‘Igpadayon an mga Butang nga Nakakahimo hin Kamurayawan’

AN BAG-O la nga sementado nga kalsada marig-on pagkit-on, baga hin diri madadaot. Kondi, paglabay han panahon, mahimo ito magkaada hin mga gutak ngan buho. Kinahanglan aydon ito basi malikyan an aksidente ngan diri maguba.

Sugad man, an aton relasyon ha iba usahay bangin madaot ngan magkaada pa ngani gutak, siring pa. Maaram hi apostol Pablo nga may-ada diri-pagsinabtanay an mga Kristiano ha Roma. Salit, iya ginsagdonan an mga igkasi-Kristiano: ‘Igpadayon naton an mga butang nga nakakahimo hin kamurayawan, ngan nakakarig-on ha usa kag usa.’ (Roma 14:13, 19) Kay ano nga kinahanglan ‘igpadayon an mga butang nga nakakahimo hin kamurayawan’? Paonan-o kita padayon nga makikigmurayaw ha maisugon ngan epektibo nga paagi?

Kay Ano nga Kinahanglan an Padayon nga Pakigmurayaw?

Kon pababay-an an gudtiay nga gutak ha sementado nga kalsada, mahimo magin peligroso ito nga mga buho. Sugad man, kon diri masulbad dayon an diri-pagsinabtanay, mahimo ito magin peligroso. Hi apostol Juan nagsurat: “Kon may tawo nga sumiring: Ako nahigugma ha Dios, ngan nadumot ha iya bugto, buwaon hiya: kay an diri nahigugma ha iya bugto nga iya nakita, diri nahigugma ha Dios nga waray niya kitaa.” (1 Juan 4:20) Mahimo mangalas an usa nga Kristiano ha iya bugto tungod han waray masulbad nga diri-pagsinabtanay.

Iginsaysay ni Jesu-Kristo nga diri kakarawaton ni Jehova an aton pagsingba kon diri kita nakikigmurayaw ha iba. Gintutdoan ni Jesus an iya mga disipulo: “Kon ikaw magdadara han imo halad ha halaran, ngan mahinumdom ka nga an imo bugto may gutiay nga butang kontra ha imo, bayai didto an imo halad ha atubangan han halaran, ngan lakat pakighiuli siyahan ha imo bugto, ngan niyan balik, ngan paghalad han imo halad.” (Mat. 5:23, 24) Oo, an importante nga hinungdan nga sadang igpadayon naton an pakigmurayaw, tungod kay karuyag naton lipayon hi Jehova nga Dios. a

An sitwasyon ha kongregasyon ha Filipos nagpapabug-at han usa pa nga hinungdan nga sadang igpadayon an pakigmurayaw. Nagkaada problema an duha nga Kristiano nga hira Euodia ngan Sintike, nga nakasamok ha bug-os nga kongregasyon. (Fil. 4:2, 3) An waray masulbad  nga diri-pagsinabtanay madagmit hibaroan han kadam-an. Kondi an hingyap nga matipigan an gugma ngan pagkaurosa han kongregasyon magpapagios ha aton nga makigmurayaw ha mga igkasi-tumuroo.

“Bulahan an mga makigdaiton,” siring ni Jesus. (Mat. 5:9) An padayon nga pakigmurayaw nagriresulta hin kalipay ngan katagbaw. Dugang pa, an kamurayawan nagriresulta hin maopay nga kahimsog, kay “an murayaw nga kasingkasing amo an kinabuhi han unod.” (Prob. 14:30) Ha luyo nga bahin, an pagdumot mahimo makadugang han posibilidad nga magkasakit kita ha pisikal.

Bisan kon kadam-an nga Kristiano an nauyon nga kinahanglan an padayon nga pakigmurayaw, bangin maghunahuna ka kon paonan-o masusulbad an diri-pagsinabtanay. Aton usisahon an mga prinsipyo ha Kasuratan nga maggigiya ha aton.

