Hi Jehova Nagbabantay ha Aton Para ha Aton Kaopayan

‘An mga mata ni Jehova nadalagan ngadto nganhi sahid an bug-os nga kalibotan, ha pagpakita han iya kusog para ha ira nga an kasingkasing hingpit ngadto ha iya.’—2 KRON. 16:9.

1. Kay ano nga gin-uusisa kita ni Jehova?

 HI Jehova amo an hingpit nga Amay. Kilala gud kita niya salit maaram hiya bisan han “painoino han [aton] mga hunahuna.” (1 Kron. 28:9) Kondi, diri kita niya gin-uusisa basi la makabiling hin sayop. (Sal. 11:4; 130:3) Lugod, mahigugmaon nga ginpapanalipdan kita tikang ha bisan ano nga bangin makadaot han aton relasyon ha iya o han aton paglaom nga mabuhi ha waray kataposan.—Sal. 25:8-10, 12, 13.

2. Ginagamit ni Jehova an iya kusog para kan kanay?

² Diri matupngan an gahum ni Jehova ngan nakikita niya an ngatanan. Salit makakabulig hiya ha iya mga maunungon kon natawag hira ha iya, ngan makakaparig-on ha ira durante han ira kakurian. ‘An mga mata ni Jehova nadalagan ngadto nganhi sahid an bug-os nga kalibotan, ha pagpakita han iya kusog para ha ira nga an kasingkasing hingpit ngadto ha iya,’ siring han 2 Kronikas 16:9. Tigamni nga ginagamit ni Jehova an iya kusog para hadton nag-aalagad ha iya nga may hingpit nga kasingkasing, nga putli ngan sinsero an motibo. Diri sugad hito an iya pagtagad ha maglimbong o salingkapaw.—Jos. 7:1, 20, 21, 25; Prob. 1:23-33.

 Maglakat Upod han Dios

3, 4. Ano an kahulogan han ‘paglakat upod han Dios,’ ngan ano nga mga ehemplo ha Biblia an nabulig ha aton nga masabtan ini?

³ Para ha damu, imposible nga an Maglalarang han aton bug-os nga uniberso matugot ha mga tawo nga maglakat upod niya ha espirituwal nga paagi. Kondi, ito gud an karuyag ni Jehova nga buhaton naton. Ha kadaan nga panahon, hira Enok ngan Noe “naglakat upod han Dios.” (Gen. 5:24; 6:9) Hi Moises marig-on nga ‘nagpadayon sugad hin tinatan-aw niya an diri sadang makita.’ (Heb. 11:27) Mapainubsanon nga naglakat hi Hadi David upod han iya langitnon nga Amay. Hiya nagsiring: “Tungod kay aadi [hi Jehova] ha akon too nga kamot, diri ako hitatalindas.”—Sal. 16:8.

⁴ Syempre, diri literal nga makakaptan naton an kamot ni Jehova ngan maglakat upod niya. Kondi mahihimo naton ito ha simboliko nga paagi. Paonan-o? Hi salmista Asap nagsurat: “Magpapadayon ako hin pag-upod ha imo: Imo ginkaptan an akon too nga kamot. Imo ako pagmamandoan han imo sagdon.” (Sal. 73:23, 24) Oo, naglalakat kita upod ni Jehova kon ginsusunod naton an iya sagdon, nga nakakarawat naton labi na pinaagi han iya sinurat nga Pulong ngan han “matinumanon ngan maaramon nga uripon.”—Mat. 24:45, NW; 2 Tim. 3:16.

5. Paonan-o nagbabantay hi Jehova ha iya mga maunungon sugad hin mahigugmaon nga amay, ngan ano an sadang abaton naton ha iya?

