Hi Jehova an Aton “Manluluwas”

“Bubuligan ngan luluwason hira ni Jehova.”—SAL. 37:40, NW.

1, 2. Ano nga importante nga kamatuoran mahitungod kan Jehova an nakakaliaw ngan nakakaparig-on ha aton?

 AN MGA lambong tungod han adlaw diri permanente. Samtang natuyok an Tuna, an mga lambong padayon nga nababalhin ngan nababag-o. Kondi, an Maglalarang han tuna ngan adlaw, diri nagbabag-o. (Mal. 3:6) An Biblia nasiring: “Ha iya waray pagkaburubalyo bisan lambong tungod ha pagliso.” (Jak. 1:17) Inin importante nga kamatuoran mahitungod kan Jehova nakakaliaw ngan nakakaparig-on gud ha aton, labi na kon naatubang kita hin magkuri nga pagsari ngan problema. Kay ano?

² Sugad han hinbaroan naton ha nauna nga artikulo, hi Jehova an “Manluluwas” ha kadaan nga panahon. (Sal. 70:5, NW) Diri hiya nagbabag-o ngan pirme niya gintutuman an iya ginsisiring; salit, an iya mga magsiringba yana makakasarig gud nga iya “bubuligan ngan luluwason hira.” (Ps. 37:40, NW) Paonan-o ginluluwas ni Jehova an iya mga surugoon ha moderno nga panahon? Paonan-o niya bubuhaton ito para ha tagsa ha aton?

Gintalwas Tikang ha mga Parakontra

3. Kay ano nga makakasiguro kita nga an mga parakontra diri makakapaundang ha katawohan ni Jehova ha pagsangyaw han maopay nga sumat?

³ Bisan ano nga pagkontra ni Satanas diri gud makakapaundang ha mga Saksi ni Jehova ha paghatag hin esklusibo nga pagsingba kan Jehova  nga takos ha Iya. An Pulong han Dios nagpapasarig ha aton: “Waray hinganiban nga ginhitsura patok ha imo nga mauswag; ngan an tagsa-tagsa nga dila nga mabangon patok ha imo ha paghukom imo pagsasayupon.” (Isa. 54:17) An mga parakontra nangalimbasog ha pagpaundang ha katawohan han Dios ha pagsangyaw kondi napakyas hira. Tagda an duha nga ehemplo.

4, 5. Ano nga pagkontra an naeksperyensyahan han katawohan ni Jehova han 1918, ngan ano an resulta?

⁴ Han 1918, an katawohan ni Jehova nakaeksperyensya hin nagtikaduro nga pagtimaraot nga igin-aghat han mga klero basi paundangon an ira pagsangyaw. Han Mayo 7, nagsugo an pederal nga gobyerno han Estados Unidos nga arestuhon hi J. F. Rutherford, an nagmamangno han bug-os-kalibotan nga pagsangyaw hito nga panahon, ngan an iba pa ha sentro nga opisina. Ha sulod hin duha ka bulan, hira Bugto Rutherford waray-hustisya nga ginhukman hin pagtraydor ha gobyerno ngan ginsentensyahan hin maiha nga kapriso. Naglampos ba an mga parakontra ha permanente nga pagpaundang han pagsangyaw pinaagi ha paggamit han mga korte? Syempre waray!

⁵ Hinumdumi an saad ni Jehova: “Waray hinganiban nga ginhitsura patok ha imo nga mauswag.” Ha tigda nga pagbag-o han panhitabo, han Marso 26, 1919—siyam ka bulan katapos sentensyahan hi Bugto Rutherford ngan an iya mga kaupod—an priso nga kabugtoan ginpagawas katapos magpyansa. Ha sumunod nga tuig, han Mayo 5, 1920, ginkansela an mga akusasyon ha ira. Ginsalingabot nira an ira kagawasan basi magpadayon ha buruhaton han Ginhadian. Ano an resulta? Daku gud an pag-uswag tikang hadto! Takos gud an “Manluluwas” han ngatanan nga kadayawan tungod hito nga pag-uswag.—1 Kor. 3:7.

