Mga Pakiana Tikang ha mga Magbarasa

Ha surat ni apostol Pablo ha mga Hebreohanon, gin-unabi niya an “pandoon han mga kamot.” Gin-uunabi ba niya an pagpili han mga tigurang o may-ada iba pa?—Heb. 6:2.

Diri kita sadang magin kritiko, kondi posible nga an gin-uunabi ni Pablo nga pagdoon han mga kamot amo an paghatag han mga regalo han espiritu.

An Biblia nag-uunabi han pagdoon han mga kamot may kalabotan ha teokratiko nga mga pagpili. Pananglitan, hi Moises ‘nagdoon han iya kamot’ kan Josue han ginpili hiya nga manurunod. (Deut. 34:9) Ha Kristiano nga kongregasyon, ginpili an iba nga kwalipikado nga kalalakin-an pinaagi ha pagdoon han mga kamot. (Buh. 6:6; 1 Tim. 4:14) Nagsagdon hi Pablo nga diri magdagmit ha pagdoon han mga kamot ha usa ka tawo.—1 Tim. 5:22.

Kondi, ginsagda ni Pablo an Hebreohanon nga mga Kristiano nga ‘mag-uswag ngadto ha pagkahamtong’ yana nga ginbayaan na nira an “siyahan nga pagturon-an.” Katapos, iginlista niya an “pagbasol tikang ha mga patay nga buhat, ngan han pagtoo ha Dios, han pagturon-an ha mga pagbaptis, ngan pandoon han mga kamot.” (Heb. 6:1, 2; NW) An pagpili ba hin mga tigurang an siyahan nga tigaman han pag-uswag ha pagkahamtong han mga Kristiano? Diri. An pagin tigurang usa nga tumong nga sadang makab-ot han hamtong nga kabugtoan ngan ginpapabilhan nira ito.—1 Tim. 3:1.

Kondi may-ada usa pa nga gamit han pagdoon han mga kamot. Ha siyahan nga siglo, iginsalikway ni Jehova an natural nga Israel sugad nga iya katawohan ngan ginsaliwnan ito han espirituwal nga Israel, an kongregasyon han dinihogan nga mga Kristiano. (Mat. 21:43; Buh. 15:14; Gal. 6:16) An milagroso nga mga regalo han espiritu, sugad han pagyakan hin magkalain-lain nga pinulongan, nagpapamatuod hito nga pagbag-o. (1 Kor. 12:4-11) Han nagin tumuroo hi Cornelio ngan an iya pamilya, ini nga mga bag-ohan nakakarawat han baraan nga espiritu nga nakita han hira ‘nagyakan han mga yinaknan.’—Buh. 10:44-46.

Usahay, an milagroso nga mga regalo iginhahatag pinaagi ha pagdoon han mga kamot. Han nagsangyaw han maopay nga sumat hi Felipe ha Samaria, damu an nabawtismohan. Ginsugo ngadto han nagmamando nga lawas hira apostol Pedro ngan Juan. Kay ano? Aton mababasa: “Niyan ipinanduon [hini nga duha] an ira mga kamot ha [nabawtismohan pa la nga mga tawo] . . . ngan hira kinarawat han espiritu santo.” Nangahulogan gud ito nga nakarawat nira an mga regalo han espiritu—mga abilidad nga nakikita han iba. Nasabtan naton ini tungod kay hi Simon, nga nagbuhat hadto hin mahika, nakakita hini nga paggios han espiritu ngan hakugnon nga nangalimbasog ha pagpalit han abilidad ha pagdoon han iya mga kamot ha iba basi maihatag an baraan nga espiritu nga maghahatag hin gahum ha pagbuhat hin milagro. (Buh. 8:5-20) Ha urhi, 12 ka tawo an nabawtismohan ha Efeso. Aton mababasa: “Han paghidoon ha ira han kan Pablo mga kamot, an espiritu santo kinuysad ha ira, ngan hira nagyakan ha mga yinaknan, ngan nanagna.”—Buh. 19:1-7; itanding an 2 Timoteo 1:6.

Salit, ha Hebreo 6:2, matin-aw nga an gin-uunabi ni Pablo nga pagdoon han mga kamot amo an paghatag han mga regalo han espiritu ngadto ha bag-o nga mga tumuroo.