Atohi an Yawa Sugad han Ginbuhat ni Jesus
Atohi an Yawa Sugad han Ginbuhat ni Jesus
“[Atohi] niyo an Yawa, ngan mapalagiw hiya ha iyo.”—JAK. 4:7.
1. Maaram hi Jesus nga maatubang hiya hin ano nga pagkontra dinhi ha tuna, ngan ano an magigin resulta?
MAARAM hi Jesu-Kristo nga kukontrahon hiya han Yawa. Masasabtan ini ha ginsiring han Dios ha halas nga ha pagkamatuod para gud ha maraot ngan rebelde nga anghel nga nagyakan pinaagi hito: “Igbubutang ko in away ha butnga nimo ngan han babaye [an langitnon nga bahin han organisasyon ni Jehova], ngan ha butnga han imo katulinan ngan han iya katulinan; ngan ini [hi Jesu-Kristo] magtutultog han imo ulo, ngan hi ikaw magtutultog han iya tikod.” (Gen. 3:14, 15; Pah. 12:9) An pagtultog ha tikod ni Jesus nangangahulogan nga mag-aantos hiya hin temporaryo nga kamatay dinhi ha tuna, tungod kay babanhawon hiya ni Jehova ngadto ha langitnon nga himaya. Kondi an pagtultog ha ulo han halas mangangahulogan nga an Yawa mamamatay ngan diri na gud mabubuhi utro.—Basaha an Buhat 2:31, 32; Hebreo 2:14.
2. Kay ano nga nasarig hi Jehova nga malampuson nga madadaog ni Jesus an Yawa?
2 Nasarig hi Jehova nga malampuson nga tutumanon ni Jesus an iya toka ngan aatohan an Yawa samtang aanhi ha tuna. Kay ano nga nakakasiguro gud hi Jehova hini? Tungod kay maiha na nga ginlarang niya hi Jesus ha langit, iya naobserbahan hiya, ngan maaram Hiya nga masinugtanon ngan matinumanon inin “labaw nga magburuhat” ngan suhag han “ngatanan nga mga binuhat.” (Prob. 8:22-31; Kol. 1:15) Salit han ginpakanhi hi Jesus ha tuna ngan gintugotan an Yawa nga sarihan hiya tubtob ha kamatay, nasarig an Dios nga magdadaog an Iya bugtong nga Anak.—Juan 3:16.
Ginpapanalipdan ni Jehova an Iya mga Surugoon
3. Ano an pagtratar han Yawa ha mga surugoon ni Jehova?
3 Gintawag ni Jesus an Yawa sugad nga ‘punoan hini nga kalibotan’ ngan ginpahamangnoan an Iya mga disipulo nga pagtitimarauton hira, sugad han ginbuhat ha iya. (Juan 12:31; 15:20) An kalibotan, nga ginmamandoan ni Satanas nga Yawa, nangangalas ha tinuod nga mga Kristiano tungod kay nag-aalagad hira kan Jehova ngan nagsasangyaw han katadongan. (Mat. 24:9; 1 Juan 5:19) Ginpupuntirya han Yawa labi na an mga dinihogan nga nanhibilin nga magmamando kaupod ni Kristo ha Ginhadian ha langit pag-abot han panahon. Puntirya liwat niya an damu nga Saksi ni Jehova nga may paglaom nga mabuhi ha waray kataposan ha paraiso nga tuna. Salit, an Pulong han Dios nagpapahamangno ha aton: “An iyo kaaway nga amo an Yawa, sugad hin maaringasa nga leon, naglilinakat-lakat, pagpinamiling hin iya lalamyon.”—1 Ped. 5:8.
4. Ano an nagpapamatuod nga malampuson nga inaatohan han katawohan han Dios an Yawa ha aton panahon?
4 Sugad nga organisasyon nga sinusuportahan ni Jehova nga Dios, malampuson nga inaatohan naton an Yawa. Tagda ini nga mga kamatuoran: Ha naglabay nga 100 ka tuig, an iba han pinakamabangis nga diktadorya ha kasaysayan nangalimbasog ha pagpoo han mga Saksi ni Jehova. Bisan pa hito, padayon nga nagtikadamu hira ngan haros 7,000,000 na hira yana ha sobra 100,000 nga kongregasyon ha bug-os nga kalibotan. Kondi an madarahog nga mga diktadorya nga nagtimaraot ha katawohan ni Jehova, amo lugod an napoo!
