Buligi Hira nga Bumalik Dayon!
Buligi Hira nga Bumalik Dayon!
“Hin-o an amon kakadtoan pa? Ikaw an may mga pulong han kinabuhi nga waray kataposan.”—JUAN 6:68.
1. Ano an ginsiring ni Pedro han damu nga disipulo an binulag kan Jesus?
BINULAG hadto kan Jesu-Kristo an damu nga disipulo nga waray umuyon ha usa han iya katutdoan. Katapos, nagpakiana hiya ha iya mga apostol: ‘Karuyag ba liwat niyo bumulag ha akon?’ Hi Pedro binaton: “Ginoo, hin-o an amon kakadtoan pa? Ikaw an may mga pulong han kinabuhi nga waray kataposan.” (Juan 6:51-69) Waray na iba nga kakadtoan. An Judaismo hito nga panahon waray han “mga pulong han kinabuhi nga waray kataposan,” ngan sigurado nga diri gud liwat ito hiaagian yana ha Babilonya nga Daku, an imperyo han palso nga relihiyon. Para ha bisan hin-o nga nawara ha panon han Dios kondi naruruyag nga lipayon hi Jehova, ‘ini na an oras ha pagmata’ ngan pagbalik ha toril.—Roma 13:11.
2. Ano an sadang hinumdoman mahitungod han kompidensyal o hudisyal nga mga butang?
2 Ipinakita ni Jehova an pagtagad ha nagkawawara nga karnero han Israel. (Basaha an Esekiel 34:15, 16.) Sugad man, hingyap ngan obligasyon han mga tigurang nga buligan an sugad-karnero nga nawara ha panon. Kon ira igintoka an usa nga magwarali nga buligan ha pag-aram an diri-aktibo, ano an sadang buhaton kon hibaroan niya nga nakasala hin seryoso ito nga tawo? Imbes nga magsagdon mahitungod han anoman nga hudisyal o kompidensyal nga butang, sadang sumatan niya an diri-aktibo nga makiistorya ha mga tigurang. Kon diri ito buhaton han diri-aktibo, an magwarali an sadang magsumat ha ira.—Leb. 5:1; Gal. 6:1.
3. Ano an inabat han tawo nga may-ada 100 nga karnero han hin-agian niya an usa nga nawara?
3 Ha nauna nga artikulo, gin-unabi an ilustrasyon ni Jesus mahitungod han tawo nga may-ada 100 nga karnero. Han nawara an usa ha toril, binayaan niya an 99 ngan ginbiling an usa nga nawara. Nalipay gud hiya han hin-agian niya ito! (Luk. 15:4-7) Nalilipay liwat kita kon nabalik an usa han mga karnero han Dios nga nawara ha panon. Tungod kay napagios han gugma, an mga tigurang ngan iba nga membro han kongregasyon bangin binisita na ha usa nga diri-aktibo. Karuyag liwat nira nga makita hiya nga nabalik ha kongregasyon ngan nagpapahimulos han bulig, panalipod, ngan bendisyon han Dios. (Deut. 33:27; Sal. 91:14; Prob. 10:22) Kon may-ada hira higayon nga makabulig ha diri-aktibo, ano an ira bubuhaton?
4. Ano an masasabtan ha Galasia 6:2, 5?
4 Mahimo nira dasigon an diri-aktibo nga bumalik ha kongregasyon pinaagi han mapinairon nga pagpakita ha iya nga hi Jehova nahigugma ha Iya mga karnero ngan nagkikinahanglan la han aton mahihimo. Nag-uupod ini han pag-aram ha Kasuratan, pagtambong ha mga katirok, ngan pagsangyaw han maopay nga sumat han Ginhadian. Bangin angay basahon an Galasia 6:2, 5 ngan unabihon nga makakabulig an mga Kristiano ha pagdara han pinas-an han usa kag usa, kondi “an tagsa-tagsa magdadara han iya kalugaringon nga darad-on” o espirituwal nga responsabilidad. Waray iba nga puydi magin matinumanon ha Dios para ha aton.
Nanluya ba Hira Tungod han “Mga Pangarit Hini nga Kinabuhi”?
