Buligi an Nagkawawara ha Panon
Buligi an Nagkawawara ha Panon
“Magkalipay kita, kay akon hin-agian an akon karnero nga nawara.”—LUK. 15:6.
1. Paonan-o pinamatud-an ni Jesus nga mahigugmaon hiya nga magbarantay?
HI Jesu-Kristo, an bugtong nga Anak ni Jehova, tinatawag nga an “daku nga magbarantay han mga karnero.” (Heb. 13:20) Igintagna ha Kasuratan an iya presensya, ngan iginsaysay hito nga waray-kapariho hiya nga Magbarantay nga nagbiling han “nagkawawara nga mga karnero” han Israel. (Mat. 2:1-6; 15:24) Dugang pa, sugad la nga an literal nga magbarantay mahimo magsakripisyo han iya kinabuhi basi mapanalipdan an iya mga karnero, namatay hi Jesus sugad nga halad lukat para ha mga sugad-karnero nga magpapahimulos han iya halad.—Juan 10:11, 15; 1 Juan 2:1, 2.
2. Ano an hinungdan nga an iba nga Kristiano diri na aktibo yana?
2 Makasurubo, an iba nga baga hin nag-apresyar han halad ni Jesus ngan nagdedikar hadto ha Dios diri na aktibo nga mga membro han kongregasyon yana. An kahulop, pagkasakit, o iba pa nga hinungdan bangin nagpaluya han ira kadasig ngan tungod hito nagin diri-aktibo hira. Kondi, mapapahimulosan la nira an kamurayaw ngan kalipay nga gin-unabi ni David ha Salmo 23 kon bahin hira han panon han Dios. Pananglitan, hiya nagkanta: “Hi Jehova amo an akon Magbarantay; [waray] magkukulang ha akon.” (Sal. 23:1) Adton aada ha panon han Dios diri makukulangan hin bisan ano ha espirituwal, kondi kabaliktaran ito ha mga karnero nga nagkawawara. Hin-o an makakabulig ha ira? Paonan-o hira mabubuligan? Ano gud an mahimo naton buhaton basi mabuligan hira nga makabalik ha panon?
Hin-o an Makakabulig?
3. Paonan-o ipinakita ni Jesus kon ano an ginkikinahanglan basi matalwas an nagkawawara nga karnero ha panabsaban han Dios?
3 Ginkikinahanglan an sinsero nga pangalimbasog basi matalwas an nagkawawara nga karnero ha panabsaban han Dios. (Sal. 100:3) Iginhulagway ini ni Jesus han hiya nagsiring: ‘Kon may tawo nga may usa ka gatos nga karnero, ngan an usa ha ira nawara, diri ba niya babayaan an kasiyaman kag siyam, ngan makadto ha mga kabukiran, ngan pamimilngon an nawara? Ngan kon mahinabo nga iya hiagian, matuod ako nasiring ha iyo, nga hiya malilipay hin durodaku pa [kay ha] kasiyaman kag siyam nga waray magkawawara. Sugad man, diri ini amo an kaburut-on han iyo Amay nga aadto ha langit, nga may mawara hini nga mga gudtiay.’ (Mat. 18:12-14) Hin-o an makakabulig ha sugad-karnero nga nagkawawara ha panon?
4, 5. An mga tigurang kinahanglan magkaada ano nga pagtagad ha panon han Dios?
4 Kon karuyag han mga tigurang nga buligan an mga karnero nga nagkawawara, kinahanglan hinumdoman nira nga an panon han Dios usa nga kongregasyon han katawohan nga dedikado kan Jehova—oo, hinigugma nga ‘mga karnero ha panabsaban han Dios.’ (Sal. 79:13) Inin hinigugma nga mga karnero nagkikinahanglan hin malumo nga pagmangno, ngan nangangahulogan ini nga an mahigugmaon nga mga magbarantay kinahanglan personal nga nagtatagad ha ira. Epektibo gud an makisangkayon nga pagbisita ha ira. An mahigugmaon nga pagdasig han magbarantay mahimo magparig-on han ira pagtoo ngan mas magpakusog han ira hingyap nga makabalik ha panon.—1 Kor. 8:1.