⁵ Tungod kay hinigugma ni Jehova adton naglalakat upod niya, padayon nga nagbabantay hiya ha ira sugad hin mahigugmaon nga amay, nagmamangno, nagpapanalipod, ngan nagtututdo ha ira. An Dios nasiring: “Tatagan ko ikaw hin hilarom nga pagsabot ngan tututdoan ko ikaw ha dalan nga sadang mo paglaktan. Sasagdonan ko ikaw samtang an akon mata nagkikinita ha imo.” (Sal. 32:8, NW) Pakianhi an imo kalugaringon: ‘Nahahanduraw ko ba nga naglalakat ako nga nakapot ha kamot ni Jehova, samtang namamati ha iya igintututdo ngan naabat han iya mahigugmaon nga pagkinita ha akon? May-ada ba maopay nga epekto ha akon panhunahuna, pulong ngan buhat an akon pagin maaram nga naeksister hiya? Ngan kon nakakasala ako, nahahanduraw ko ba hi Jehova, diri sugad hin makuri madaop ngan istrikto nga Dios, kondi mahigugmaon ngan maloloy-on nga Amay nga karuyag bumulig ha mga nagbabasol nga magin duok utro ha iya?’—Sal. 51:17.

6. Ano an bentaha ni Jehova kay ha tawhanon nga kag-anak?

⁶ May mga panahon nga hi Jehova bangin bumulig ha aton antes pa kita magtikang pagbuhat hin sayop. Pananglitan, bangin maobserbahan niya nga an aton kasingkasing, nga may tendensya nga magin malimbong, nagtitikang maghingyap ha pagbuhat hin sayop. (Jer. 17:9) Ha sugad nga kahimtang, mas madagmit nga makakagios hiya kay ha tawhanon nga mga kag-anak tungod kay an iya “nasanag nga mga mata” may-ada abilidad ha pagkita ha aton tinuod nga pagkatawo, ha pag-usisa han aton gihilarumi nga panhunahuna. (Sal. 11:4, NW; 139:4; Jer. 17:10) Tagda an ginbuhat han Dios ha nahitabo kan Baruk, nga sekretaryo ngan duok nga sangkay ni propeta Jeremias.

Sugad hin Tinuod nga Amay ni Baruk

7, 8. (a) Hin-o hi Baruk, ngan ano nga sayop nga mga hingyap an posible nga nagtikang tumubo ha iya kasingkasing? (b) Paonan-o ipinakita ni Jehova an iya kinag-anak nga pagtagad kan Baruk?

⁷ Hi Baruk usa nga propesyonal nga sekretaryo nga matinumanon nga nag-alagad kaupod ni Jeremias ha nagin makuri nga toka—pagpasamwak han mga paghukom ni Jehova ha Juda. (Jer. 1:18, 19) May-ada higayon nga hi Baruk, nga bangin tikang ha prominente nga pamilya, nagtikang pamiling hin “dagku nga mga butang” para ha iya kalugaringon. Posible nga nagtikang hiya maghingyap hin kauswagan ha materyal. Anoman an nahitabo, nakita ni Jehova nga inin peligroso nga hingyap nagtutubo ha kasingkasing ni Baruk. Pinaagi kan Jeremias, nagsiring dayon hi Jehova kan Baruk: “Ikaw nagsiring: Kairo ko yana! Kay kan Jehova gindugangan hin kasub-anan an akon maul-ol; ako kinakapoy ha akon pag-araba, ngan waray ako pakaagi hin kapahuwayan.” Katapos, an Dios nagsiring: “Nangingita ka ba han dagku nga mga butang para ha imo ngahaw? Ayaw pangita ha ira.”—Jer. 45:1-5.

⁸ Bisan kon magbug-at an ginyakan ni Jehova kan Baruk, waray Hiya masina, kondi nagpakita hin sinsero ngan kinag-anak nga pagtagad.  Matin-aw nga nakita han Dios nga bisan kon peligroso an mga hingyap ni Baruk, diri maraot o malimbong an iya kasingkasing. Maaram liwat hi Jehova nga an Jerusalem ngan Juda aada na ha kataposan nga mga adlaw hito, ngan diri niya karuyag nga umundang hi Baruk ha pag-alagad durante hiton peligroso nga panahon. Salit, basi makahunahuna hin maopay an iya surugoon, iya ginpahinumdoman hiya nga iya “pagdadad-on an karaotan ngada ha ngatanan nga unod,” ngan nagsiring pa hiya nga kon hi Baruk gumios hin maaramon, mabubuhi hiya. (Jer. 45:5) Ha iba nga pagkayakan, baga hin nagsiring an Dios: ‘Magin reyalistiko ka Baruk. Hunahunaa kon ano an hirani na mahitabo ha makasasala nga Juda ngan Jerusalem. Pagpabilin nga matinumanon ngan mabubuhi ka! Pananalipdan ko ikaw.’ Sigurado nga nabantad ni Jehova an kasingkasing ni Baruk, tungod kay ginbag-o niya an iya panhunahuna ngan natalwas ha kabungkagan han Jerusalem nga nahitabo paglabay hin 17 ka tuig.