6, 7. (a) Ano nga kampanya kontra ha mga Saksi ni Jehova an ginhimo han mga Nazi ha Alemanya, ngan ano an resulta? (b) An moderno nga kasaysayan han katawohan ni Jehova nagpapamatuod han ano nga kamatuoran?

⁶ Tagda yana an ikaduha nga ehemplo. Han 1934, nagsumpa hi Hitler nga pupoohon niya an mga Saksi ni Jehova ha Alemanya. Diri ito kay tarhog la. Katapos niya ito ideklara, damu an gin-aresto ngan ginpriso. Yinukot nga Saksi an gintimaraot; ginatos an ginpatay ha mga kampo nga prisohan. Naglampos ba hi Hitler ha iya kampaya ha pagpoo ha mga Saksi? Napaundang gud ba niya an pagsangyaw han maopay nga sumat ha Alemanya? Waray gud! Durante han pagtimaraot, nagpadayon an aton kabugtoan ha pagsangyaw hin patagó. Katapos mapukan an pagmando han mga Nazi, ginsalingabot nira an ira kagawasan basi magpadayon ha pagsangyaw. Yana, sobra 165,000 na an magwarali han Ginhadian ha Alemanya. Makausa pa, gintuman gud han “Manluluwas” an iya iginsaad: “Waray hinganiban nga ginhitsura patok ha imo nga mauswag.”

⁷ An moderno nga kasaysayan han mga Saksi ni Jehova nagpapamatuod nga diri gud tutugotan ni Jehova nga mapoo an iya katawohan sugad  nga grupo. (Sal. 116:15) Kondi, kumusta man kita? Paonan-o ginluluwas ni Jehova an tagsa ha aton?

Ginpapanalipdan ba Kita ha Pisikal?

8, 9. (a) Paonan-o kita nahibaro nga diri kita pirme pananalipdan ha pisikal? (b) Ano an kinahanglan karawaton naton?

⁸ Sugad nga indibiduwal, maaram kita nga hi Jehova waray magsaad nga pananalipdan kita niya pirme ha pisikal. Bisan pa hito, ginsusubad naton an determinasyon han tulo nga magtinumanon nga Hebreohanon nga nagdumiri pagyukbo ha imahen nga bulawan nga gintukod ni Hadi Nabukodonosor. Iton mahadlukon ha Dios nga mga batan-on waray maghunahuna nga milagroso nga pananalipdan hira ni Jehova tikang ha kadaot ha pisikal. (Basaha an Daniel 3:17, 18.) Pero sugad han nahitabo, ginluwas hira ni Jehova tikang ha naglalaga nga hudno. (Dan. 3:21-27) Kondi, bisan ha kadaan nga panahon, talagsahon la an milagroso nga pagtalwas. Damu han magtinumanon nga surugoon ni Jehova an ginpatay hadton nakontra ha ira.—Heb. 11:35-37.

⁹ Kumusta man yana? Sugad nga “Manluluwas,” sigurado nga tatalwason ni Jehova an mga tawo tikang ha peligro. Masisiguro gud ba naton kon hi Jehova naghilabot o waray, ha espisipiko nga mga kahimtang? Diri. Kondi, an usa nga nakatalwas ha peligro bangin umabat nga naghilabot hi Jehova. Magigin paragbuot an iba kon pakarauton nira ito nga tawo. Lugod, kinahanglan karawaton naton nga damu nga magtinumanon nga Kristiano an namatay tungod han pagtimaraot, sugad han nahitabo ha panahon han mga Nazi. Namatay an iba ha makangingirhat nga kahimtang. (Ekles. 9:11) Bangin magpakiana kita, ‘Napakyas ba hi Jehova nga magin “Manluluwas” para ha magtinumanon nga ginpatay?’ Diri gud ito mahitatabo.

10, 11. Kay ano nga diri mapupugngan han tawo an kamatayon, kondi ano an mahihimo ni Jehova may kalabotan hito?