5, 6. (a) Kay ano nga importante nga mamati kita hin maopay ha iginpapahayag han diri-aktibo nga igkasi-tumuroo? (b) Paonan-o mo mabubuligan an mga diri-aktibo nga masabtan nga peligroso an diri pagtambong ha mga katirok han kongregasyon?
5 Basi mahibaro kon paonan-o mabubuligan an diri-aktibo nga mga igkasi-tumuroo, kinahanglan mamati hin maopay an mga tigurang ngan iba nga hamtong nga magwarali samtang nagpapahayag hira han ira kinasingkasing nga mga pagbati. Pananglitan usa ka nga tigurang nga nabisita ha mag-asawa nga diri na natambong ha mga katirok ha kongregasyon tungod han “mga pangarit hini nga kinabuhi.” (Luk. 21:34) An mga problema ha pinansyal o dugang nga mga responsabilidad ha pamilya bangin hinay-hinay nga nakapaundang ha ira ha espirituwal nga buruhaton. Bangin sumiring hira nga kinahanglan makatalwas hira ha ira mga responsabilidad, kondi puydi mo ipatin-aw nga an pagpahirayo diri amo an solusyon. (Basaha an Proberbios 18:1.) Mataktika nga pakianhi hira: “Mas malipayon ba kamo tikang nga inundang kamo ha pagtambong ha mga katirok? Mas maopay ba an kahimtang han iyo pamilya yana? Inaabat pa ba niyo an kalipay tungod ha pagsarig kan Jehova?”—Neh. 8:10.
6 An pamalandong ha sugad nga mga pakiana mahimo makabulig ha diri-aktibo nga makasabot nga tungod han ira pag-undang ha pakig-upod ha kongregasyon, nanluya an ira espirituwalidad ngan nawara an ira kalipay. (Mat. 5:3; Heb. 10:24, 25) Bangin mabuligan hira nga makasantop nga nawara an ira kalipay tungod kay diri na hira nagsasangyaw han maopay nga sumat. (Mat. 28:19, 20) Salit, ano an maaramon nga sadang buhaton han diri-aktibo?
7. Sadang dasigon naton an mga nawara ha panon nga buhaton an ano?
7 Hi Jesus nagsiring: “Pagmatngon kamo ha iyo kalugaringon, bangin an iyo mga kasingkasing mabug-atan han kahakog, ngan kaparahubog, ngan mga pangarit hini nga kinabuhi . . . Busa pag-agmahi niyo ha ngatanan nga panahon, ngan mag-ampo basi kamo makapalagiw ha ngatanan hini nga mga bagay nga maabot.” (Luk. 21:34-36) Adton nawara ha panon kondi naruruyag magpahimulos han ira kalipay hadto mahimo dasigon nga mag-ampo para han baraan nga espiritu ngan han bulig han Dios ngan gumios uyon hito.—Luk. 11:13.
Nahipakdol ba Hira?
8, 9. Paonan-o mangangatadongan an tigurang ha usa nga nahipakdol?
8 Tungod kay an mga tawo diri-hingpit, nagkakaada hin diri-pagsinabtanay, ngan bangin makapakdol ito ha usa. An iba nahipapakdol kon an talahuron nga bugto ha kongregasyon nagtalapas han mga prinsipyo han Biblia. Kon an diri-aktibo naapektohan hito, mahimo ipatin-aw han nabisita nga tigurang nga diri ginpapahinabo ni Jehova nga mahipakdol an bisan hin-o. Salit, kay ano nga uutdon han usa an iya relasyon ha Dios ngan ha Iya katawohan? Lugod, diri ba sadang magpadayon hiya ha pag-alagad ha Dios, nasarig nga “an Maghuhukom han bug-os nga tuna” maaram han nahitabo ngan magtatadong han mga butang? (Gen. 18:25; Kol. 3:23-25) Kon an tawo literal nga nahipakdol ngan natumba, diri hiya magpapabilin na la hito nga kahimtang kondi mangangalimbasog hiya ha pagbuhát.