5 Responsabilidad han mga magbarantay ha panon han Dios nga bilngon an mga karnero nga nagkawawara ngan buligan hira. Ginpahinumdom ni apostol Pablo an mga tigurang ha kadaan nga Efeso han ira mga responsabilidad nga pagbantay ha mga karnero han hiya nagsiring: “Magtagam kamo ha iyo kalugaringon ngan ha ngatanan nga panon, nga igintapod ha iyo han baraan nga espiritu nga kamo amo an mga magmarangno, basi papanabsabon niyo an kongregasyon han Dios, nga ginpalit pinaagi han dugo han iya kalugaringon nga Anak.” (Buh. 20:28, NW) Sugad man, ginsagdonan ni apostol Pedro an dinihogan nga katigurangan: “Pasabsaba niyo an panon han Dios nga aada ha iyo, pagbantayan niyo, diri nga sugad hin [napipiritan], kondi ha iyo kalugaringon nga kaburut-on, sumala ha kaburut-on han Dios; diri tungod ha mahugaw nga salapi, kondi ha maandaman nga painoino. Diri mga agaron han mga igintubyan ha iyo, kondi nga magin susbaranan kamo ha panon.”—1 Ped. 5:1-3.
6. Kay ano nga an mga karnero han Dios yana labi nga nagkikinahanglan han pagmangno han mga magbarantay?
6 Kinahanglan subaron han Kristiano nga mga magbarantay “an maopay nga paramangno,” hi Jesus. (Juan 10:11) Gintagad gud niya an mga karnero han Dios ngan ginpabug-atan niya an pagkaimportante han pagmangno ha ira han ginsidngan niya hi Simon Pedro nga ‘pasabsabon an Iya nati nga mga karnero.’ (Basaha an Juan 21:15-17.) An mga karnero yana labi nga nagkikinahanglan han sugad nga pagmangno kay mas nangangalimbasog an Yawa ha pagbungkag han integridad hadton dedikado ha Dios. Ginsasalingabot ni Satanas an mga kaluyahan han mga karnero ni Jehova ngan ginagamit niya an kalibotan ha pagtugway ha ira ha sayop nga mga buhat. (1 Juan 2:15-17; 5:19) An diri-aktibo madali gud mabiktima salit kinahanglan buligan hira basi maiaplikar an sagdon nga ‘manggawi uyon ha espiritu.’ (Gal. 5:16-21, 25) Basi mabuligan hira, kinahanglan mag-ampo ngan sumarig kita ha giya han Dios ngan han iya espiritu, ngan gamiton hin maopay an iya Pulong.—Prob. 3:5, 6; Luk. 11:13; Heb. 4:12.
7. Kay ano nga importante gud nga bantayan han mga tigurang an sugad-karnero nga igintapod ha ira?
7 An magbarantay ha kadaan nga Israel nagamit hin hilaba nga baston, o tungkod ha pagtugway han iya panon. Samtang an mga karnero nasulod o nagawas ha toril, ‘naagi ito ha ilarom han tungkod,’ salit naiihap han magbarantay. (Leb. 27:32; Mika 2:12; 7:14) Sugad man, kinahanglan kilala gud han Kristiano nga magbarantay an panon han Dios ngan maaram han kahimtang han tagsa nga karnero nga iya ginbabantayan. (Itanding an Proberbios 27:23.) Salit, an pagmangno usa han importante nga mga butang nga ginhihisgotan han lawas han mga tigurang. Nag-uupod ini han paghimo hin mga kahikayan ha pagbulig ha mga karnero nga nagkawawara. Hi Jehova nagsiring nga bibilngon niya an iya mga karnero ngan mamangnoan hira. (Esek. 34:11) Salit nalilipay an Dios kon nangangalimbasog liwat an mga tigurang ha pagbulig ha nagkawawara nga karnero nga bumalik ha panon.