9. Ano an imo baton ha mga pakiana ha parapo?

⁹ Samtang pinamamalandong mo an asoy mahitungod kan Baruk, tagda an masunod nga mga pakiana ngan teksto: Ha paagi han pagtratar ni Jehova kan Baruk, ano an iginpapahayag hito mahitungod ha Iya ngan ha iya mga pagbati para ha iya mga surugoon? (Basaha an Hebreo 12:9.) Tungod kay nagkikinabuhi kita ha peligroso nga panahon, ano an mahibabaroan naton tikang ha sagdon han Dios kan Baruk ngan ha iya reaksyon hito? (Basaha an Lukas 21:34-36.) Sugad nga pagsubad kan Jeremias, paonan-o maipapakita han mga tigurang an pagtagad ni Jehova ha Iya mga surugoon?—Basaha an Galasia 6:1.

Ginsubad han Anak an Gugma han Amay

10. Paonan-o ginsasangkapan hi Jesus ha pagdumara han iya katungdanan sugad nga Ulo han kongregasyon?

¹⁰ Antes han Kristiano nga panahon, iginpahayag ni Jehova an iya gugma ha iya katawohan pinaagi han iya mga propeta ngan iba pa nga magtinumanon nga surugoon. Yana, ipinapakita ito nga gugma, labaw ha ngatanan, ni Jesu-Kristo, an Ulo han kongregasyon. (Efe. 1:22, 23) Salit, ha libro han Pahayag, iginhuhulagway hi Jesus sugad nga kordero nga may-ada “pito nga mata, nga amo an pito nga espiritu han Dios, nga ginsugo ngadto ha bug-os nga kalibotan.” (Pah. 5:6) Oo, tungod kay tinagan hi Jesus hin bug-os nga gahum han baraan nga espiritu han Dios, may-ada hiya hingpit nga pagsabot. Nakikita liwat niya kon ano gud kita, ngan maaram hiya han ngatanan nga nahitatabo.

11. Ano an responsabilidad ni Kristo, ngan paonan-o niya ipinapakita ha aton an pagtagad han iya Amay?

¹¹ Kondi, pariho kan Jehova, hi Jesus diri  sugad hin polis nga nagbibinantay tikang ha langit. Gin-uusisa kita niya ha mahigugmaon nga paagi. An usa han mga katungdanan ni Jesus nga ‘Amay ha Kadayonan,’ nagpapahinumdom ha aton han iya magigin responsabilidad ha paghatag hin kinabuhi nga waray kataposan ha ngatanan nga natoo ha iya. (Isa. 9:6) Dugang pa, sugad nga Ulo han kongregasyon, mapapagios ni Kristo an disidido ngan hamtong ha espirituwal nga mga Kristiano, labi na an mga tigurang, ha pagliaw o pagsagdon ha mga nanginginahanglan.—1 Tes. 5:14; 2 Tim. 4:1, 2.

12. (a) Ano an iginpapahayag han mga surat ngadto ha pito nga kongregasyon ha Asia Minor mahitungod kan Jesus? (b) Paonan-o ipinapakita han mga tigurang an pagtagad ni Kristo ha panon han Dios?