9 Ha pangalimbasog nga makabulig ha ira ha espirituwal, mahimo unabihon han tigurang nga ha paglabay han panahon, baga hin diri na gud importante ha iba an nakapakdol ha ira. Ha pagkamatuod, an sitwasyon nga nakapakdol ha ira bangin diri na mahinumdoman. Kon an diri-aktibo nahipakdol tungod kay gindisiplina hiya, an pag-ampo ngan pamalandong mahimo makabulig ha iya nga masantop nga nagsayop hiya ngan diri sadang tugotan an disiplina nga makapakdol ha iya.—Sal. 119:165; Heb. 12:5-13.
Katutdoan ha Biblia ba an Hinungdan?
10, 11. Ano nga pangatadongan an epektibo ha pagbulig ha usa nga naiiba an pagsabot ha pipira nga katutdoan han Biblia?
10 An iba bangin binulag ha panon han Dios tungod kay waray hira umuyon ha pipira nga katutdoan ha Kasuratan. An mga Israelita nga natalwas ha pagkauripon ha Ehipto ‘nahingalimot dayon han mga ginbuhat han Dios’ para ha ira ngan “waray paghulat han iya sagdon.” (Sal. 106:13) Bangin makabulig an pagpahinumdom ha diri-aktibo nga “an matinumanon ngan maaramon nga uripon” naghahatag hin maopay gud nga espirituwal nga pagkaon. (Mat. 24:45, NW) Pinaagi hito siyahan nga hinbaroan niya an kamatuoran. Salit kay ano nga diri hiya magin determinado ha paglakat utro uyon ha kamatuoran?—2 Juan 4.
11 Kon nangangalimbasog ha pagbulig ha nagkawawara nga karnero ha panon han Dios, mahimo unabihon han tigurang an mga disipulo nga binulag kan Jesus tungod kay waray hira umuyon ha usa han iya katutdoan. (Juan 6:53, 66) Tungod han ira pagbulag kan Kristo ngan ha iya matinumanon nga mga sumurunod, nawara an ira espirituwalidad ngan kalipay. An mga inundang ba ha pakig-upod ha kongregasyon nakabiling hin iba nga lugar nga may-ada hura nga espirituwal nga pagkaon? Waray, tungod kay waray na iba!
Tungod ba han Seryoso nga Sala?
12, 13. Kon kinakarawat han usa nga nawara ha panon nga nakasala hiya hin seryoso, paonan-o hiya mabubuligan?
12 An iba inundang ha pagsangyaw ngan pagtambong ha mga katirok tungod kay nakasala hira hin seryoso. Bangin naghunahuna hira nga kon isumat nira ha mga tigurang an ira sala, paiiwason hira ha kongregasyon. Kondi diri hira paiiwason ha kongregasyon kon inundang na hira ha supak ha Kasuratan nga buhat ngan tinuod nga nagbabasol. (2 Kor. 7:10, 11) Lugod, malipayon nga kakarawaton hira ha pagbalik, ngan bubuligan hira han mga tigurang ha espirituwal.
13 Kon hamtong ka nga magwarali nga gintokahan ha pagbulig ha diri-aktibo, ano an sadang mo buhaton kon magsumat hiya ha imo nga nakasala hiya hin seryoso? Sugad han iginsaysay na, imbes nga maghilabot ha sitwasyon, dasiga hiya nga makiistorya ha mga tigurang. Kon diri hiya maruyag, ipapakita mo nga gintatagad mo an ngaran ni Jehova ngan an espirituwal nga kaopayan han kongregasyon kon bubuhaton mo an uyon ha giya han Dios para ha sugad nga kahimtang. (Basaha an Lebitiko 5:1.) An mga tigurang makakabulig ha bisan hin-o nga naruruyag bumalik ngan sumunod ha kaburut-on han Dios. Bangin kinahanglan an mahigugmaon nga disiplina. (Heb. 12:7-11) Kon kinakarawat han tawo nga nakasala hiya ha Dios, inundang na ha sayop nga buhat, ngan tinuod nga nagbabasol, bubuligan hiya han mga tigurang, ngan makakarawat niya an pagpasaylo ni Jehova.—Isa. 1:18; 55:7; Jak. 5:13-16.