¹⁰ Tagda ini: Diri mapupugngan han tawo an iya kamatayon tungod kay waray tawo nga “magluluwas han iya kalag tikang ha gahum han lubnganan.” (Sal. 89:48) Kondi, kumusta man ha bahin ni Jehova? Usa nga bugto nga babaye nga nakatalwas ha panahon han kabangis han mga Nazi an nahinunumdom han ginsiring ha iya han iya nanay nga Saksi basi liawon hiya tungod ha kamatay han ira mga hinigugma ha kampo nga prisohan: “Kon permanente an kamatayon, magigin mas gamhanan ito kay ha Dios, diri ba?” An kamatayon diri gud mas gamhanan kay ha gamhanan-ha-ngatanan nga Surok han kinabuhi! (Sal. 36:9) Nahinunumdoman ni Jehova an ngatanan nga aadto ha lubnganan, ngan luluwason niya an tagsa ha ira.—Luk. 20:37, 38; Pah. 20:11-14.

¹¹ Kondi, hi Jehova nagmamangno gud ha iya magtinumanon nga magsiringba yana. Tagdon naton yana an tulo nga paagi nga nagpapakita nga hiya an aton “Manluluwas.”

Nagpapanalipod ha Espirituwal

12, 13. Kay ano nga pinakaimportante an espirituwal nga panalipod, ngan paonan-o nagpapanalipod hi Jehova ha aton?

¹² Hi Jehova nagpapanalipod ha aton ha espirituwal, nga amo an pinakaimportante. Sugad nga tinuod nga mga Kristiano, maaram kita nga may-ada mas birilhon kay ha aton kinabuhi yana. An aton pinakabirilhon nga panag-iya amo an aton personal nga relasyon kan Jehova. (Sal. 25:14; 63:3) Kon waray hito, mawawaray pulos an aton kinabuhi yana ngan an aton paglaom ha tidaraon.

¹³ Mapasalamaton kita nga hi Jehova nabulig gud ha aton nga matipigan an aton duok nga relasyon ha iya. Nabulig ha aton an iya Pulong, an iya baraan nga espiritu, ngan an iya bug-os-kalibotan nga kongregasyon. Ano an gimaopayi nga paagi nga magagamit naton ini nga mga tagana? Pinaagi han aton regular ngan maduruto nga pag-aram ha iya Pulong, mapaparig-on an aton pagtoo ngan paglaom. (Roma 15:4) Pinaagi han sinsero nga pag-ampo nga giyahan kita han iya espiritu, mabubuligan kita nga maatohan an pagsulay ha pagbuhat hin maraot. (Luk. 11:13) Kon sundon naton pirme an giya han uripon nga klase pinaagi han basado-ha-Biblia nga mga publikasyon, katirok, asembleya, ngan kombensyon,  mapaparig-on kita pinaagi han espirituwal nga “pagkaon ha husto nga panahon.” (Mat. 24:45, NW) An sugad nga mga tagana nagpapanalipod ha aton ha espirituwal ngan nabulig ha aton nga magpabilin nga duok ha Dios.—Jak. 4:8.

14. Isaysay an eksperyensya nga nagpapatin-aw han espirituwal nga panalipod.

¹⁴ Ha pagpatin-aw han sugad nga espirituwal nga panalipod, hinumdumi an mga kag-anak nga gin-unabi ha tinikangan han nauna nga artikulo. Paglabay hin pipira ka adlaw katapos ireport nga nawawara an ira anak nga hi Theresa, nakarawat nira an makasurubo gud nga sumat: Ginpatay hiya. a An amay nagsiring: “Nag-ampo ako kan Jehova nga panalipdan hiya. Han hin-agian hiya nga patay, ha tinikangan nagpakiana ako kon kay ano nga waray batona ni Jehova an akon mga pag-ampo. Syempre, maaram ako nga hi Jehova diri milagroso nga nagpapanalipod ha iya katawohan. Nagpadayon ako ha pag-ampo para han pagsabot. Naliaw ako ha paghibaro nga hi Jehova nagpapanalipod ha iya katawohan ha espirituwal—karuyag sidngon, nagtatagana hiya ha aton hin bulig basi mapanalipdan an aton relasyon ha iya. Ito nga panalipod an pinakaimportante tungod kay nakakaapekto ito han aton waray kataposan nga tidaraon. Hito nga paagi, ginpanalipdan ni Jehova hi Theresa; matinumanon hiya nga nag-aalagad ha Iya han mamatay hiya. Nagkaada ako hin kamurayawan ha paghibaro nga an iya paglaom nga mabuhi ha tidaraon aada ha Iya mahigugmaon nga mga kamot.”

