Pagsangyaw ha Baraligyaan

HAN nakadto hi apostol Pablo ha syudad han Atenas, adlaw-adlaw nga kinadto hiya ha baraligyaan basi isangyaw an maopay nga sumat mahitungod kan Jesus. (Buh. 17:17) Ginpili niya an baraligyaan tungod kay haros didto kapipirme an mga taga-Atenas.

Paglabay hin haros 2,000 ka tuig, an katawohan ni Jehova nakadto pa gihapon ha mga baraligyaan basi isangyaw an mensahe mahitungod han Ginhadian han Dios. Kay ano? Tungod kay damu an tawo didto. Yana, bangin ha mga shopping mall, o ha dagku nga grocery shop namamalit an mga tawo. Katapos sumarit ha manidyer o ha tag-iya han tindahan, nagbubutang an pipira nga Saksi hin lamesa o literature stand basi dida idispley an mga literatura.

Pananglitan, ha usa nga shopping mall ha New Jersey, E.U.A., nakakadani nga gindispley an aton mga publikasyon nga naghihisgot kon paonan-o matitipigan han mga membro han pamilya an mag-opay nga prinsipyo. Ano an resulta? Ha usa ka adlaw, 153 nga libro ha unom nga yinaknan an naipahamutang.

Usa nga babaye an dinaop ha literature stand ngan namati hin maopay ha pagsaysay han usa nga bugto. Inuyon an babaye nga importante nga tagdon naton ngan han aton pamilya an Dios. Kinuha hiya hini nga mga publikasyon: Mahibaro Tikang ha Bantogan nga Magturutdo, An Sekreto han Kalipayan ha Pamilya, ngan Questions Young People Ask—Answers That Work.

Temprano ha kulop, may lalaki nga inagi ha literature stand nga tisulod ha tindahan nga sapit hito. Nagkinita hiya ha libro nga Young People Ask. Naobserbahan han bugto nga nagbabantay an interes han lalaki. Salit hiya nagpakiana: “May-ada ba libro dinhi nga imo naruruyagan?” Tinangdo an lalaki ngan gintudlok an libro nga  Young People Ask ngan gin-ikakuha ito, salit ginduhol ito han bugto. Nagsumat an lalaki nga may-ada hiya tulo nga anak, ngan duha hito an tinedyer na. Ha pagpadayon han ira pag-istorya, naunabi han lalaki nga nakikiistorya hiya ha iya mga anak makausa ha usa ka semana. Samtang ginpupuropakli an libro, nagsiring hiya nga magagamit gud niya ito sugad nga giya ha pag-uruistorya han ira pamilya. Ginpakita liwat han bugto an libro nga The Secret of Family Happiness, ngan iya ginpasarig an lalaki nga hira nga mag-asawa makakabiling hin damu nga mapulsanon gud nga sagdon ha paghimo hin mga desisyon may kalabotan han ira pamilya. Nagpasalamat an lalaki ha suhestyon, naghatag hin donasyon, ngan inuyon nga bisitahon.

Ano an inabat han mga Saksi ha ira pagsangyaw ha shopping mall? “Naruyagan ko gud ini nga paagi han pagsangyaw,” siring han usa nga bugto. “Nalipay gud ako hini nga eksperyensya!” Usa pa nga bugto an nagsiring: “Hi Jehova nasiring nga an maopay nga sumat isasangyaw tubtob ha sidsid gud han tuna. Yana, ha Paramus, New Jersey, nababantad hinin maopay nga sumat an mga tawo nga iba-iba an nasyonalidad. Makalilipay gud nga magin bahin hini nga kahikayan, ngan nalipay an ngatanan nga nakigbahin hini. Han gab-i na, waray usa ha amon an naruyag bumaya.”

Mahimo mo ba isangyaw an maopay nga sumat ha magkalain-lain nga paagi? An pagbalay-balay an aton siyahan nga paagi ha pagsangyaw. (Buh. 20:20) Kondi, maisasangyaw mo ba liwat ito ha mga baraligyaan o ha dagku nga grocery shop?