Makalilipay an Pagbalik han Usa nga Anak
14. Ha imo kalugaringon nga mga pulong, isaysay an ilustrasyon ni Jesus mahitungod han anak nga makaragon.
14 Kon nangangalimbasog an gintokahan nga buligan an karnero nga nawara, mahimo niya gamiton an ilustrasyon ni Jesus ha Lukas 15:11-24. Hito nga parabola, usa nga batan-on nga olitawo an nagkarag han iya panurundon ha imoral nga pagkinabuhi. Inabot an panahon nga nangalas hiya ha iya maraot nga ginbubuhat. Nagugutom na hiya, namimingaw, ngan nagdesisyon—mauli na hiya! Han hirayo pa hiya, hinkit-an na hiya han iya amay salit dinalagan ha pagtapo ha iya, hinangkop ngan ginhadkan hiya, ngan nalipay gud. An pamalandong hini nga ilustrasyon mahimo magpagios ha usa nga nawara nga bumalik ha kongregasyon. Tungod kay hirani na bungkagon ini nga sistema, kinahanglan ‘umuli’ na hiya dayon.
15. Kay ano nga an iba igin-aanod pahirayo ha kongregasyon?
15 An kadam-an nga nabulag ha kongregasyon diri gud pariho ha anak nga makaragon. An pipira hinay-hinay nga nagpahirayo sugad han igin-aanod nga baluto nga hinay-hinay nga nagtitikahirayo ha baybayon. Samtang an iba nabubug-atan hinduro han mga pangarit salit napapabay-an an ira espirituwalidad. Tinutugotan han iba pa nga mahipakdol ha usa nga membro han kongregasyon, o nabaya hira tungod kay diri hira nauyon ha pipira nga katutdoan ha Kasuratan. An pipira nagbuhat hin seryoso nga sala. Kondi, an mga punto nga iginsaysay may kalabotan ha tagsa hini nga sitwasyon bangin makabulig ha imo ha pagdasig ha mga binaya ha kongregasyon tungod han magkalain-lain nga hinungdan, nga bumalik samtang may-ada pa panahon.
“Nalilipay Ako nga Inuli Ka Na, Anak!”
16-18. (a) Paonan-o ginbuligan han usa nga tigurang an bugto nga nagin diri-aktibo ha damu ka tuig? (b) Kay ano nga ini nga bugto nagin diri-aktibo, paonan-o hiya nabuligan, ngan paonan-o hiya ginkarawat han kongregasyon?
16 Usa nga tigurang an nasiring: “An ngatanan nga tigurang ha amon kongregasyon interesado gud ha pagbisita ha mga diri-aktibo. Nahinumdoman ko an usa nga bugto nga lalaki nga akon gindumarahan hin pag-aram ngan nabuligan nga mahibaro han kamatuoran. Mga 25 anyos na nga diri-aktibo hiya ngan makuri gud an iya sitwasyon, salit iginsaysay ko kon paonan-o makakabulig ha iya an pag-aplikar han mga prinsipyo han Biblia. Paglabay hin pipira ka panahon, tinambong na hiya ha Kingdom Hall ngan ginkarawat niya an pag-aram ha Biblia basi makabulig ha pagparig-on han iya determinasyon nga bumalik ha panon.”
17 Kay ano nga an bugto nagin diri-aktibo? Hiya nagsiring: “Mas gintagan ko hin panahon an kalibotanon nga mga butang kay ha espirituwal. Katapos, inundang ako ha pag-aram, pagsangyaw, ngan pagtambong ha mga katirok. An sunod nga nahitabo, diri na ako bahin han kongregasyon. Kondi nabuligan ako nga makabalik pinaagi han personal ngan sinsero nga pagtagad han tigurang.” An mga problema hini nga bugto hinay-hinay nga nasulbad han ginkarawat niya an pag-aram ha Biblia. Siring niya nga, “Nasantop ko nga an kulang ha akon kinabuhi amo an gugma ngan giya ni Jehova ngan han iya organisasyon.”