Nabulig ha May Sakit

15. Ha ano nga mga paagi binubuligan kita ni Jehova kon nag-aantos kita hin grabe nga sakit?

¹⁵ Hi Jehova nabulig ha aton “ha higdaan han mga kangutngot,” sugad han iya pagbulig kan David. (Sal. 41:3) Bisan kon hi Jehova yana diri nagluluwas pinaagi han milagroso nga pagtambal, binubuligan kita niya. Ha ano nga paagi? An mga prinsipyo ha iya Pulong mahimo makabulig ha aton ha pagdesisyon hin maaramon mahitungod ha pagtambal ngan iba pa nga butang. (Prob. 2:6) Mahimo kita makakuha hin mapulsanon nga impormasyon ngan praktikal nga suhestyon ha mga artikulo nga iginpublikar ha An Barantayan ngan Awake! nga naghihisgot han aton problema ha panlawas. Pinaagi han espiritu ni Jehova, ihahatag niya ha aton “an kapin kaopay nga gahum” basi malamposan an aton kahimtang ngan matipigan an aton integridad, ano man an mahitabo. (2 Kor. 4:7) Pinaagi hito nga bulig, malilikyan naton an sobra nga paghinunahuna ha aton sakit nga tungod hito nawawara na an aton atensyon ha espirituwal nga butang.

16. Paonan-o nalamposan han bugto nga lalaki an iya sakit?

¹⁶ Tagda an batan-on nga bugto nga lalaki nga gin-unabi ha tinikangan han nauna nga artikulo. Han 1998, ginsumatan hiya han doktor nga may-ada hiya sakit nga amyotrophic lateral sclerosis, o ALS, nga ha urhi nakaparalisa han iya bug-os nga lawas. b Paonan-o niya nalamposan an iya  sakit? Siring niya: “May mga panahon nga naabat ako hin kasakit ngan kawaray paglaom kon nahuhunahuna ko nga kamatayon la an paagi basi makatalwas. Kon nanluluya ako, nag-aampo ako nga tagan ni Jehova hin tulo nga butang: kalmado nga kasingkasing, pagpailob, ngan pagkamainantuson. Inabat ko nga ginbabaton ni Jehova an akon mga pag-ampo. Tungod han kalmado nga kasingkasing napapamalandong ko an nakakaliaw nga paglaom, sugad han magigin kahimtang ha bag-o nga kalibotan kon makalakat na ako, makakaon hin marasa nga pagkaon ngan makaistorya utro an akon pamilya. Nakabulig ha akon an pagpailob nga maantos an mga kakurian ngan problema han pagin paralisado. An pagkamainantuson nakabulig ha akon nga magpabilin nga matinumanon ngan timbang ha espirituwal. Nasasabtan ko gud an kahimtang ni salmista David, kay inabat ko nga hi Jehova nabulig ha akon ha higdaan han mga kangutngot.”—Isa. 35:5, 6.