¹² An sinsero nga pagtagad ni Kristo ha panon ipinapakita han mga surat ngadto ha mga tigurang han pito nga kongregasyon ha Asia Minor. (Pah. 2:1–3:22) Pinaagi hito nga mga surat, iginpasabot ni Jesus nga maaram hiya han nahitatabo ha tagsa nga kongregasyon ngan sinsero nga gintatagad niya an iya mga sumurunod. Mas naaplikar gud ito yana tungod kay an bisyon ha Pahayag natutuman durante han “Adlaw han Ginoo.” a (Pah. 1:10) An gugma ni Kristo agsob nga iginpapahayag pinaagi han mga tigurang, nga nag-aalagad sugad nga mga magbarantay han kongregasyon. Mapapagios niya ini nga “mga regalo nga kalalakin-an” basi magliaw, magparig-on, o magsagdon kon kinahanglanon. (Efe. 4:8, NW; Buh. 20:28; basaha an Isaias 32:1, 2.) Gintatagad mo ba an ira mga pangalimbasog sugad nga kapahayagan han gugma ni Kristo ha imo?

Bulig ha Husto nga Panahon

13-15. Paonan-o ginbabaton han Dios an mga pag-ampo? Paghatag hin mga ehemplo.

¹³ Nag-ampo ka na ba hin kinasingkasing ha pangaro hin bulig ngan nakarawat mo an baton hito pinaagi han makaparig-on nga pagbisita ha imo han hamtong nga Kristiano? (Jak. 5:14-16) O bangin nabuligan ka han pahayag ha katirok o han impormasyon nga nabasa mo ha usa han aton mga publikasyon. Agsob nga ha sugad hini nga paagi ginbabaton ni Jehova an mga pag-ampo. Pananglitan, katapos magpahayag an tigurang, dinaop ha iya an bugto nga babaye nga nabiktima han duro nga kawaray-hustisya pipira ka semana na an naglabay. Imbes nga magreklamo mahitungod han iya problema, inapresyar gud niya an kasuratanhon nga mga punto nga iginpatin-aw ha pahayag. Naaplikar ito ha iya kahimtang ngan naliaw gud hiya. Nalipay gud an bugto nga tinambong hiya ha katirok!

¹⁴ Mahitungod han bulig nga nakakarawat pinaagi han pag-ampo, tagda an ginbuhat han tulo nga priso nga nahibaro han kamatuoran ha Biblia samtang priso ngan nagin diri-bawtismado nga magwarali. Tungod han madarahog nga hitabo, mas gin-istriktohan an ngatanan nga priso didto. Tungod hito, nagprotesta hira. Nagsarabot hira nga katapos han pamahaw kinabuwasan, sugad nga pagrebelde, diri nira ibabalik an ira mga pinggan. An tulo nga diri-bawtismado nga magwarali diri maaram kon ano an bubuhaton. Kon umapi hira ha pagprotesta, tatalapason nira an sagdon ni Jehova ha Roma 13:1. Kon diri hira umapi, kukontrahon hira han nasisina nga mga igkasi-priso.

¹⁵ Tungod kay hira nga tulo waray makagkomunikar, nag-ampo hira nga buligan ha pagdesisyon. Kinabuwasan, hinbaroan nira nga magkapariho gud an ira desisyon—diri na la hira mamamahaw. Han mangulekta na an mga  gwardya han mga pinggan, hira nga tulo waray ibabalik. Malipayon gud hira nga hirani an “Parapamati han pag-ampo”!—Sal. 65:2, NW.

May Pagsarig nga Inaatubang an Tidaraon

16. Paonan-o ipinapakita han pagsangyaw an pagtagad ni Jehova ha sugad-karnero nga mga tawo?

¹⁶ An bug-os-kalibotan nga pagsangyaw usa pa nga ebidensya han pagtagad ni Jehova ha tangkod an kasingkasing nga mga tawo, diin man hira naukoy. (Gen. 18:25) Agsob nga ginagamit ni Jehova an mga anghel ha paggiya ha iya mga surugoon ngadto ha sugad-karnero nga mga tawo—bisan kon naukoy hira ha mga lugar nga waray pa masangyawi. (Pah. 14:6, 7) Pananglitan, pinaagi hin anghel, giniyahan han Dios hi Felipe, usa nga ebanghelisador ha siyahan nga siglo, ha pagbiling ha Etiopiahanon nga opisyal ngan pagsaysay han Kasuratan ha iya. Ano an resulta? Ginkarawat han opisyal an maopay nga sumat ngan nagin bawtismado nga sumurunod ni Jesus. b—Juan 10:14; Buh. 8:26-39.