An Kalmado nga Pag-istorya Nagpapahiuli han Kamurayawan

An gudtiay nga gutak ha sementado nga kalsada agsob nga naaayad pinaagi ha pagtabon ha nadaot nga bahin hito. Mahihimo ba naton pasayloon ngan tabonan an gudtiay nga sayop han aton kabugtoan? Posible gud nga epektibo ini ha kadak-an nga diri-pagsinabtanay, kay hi apostol Pedro nagsurat nga “an gugma nakakatabon hin damu nga mga sala.”—1 Ped. 4:8.

Kondi usahay, an problema baga hin seryoso gud salit diri mahimo nga igbalewaray la naton ito. Tagda an nahitabo ha mga Israelita han diri pa la maiha nga gintag-iya nira an Tuna nga Iginsaad. Antes tumabok ha Salog Jordan “an mga anak ni Ruben ngan an mga anak ni Gad ngan an tunga nga tulin ni Manases,” nagtukod hira didto hin “daku nga halaran.” An iba nga tribo han Israel tinoo nga an halaran gin-gamit ha idolatroso nga pagsingba ngan diri nira mahimo igbalewaray la ito. Salit, nag-andam hira ha pakig-away.—Jos. 22:9-12.

An iba nga Israelita bangin naghunahuna nga may-ada na igo nga ebidensya han sayop nga buhat ngan kon tigda nga umatake hira, gutiay la an mapapatay ha ira. Kondi, imbes nga gumios dayon, an mga tribo ha weste han Jordan nagpasugo hin mga delegado basi pag-istoryahan an problema ha ira kabugtoan. Nagpakiana hira: “Ano nga pagtalapas ini nga iyo ginbuhat patok han Dios han Israel, ha pagsimang hini nga adlaw tikang ha pagsunod kan Jehova?” Ha pagkamatuod, waray idolatroso nga ginbuhat an mga tribo nga nagtukod hin halaran. Kondi paonan-o hira magios ha sugad nga akusasyon? Masisina ba hira o diri na makikiistorya ha ira? An gin-akusahan nga mga tribo binaton hin malumo ngan ira iginpatin-aw nga ginbuhat nira ito tungod han ira hingyap nga mag-alagad kan Jehova. An ira malumo nga baton nagtipig han ira relasyon ha Dios ngan nagtalwas han mga kinabuhi. Tungod han kalmado nga pag-istorya, nasulbad an problema ngan nahiuli an kamurayawan.—Jos. 22:13-34.

Antes gumios, maaramon nga nakiistorya an iba nga Israelita mahitungod han ira problema ha mga tribo ni Ruben ngan Gad ngan ha katunga  nga tribo ni Manases. “Ayaw pagmahinanalion ha imo espiritu ha pagkasina, kay an kasina napahuway ha dughan han mga lurong,” siring han Pulong han Dios. (Ekles. 7:9) An Kasuratanhon nga paagi han pagsulbad han seryoso nga diri-pagsinabtanay amo an kalmado ngan prangka nga pag-istorya. Makakalaom gud ba kita han bendisyon ni Jehova kon nagdudumot kita ngan diri nakikiistorya ha usa nga nakabido ha aton?

Ha luyo nga bahin, paonan-o kita magios kon an igkasi-Kristiano nakiistorya ha aton mahitungod hin problema, nga bangin sayop nga nag-aakusar pa ngani ha aton? “An malumo nga baton nakakapaiway han kapungot,” siring han Biblia. (Prob. 15:1) An gin-akusahan nga mga tribo han Israel malumo, kondi matin-aw nga nagsaysay han ira kahimtang, hito nga paagi nasulbad nira an problema ha ira kabugtoan. Kita man an nag-una ha pakiistorya ha aton bugto o hiya an nakiistorya ha aton han problema, sadang pakianhan naton an aton kalugaringon, ‘Ano nga mga pulong, tono han tingog, ngan paggawi an makakaaghat hin kamurayawan?’

