An Pulong ni Jehova Buhi

Importante nga mga Punto Tikang ha mga Surat ha mga Taga-Tesalonika Ngan kan Timoteo

TIKANG nga naorganisa an bag-o nga kongregasyon ha Tesalonika han binisita hi apostol Pablo didto, ginkukontra na ito. Salit han hi Timoteo—bangin han mga 20 anyos hiya—binalik tikang didto nga may-ada maopay nga report, napagios hi Pablo nga magsurat ha ira basi kumendasyonan ngan dasigon hira. Ito nga surat, nga posible nga ginhimo ha ikatarapos han 50 K.P., amo an siyahan han giniyahan nga mga sinurat ni Pablo. Waray pag-iha katapos hito, ginhimo niya an ikaduha nga surat ha mga Kristiano ha Tesalonika. Hini nga higayon, gintadong niya an sayop nga mga panhunahuna han iba nga kabugtoan ngan gin-aghat hira nga magmarig-on ha pagtoo.

Paglabay hin mga napulo ka tuig, hi Pablo aadto ha Masedonia ngan hi Timoteo ha Efeso. Ginsuratan ni Pablo hi Timoteo basi dasigon hiya nga magpabilin ha Efeso ngan magpadayon ha espirituwal nga pakig-away kontra ha palso nga mga magturutdo ha sulod han kongregasyon. Han gintimaraot an mga Kristiano katapos han sunog nga nakadaot ha Roma han 64 K.P., ginhimo ni Pablo an iya ikaduha nga surat kan Timoteo. Ito an ultimo han iya giniyahan nga mga sinurat. Makakapahimulos kita yana ha pagdasig ngan sagdon nga aton mababasa hinin upat nga surat ni Pablo.—Heb. 4:12.

“MAG-AGMA”

(1 Tes. 1:1–5:28)

Ginkumendasyonan ni Pablo an mga taga-Tesalonika tungod han ira “buhat ha pagtoo ngan kabudlay han paghigugma, ngan pag-ilob.” Ginsumatan niya hira nga hira an iya ‘paglaom ngan kalipay ngan pudongpudong han himaya.’—1 Tes. 1:3; 2:19.

Katapos dasigon ni Pablo an mga taga-Tesalonika nga liawon an usa kag usa pinaagi han paglaom han pagkabanhaw, hiya nagsiring: “An adlaw [ni Jehova] maabot sugad hin usa nga kawatan ha kagab-ihon.” Ginsagdonan niya hira nga “mag-agma” ngan magmaligdong.—1 Tes. 4:16-18; 5:2, 6.

Mga Baton ha mga Pakiana Mahitungod ha Kasuratan:

4:15-17—Hin-o an mga ‘babayawon ha mga dampog ha pagtapo ha Ginoo didto ha hangin,’ ngan paonan-o ini mahitatabo? Hira an dinihogan nga mga Kristiano nga buhi durante han presensya ni Kristo ha pagmando han Ginhadian. Hira ‘natapo ha Ginoo’ nga hi Jesus ha diri-nakikita nga lugar ha langit. Kondi, basi maeksperyensyahan ito, kinahanglan mamatay anay hira ngan mabanhaw sugad nga espiritu nga mga linarang. (Roma 6:3-5; 1 Kor. 15:35, 44) Nagtikang na an presensya ni Kristo, salit an mga dinihogan nga namamatay yana diri nagpapabilin nga patay. “Babayawon,” o babanhawon dayon hira.—1 Kor. 15:51, 52.

5:23—Ano an iginpapasabot ni Pablo han nag-ampo hiya nga ‘bantayan an espiritu ngan kalag ngan lawas’ han kabugtoan? Gin-unabi ni Pablo an espiritu, kalag, ngan lawas han dinihogan nga mga Kristiano nga nagkukompwesto han kongregasyon. Imbes nga mag-ampo la nga bantayan an kongregasyon, nag-ampo hiya nga bantayan an “espiritu,” o disposisyon han hunahuna hito. Nag-ampo liwat hiya para ha “kalag,” kinabuhi, o pag-eksister hito, ngan para ha “lawas” hito—an kabug-osan nga grupo han dinihogan nga mga Kristiano. (1 Kor. 12:12, 13) Salit, ito nga pag-ampo nagpapakita han duro nga pagtagad ni Pablo ha kongregasyon.

Mga Leksyon Para ha Aton:

1:3, 7; 2:13; 4:1-12; 5:15. An epektibo nga paagi ha pagsagdon amo an paghatag hin sinsero nga  kumendasyon ngan pagdasig nga buhaton an mas maopay pa.

4:1, 9, 10. An mga magsiringba ni Jehova sadang magpadayon ha pag-uswag ha espirituwal.

5:1-3, 8, 20, 21. Samtang nagtitikahirani an adlaw ni Jehova, sadang “magmaligdong kita ngan magsul-ot kita han taming han pagtoo ngan paghigugma; ngan han kalasag han paglaom han kaluwasan.” Dugang pa, sadang naton tagdon hin maopay an matagnaon nga Pulong han Dios, an Biblia.

