An Pulong ni Jehova Buhi

Importante nga mga Punto ha mga Surat kan Tito, kan Filemon, Ngan ha mga Hebreohanon

WARAY pag-iha katapos makagawas hi apostol Pablo ha iya siyahan nga kapriso ha Roma han 61 K.P., binisita hiya ha isla han Kreta. Tungod kay naobserbahan niya an kahimtang ha espirituwal han mga kongregasyon didto, ginhangyo niya hi Tito nga magpabilin didto basi parig-unon hira. Katapos hito, posible nga han nakadto hi Pablo ha Masedonia, nagsurat hiya kan Tito basi giyahan hiya ha iya toka ngan hatagan hin awtoridad.

Antes pa hito, han hirani na makagawas ha prisohan hi Pablo han 61 K.P., nagsurat hiya kan Filemon, usa nga Kristiano ha Kolosas. Personal ito nga pakimalooy ha usa nga sangkay.

Han mga 61 K.P., nagsurat liwat hi Pablo ha mga tumuroo nga Hebreohanon ha Judea, nga nagpapakita nga hitaas gud an Kristianidad kay ha Judio nga sistema han relihiyon. Inin tulo nga surat may-ada birilhon nga sagdon para ha aton.—Heb. 4:12.

MAGPABILIN NGA MARIG-ON HA ESPIRITUWAL

(Tito 1:1–3:15)

Katapos ni Pablo maggiya ha ‘pagpili hin mga ansiano ha tagsa-tagsa nga bungto,’ nagsagdon hiya kan Tito nga ‘sawayon hin mabaskog [an mga diri matinumanon], basi hira magmarig-on ha pagtoo.’ Nagsagdon hiya ha ngatanan nga kongregasyon ha Kreta nga ‘magdumiri ha pagkadiri-matinoohon ngan mag-ukoy ha kabuotan.’—Tito 1:5, 10-13; 2:12.

Nagsagdon pa hi Pablo basi mabuligan an kabugtoan ha Kreta nga magpabilin nga marig-on ha espirituwal. Ginsagdonan niya hi Tito nga ‘likyan an mga paglantugi nga waray kahimurulsan ngan pag-away tungod ha Kasugoanan.’—Tito 3:9.

Baton ha mga Pakiana Mahitungod ha Kasuratan:

1:15—Paonan-o mahimo magin ‘putli ha mga putli’ “an ngatanan nga mga butang” kondi mahugaw ha “magraot ngan waray pagtoo”? Basi mahibaroan an baton hito, kinahanglan masabtan naton an karuyag sidngon ni Pablo han “ngatanan nga mga butang.” Gin-uunabi niya, diri an mga butang nga direkta nga ginkukondenar han sinurat nga Pulong han Dios, kondi an mga butang nga mahimo pagdesisyonan han usa nga tumuroo uyon ha iya konsensya. Ha tawo nga an panhunahuna nauyon ha mga prinsipyo han Dios, putli an sugad nga butang. Kondi mahugaw ito ha usa nga baliko an panhunahuna ngan mahugaw an konsensya. a

3:5—Paonan-o an mga dinihogan ‘ginluwas pinaagi ha paghugas’ ngan ‘ginbag-o pinaagi han baraan nga espiritu’? ‘Ginluwas hira pinaagi ha paghugas’ tungod kay ginhugasan, o ginlimpyohan hira han Dios han dugo ni Jesus pinaagi han bili han halad lukat. ‘Ginbag-o hira pinaagi han baraan nga espiritu’ tungod kay nagin ‘bag-o hira nga binuhat’ sugad nga mga anak han Dios pinaagi han espiritu.—2 Kor. 5:17.

Mga Leksyon Para ha Aton:

1:10-13; 2:15. An mga paramangno kinahanglan magin maisugon ha pagtadong han mga sayop ha kongregasyon.

2:3-5. Pariho ha siyahan nga siglo, an hamtong nga kabugtoan nga babaye yana kinahanglan magin “matinalahuron man ha hunahuna, diri maglibak, ngan diri mga uripon ha alaksiw, mga magturutdo hadton mag-opay.” Hito nga paagi, mahimo hira magin epektibo ha pribado nga pagtutdo ha “batan-on nga kababayin-an” ha kongregasyon.

3:8, 14. An aton padayon nga “paghigugma ha mga mag-opay nga buhat . . . maopay ngan may kapulsanan ha mga tawo” tungod kay nabulig ito  ha aton nga magin mabungahon ha pag-alagad ha Dios ngan nagtitipig ha aton nga bulag ha maraot nga kalibotan.

MAGSAGDON “TUNGOD HA GUGMA”

(Filem. 1-25)

Ginkumendasyonan hi Filemon tungod han pagin susbaranan ha ‘gugma ngan pagtoo.’ An iya pagin makaparig-on ha mga igkasi-Kristiano nakahatag kan Pablo hin ‘daku nga kalipay’ ngan pagliaw.—Filem. 4, 5, 7.