Nagtatagana han Panginahanglan

17. Ano an iginsasaad ni Jehova nga bubuhaton niya para ha aton, ngan ano an kahulogan hini nga saad?

¹⁷ Hi Jehova nagsasaad nga ihahatag niya an aton materyal nga panginahanglan. (Basaha an Mateo 6:33, 34 ngan Hebreo 13:5, 6.) Diri ito nangangahulogan nga makakalaom kita nga milagroso nga ihahatag an aton materyal nga panginahanglan o diri na kita magtatrabaho. (2 Tes. 3:10) Lugod, nangangahulogan ito nga: Kon unahon naton ha aton kinabuhi an Ginhadian han Dios ngan kon disidido kita magtrabaho, makakasarig kita kan Jehova nga bubuligan kita niya nga magkaada han aton mga kinahanglanon. (1 Tes. 4:11, 12; 1 Tim. 5:8) Maihahatag niya an panginahanglan naton ha paagi nga diri naton ginlalaoman, bangin pinaagi han igkasi-magsiringba nga mabulig ha aton o mahatag ha aton hin trabaho.

18. Isaysay an eksperyensya nga nagpapakita nga mahimo kita hatagan ha panahon han panginahanglan.

¹⁸ Hinumdumi an solo nga iroy nga gin-unabi ha tinikangan han nauna nga artikulo. Han binalhin hiya ngan an iya anak nga babaye ha iba nga lugar, nakurian hiya ha pagbiling hin trabaho. Siring niya: “Nagsasangyaw ako ha aga, ngan kada kulop nagbibiling ako hin trabaho. Nahinumdoman ko nga usa ka adlaw kinadto ako ha tindahan basi pumalit hin gatas. Ginkita ko an mga utanon, kondi waray ako igo nga kwarta ha pagpalit hito. Ito an pinakamakasurubo nga takna ha akon kinabuhi. Pag-uli ko tikang ha tindahan hito nga adlaw, an amon balkon ha luyo puno hin sinupot-supot nga iba-iba nga utanon. Igo gud ito nga pagkaon ha sulod hin pipira ka bulan. Nagtangis na la ako, ngan nagpasalamat kan Jehova.” Hinbaroan dayon hini nga bugto nga iginhatag ito han usa nga bugto nga lalaki ha kongregasyon nga may-ada hardin hin mga utanon. Ha urhi an bugto nga babaye nagsurat ha iya: “Bisan kon nagpasalamat gud ako ha imo hadto nga adlaw, nagpasalamat liwat ako kan Jehova ha paggamit niya han imo pagkabuotan ha pagpahinumdom ha akon han iya gugma.”—Prob. 19:17.

19. Ha daku nga kagol-anan, an mga surugoon ni Jehova magkakaada ano nga pagsarig, ngan sadang magin determinado kita nga buhaton an ano yana?

¹⁹ Matin-aw nga an ginbuhat ni Jehova ha kadaan nga panahon ngan ha aton panahon naghahatag ha aton hin hinungdan nga sumarig ha iya sugad nga aton Parabulig. Diri na maiha, kon umabot an daku nga kagol-anan ha kalibotan ni Satanas, pagkikinahanglanon gud naton an bulig ni Jehova labaw kay ha kakan-o pa man. Kondi, an mga surugoon ni Jehova bug-os nga makakasarig ha iya. Mahangad hira ngan maglilipay kay hirani na an ira katalwasan. (Luk. 21:28) Samtang yana, anoman nga kakurian an umabot ha aton, magin determinado kita nga sumarig kan Jehova, ngan bug-os nga tumapod nga an aton diri nagbabag-o nga Dios, tinuod nga aton “Manluluwas.”

[Mga footnote]

Nahinunumdoman Mo Ba?

• Paonan-o hi Jehova makakahatag hin katalwasan para ha mga ginpatay?

• Kay ano nga pinakaimportante an espirituwal nga panalipod?

• Ano an kahulogan han saad ni Jehova nga ihahatag niya an aton materyal nga panginahanglan?

[Mga Pakiana]

[Retrato ha pahina 8]

Han 1918, gin-aresto hi Bugto Rutherford ngan an iya mga kaupod kondi ha urhi ginpagawas hira, ngan ginkansela an mga akusasyon ha ira

[Retrato ha pahina 10]

Hi Jehova mabulig ha aton ha “higdaan han mga kangutngot”