18 Paonan-o ginkarawat ini nga bugto ha kongregasyon? Siring niya: “Inabat ko nga sugad ako han anak nga makaragon ha parabola ni Jesu-Kristo. Ha pagkamatuod, usa han amon edaran nga bugto nga babaye nga 30 anyos na nga matinumanon nga nag-aalagad kan Jehova an nagsiring ha akon: ‘Nalilipay ako nga inuli ka na, Anak!’ Nabantad gud hito an akon kasingkasing. Tinuod nga nakauli na ako. Ngan karuyag ko igpahayag an akon sinsero nga apresasyon ha gugma, pagkabuotan, pagpailob, ngan pagtagad nga ipinakita ha akon hito nga tigurang ngan han bug-os nga kongregasyon. An ira gugma kan Jehova ngan ha igkasi-tawo nakabulig gud ha akon nga makabalik ha panon.”
Aghata Hira nga Gumios Na Yana!
19, 20. Paonan-o mo madadasig an mga diri-aktibo nga bumalik dayon ha panon, ngan paonan-o mo maipapatin-aw ha ira nga an Dios diri naglalaom ha aton han diri naton mahihimo?
19 Nagkikinabuhi na kita ha kataposan nga mga adlaw, ngan hirani na an kataposan hini nga sistema. Salit, aghata an mga diri-aktibo nga tumambong na ha mga katirok. Dasiga hira nga tumambong dayon. Pahinumdoma hira nga nangangalimbasog hi Satanas ha pagbungkag han ira relasyon ha Dios ngan ha pag-aghat ha ira nga maghunahuna nga matatalwas hira ha ira problema kon bumaya hira ha tinuod nga pagsingba. Pasariga hira nga pinaagi la han pagin matinumanon nga mga sumurunod ni Jesus mapapahimulosan nira an tinuod nga katalwasan.—Basaha an Mateo 11:28-30.
20 Pahinumdoma an diri-aktibo nga naglalaom hi Jehova nga bubuhaton naton an aton mahihimo. Han ginpakaraot an bugto ni Lasaro nga hi Maria tungod ha paghirog ha ulo ni Jesus hin mahal ngan mahamot nga lana antes gud hiya mamatay, hi Jesus nagsiring: “Pabay-i hiya. . . . Hiya nagbuhat han iya nahihimo.” (Mar. 14:6-8) Gindayaw ni Jesus an pobre nga balo nga naghatag hin gutiay hinduro nga amot ha templo. Nagbuhat liwat hiya han iya mahihimo. (Luk. 21:1-4) Kadam-an ha aton an makakahimo pagtambong ha mga katirok ngan pagsangyaw han maopay nga sumat han Ginhadian. Pinaagi han bulig ni Jehova, damu hiton diri-aktibo yana an makakahimo liwat hito.
21, 22. Ano an maipapasarig mo ha mga nabalik kan Jehova?
21 Kon an sugad-karnero nga nawara ha panon nahahadlok ha pakigkita utro ha iya kabugtoan, pahinumdoma hiya han kalipay nga nahitabo han inuli an anak nga makaragon. Adton nabalik ha kongregasyon nakakalipay liwat. Dasiga hira nga gumios na yana basi maatohan an Yawa ngan magin duok ha Dios.—Jak. 4:7, 8.
22 Malipayon nga kinakarawat an mga nabalik kan Jehova. (Pagta. 3:40) An ira mga eksperyensya hadto ha pag-alagad ha Dios sigurado nga nakalipay gud ha ira. Damu nga bendisyon an makakarawat hadton nabalik dayon ha panon!
Ano an Imo Baton?
• Paonan-o mo mabubuligan an Kristiano nga nahipakdol ngan nagin diri-aktibo?
• Ano nga pangatadongan an mabulig ha usa nga binulag ha panon han Dios tungod han kalugaringon nga opinyon mahitungod han usa nga katutdoan?
• Paonan-o mabubuligan an usa nga nahahadlok ha pagbalik ha kongregasyon?
[Mga Pakiana]
[Retrato ha pahina 13]
Pamati hin maopay samtang nag-iistorya an diri-aktibo han iya mga pagbati
[Retrato ha pahina 15]
An pamalandong ha ilustrasyon ni Jesus mahitungod han anak nga makaragon mahimo magpagios ha iba nga bumalik ha panon