“Amo Gud Ini an Gibabaraani Ngan Harangdon nga Ngaran han Dios”
“Amo Gud Ini an Gibabaraani Ngan Harangdon nga Ngaran han Dios”
Ini an ginsiring ni Nicholas han Cusa ha iya sermon han tuig 1430. a Damu an karuyag niya hibaroan salit nag-aram hiya hin Griego ngan Hebreo nga yinaknan, pilosopiya, teolohiya, matematika, ngan astronomiya. Ha edad nga 22, natapos niya an pinakahitaas nga edukasyon ha pamalaud han iglesia Romana Katolika. Han 1448 ginpili hiya nga kardinal.
Mga 550 ka tuig na an naglabay, hi Nicholas han Cusa nagtukod hin nursing home para ha mga lagas ha Kues, nga kilala na yana nga Bernkastel-Kues, usa nga bungto nga mga 130 kilometro ha sur han Bonn ha Alemanya. Aadto yana hito nga tinukod an Librarya han Cusa nga may-ada sobra 310 nga manuskrito. Usa hito an Codex Cusanus 220 diin mababasa an sermon ni Cusa han 1430. Hito nga sermon nga In principio erat verbum (Ha Tinikangan Amo an Pulong), gin-gamit ni Nicholas han Cusa an Latin nga ispeling nga Iehoua para ha Jehova. b Ha pahina 56, ini an mababasa mahitungod han ngaran han Dios: “Iginhatag ito han Dios. Ito an Tetragrammaton, nga amo an ngaran nga may-ada upat nga letra. . . . Amo gud ini an gibabaraani ngan harangdon nga ngaran han Dios.” An ginsiring ni Nicholas han Cusa nauyon ha kamatuoran nga an ngaran han Dios nakasurat ha orihinal nga Hebreo nga Kasuratan.—Eks. 6:3.
Ini nga libro nga tikang pa ha temprano han ika-15 ka siglo, usa han gidadaani nga naeksister pa nga mga dokumento diin an Tetragrammaton iginhubad nga “Iehoua.” Inin sinurat nga asoy dugang nga nagpapamatuod nga an mga hubad han ngaran han Dios nga pariho han “Jehova” amo an pinakakalyap nga pagsurat han ngaran han Dios ha mga literatura ha sulod hin mga siglo na.
[Mga footnote]
a Hi Nicholas han Cusa kilala liwat nga Nikolaus Cryfts (Krebs), Nicolaus Cusanus, ngan Nikolaus von Kues. Kues an ngaran han bungto ha Alemanya nga iya natawohan.
b An katuyoan han sermon amo an pagsuporta ha Trinidad.
[Retrato ha pahina 16]
Librarya han Cusa