8. Ha ano nga mga paagi personal nga gintatagad han mga tigurang an karnero?
8 Kon masakit ha pisikal an igkasi-tumuroo, makakalipay ngan makakaparig-on ha iya an pagbisita han magbarantay ha panon han Dios. Sugad liwat an kahimtang kon an karnero nga masakit ha espirituwal personal nga gintatagad. An mga tigurang mahimo magbasa hin mga teksto, magrepaso hin artikulo, maghisgot hin importante nga mga punto ha katirok, mag-ampo upod ha iya, ngan iba pa. Mahimo nira isumat nga an kabugtoan ha kongregasyon malilipay gud kon makita hiya nga tumambong utro ha mga katirok. (2 Kor. 1:3-7; Jak. 5:13-15) Makakabulig gud an pagbisita, pagtawag ha telepono, o pagsurat! Makakadugang liwat ha kalipay han mapinairon nga Kristiano nga magbarantay an personal nga pagbulig ha usa nga nawawara ha panon.
Nagkakaurosa ha Pagbulig
9, 10. Kay ano nga makakasiring ka nga diri la mga tigurang an sadang magpakita hin pagtagad ha mga karnero nga nagkawawara?
9 Nagkikinabuhi kita ha okupado ngan peligroso nga panahon, salit posible nga diri kita umabat nga an usa nga igkasi-tumuroo igin-aanod na pahirayo ha kongregasyon. (Heb. 2:1) Kondi, birilhon gud kan Jehova an iya mga karnero. Importante an kada usa ha ira, sugad la nga importante an tagsa nga bahin han lawas han tawo. Salit, kinahanglan nga kita ngatanan magpakita hin pagtagad ha aton kabugtoan ngan magmangno gud ha usa kag usa. (1 Kor. 12:25) Nagpapakita ka ba hin sugad nga pagtagad?
10 Bisan kon mga tigurang an nangunguna ha pagbiling ngan pagbulig ha mga karnero nga nagkawawara, diri la hira an sadang magpakita hin pagtagad. An iba mahimo bumulig ha ira. Sadang dasigon ngan buligan naton ha espirituwal an aton kabugtoan nga bumalik ha panon. Paonan-o maihahatag an sugad nga bulig?
11, 12. Ano nga pribilehiyo an bangin makarawat mo ha pagbulig ha usa nga nanginginahanglan hin espirituwal nga bulig?
11 Ha pipira nga kahimtang, an mga tigurang mahimo magtoka hin eksperyensyado nga magwarali han Ginhadian basi magdumara hin pag-aram ha Biblia ha diri-aktibo nga nangangaro hin bulig. An katuyoan hito amo an pagbulig ha ira nga maipahiuli an ira “siyahan nga gugma.” (Pah. 2:1, 4) Ini nga mga igkasi-tumuroo mahimo maparig-on ngan mapakusog ha espirituwal pinaagi ha pagrepaso han impormasyon nga waray nira mabatii tungod kay waray hira turutambong.
12 Kon hangyoon ka han mga tigurang nga buligan ha pag-aram an igkasi-tumuroo nga nagkikinahanglan hin espirituwal nga bulig, pag-ampo kan Jehova nga giyahan ngan bendisyonan an imo mga pangalimbasog. Oo, “isarig an imo mga buruhaton kan Jehova, ngan an imo mga tinguha matutukod.” (Prob. 16:3) Pamalandonga an mga teksto ha Biblia ngan an nagpaparig-on-ha-pagtoo nga mga punto nga magagamit mo ha paghisgot hadton nagkikinahanglan hin espirituwal nga bulig. Hunahunaa an maopay gud nga susbaranan ni apostol Pablo. (Basaha an Roma 1:11, 12.) Naghingyap gud hiya nga makita an mga Kristiano ha Roma basi hatagan hin pipira nga espirituwal nga regalo basi maparig-on hira. Ginhandom liwat niya an pagparig-onay ha usa kag usa. Diri ba sadang magin sugad hito an aton pagtagad kon karuyag naton buligan an mga karnero nga nagkawawara ha panon han Dios?
