Mag-uswag ha Husto nga Kahibaro nga May “Kaikag ha Hunahuna”

NGATANAN nga surugoon ni Jehova nangangalimbasog nga makarawat an iya pag-uyon. Tungod kay ginhihingyap naton ito, naiikag kita ha pagpauswag han kalidad han aton pagtoo ngan pagbuhat hin madasigon ha sagrado nga pag-alagad. Kondi, ginpapatin-aw ha aton ni Pablo an posible nga peligro nga nakaapekto ha pipira nga Judio ha iya panahon: “May hira ungod nga pagtalinguha tungod ha Dios, kondi diri sumala ha [husto nga] paghibaro.” (Roma 10:2) Salit, an aton pagtoo ngan pagsingba kan Jehova diri la nadepende ha emosyon. Nagkikinahanglan kita hin husto nga kahibaro mahitungod ha aton Maglalarang ngan ha iya kaburut-on.

Ha usa han mga sinurat ni Pablo, iginsaysay niya nga an aton kaikag ha pagkuha hin kahibaro usa han paggawi nga inuuyonan han Dios. Nag-ampo hiya nga an mga sumurunod ni Kristo ‘magkapupuno unta han husto nga kahibaro’ mahitungod han kaburut-on han Dios ‘basi manggawi hin takos kan Jehova, nga makalipay ha iya’ samtang padayon nga ‘namumunga ha ngatanan nga maopay nga buhat, ngan mag-uswag ha husto nga kahibaro han Dios.’ (Kol. 1:9, 10, NW) Kay ano nga ginkikinahanglan gud naton an ‘husto nga kahibaro’? Ngan kay ano nga sadang kita mag-uswag hito nga kahibaro?

An Yawi ha Pagtoo

An husto nga kahibaro ha Dios ngan ha iya kaburut-on nga iginpahayag ha Biblia amo an basihan han aton pagtoo. Kon waray ito nga masasarigan nga kahibaro, an aton pagtoo kan Jehova magigin sugad hin balay-balay nga karton nga masayon la maguba bisan ha mahinay nga hangin. Salit, gindadasig kita ni Pablo nga buhaton an sagrado nga pag-alagad ha Dios upod an “abilidad ha pangatadongan” ngan ‘pagbag-o ha hunahuna.’ (Roma 12:1, 2; NW) Makakabulig ha aton hito nga bahin an regular nga pag-aram ha Biblia.

Hi Ewa, usa nga regular payunir ha Poland, nagsumat: “Kon diri regular an akon pag-aram ha Pulong han Dios, diri mag-uuswag an akon husto nga kahibaro mahitungod kan Jehova. Mawawara dayon an akon Kristiano nga pangirilal-an, ngan magtitikaluya an akon pagtoo ha Dios—magriresulta ini ha pagluya han akon espirituwalidad.” Hinaot diri ito mahitabo ha aton! Tagda an susbaranan han usa nga lalaki nga nag-uswag ha husto nga kahibaro mahitungod kan Jehova ngan sugad nga resulta nakaeksperyensya han iya pag-uyon.

“Nahigugma Gud Ako ha Imo Balaud!”

An siday nga kanta ha Salmo 119 han Biblia nagpapahayag han pagbati han salmista ha mga balaud, pahinumdom, kahikayan, kasugoanan ngan hudisyal nga mga desisyon ni Jehova. Nagsurat hiya: “Maglilipay ako ngahaw ha imo mga kasugoanan. . . . An imo liwat mga pagpamatuod amo an akon kalipay.” Hiya nagpadayon: “O nahigugma gud ako ha imo balaud! Amo ito an akon pamalandong ha bug-os nga adlaw.”—Sal. 119:16, 24, 47, 48, 77, 97.