“MANRIG-ON KAMO”

(2 Tes. 1:1–3:18)

Tungod kay ginbaliko han iba ha kongregasyon an ginsiring ni Pablo ha iya siyahan nga surat, matin-aw nga naglantugi hira nga hirani na an ‘pagkanhi han Ginoo.’ Basi tadungon ito nga panhunahuna, iginsaysay ni Pablo kon ano ‘anay an maabot.’—2 Tes. 2:1-3.

Hi Pablo nag-aghat: “Manrig-on kamo, ngan iyo pagtipigan an mga surumatanon nga ipinanutdo ha iyo.” Ginsugo niya hira nga ‘bumulag ha ngatanan nga mga kabugtoan nga nanggagawi ha kamagsamok.’—2 Tes. 2:15; 3:6.

Mga Baton ha mga Pakiana Mahitungod ha Kasuratan:

2:3, 8—Hin-o an “tawo han sala,” ngan paonan-o hiya papatayon? Ini nga “tawo” ginkukompwesto han grupo han mga klero han Kakristianohan. An gintagan hin awtoridad ha pagpahayag han paghukom han Dios ha magraot ngan ha pagsugo ha pagpatay ha ira amo an “Pulong”—an Punoan nga Tagapagyakan han Dios, hi Jesu-Kristo. (Juan 1:1) Salit, masisiring nga papatayon ni Jesus an tawo han sala “pinaagi han gininhawa [nagpapagios nga pwersa] han iya baba.”

2:13, 14—Paonan-o an dinihogan nga mga Kristiano ‘ginpili tikang ha tinikangan ngadto ha katalwasan’? Itinanda nga daan an dinihogan nga grupo han gintuyo ni Jehova nga an binhi han babaye magtultog han ulo ni Satanas. (Gen. 3:15) Iginpahayag liwat ni Jehova an mga kwalipikasyon nga kinahanglan nira abuton, toka nga ira bubuhaton, ngan pagsari nga ira aatubangon. Salit, iya gintawag hira para hini nga ‘katuyoan.’

Mga Leksyon Para ha Aton:

1:6-9. An paghukom ni Jehova ipapadapat la ha mga magraot.

3:8-12. An pagkahirani han adlaw ni Jehova diri sadang magin pasangilan basi diri na magtrabaho ha pagtagana han aton panginahanglan. Kon waray kita ginbubuhat, magigin hubya kita ngan maaaghat nga magin ‘malabot ha kinabuhi han iba.’—1 Ped. 4:15, NW.

“BANTAYI AN IGINTUBYAN HA IMO”

(1 Tim. 1:1–6:21)

Hi Pablo nagsagdon kan Timoteo nga “makipag-away . . . ha maopay nga away; nga magbantay han pagtoo ngan han maopay nga konsensya.” Iginsaysay han apostol an mga kwalipikasyon han pinili nga kalalakin-an ha kongregasyon. Nagtutdo liwat hiya kan Timoteo nga ‘likyan an diri-diosnon nga mga susmatanon’ nga nagpapasipara ha kon ano an baraan.—1 Tim. 1:18, 19; 3:1-10, 12, 13; 4:7; Maopay nga Sumat.

‘Ayaw pagbusai an lagas nga lalaki,’ nagsurat hi Pablo. Gin-aghat niya hi Timoteo: “Bantayi an igintubyan ha imo, lingiw tikang ha mga yakan nga diri mga espirituhanon, ngan ha mga pagkontra han mga buwa nga gintawag nga kaaram.”—1 Tim. 5:1; 6:20.

Mga Baton ha mga Pakiana Mahitungod ha Kasuratan:

1:18; 4:14—Ano nga “mga tagna” an iginpahayag mahitungod kan Timoteo? Bangin partikular ito nga mga tagna mahitungod ha tidaraon nga bahin ni Timoteo ha Kristiano nga kongregasyon nga iginpahayag ni Pablo pinaagi han giya han Dios han binisita hiya ha Listra durante han iya ikaduha nga pagbiyahe sugad nga misyonero. (Buh. 16:1, 2) Uyon hini nga “mga tagna,” an mga tigurang ha kongregasyon ‘nagdoon han ira mga kamot’ ha batan-on nga hi Timoteo, ngan ginpili hiya para ha usa ka partikular nga pag-alagad.

2:15—Paonan-o an usa nga babaye “maluluwas . . . tungod ha pagpanganak”? An pagpanganak, pagmangno han iya kabataan, ngan panginano ha panimalay ‘makakaluwas’ ha babaye tikang ha pagin waray ginbubuhat nga ‘malibak  ngan malabot’ ha kinabuhi han iba.—1 Tim. 5:11-15.