13. Ano an mahimo niyo pag-istoryahan ngan han diri-aktibo?
13 Durante han iyo pag-aram, mahimo ka magpakiana, “Paonan-o mo hinbaroan an kamatuoran?” Ipahinumdom ha diri-aktibo an makalilipay nga panahon samtang nag-aalagad hiya hadto kan Jehova, dasiga hiya nga isumat an iya makalilipay nga mga eksperyensya ha mga katirok, pagsangyaw, ngan kombensyon. Unabiha an makalilipay nga panahon han magkaupod kamo hadto ha pag-alagad kan Jehova ngan an imo kalipay ha pagin duok ha Iya. (Jak. 4:8) Ipahayag an imo pagpasalamat ha paagi han pagmangno han Dios ha aton sugad nga iya katawohan—labi na an paghatag ha aton hin paglaom ngan pagliaw ha aton mga kagol-anan.—Roma 15:4; 2 Kor. 1:3, 4.
14, 15. Bangin makabulig an pagpahinumdom ha mga diri-aktibo han ano nga bendisyon nga ira napahimulosan hadto?
14 Maopay nga pahinumdumon an diri-aktibo han mga bendisyon nga napahimulosan niya hadto tungod ha duok nga pakig-upod ha kongregasyon. Pananglitan, bendisyon an pagkaada hin dugang nga kahibaro ha Pulong ngan katuyoan han Dios. (Prob. 4:18) Han hiya ‘gumawi uyon ha espiritu,’ sigurado nga mas masayon nga naatohan niya an mga pagsulay nga makasala. (Gal. 5:22-26) Tungod hito, an limpyo nga konsensya nakabulig ha iya nga dumaop kan Jehova pinaagi ha pag-ampo ngan nagkaada hiya ‘kamurayawan han Dios nga labaw ha ngatanan nga hibabroan ngan nagbabantay han aton kasingkasing ngan hunahuna.’ (Fil. 4:6, 7) Hinumdumi pirme an sugad nga mga punto, ipakita an sinsero nga pagtagad, ngan mahigugmaon nga dasiga gud an imo espirituwal nga bugto nga bumalik ha panon.—Basaha an Filipos 2:4.
15 Pananglitan usa ka nga tigurang nga nabisita ha diri-aktibo nga mag-asawa. Mahimo mo hira dasigon nga pamalandungon an panahon han siyahan nga hinbaroan nira an kamatuoran tikang ha Pulong han Dios. Urusahon gud, makatadunganon, makapatagbaw, ngan nagluluwas ha espirituwal an kamatuoran! (Juan 8:32) Mapasalamaton gud hira ha ira hinbaroan mahitungod kan Jehova, han iya gugma, ngan han iya makaruruyag nga mga katuyoan! (Itanding an Lukas 24:32.) Pahinumdoma hira han ira duok nga relasyon ha Iya ngan han urusahon nga pribilehiyo han pag-ampo nga pinahihimulosan han dedikado nga mga Kristiano. Sinsero nga dasiga hira nga magbuhat utro uyon ha “mahimayaon nga maopay nga sumat han malipayon nga Dios,” hi Jehova.—1 Tim. 1:11, NW.
Padayon nga Higugmaa Hira
16. Paghatag hin ehemplo ha pagpakita nga epektibo gud an mga pangalimbasog ha paghatag hin espirituwal nga bulig.
16 Epektibo gud ba ini nga mga suhestyon? Oo. Pananglitan, usa nga batan-on nga nagin magwarali han Ginhadian han 12 anyos hiya, an nagin diri-aktibo ha edad nga 15. Kondi, paglabay hin pipira ka tuig, nagin aktibo hiya, ngan sobra 30 anyos na hiya ha bug-os-panahon nga pag-alagad. Nagin aktibo utro hiya tungod han daku nga bulig ha iya han usa nga tigurang. Inaapresyar gud niya iton espirituwal nga bulig!