An mga pulong nga “maglilipay” ngan “pamalandong” nagpapasabot hin pag-aram ha Pulong han Dios, ha pagkamatuod, nalilipay gud ha pag-aram hito. Nagpapabug-at ito han tinuod nga gugma han salmista ha pag-aram han balaud han Dios. Ito nga gugma diri la tungod han iya sobra nga emosyon. Kondi, may-ada hiya sinsero nga hingyap nga ‘mamalandong’ han balaud, basi magkaada hin hilarom nga pagsabot ha mga pulong ni Jehova. Makikita naton ha iya disposisyon nga karuyag niya makilala an Dios ngan mahibaroan an Iya kaburut-on ha pinakahusto nga paagi nga posible.

 Matin-aw gud nga an gugma han salmista ha Pulong han Dios nakagamot ha iya kasingkasing. Mahimo naton pakianhan an aton kalugaringon: ‘May-ada ba liwat ako tinuod nga gugma ha Pulong han Dios? Nalilipay ba ako ha pagbasa ngan pagpamalandong han bahin han Biblia kada adlaw? Nangangalimbasog gud ba ako ha pagbasa han Pulong han Dios ngan nag-aampo antes tikangan ito?’ Kon mababaton naton hin oo ito nga mga pakiana, posible gud nga kita ‘nag-uuswag ha husto nga kahibaro han Dios.’

Hi Ewa nagsiring: “Padayon nga nangangalimbasog ako nga mapauswag an kalidad han akon personal nga pag-aram. Tikang han nakarawat ko an ‘See the Good Land’ nga brosyur, ginagamit ko ito haros ha kada ko pag-aaram. Mas nangangalimbasog ako nga pamilngon an impormasyon ha Insight on the Scriptures ngan iba pa nga reperensya kon kinahanglanon.”

Tagda liwat an ginbuhat han mag-asawa nga hira Wojciech ngan Małgorzata, nga may-ada damu nga responsabilidad ha pamilya. Ano an ira ginhimo basi mahiupod ha ira eskedyol an personal nga pag-aram ha Biblia? “Kada usa ha amon naggagahin hin panahon basi pag-adman an Pulong han Dios tubtob nga mahihimo. Katapos, durante ha amon pag-aram han pamilya ngan adlaw-adlaw nga pag-uruistorya, ginhihisgotan namon an mga punto nga nakapainteres ngan nakapabantad ha amon.” An maopay gud nga personal nga pag-aram nakakahatag ha ira hin daku nga kalipay ngan nakakabulig ha ira nga ‘mag-uswag ha husto nga kahibaro.’

Mag-aram nga Abrido an Hunahuna

Sugad nga mga Kristiano, natoo kita nga kaburut-on han Dios nga “an ngatanan nga mga tawo maluwas, ngan . . . makadangat ha pagkilala han kamatuoran.” (1 Tim. 2:3, 4) Ginpapabug-atan hini an kapulsanan han pagbasa han Biblia ngan pangalimbasog nga ‘masabtan’ ito. (Mat. 15:10) Usa nga bulig basi mahimo ito amo an pag-aram nga abrido an hunahuna. Ini an disposisyon han mga taga-Berea hadto han ginsangyawan hira ni Pablo han maopay nga sumat: “Hira nagkarawat han pulong hin bug-os nga kaabtik [“kaikag ha hunahuna,” NW], ngan ha adlaw-adlaw ira gin-usisa an Santos nga Surat, kon ini nga mga bagay amo an kamatuoran.”—Buh. 17:11.

Ginsusubad mo ba an mga taga-Berea ha pagkaada hin kaikag ha hunahuna ngan ha diri pagpadisturbo ha waray pulos nga mga butang samtang nag-aaram ka ha Biblia? Masusubad han usa nga Kristiano an ginhimo han mga taga-Berea, bisan kon hadto, diri makaruruyag ha iya an pag-aram. Dugang pa, may mga tawo nga panalagsa na la magbasa ngan mag-aram kon nagtitikalagas na, kondi diri sadang magsubad hito an Kristiano. Anoman an pangidaron, posible gud nga malamposan an mga ulang. Samtang nagbabasa ka, pangalimbasugi nga makabiling hin impormasyon nga maisusumat mo ha iba. Pananglitan, mahimo mo ba unabihon ha imo asawa o ha usa nga Kristiano nga sangkay an imo nabasa o nahibaroan durante han imo pag-aram? Kon buhaton mo ito, magpapabilin gud an impormasyon ha imo hunahuna ngan kasingkasing ngan makakapahimulos hito an iba.