3:16—Ano an sagrado nga tinago han diosnon nga debosyon? Maiha hinduro nga panahon nga waray maaram kon an tawo ba hingpit nga masugot ha pagkasoberano han Dios o diri. Ginbaton ito ni Jesus pinaagi ha pagtipig hin hingpit nga integridad ha Dios tubtob ha iya kamatayon.

6:15, 16, NW—Ini ba nga mga pulong naaplikar kan Jehova nga Dios o kan Jesu-Kristo? Ini nga mga pulong naaplikar ha usa nga iginhulagway an pangirilal-an nga amo hi Jesu-Kristo. (1 Tim. 6:14) Kon itanding ha mga tawo nga nagmamando sugad nga mga hadi ngan ginoo, hi Jesus an ‘amo la nga Makagarahum nga Magmarando,’ ngan hiya la an diri-mamaratyon. (Dan. 7:14; Roma 6:9) Tikang nga sinaka hiya ngadto ha diri-nakikita nga mga langit, waray tawo ha tuna an ‘makakakita’ ha iya pinaagi han literal nga mata.

Mga Leksyon Para ha Aton:

4:15. Bag-ohan man kita o maiha na nga Kristiano, sadang kita mangalimbasog ha pagpauswag ngan pagparig-on han aton relasyon kan Jehova.

6:2. Kon nagtatrabaho kita ha igkasi-tumuroo, imbes nga makabentaha ha iya ha anoman nga paagi, sadang magtrabaho kita hin mas maopay kay ha aton pagtrabaho ha usa nga diri-tumuroo.

“MAGWALI KA HAN PULONG, MANIGURO KA GUD”

(2 Tim. 1:1–4:22)

Basi magin andam hi Timoteo ha makuri nga kahimtang nga tiarabot, hi Pablo nagsurat: “An Dios waray paghatag ha aton han espiritu han kahadlok, kondi han gahum, ngan han gugma ngan ha kaligdongan.” Ginsagdonan hi Timoteo: “An surugoon han Ginoo diri kinahanglan makiglantugi, kondi magin magtalunoy ha ngatanan, andam ha pagtutdo.”—2 Tim. 1:7; 2:24.

Ginsagda ni Pablo hi Timoteo: “Pagrig-on ha mga bagay nga imo gintuton-an, ngan iginpatapod ha imo.” Nagtitikakalyap an apostata nga mga katutdoan salit an apostol nagsagdon ha batan-on nga paramangno: “Magwali ka han pulong, maniguro ka gud, . . . magbadlong ka, magsaway ka, maglaygay ka.”—2 Tim. 3:14; 4:2.

Mga Baton ha mga Pakiana Mahitungod ha Kasuratan:

1:13—Ano an ‘surubdan han putli nga mga pulong’? An “putli nga mga pulong” amo an “mga pulong han aton Ginoo Jesu-Kristo”—tinuod nga Kristiano nga mga katutdoan. (1 Tim. 6:3) Uyon ha Pulong han Dios an igintutdo ngan ginbuhat ni Jesus, salit an ekspresyon nga “putli nga mga pulong” mahimo liwat magpasabot han ngatanan nga katutdoan han Biblia. Ini nga mga katutdoan makakabulig ha aton nga masabtan an mga ginkikinahanglan ni Jehova. Gintitipigan naton ito nga surubdan pinaagi ha pag-aplikar han aton nahibaroan ha Biblia.

4:13—Ano an “anit nga mga sinuratan”? Posible nga gin-aaro ni Pablo an pipira nga linukot nga basahon han Hebreo nga Kasuratan basi maadman niya ito samtang priso hiya ha Roma. Bangin papiro an iba nga mga linukot nga basahon kondi anit han hayop an iba hito.

Mga Leksyon Para ha Aton:

1:5; 3:15. An nangunguna nga hinungdan han pagtoo ni Timoteo kan Kristo Jesus nga nakaimpluwensya ha ngatanan nga iya ginbuhat amo an Kasuratanhon nga edukasyon nga iya nakarawat tikang han pagkabata. Importante gud nga hunahunaon hin seryoso han mga kag-anak kon paonan-o nira gintutuman ini nga responsabilidad ha Dios ngan ha ira mga anak!

1:16-18. Kon an aton mga igkasi-tumuroo nakakaeksperyensya hin mga pagsari, pagtimaraot, o kapriso, ig-ampo naton hira ngan buhaton an ngatanan ha pagbulig ha ira.—Prob. 3:27; 1 Tes. 5:25.

2:22. An mga Kristiano, labi na an mga batan-on, diri sadang magin okupado ha pagpadaku han lawas, mga isport, musika, kaliawan, hilangkagan, pagbiyahe, waray pulos nga pag-uruistorya, ngan iba pa nga sugad hito, nga haros waray na hira panahon ha espirituwal nga mga buruhaton.

[Retrato ha pahina 31]

Ha giniyahan nga mga surat ni apostol Pablo, ano an iya ultimo nga iginsurat?