5. Paonan-o napamatud-an han mga surugoon ni Jehova nga masasarigan gud an saad ha Isaias 54:17?
5 Ha pakiistorya han Dios ha kongregasyon han kadaan nga Israel sugad nga iya simboliko nga babaye, hiya nagsaad: “Waray hinganiban nga ginhitsura patok ha imo nga mauswag; ngan an tagsa-tagsa nga dila nga mabangon patok ha imo ha paghukom imo pagsasayupon. Amo ini an panurundon han mga surugoon ni Jehova, ngan an ira pagkamatadong nga tikang ha akon.” (Isa. 54:11, 17) Napamatud-an han katawohan ni Jehova ha bug-os nga tuna nga masasarigan gud ito nga saad durante hinin “kataposan nga mga adlaw.” (2 Tim. 3:1-5, 13) Padayon nga inaatohan naton an Yawa, ngan waray naglalampos nga hinganiban nga ginagamit niya ha pagpoo ha katawohan han Dios, tungod kay hi Jehova nadapig ha aton.—Sal. 118:6, 7.
6. Ano an iginsusumat ha aton han tagna ni Daniel mahitungod han mahitatabo ha pagmando han Yawa?
6 Ha madagmit nga nagtitiarabot nga kataposan hinin bug-os nga maraot nga sistema, mabubungkag an ngatanan nga bahin han pagmando ni Satanas. Pinaagi han giya han Dios, hi propeta Daniel nagtagna: “Ha mga adlaw hito nga kahadian [nga nagmamando ha aton panahon] an Dios ha langit magpapabangon hin usa nga ginhadian [ha langit], nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian [nga nagmamando yana], ngan ini matindog ha kadayonan.” (Dan. 2:44) Kon mahitabo na ito, mawawara an pagmando ni Satanas ngan han diri-hingpit nga mga tawo. Mawawara na ha kadayonan an ngatanan nga bahin han sistema han Yawa, ngan an Ginhadian han Dios magmamando ha bug-os nga tuna nga waray na makontra.—Basaha an 2 Pedro 3:7, 13.
7. Kay ano nga maaram kita nga malampuson nga makakaato ha Yawa an tagsa nga surugoon ni Jehova?
7 Waray ruhaduha nga magpapabilin ngan mag-uuswag ha espirituwal an organisasyon ni Jehova. (Basaha an Salmo 125:1, 2.) Kumusta man kita? An Biblia nagsusumat ha aton nga makakalampos kita ha pag-ato ha Yawa, sugad han ginbuhat ni Jesus. Ha pagkamatuod, iginsaysay ha tagna ni Kristo pinaagi kan apostol Juan nga bisan pa han pagkontra ni Satanas, maluluwas ha kataposan hini nga sistema an daku nga panon nga may-ada tunan-on nga paglaom. Sumala ha Kasuratan, hira nasinggit: “An kaluwasan iya han aton Dios nga nalingkod ha hadianon nga lingkuranan, ngan han Kordero [hi Jesu-Kristo].” (Pah. 7:9-14) An mga dinihogan gin-uunabi sugad nga nagdadaog kontra kan Satanas, ngan an ira mga kaupod, an ‘iba nga mga karnero,’ malampuson liwat nga naato ha iya. (Juan 10:16; Pah. 12:10, 11) Kondi nagkikinahanglan ini hin maduruto nga pangalimbasog ngan sinsero nga pag-ampo basi ‘maluwas ha usa nga maraot.’—Mat. 6:13.