Mahitungod han imo pag-aram, subara an ginbuhat ni Esra, an surugoon han Dios hadto nga nag-andam han iya “kasingkasing ha pagpangita han balaud ni Jehova.” (Esra 7:10) Paonan-o mo mahihimo ito? Pagbiling hin lugar diin makakag-aram ka hin maopay. Katapos, lingkod ngan pag-ampo kan Jehova para han iya giya ngan kinaadman. (Jak. 1:5) Pakianhi an imo kalugaringon, ‘Ano an sadang ko hibaroan ha pag-aram yana?’ Samtang nagbabasa ka, tigamni  an importante nga mga ideya. Mahimo mo isurat ito o tigamnan adton karuyag mo hinumdoman. Hunahunaa kon paonan-o mo magagamit an impormasyon ha pagsangyaw, pagdesisyon, o pagdasig ha mga igkasi-tumuroo. Antes mo tapuson an pag-aram, repasoha ito hin madaliay. Makakabulig ito nga magpabilin ha hunahuna an imo hinbaroan.

Nagsaysay hi Ewa han iya ginhimo: “Samtang binabasa ko an Biblia, akon ginagamit an mga cross reference, an Watch Tower Publications Index, ngan an Watch Tower Library ha CD-ROM. Iginsusurat ko an importante nga mga punto nga magagamit ko ha pagsangyaw.”

An iba maiha na nga nagpapahimulos han maopay gud nga pag-aram, ngan mas nahibabaro mahitungod ha Dios. (Prob. 2:1-5) Nahihimo nira ito bisan pa kon damu an ira responsabilidad ngan nakukurian ha pagkaada hin panahon ha personal nga pag-aram. Kon sugad hito an imo kahimtang, paonan-o mo maipapahiuyon an imo eskedyol?

Paonan-o Ako Magkakaada hin Panahon?

Mauyon ka gud nga mas masayon la magkaada hin panahon ha mga buruhaton nga imo naruruyagan. Naobserbahan han damu nga an usa nga bulig basi maipadayon an personal nga pag-aram amo an pagkaada hin reyalistiko nga tumong, sugad han pagbasa han bug-os nga Biblia. Oo, bangin makuri gud an pagbasa han higlaba nga rekord han katulinan, detalyado nga mga paghulagway han templo hadto, o komplikado nga mga tagna nga baga hin waray kalabotan ha adlaw-adlaw nga pagkinabuhi. Kondi, paghimo hin praktikal nga mga paagi nga makakabulig ha pagkab-ot han imo tumong. Pananglitan, antes pag-adman an bahin han Biblia nga baga hin makuri masabtan, mahimo mo basahon an mahitungod han kasaysayan o praktikal nga aplikasyon hito. Ini nga mga impormasyon mababasa ha libro nga “All Scripture Is Inspired of God and Beneficial,” nga iginpublikar ha haros 50 nga yinaknan.

Mas magkakainteres ka kon gamiton mo an imo imahinasyon samtang nagbabasa han Biblia. Mabulig ito ha imo nga mahanduraw an mga tawohan ngan panhitabo. Pinaagi ha pag-aplikar hini nga mga suhestyon, magigin mas makalilipay ngan mapulsanon an imo pag-aram. Sugad nga resulta, mas maiikag ka gud nga mag-aram. Ngan magtitikasayon an pagpadayon hito kada adlaw.