Gamita hin Maaramon an Dila

Nasasabtan ni Jehova nga kinahanglan igpahayag naton an aton mga problema. Kondi, kon diri naton masulbad an diri-pagsinabtanay, bangin maisumat naton ito ha iba. An waray masulbad nga problema masayon la magresulta hin pagpakaraot. Mahitungod han sayop nga paggamit han dila, an Proberbios 11:11 nasiring: ‘An bungto gin-gun-ob [tungod] han baba han maraot.’ Sugad man, an waray pagtagad nga yakan mahitungod han igkasi-Kristiano makakasamok ha sugad-bungto nga kongregasyon.

Kondi, an pakigmurayaw diri nangangahulogan nga lilikyan naton nga mag-istorya mahitungod han aton kabugtoan. Ginsagdonan ni apostol Pablo an mga igkasi-tumuroo: “Diri gumowa an bisan ano nga malaw-ay nga pulong ha iyo baba.” Ngan nagdugang hiya: “Kondi an maopay sugad nga kinahanglan ha pagparig-on, basi nga makahatag hin grasya ha mga nakakabati. . . . Magmaloloy-on kamo an usa kag usa, magmahumok an iyo kasingkasing, magpinasayloay kamo an usa kag usa.” (Efe. 4:29-32) Kon nakiistorya ha imo an usa nga bugto nga nabido tungod han imo ginyakan o ginbuhat, diri ba mas masayon an pangaro hin pasaylo ngan pakigmurayaw kon waray gud hiya magpakaraot ha imo ha iba? Salit, kon kilala ka nga makaparig-on kon nag-iistorya mahitungod han mga igkasi-Kristiano, mas masayon an aton pagpahiuli han kamurayawan kon may-ada diri-pagsinabtanay.—Luk. 6:31.

Mag-alagad ha Dios nga ‘Nagkakahiringyon’

An aton tendensya sugad nga makasasala amo an paglikay ha mga nakabido ha aton ngan pagpahirayo ha ira. Kondi diri ito maaramon. (Prob. 18:1) Sugad nga nagkakaurosa nga katawohan nga natawag ha ngaran ni Jehova, determinado kita ‘ha pag-alagad ha iya nga nagkakahiringyon.’—Sep. 3:9.

An diri maopay nga pulong o paggawi han iba diri gud sadang magpaluya han aton kadasig ha putli nga pagsingba. Pipira na la ka adlaw antes saliwnan han halad ni Jesus an mga halad ha templo ngan katapos gud niya kondenahon an mga eskriba, naobserbahan niya an pobre nga balo nga nag-amot han “ngatanan nga iya pinakabuhian” ha surudlan han salapi ha templo. Gindid-an ba hiya ni Jesus? Waray, lugod gindayaw an iya maunungon nga suporta ha kongregasyon ni Jehova hito nga panahon. (Luk. 21:1-4) An maraot nga buhat han iba waray makapugong ha iya obligasyon nga suportahan an pagsingba kan Jehova.

Bisan kon bangin inaabat naton nga an Kristiano nga bugto nagbuhat hin sayop, o diri makatadunganon pa ngani, ano an aton magigin reaksyon? Pasasagdan ba naton nga makaapekto ini ha aton bug-os-kalag nga pag-alagad kan Jehova? O maisugon nga susulbaron naton an anoman nga diri-pagsinabtanay basi matipigan an kamurayawan nga importante gud ha kongregasyon han Dios yana?

“Kon sadang mahimo, sugad han nahitutungod ha iyo, makigmurayaw kamo ha ngatanan nga mga tawo,” nagsasagdon an Kasuratan. (Roma 12:18) Hinaot magin determinado kita nga buhaton ito ngan magpabilin ha dalan ngadto ha kinabuhi.

[Footnote]

[Retrato ha pahina 17]

Kinahanglan makigmurayaw hira Euodia ngan Sintike

[Retrato ha pahina 18]

Ano nga mga pulong, tono han tingog, ngan paggawi an nakakaaghat hin kamurayawan?