An Hingpit nga Susbaranan ha Pag-ato ha Yawa
8. Ano an siyahan nga pagsulay han Yawa kan Jesus ha kamingawan, ngan ano an ginbuhat ni Jesus?
8 An Yawa nangalimbasog ha pagbungkag han integridad ni Jesus. Ha kamingawan, ginsulay niya hi Jesus basi magtalapas kan Jehova. Kondi, nagpakita hi Jesus hin hingpit nga susbaranan ha pag-ato kan Satanas. Katapos han 40 ka adlaw ngan 40 ka gab-i nga pagpuasa, sigurado nga karuyag na gud ni Jesus nga kumaon. “Kon ikaw Anak han Dios, sugoa ini nga mga bato, nga mahimo nga tinapay,” siring ni Satanas. Kondi waray gamita ni Jesus para ha iya kalugaringon nga kaopayan an gahum nga hatag ha iya han Dios. Nagsiring lugod hiya: “Nahisurat na: Diri la an tinapay an nakakabuhi han tawo, kondi an ngatanan nga pulong, nga nagowa ha baba han Dios.”—Mat. 4:1-4; Deut. 8:3.
9. Kay ano nga kinahanglan atohan naton an pagsalingabot han Yawa ha aton pisikal nga hingyap?
9 Yana, ginsasalingabot han Yawa an pisikal nga hingyap han mga surugoon ni Jehova. Salit kinahanglan magin determinado kita ha pag-ato han pagsulay nga magbuhat han sayop nga pakighilawas, nga kalyap gud hinin imoral nga kalibotan. An Pulong han Dios marig-on nga nasiring: “Waray ba niyo hibaroi nga an diri mga matadong diri makakapanunod ha ginhadian han Dios? Diri kamo kalimbongan; bisan an mga makihihilawason, masingbahon ha mga dios-dios, bisan an mga manlilibog, bisan an mga babayin-on, bisan an mga Sodomanhon . . . diri makakapanunod ha ginhadian han Dios.” (1 Kor. 6:9, 10) Matin-aw kon sugad nga an mga tawo nga nagbubuhat hin imoral ngan diri nagbabag-o, diri tutugotan nga magkinabuhi ha bag-o nga kalibotan han Dios.
10. Sumala ha Mateo 4:5, 6, ano an usa pa nga pagsulay ni Satanas basi mabungkag an integridad ni Jesus?
10 May kalabotan ha usa han mga pagsulay kan Jesus ha kamingawan, an Kasuratan nasiring: “Gindara hiya han Yawa ngadto ha baraan nga bungto, ngan ibinutang hiya ha bubong han templo. Ngan siniring ha iya: Kon ikaw anak han Dios, pakahulog ngadto ha ubos, kay nahisurat na: Magsusugo hiya han iya mga anghel ha nahitutungod ha imo, ngan pagkukuguson ka ha ira mga kamot basi diri . . . mahipakdol an imo tiil ha bato.” (Mat. 4:5, 6) Iginpasabot ni Satanas nga magriresulta ini ha urusahon nga pagpakita han pagin Mesias ni Jesus. Kondi ha pagkamatuod, sayop ngan mapahitas-on unta adto nga buhat nga diri uuyonan ngan susuportahan han Dios. Makausa pa, gintipigan ni Jesus an iya integridad kan Jehova ngan binaton hiya pinaagi ha pagkotar hin teksto. Hiya siniring: “Nahisurat liwat: Diri mo pagsulayon an Ginoo, nga imo Dios.”—Mat. 4:7; Deut. 6:16.
11. Paonan-o kita ginsusulay ni Satanas, ngan ano an mahimo magin resulta?
11 Bangin sulayon kita ni Satanas nga maghingyap hin kabantogan ha magkalain-lain nga paagi. Mahimo nga impluwensyahan kita niya nga magsubad ha kalibotanon nga mga uso ha pamado ngan pag-ayos o makigbahin ha kwestyonable nga kaliawan. Kondi kon igbalewaray naton an sagdon han Biblia ngan magsubad han kalibotanon nga buhat, malalaoman ba naton nga pananalipdan kita han mga anghel tikang ha maraot nga mga epekto hito? Bisan kon nagbasol hi Hadi David han iya mga sala may kalabotan kan Batseba, waray hiya makalikay ha magraot nga resulta han iya ginbuhat. (2 Sam. 12:9-12) Diri naton sarihan hi Jehova ha sayop nga paagi, sugad han pakigsangkay ha kalibotan.—Basaha an Jakobo 4:4; 1 Juan 2:15-17.