Samtang an mga suhestyon nga gin-unabi pa la makakabulig ha aton sugad nga indibiduwal,  kumusta man an okupado nga pamilya? Kay ano nga diri kamo mangalingkod basi pag-istoryahan niyo an mga kapulsanan han pag-aram ha Biblia sugad nga pamilya? Makakabulig ito nga makahimo kamo hin praktikal nga mga suhestyon, sugad han pagbangon hin mas temprano kada adlaw, o ha partikular nga mga adlaw basi pag-adman an Biblia. O bangin liwat ha iyo pag-uruistorya makita niyo nga kinahanglan bag-ohon an eskedyol. Pananglitan, naeksperyensyahan han pipira nga pamilya nga praktikal an paghisgot han inadlaw nga teksto o pagbasa han pipira nga kapitulo han Biblia katapos han pangaon. Antes manhimos han hugasan o kumadto ha iba nga buruhaton, an pamilya nagbabasa han Biblia uyon ha nakaeskedyol o naghihisgot han mga teksto hito ha sulod hin 10 o 15 minutos. Ha siyahan, bangin makuri ini, kondi diri mag-iiha mahiaara na hira ngan malilipay gud hini.

Hira Wojciech ngan Małgorzata nagsaysay kon ano an nakabulig ha ira pamilya: “Hadto, nauubos an amon panahon ha waray-pulos nga mga buruhaton. Salit, nagdesisyon kami nga ibanan an oras ha pagpinadara hin e-mail. Gin-ibanan liwat namon an panahon ha pagpahalibway ngan nagpili kami hin adlaw ngan oras para ha pag-aram hin maopay.” Sigurado nga waray gud pagbasuli hini nga pamilya an mga pagbag-o nga ira ginhimo, ngan mahihimo liwat ito han iyo pamilya.

Mapulsanon an Pag-uswag ha Husto nga Kahibaro!

An maopay gud nga pag-aram ha Pulong han Dios mahimo magresulta ha ‘pamunga han ngatanan nga maopay nga buhat.’ (Kol. 1:10) Samtang ginbubuhat mo ito, an imo pag-uswag makikita han ngatanan. Magkakaada ka hin hilarom nga pagsabot ha mga kamatuoran han Biblia. Magigin mas timbang an imo mga desisyon ngan mas andam ka gud ha pagbulig ha iba, nga diri nasusobrahan o nakukulangan nga kasagaran makikita ha mga kulang an kahibaro. Labaw ha ngatanan, magigin mas duok ka kan Jehova. Magkakaada ka hin mas hilarom nga apresasyon ha iya mga kalidad, ngan makikita ini samtang nagsusumat ka ha iba mahitungod ha iya.—1 Tim. 4:15; Jak. 4:8.

Anoman an imo pangidaron o eksperyensya, padayon nga pangalimbasugi gud nga malipay ha Pulong han Dios ngan mag-aram hito hin maopay nga abrido an imo hunahuna. Makakalaom ka nga diri hingangalimtan ni Jehova an imo mga pangalimbasog. (Heb. 6:10) Hura nga bibendisyonan ka niya.

[Retrato ha pahina 13]

KON KITA ‘MAG-USWAG HA HUSTO NGA KAHIBARO’. . .

Mapaparig-on naton an aton pagtoo kan Jehova nga Dios ngan magawi hin takos ha Iya.—Kol. 1:9, 10

Magkakaada kita hilarom nga pagsabot, mahibabaro ha pagturutimbang ngan makakahimo hin maaramon nga desisyon.—Sal. 119:99

Mas malilipay kita ha pagbulig ha iba nga magin duok kan Jehova.—Mat. 28:19, 20

[Mga Retrato ha pahina 14]

Makuri an pagbiling hin lugar diin makakag-aram ka hin maopay, kondi mapulsanon gud ito

[Retrato ha pahina 15]

An iba nga pamilya nagbabasa hin bahin han Biblia katapos mangaon