17, 18. Ano nga mga kalidad an kinahanglanon ha pagbulig ha usa nga nawara ha panon han Dios?
17 Gugma an nagpapagios ha mga Kristiano nga buligan an diri-aktibo nga bumalik ha kongregasyon. Hi Jesus nagsiring ha iya mga sumurunod: “Ako nahatag ha iyo hin usa nga bag-o nga sugo, nga kamo maghigugmaay an usa kag usa; nga sugad gud han akon paghigugma ha iyo, kamo man maghigugmaay an usa kag usa. Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.” (Juan 13:34, 35) Oo, gugma an pangirilal-an han tinuod nga mga Kristiano. Diri ba kinahanglan ipakita ito nga gugma ha bawtismado nga mga Kristiano nga nagin diri-aktibo? Kinahanglan gud! Kondi ha paghatag han ginkikinahanglan nga bulig sadang ipakita naton an iba-iba nga diosnon nga kalidad.
18 Kon karuyag mo makabulig ha usa nga nawara ha panon han Dios, ano nga mga kalidad an sadang mo ipakita? Gawas pa han gugma, bangin kinahanglan ipakita mo an pagpaid, pagkabuotan, pagkamalumo, ngan hilawig nga pagpailob. Sadang ka liwat magin mapinasayloon kon kinahanglanon ha kahimtang. Hi Pablo nagsurat: ‘Panul-ot kamo, hin kasingkasing han pagpuangon, pagkalooy, pagpaubos, pagkaaghop, pagkamailob; mag-inantusay kamo ha usa kag usa, ngan magpinasayloay kamo ha usa kag usa, kon may-ada usa ka tawo nga may igsusumbong kontra ha iba; sugad nga an Ginoo nagpasaylo ha iyo, sugad man buhaton ini niyo. Ngan labaw pa hini nga mga bagay, manul-ot kamo han gugma, nga amo an hingpit nga higot han pagkaurosa.’—Kol. 3:12-14.
19. Kay ano nga mapulsanon an pagbulig ha mga sugad-karnero nga bumalik ha kongregasyon?
19 An masunod nga artikulo nga pag-aadman maghihisgot han mga hinungdan kon kay ano nga an iba nawawara ha panon han Dios. Ipapatin-aw liwat hito kon paonan-o adton nabalik makakalaom nga kakarawaton hira. Samtang gin-aadman mo ito nga artikulo ngan pinamamalandong mo ini, laomi nga mapulsanon gud an anoman nga imo pangalimbasog ha pagbulig ha mga sugad-karnero nga bumalik ha kongregasyon. Yana nga panahon, ginagamit han damu an ira bug-os nga kinabuhi ha pagtirok hin materyal nga bahandi, kondi mas birilhon gud bisan an usa la nga kinabuhi kay ha ngatanan nga salapi ha kalibotan. Pinabug-atan ini ni Jesus ha iya ilustrasyon mahitungod han mga karnero nga nagkawawara. (Mat. 18:12-14) Hinaot hinumdoman mo pirme ito nga punto samtang sinsero ngan may pagkaapurado nga nangangalimbasog ka ha pagbulig ha nagkawawara nga sugad-karnero nga hinigugma ni Jehova nga bumalik ha panon.
Ano an Imo Baton?
• Ano an responsabilidad han Kristiano nga mga magbarantay may kalabotan ha sugad-karnero nga nagkawawara ha panon?
• Paonan-o mo mabubuligan adton diri na nakikig-upod yana ha kongregasyon?
• Ano nga mga kalidad an kinahanglanon basi mabuligan an nagkawawara ha panon?
[Mga Pakiana]
[Retrato ha pahina 10]
An Kristiano nga mga magbarantay mahigugmaon nga nangangalimbasog ha pagbulig ha nagkawawara ha panon han Dios