12. Ano nga pagsulay an gin-unabi ha Mateo 4:8, 9, ngan ano an ginbuhat han Anak han Dios?
12 An usa pa nga pagsulay nga ginamit ni Satanas ha kamingawan amo an pagtanyag kan Jesus han gahum ha politika. Iginpakita niya kan Jesus an ngatanan nga ginhadian ha kalibotan ngan an himaya hito ngan nagsiring: “Ngatanan ini nga mga butang akon ihahatag ha imo, kon ikaw lumuhod ngan yumukbo ngan magsingba ha akon.” (Mat. 4:8, 9) Malimbong gud ito nga paagi han pag-agaw ha pagsingba nga para la kan Jehova ngan pag-aghat kan Jesus nga magtalapas ha Dios! Tungod han paghiningyap nga singbahon hiya, iton maunungon hadto nga anghel nakasala tungod han iya kaawa, ngan nagin maraot hinduro nga manunulay nga hi Satanas nga Yawa. (Jak. 1:14, 15) Kondi ha kabaliktaran, determinado hi Jesus nga magpabilin nga matinumanon ha iya langitnon nga Amay, salit hiya nagsiring: “Iwas ka dinhi, Satanas, kay nahisurat na: Magsingba ka ha imo Ginoo nga Dios, ngan ha iya la ikaw mag-aalagad.” Ha sugad katin-aw ngan karig-on nga pagkayakan, inatohan na liwat ni Jesus an Yawa. Waray gud maruyag an Anak han Dios nga magin bahin han kalibotan ni Satanas ngan diri gud niya sisingbahon ito nga maraot!—Mat. 4:10; Deut. 6:13; 10:20.
‘Atohi an Yawa, Ngan Mapalagiw Hiya ha Iyo’
13, 14. (a) Pinaagi ha pagpakita kan Jesus han ngatanan nga ginhadian ha kalibotan, ano an igintanyag han Yawa ha iya? (b) Paonan-o nangangalimbasog hi Satanas ha pagdaot ha aton?
13 Pinaagi ha pagpakita kan Jesus han ngatanan nga ginhadian ha kalibotan, igintanyag han Yawa ha iya an awtoridad nga waray pa makarawat han bisan hin-o nga tawo. Naglaom hi Satanas nga madadani hi Jesus han iya nakita ngan makukombinse hiya nga magin pinakagamhanan nga lider ha politika ha bug-os nga tuna. Yana, an Yawa diri nagtatanyag ha aton hin mga ginhadian, kondi nangangalimbasog gud hiya ha pagdaot han aton kasingkasing pinaagi han aton mga mata, talinga, ngan hunahuna.
14 Kontrolado han Yawa ini nga kalibotan. Tungod hito, kontrolado niya an media. Salit, diri urusahon nga an mga kiritaon, nababatian, ngan barasahon ha kalibotan puno hin imoralidad ngan kamadarahog. Ini nga ginagamit han kalibotan ha pag-anunsyo nag-aaghat ha aton nga pumalit hin damu nga butang nga diri naton kinahanglanon. Hito nga paagi, padayon nga ginsusulay kita han Yawa pinaagi han materyal nga mga butang nga makakadani ha aton pagkita, pamati, ngan panhunahuna. Kondi kon diri kita magkita, mamati, ngan magbasa han mga impormasyon nga supak ha mga prinsipyo han Biblia, sugad hin nasiring kita: “Iwas ka dinhi, Satanas!” Ha sugad nga paagi ginsusubad naton hi Jesus ha pagin marig-on ngan determinado ha pagsalikway han mahugaw nga kalibotan ni Satanas. Nakikita liwat an kamatuoran nga diri kita bahin han kalibotan ni Satanas pinaagi han maisugon nga pagpakilala naton sugad nga mga Saksi ni Jehova ngan sumurunod ni Kristo ha trabaho, eskwelahan, mga amyaw ngan paryente.—Basaha an Markos 8:38.
