An Pulong ni Jehova Buhi

Importante nga mga Punto ha mga Surat ni Jakobo Ngan ni Pedro

HAROS 30 ka tuig na katapos han Pentekostes 33 K.P., an disipulo nga hi Jakobo—an bugto ha iroy ni Jesus—nagsurat ha “napulo kag duha” nga tribo han espirituwal nga Israel. (Jak. 1:1) An iya tumong: pagsagdon ha ira nga magmarig-on ha pagtoo ngan magpailob kon nakakaeksperyensya hin mga pagsari. Nagsagdon liwat hiya basi tadungon an nakakapabaraka nga mga hitabo ha kongregasyon.

Antes gud han kampanya han pagtimaraot ni Emperador Nero han Roma han 64 K.P., iginsurat ni apostol Pedro an iya siyahan nga surat ha mga Kristiano, nga nagdadasig ha ira nga magpabilin nga marig-on ha pagtoo. Ha iya ikaduha nga surat, nga iginsurat waray pag-iha katapos han siyahan, gindasig niya an iya mga igkasi-tumuroo nga tagdon an pulong han Dios ngan ginpahamangnoan hira mahitungod han pag-abot han adlaw ni Jehova. Oo, magpapahimulos kita kon tagdon naton an mensahe han mga surat ni Jakobo ngan ni Pedro.—Heb. 4:12.

AN DIOS NAHATAG HIN KINAADMAN HADTON ‘NANGANGARO NGA MAY PAGTOO’

(Jak. 1:1–5:20)

“Bulahan an tawo nga makag-antos ha panulay,” nagsurat hi Jakobo, “kay kon human na hiya [proybahi], kakarawaton niya an pudong-pudong han kinabuhi.” Para hadton padayon nga ‘nangangaro nga may pagtoo,’ nahatag hi Jehova hin kinaadman nga kinahanglanon basi mailob an mga pagsari.—Jak. 1:5-8, 12.

Kinahanglanon liwat an pagtoo ngan kinaadman han nagigin “mga magturutdo” ha kongregasyon. Katapos unabihon ni Jakobo an dila sugad nga “gutiay nga bahin” nga “makakahugaw ha bug-os nga lawas,” nagpahamangno hiya kontra ha kalibotanon nga mga hilig nga makakadaot ha relasyon han usa ha Dios. Iginsaysay liwat niya an paagi nga sadang himoon han bisan hin-o nga may sakit ha espirituwal basi mag-opay.—Jak. 3:1, 5, 6; 5:14, 15.

Baton ha Pakiana Mahitungod ha Kasuratan:

2:13—Ha ano nga paagi nga an ‘kalooy naghihimaya kontra ha paghukom’? May kalabotan ha aton pakighusay ha Dios, gintatagad niya an aton pagpakita hin kalooy ha iba ngan ginpapasaylo kita pinaagi han halad lukat han iya Anak. (Roma 14:12) Diri ba usa ini nga hinungdan nga sadang ipakita naton an kalooy sugad nga importante nga kalidad ha aton kinabuhi?

4:5 a—Ano nga teksto an ginkotar ni Jakobo dinhi? Waray magkotar hi Jakobo hin espisipiko nga bersikulo. Kondi, ini nga mga pulong nga giniyahan han Dios posible nga iginbasar ha kabug-osan nga punto han mga teksto ha Genesis 6:5; 8:21; Proberbios 21:10; ngan Galasia 5:17.

5:20—“An magkabig ha usa nga makasasala tikang ha iya kawara [“pagsayop,” NW] ha iya dalan” makakatalwas han kan kanay kalag tikang ha kamatayon? An Kristiano nga magkabig ha makasasala tikang ha iya maraot nga buhat nagtatalwas han kalag hito tikang ha espirituwal nga kamatayon ngan ha posible nga dayon nga kabungkagan. Hini nga paagi, an nabulig ha makasasala ‘magtatabon liwat han damu nga sala’ hito nga tawo.

Mga Leksyon Para ha Aton:

1:14, 15. An sala nagtitikang ha sayop nga hingyap. Salit, diri naton sadang paghinunahunaon an sayop nga mga hingyap. Lugod, kinahanglan padayon nga ‘hunahunaon’ naton an makaparig-on nga mga butang ngan pun-on hito an aton hunahuna ngan kasingkasing.—Fil. 4:8.

 2:8, 9. An “pagpasulabi” kabaliktaran ha “hadianon nga balaud” han gugma. Salit, an tinuod nga mga Kristiano diri nagpapasulabi.

2:14-26. “Naluwas [kita] pinaagi han pagtoo,” “diri tungod ha mga buhat” han Mosaiko nga Balaud o ha mga ginbuhat sugad nga mga Kristiano. An aton pagtoo kinahanglan nga diri la kay pagsiring nga natoo kita ha Dios. (Efe. 2:8, 9; Juan 3:16) Sadang magpagios ito ha aton nga magbuhat uyon ha Iya kaburut-on.