Nagpakita hi Pablo hin susbaranan ha ngatanan nga paramangno ha pagdumara han sensitibo nga problema mahitungod kan Onesimo, diri pinaagi ha pagsugo, kondi ha pagsagdon “tungod ha gugma.” Nagsiring hiya kan Filemon: “Daku it akon pagsarig ha imo pagkamatinumanon salit nagsusurat ako ha imo, kay hinbaroan ko nga imo bubuhaton bisan an waray ko igsiring.”—Filem. 8, 9, 21.

Baton ha mga Pakiana Mahitungod ha Kasuratan:

10, 11, 18—Paonan-o an ‘waray pulos’ hadto nga hi Onesimo nagin “may kapulsanan”? Hi Onesimo usa nga uripon nga napipiritan ha pagserbi, nga binaya ha panimalay ni Filemon ha Kolosas ngan kinadto ha Roma. Posible nga nangawat liwat hiya ha iya agaron basi may-ada magasto ha 1,400-kilometro nga biyahe. Waray gud hiya pulos kan Filemon. Kondi ha Roma, ginbuligan hiya ni Pablo nga magin Kristiano. Tungod kay usa nga Kristiano na yana, inin ‘waray pulos’ nga uripon hadto nagin “may kapulsanan” na.

15, 16—Kay ano nga waray maghangyo hi Pablo kan Filemon nga tagan hin kagawasan hi Onesimo? Karuyag ni Pablo nga tumanon gud an sugo ha iya nga ‘pagwali han ginhadian han Dios, ngan pagtutdo han mga bagay mahitungod ha Ginoo Jesu-Kristo.’ Salit, diri niya karuyag maghilabot ha mga problema han tawo, sugad han pagkauripon.—Buh. 28:31.

Mga Leksyon Para ha Aton:

2. Iginpagamit ni Filemon an iya balay para ha Kristiano nga mga katirok. Usa nga pribilehiyo nga ipagamit an aton balay para ha katirok antes han pagsangyaw.—Roma 16:5; Kol. 4:15.

4-7. Sadang naton kumendasyonan an mga igkasi-tumuroo nga susbaranan ha pagtoo ngan gugma.

15, 16. An diri mag-opay nga panhitabo ha kinabuhi diri sadang makapabaraka gud ha aton. Mahimo pa ngani ito magresulta hin maopay, pariho han nahitabo kan Onesimo.

21. Naglaom hi Pablo nga pasasayloon ni Filemon hi Onesimo. Ginlalaoman liwat nga magin mapasayloon kita ha bugto nga bangin nakasala ha aton.—Mat. 6:14.

“MAG-USWAG KITA HA PAGKAHAMTONG”

(Heb. 1:1–13:25)

Basi pamatud-an ni Pablo nga mas importante an pagtoo ha halad ni Jesus kay ha pagtuman han Balaud, pinabug-atan niya an pagkaharangdon ni Jesus sugad nga Pundasyon han Kristianidad, an iya pagkasaserdote, an iya halad, ngan an bag-o nga kauyonan. (Heb. 3:1-3; 7:1-3, 22; 8:6; 9:11-14, 25, 26) Sigurado nga an paghibaro hini nakabulig gud ha Hebreohanon nga mga Kristiano nga maantos an pagtimaraot han mga Judio. Gin-aghat hira ni Pablo nga ‘mag-uswag ha pagkahamtong.’—Heb. 6:1, NW.

Mationan-o kaimportante an pagtoo para ha usa nga Kristiano? “Kon waray pagtoo diri gud mahihimo nga makalipay ha [Dios],” nagsurat hi Pablo. Gindasig niya an mga Hebreohanon: “Dalaganon ta ha mapailubon an rumba nga ibinutang ha aton atubangan,” ginbubuhat ito nga may pagtoo.—Heb. 11:6; 12:1.

Baton ha mga Pakiana Mahitungod ha Kasuratan:

2:14, 15—Tungod kay hi Satanas “may gahum ha kamatayon,” nagpapasabot ba ini nga mahimo niya pahinaboon nga mamatay ha diri-napapanahon an bisan hin-o nga iya karuyag? Diri. Kondi, tikang nga nagbuhat hin maraot hi Satanas ha Eden, an iya mga buwa an nagin hinungdan han kamatayon tungod kay nakasala hi Adan ngan naipasa an sala ngan kamatayon ha iya katulinan. (Roma 5:12) Dugang pa, gintimaraot han mga sakop ni Satanas ha tuna an mga surugoon han Dios tubtob ha kamatayon, pariho han ira ginbuhat kan Jesus. Kondi diri ito nangangahulogan nga waray tubtoban an gahum ni Satanas ha pagpatay han bisan hin-o nga iya karuyag. Kon ito an kahimtang, sigurado nga ginpoo na unta niya  hadto pa an mga magsiringba ni Jehova. Kondi, ginpapanalipdan ni Jehova an iya katawohan sugad nga grupo ngan diri gintutugotan hi Satanas nga poohon hira. Bisan kon gintutugotan han Dios an pipira ha ira nga mamatay tungod han pag-atake ni Satanas, makakasarig kita nga Iya pagwawad-on an anoman nga epekto han pagdaot ha aton.