17. Kay ano nga diri kita sadang mabaraka hinduro mahitungod han tidaraon?

¹⁷ Samtang ini nga sistema yana nagtitikahirani ha kataposan hito, magpapadayon an igintagna nga “mga kasakitan.” (Mat. 24:8) Pananglitan, bangin magmahal hinduro an mga prisyo han pagkaon tungod han nagtitikadamu nga nanginginahanglan, duro karaot nga kahimtang han panahon, o pagluya han ekonomiya. Bangin mas makuri na makabiling hin trabaho, ngan an mga empleyado mas mapiritan ha pagtrabaho hin mas hilawig nga mga oras. Anoman an mahitabo, diri kinahanglan mabaraka hinduro an ngatanan nga inuuna an pag-alagad ngan nagtitipig hin simple nga mata. Maaram hira nga an Dios nahigugma ha ira ngan magmamangno ha ira. (Mat. 6:22-34) Tagda, pananglitan, kon paonan-o hi Jehova nagtagana kan Jeremias ha panahon han masamok nga kataposan han Jerusalem han 607 A.K.P.

18. Paonan-o pinamatud-an ni Jehova an iya gugma kan Jeremias durante han paglikusi han Jerusalem?

¹⁸ Durante han ultimo nga paglikos han mga Babilonyahanon ha Jerusalem, priso hi Jeremias ha Ruwang han Bantay. Paonan-o hiya magkakaada hin pagkaon? Kon diri hiya priso, mamimiling unta hiya hin makakaon. Kondi, bug-os nga nakadepende hiya ha mga nakapalibot ha iya, nga an kadam-an nangangalas ha iya! Pero, sinarig hi Jeremias diri ha mga tawo kondi ha Dios, nga nagsaad nga magmamangno ha iya. Gintuman ba ni Jehova an iya saad? Syempre! Ginsiguro niya nga hi Jeremias hatagan ha adlaw-adlaw hin “usa ka bug-os nga tinapay . . . ngada nga an ngatanan nga tinapay han bungto naubos.” (Jer. 37:21) Hira Jeremias, Baruk, Ebed-melek, ngan iba pa, nakatalwas hito nga panahon han kagutom, sakit ngan kamatayon.—Jer. 38:2; 39:15-18.

19. Samtang inaatubang naton an tidaraon, ano an sadang magin determinasyon naton?

¹⁹ Oo, “an mga mata [ni Jehova] itinatamod ha mga magtadong, ngan an iya mga talinga nanmamati ha ira pag-ampo.” (1 Ped. 3:12) Nalilipay ka ba nga an imo Amay ha langit nagbabantay ha imo? Naabat ka ba nga talwas ka ngan may seguridad tungod kay maaram ka nga pirme hiya nagkikita ha imo para ha imo kaopayan? Magin determinado, kon sugad, nga magpadayon ha paglakat upod han Dios—anoman an mahitabo ha tidaraon. Makakasiguro kita nga hi Jehova magbabantay pirme sugad hin mahigugmaon nga amay ha ngatanan nga iya maunungon.—Sal. 32:8; basaha an Isaias 41:13.

[Mga footnote]

Maisasaysay Mo Ba?

• Paonan-o naton maipapakita nga ‘naglalakat kita upod han Dios’?

• Paonan-o ipinakita ni Jehova an iya gugma kan Baruk?

• Sugad nga Ulo han kongregasyon, paonan-o ipinapakita ni Jesus an mga kalidad han iya Amay?

• Ha ano nga mga paagi maipapakita naton nga nasarig kita ha Dios durante hinin peligroso nga panahon?

[Mga Pakiana]

[Retrato ha pahina 9]

Pariho han ginbuhat ni Jeremias kan Baruk, ipinapakita han mga tigurang yana an pagtagad ni Jehova

[Retrato ha pahina 10]

Paonan-o nabulig hi Jehova ha husto nga panahon?