3:13-17. “An kinaadman nga tikang ha kahitas-an” labaw gud ha “tunan-on, lawasnon, yawan-on” nga kinaadman! Sadang naton padayon nga ‘pamilngon an diosnon nga kinaadman sugad hin tinago nga mga bahandi.’—Prob. 2:1-5.

3:18. An binhi han maopay nga sumat han Ginhadian ‘igsasabwag ha kamurayawan han magburuhat hin kamurayawan.’ Importante nga magin makimurayawon kita ngan diri mapahitas-on, makiawayon, o masamok.

‘MAGMARIG-ON HA PAGTOO’

(1 Ped. 1:1–5:14)

Ginpahinumdoman ni Pedro an iya mga igkasi-tumuroo han ira “buhi nga paglaom” ha panurundon ha langit. “Pinili kamo nga kamamatan, hadianon nga pagkasaserdote, baraan nga nasud,” nagsiring hiya ha ira. Katapos magsagdon may kalabotan ha pagpasakop, gin-aghat niya an ngatanan nga magin ‘urosa ha hunahuna, malolooyon, mahigugmaon sugad nga magburugto, mapuanguron, mapainubsanon.’—1 Ped. 1:3, 4; 2:9; 3:8.

Tungod kay “an kataposan han [Judio nga sistema han] mga butang hirani na,” nagsagdon hi Pedro ha kabugtoan nga ‘magbuotan ngan magmaligdong ha pag-ampo.’ Nagsiring hiya ha ira: “Magbuotan, ngan mag-agma kamo. . . . Ato kamo [kan Satanas], nga marig-on an iyo pagtoo.”—1 Ped. 4:7; 5:8, 9.

Baton ha Pakiana Mahitungod ha Kasuratan:

3:20-22—Paonan-o nagtatalwas ha aton an bawtismo? Kinahanglan magpabawtismo adton naruruyag matalwas. Kondi, an pagin bawtismado la diri makakatalwas ha aton. Ha pagkamatuod, matatalwas kita “pinaagi ha pagkabanhaw ni Jesu-Kristo.” An kandidato ha bawtismo kinahanglan natoo nga posible la ito tungod kay namatay hi Jesus sugad nga halad, ginbanhaw, ngan “aadto niyan ha too nga kamot han Dios,” nga may-ada awtoridad ha buhi ngan patay. An bawtismo nga iginbasar ha sugad nga pagtoo katugbang ha ‘walo nga kalag nga naluwas ha tubig.’

4:6—Hin-o an ‘mga patay’ nga ‘ginwalihan han maopay nga sumat’? Hira an mga ‘patay tungod ha ira mga pagtalapas ngan sala,’ o an mga patay ha espirituwal, antes makabati han maopay nga sumat. (Efe. 2:1) Kondi, han tumoo hira ha maopay nga sumat, ‘nabuhi’ hira ha espirituwal.

Mga Leksyon Para ha Aton:

1:7. Basi magin birilhon gud an aton pagtoo, kinahanglan proybahan, o sarihan an kalidad hito. An sugad nga marig-on nga pagtoo tinuod nga ‘nakakaluwas han kalag.’ (Heb. 10:39) Kinahanglan diri kita umisol tungod ha mga pagsari han aton pagtoo.

1:10-12. Nagtinguha an mga anghel ha pag-usisa ngan pagsabot han higlarom nga espirituwal nga kamatuoran nga iginsurat han mga propeta han Dios ha kadaan nga panahon may kalabotan ha dinihogan nga Kristiano nga kongregasyon. Kondi, nagin matin-aw la ini han nakig-upod hi Jehova ha kongregasyon. (Efe. 3:10) Diri ba sadang sundon naton an susbaranan han mga anghel ngan mangalimbasog nga usisahon an “higlarom nga mga bagay han Dios”?—1 Kor. 2:10.

2:21. Ha pagsubad ha aton Susbaranan, hi Jesu-Kristo, sadang kita magin disidido ha pag-antos bisan tubtob ha kamatayon basi suportahan an pagkasoberano ni Jehova.

5:6, 7. Kon igintutubyan naton an aton pangarit kan Jehova, ginbubuligan kita niya nga padayon nga unahon an tinuod nga pagsingba imbes nga sobra nga mabaraka kon ano an mahimo mahitabo ha sunod nga adlaw.—Mat. 6:33, 34.

‘AN ADLAW NI JEHOVA MAABOT’

(2 Ped. 1:1–3:18)

“Waray pa gud igintagna nga inabot pinaagi ha kaburut-on han tawo: kondi an mga tawo nagyayakan tikang ha Dios, tungod nga ginmandoan han espiritu santo,” nagsurat hi Pedro. An pagpamati hin maopay ha tagna magpapanalipod ha  aton ha “buwaon nga mga magturutdo” ngan ha iba nga magraot nga tawo.—2 Ped. 1:21; 2:1-3.

“Ha urhi nga mga adlaw maabot an mga magyubit ha panyubit,” nagpahamangno hi Pedro. Kondi ‘an adlaw ni Jehova maabot sugad hin kawatan.’ Gintapos ni Pedro an iya surat pinaagi han maopay nga sagdon ha mga ‘naghuhulat ngan nagtitinguha gud han pag-abot hito nga adlaw.’—2 Ped. 3:3, 10-12.