4:9-11—Paonan-o kita ‘nasulod ha pagpahuway han Dios’? Ha kataposan han unom ka adlaw nga paglarang han Dios, pinahuway hiya, nasarig nga matutuman an iya katuyoan may kalabotan ha tuna ngan katawohan. (Gen. 1:28; 2:2, 3) ‘Nasulod kita hito nga pagpahuway’ pinaagi ha pag-undang ha pagpakamatadong-ha-kalugaringon ngan ha pagkarawat han tagana han Dios para ha aton kaluwasan. Kon natoo kita kan Jehova ngan nasugot ha iya Anak imbes nga magtinguha han kalugaringon nga karuyag, nagpapahimulos kita han nakakaparig-on ngan nakakahatag hin kapahuwayan nga mga bendisyon kada adlaw.—Mat. 11:28-30.

9:16—Hin-o an tawo nga naghimo hin pakigsaad han bag-o nga kauyonan? Hi Jehova an naghimo han bag-o nga kauyonan, kondi hi Jesus an tawo nga naghimo hin pakigsaad. Hi Jesus an Manlalaban hito nga kauyonan, ngan pinaagi han iya kamatayon, iginhatag niya an halad nga kinahanglanon ha pagparig-on hito.—Luk. 22:20; Heb. 9:15.

11:10, 13-16—Ano nga “bungto” an ginhinulat ni Abraham? Diri ini literal nga bungto. Ginhinulat ni Abraham an “langitnon nga Jerusalem,” nga ginkukompwesto ni Kristo Jesus ngan han iya 144,000 nga igkasi-magmarando. Ini nga mga igkasi-magmarando ha ira langitnon nga himaya gintawag liwat nga “baraan nga bungto, an Bag-o nga Jerusalem.” (Heb. 12:22; Pah. 14:1; 21:2) Ginpamulat ni Abraham nga magkinabuhi ha pagmando han Ginhadian han Dios.

12:2—Ano an ‘kalipay nga ibinutang ha atubangan ni Jesus’ nga tungod hito “nag-antos” hiya ha pasakitan nga kahoy? Ito an kalipay nga makita an magigin resulta han iya pag-alagad—upod na an pagbaraan han ngaran ni Jehova, pagbindikar han Iya pagkasoberano, ngan paglukat ha katawohan tikang ha kamatayon. Ginpamulat liwat ni Jesus an balos nga pagmando sugad nga Hadi ngan pag-alagad sugad nga Hitaas nga Saserdote basi magpahimulos an katawohan.

13:20—Kay ano nga an bag-o nga kauyonan gin-unabi sugad nga “waray kataposan”? Tungod ha tulo nga hinungdan: (1) Diri gud ito sasaliwnan, (2) permanente an kapulsanan han mga natutuman hito, ngan (3) padayon nga magpapahimulos an ‘iba nga mga karnero’ ha kahikayan hito katapos han Armagedon.—Juan 10:16.

Mga Leksyon Para ha Aton:

5:14. Sadang kita magin maduruto nga estudyante han Pulong han Dios, an Biblia, ngan mag-aplikar han aton hinbabaroan tikang hito. Waray iba nga paagi basi an aton ‘mga balatian magkababatid ha pagkilala han maopay ngan han maraot.’—1 Kor. 2:10.

6:17-19. Tungod kay an aton paglaom marig-on nga iginbasar ha saad ngan panumpa han Dios, mabulig ito ha aton nga diri sumimang ha paglakat ha dalan han kamatuoran.

12:3, 4. Imbes nga ‘magkabubutlaw ngan manluya an aton kalag’ tungod han pagsari o pagkontra nga bangin maeksperyensyahan naton, pangalimbasogan naton nga mag-uswag ha pagkahamtong ngan magin mas mapailubon ha mga pagsari. Sadang kita magin determinado ha pagpailob “tubtob ha dugo,” karuyag sidngon, tubtob ha kamatayon.—Heb. 10:36-39.

12:13-15. Diri naton sadang tugotan an “gamot ha kapaitan,” o an bisan hin-o ha kongregasyon nga namimiling hin sayop ha paagi han pagbuhat han mga butang, nga magpugong ha aton ha ‘paghimo hin dalan nga magtadong para ha aton mga tiil.’

12:26-28. An “mga butang nga mga hinimo” han kamot ngan diri hinimo han Dios—an bug-os nga presente nga sistema, bisan an maraot nga “langit”—pag-uuy-ugon tubtob nga mabungkag. Kon mahitabo ito, an mahibibilin la amo an “mga waray kauy-og”—an Ginhadian ngan an mga nasuporta hito. Salit, importante gud nga madasigon nga ipasamwak naton an Ginhadian ngan sundon an mga prinsipyo hito!

13:7, 17. An pagsunod pirme ha sagdon nga magin masinugtanon ngan mapinasakupon ha mga paramangno han kongregasyon mabulig ha aton nga magkooperar ha ira.

[Footnote]