15. Kay ano nga an pag-ato kan Satanas nangangahulogan hin padayon nga pag-ikmat?
15 Katapos han ikatulo nga pakyas nga pagsari han Yawa ha pagsulay kan Jesus basi ikompromiso an Iya integridad ha Dios, “binayaan hiya han Yawa.” (Mat. 4:11) Kondi, waray plano hi Satanas nga umundang ha pagsulay kan Jesus, tungod kay ginsusumatan kita nga “katima na han ngatanan nga pagsulay [ha kamingawan], an manunulay binulag tikang ha iya tubtob ha pira ka panahon” nga kombinyente ha iya. (Luk. 4:13) Kon naglalampos kita ha pag-ato ha Yawa, sadang pasalamatan naton hi Jehova. Kondi mangaro liwat kita han padayon nga bulig han Dios, tungod kay an Yawa mabalik ha pagsulay ha aton ha iba nga panahon nga kombinyente ha iya—diri pirme ha panahon nga ginlalaoman naton. Salit, kinahanglan mag-ikmat kita pirme, disidido nga magpadayon ha sagrado nga pag-alagad kan Jehova anoman nga mga pagsari an aton atubangon.
16. Ano nga gamhanan nga pwersa an iginhahatag ha aton ni Jehova, ngan kay ano nga sadang pangaroon naton ito ha pag-ampo?
16 Basi mabuligan kita ha aton pangalimbasog nga atohan an Yawa, sadang mag-ampo kita para han bulig han pinakagamhanan nga pwersa ha uniberso, an baraan nga espiritu han Dios, ngan sumarig nga makakarawat naton ito. Mabulig ito ha aton nga mabuhat an imposible naton mahimo ha kalugaringon nga kusog. Ginpasarig ni Jesus an iya mga sumurunod nga mahimo gud makarawat an espiritu han Dios. Hiya nagsiring: “Kon kamo nga [diri-hingpit ngan tungod hito masisiring nga] mga magraot, mahibabaro kamo paghatag hin mag-opay nga mga hatag ha iyo mga kabataan labi pa gud an iyo Amay nga langitnon, nga mahatag han [baraan nga] espiritu . . . ha mga nangangaro ha iya”! (Luk. 11:13) Salit, padayon nga mag-ampo kita kan Jehova para han bulig han iya baraan nga espiritu. Malampuson nga magdadaog kita ha aton determinasyon nga atohan an Yawa pinaagi han bulig hinin pinakagamhanan nga pwersa. Gawas pa han regular ngan sinsero nga pag-ampo, kinahanglan isul-ot naton an kompleto nga espirituwal nga hinganiban tikang ha Dios basi marig-on nga ‘maatubang naton an mga limbong han Yawa.’—Efe. 6:11-18.
17. Ano nga kalipay an nakabulig kan Jesus ha pag-ato ha Yawa?
17 May-ada usa pa nga nakabulig kan Jesus ha pag-ato ha Yawa, ngan makakabulig liwat ito ha aton. An Biblia nasiring: ‘Tungod han kalipay nga ibinutang ha atubangan ni Jesus, nag-antos hiya han [pasakitan nga kahoy], nagtamay han kaalo, ngan naglingkod ha too han lingkuranan han Dios.’ (Heb. 12:2) Magkakaada liwat kita pariho hito nga kalipay pinaagi han pagsuporta ha pagkasoberano ni Jehova, pagpasidungog han iya baraan nga ngaran, ngan paghunahuna pirme han balos nga kinabuhi nga waray kataposan. Magmamalipayon gud kita kon wad-on na ha kadayonan hi Satanas ngan an ngatanan nga buhat niya, ngan kon ‘an mga maaghop makapanunod na han tuna ngan magkalipay tungod han kahuraan han kamurayaw’! (Sal. 37:11) Salit, padayon nga atohi an Yawa, sugad han ginbuhat ni Jesus.—Basaha an Jakobo 4:7, 8.
Ano an Imo Baton?
• Ano an pamatuod nga ginpapanalipdan ni Jehova an iya katawohan?
• Paonan-o nagpakita hi Jesus hin susbaranan ha pag-ato kan Satanas?
• Ha ano nga mga paagi maaatohan mo an Yawa?
[Mga Pakiana]
[Retrato ha pahina 29]
Kon makigsangkay kita ha kalibotan, magigin kaaway kita han Dios
[Retrato ha pahina 31]
Iginsalikway ni Jesus an ngatanan nga ginhadian ha kalibotan nga igintanyag ni Satanas