Baton ha Pakiana Mahitungod ha Kasuratan:

1:19—Hin-o an “bitoon ha kaadlawon,” kakan-o hiya sinirang, ngan paonan-o kita nahibaro nga nahitabo ini? An “bitoon ha kaadlawon” amo hi Jesu-Kristo han magin Hadi hiya ha Ginhadian. (Pah. 22:16) Han 1914, sinirang hiya ha atubangan han ngatanan nga linarang sugad nga Mesianiko nga Hadi, nga nagtitigaman han kaagahon han bag-o nga adlaw. An transpigurasyon usa nga bisyon han himaya ngan pagmando ni Jesus ha Ginhadian, nga nagpapabug-at han katumanan han tagna han Dios. An pagpamati hito nga tagna naglalamrag ha aton kasingkasing, salit nahibaro kita nga sinirang na an Bitoon ha Kaadlawon.

2:4—Ano an “impyerno,” ngan kakan-o ipinanlabog ngadto an rebelyoso nga mga anghel? An pulong nga iginhubad nga “impyerno” amo an “Tartaro” ha orihinal nga yinaknan. An Tartaro amo an sugad-priso nga kahimtang diin an mga espiritu la—diri mga tawo—an nahingangadto. Ito an kahimtang han madulom hinduro nga panhunahuna mahitungod han malamrag nga mga katuyoan han Dios. An mga aadto ha Tartaro waray paglaom ha tidaraon. Ipinanlabog han Dios an matinalapason nga mga anghel ha Tartaro ha panahon ni Noe, ngan magpapabilin hira hito nga giuubosi nga kahimtang tubtob nga bungkagon hira.

3:17—Ano an karuyag sidngon ni Pedro han ‘hinbaroan na nga daan’? Gin-uunabi ni Pedro an abanse nga kahibaro ha mahitatabo ha tidaraon nga iginpahibaro ha iya ngan ha iba nga parasurat han Biblia pinaagi han giya han Dios. Tungod kay limitado la ini nga kahibaro, diri ini nangangahulogan nga hinbaroan han siyahan nga mga Kristiano an ngatanan nga detalye mahitungod han mahitatabo ha tidaraon. Hinbaroan la nira an sumaryo han ginlalaoman nga mahitatabo.

Mga Leksyon Para ha Aton:

1:2, 5-7. Dugang pa ha pagbulig ha aton nga mag-uswag ha husto nga “kinaadman han Dios ngan han kan Jesus,” an aton duro nga pangalimbasog ha pagkultibar han mga kalidad sugad han pagtoo, pagpailob, ngan diosnon nga debosyon mabulig ha aton nga diri magin diri-aktibo o diri-mabungahon mahitungod hito nga kahibaro.—2 Ped. 1:8.

1:12-15. Basi magpabilin nga “magrig-on ha kamatuoran,” kinahanglan naton pirme hin pahinumdom, sugad han aton nakakarawat pinaagi han aton mga katirok ha kongregasyon, personal nga pag-aram, ngan pagbasa han Biblia.

2:2. Sadang mag-ikmat kita nga an aton paggawi diri makapasipara kan Jehova ngan ha iya organisasyon.—Roma 2:24.

2:4-9. Kon tatagdon naton an ginbuhat ni Jehova ha naglabay, makakasarig kita nga hi Jehova ‘maaram ha pagluwas han matinumanon ha Iya tikang ha panulay, ngan pagkapot ha diri matinumanon ha Iya ha ilarom ha pagkahinukman ngada ha adlaw han paghukom.’

2:10-13. Bisan kon an “mga gamhanan [“mahimayaon,” NW],” nga amo an mga tigurang, may-ada mga kaluyahan ngan nagsasayop usahay, kinahanglan diri kita magyakan hin waray pagtahod ha ira.—Heb. 13:7, 17.

3:2-4, 12. An pagpamati hin maopay ha “mga pulong nga iginyakan hadto pa han mga baraan nga manaragna, ngan [ha] mga sugo ha aton han Ginoo ngan Manluluwas” mabulig ha aton nga hunahunaon pirme an pagkahirani han adlaw ni Jehova.

3:11-14. Samtang “naghuhulat ngan nagtitinguha gud . . . han pag-abot han adlaw han Dios,” kinahanglan (1) magin baraan kita ha paggawi, nga gintitipigan an pisikal, mental, moral, ngan espirituwal nga kalimpyo; (2) magin okupado kita ha mga buhat nga nagpapakita hin diosnon nga debosyon, sugad han pagsangyaw han Ginhadian ngan paghimo hin disipulo; (3) tipigan naton an aton paggawi ngan personalidad nga “waray buring,” ngan waray mahugawi han kalibotan; (4) magin ‘waray kita kasaypanan,’ nga ginbubuhat an ngatanan nga may putli nga motibo; ngan (5) ‘makigdait’ kita—nakikigmurayaw ha Dios, ha Kristiano nga kabugtoan, ngan ha mga igkasi-tawo.

[Footnote]