aton kalugaringon. Oo, an dignidad kinahanglan nakikita pirme ha ngatanan nga aton ginyayakan ngan ginbubuhat. May kalabotan ha aton panggawi, paggios, pamado ngan pag-ayos, gintatagad naton an ginsiring ni apostol Pablo: “Diri kami naghatag hin katigayonan hin paghipakdol ha bisan ano nga bagay, basi nga an amon pag-alagad diri pagbutangan hin sala; kondi ha ngatanan nga mga bagay nagpapakamaopay kami ha amon mga kalugaringon, sugad nga mga ministro kami han Dios.” (2 Kor. 6:3, 4) Aton ‘ginrarayandayanan an pagturon-an han Dios nga aton Manluluwas ha ngatanan nga bagay.’—Tito 2:10.

Padayon nga Ipakita an Dungganon nga Paggawi

19, 20. (a) Ano an maopay nga paagi ha pagpasidungog ha iba? (b) May kalabotan ha dignidad o kadungganan, ano an determinado naton buhaton?

¹⁹ An dignidad ipinapakita han dinihogan nga mga Kristiano, nga ‘mga surugoon [kasaliwan] kan Kristo.’ (2 Kor. 5:20) Maunungon nga sinusuportahan hira han ‘iba nga mga karnero,’ nga dungganon nga mga representante para ha Mesianiko nga Ginhadian. An embahador o representante maisugon ngan matinalahuron nga nagyayakan para ha iya gobyerno. Salit, sadang kita magyakan nga may kaisog ngan pagtahod ha pagsuporta ha gobyerno han Dios, an Ginhadian. (Efe. 6:19, 20) Ngan kon iginsasangyaw naton ha mga tawo an “mag-opay nga mga sumat han kaopayan,” diri ba pagpasidungog ngan pagtahod ito ha ira?—Isa. 52:7.

²⁰ Sadang magin determinado kita nga himayaon an Dios pinaagi han aton paggawi nga uyon ha iya pagkadungganon. (1 Ped. 2:12) Hinaot pirme kita magpakita hin hilarom nga pagtahod ha iya, ha pagsingba ha iya, ngan ha aton mga igkasi-magsiringba. Ngan hinaot hi Jehova, nga ginputos an iya kalugaringon hin kadungganan ngan pagkaharangdon, malipay ha aton may dignidad ngan matinalahuron nga paagi han pagsingba ha iya.

[Footnote]

Ano an Imo Baton?

• Ano an sadang magin epekto ha aton han pag-apresyar ha pagkaharangdon han pagkadungganon ni Jehova?

• Ano an mahibabaroan naton mahitungod han pagpasidungog tikang ha paagi han pagtratar ni Jesus ha usa nga sanlahon?

• Paonan-o naton mapapasidunggan hi Jehova ha may dignidad nga paagi?

[Mga Pakiana]

[Retrato ha pahina 12]

Paonan-o ginpasidunggan ni Jehova hi Abel?

[Retrato ha pahina 14]

An dagku nga buhat ni Jehova nakikita bisan ha pagtagana hin tinapay

[Retrato ha pahina 15]

Ano an imo hinbaroan mahitungod han pagpasidungog tikang ha paagi han pagtratar ni Jesus ha usa nga sanlahon?

[Retrato ha pahina 16]

An may dignidad nga pagsingba nag-uupod han pagpasidungog kan Jehova