Karuyag Mo Magkaada hin Ano nga Klase hin Personalidad?

AN HEPE han polisya ha usa nga bungto ha Pilipinas nagpakiana ha payunir, “Ano an imo ginbuhat basi mabag-o an paggawi hito nga tawo?” Gintudlok niya an nakatambak nga papel ha iya lamesa ngan nagsiring: “Maaram ka ba nga ito ngatanan, rekord han iya kaso? Nakatalwas kami ha usa han mga problema hini nga bungto tungod han imo bulig.” An lalaki nga ira ginhihisgotan usa nga madarahog nga parahubog hadto, nga agsob magpatikang hin samok. Ano gud an nakagbag-o ha iya? Amo an giniyahan nga mensahe han Pulong han Dios, an Biblia.

Damu nga tawo an nasunod gud ha sagdon ni apostol Pablo nga ‘hukason an daan nga personalidad nga uyon ha ira paggawi hadto ngan isul-ot an bag-o nga personalidad nga ginlarang sumala ha kaburut-on han Dios.’ (Efe. 4:22-24, NW) Daku man o guti an angay naton bag-ohon, an pagsul-ot han bag-o nga personalidad bahin han pagin Kristiano.

Kondi, an aton pagbag-o ngan pag-uswag tubtob nga magin kwalipikado ha bawtismo tinikangan pa la. Kon nagpapabawtismo kita, sugad kita hin usa ka utod hin kahoy nga gintiksapan basi magkaada hin porma. Mahahanduraw mo kon ano an magigin hitsura hito, kondi damu pa an sadang buhaton. Kinahanglan dugangan pa ito han paraukit hin gudtiay nga detalye basi magin maopay pagkit-on. Han aton pagpabawtismo, may-ada kita han importante nga mga kalidad nga kinahanglanon basi magin surugoon han Dios. Kondi, tinikangan pa la ito han aton bag-o nga personalidad. Kinahanglan padayon nga pauswagon pa naton ito pinaagi ha pagbag-o.

Bisan hi Pablo, nasantop niya nga kinahanglan mag-uswag pa hiya. Hiya nagsiring: “Kon buot ako magbuhat han maopay, an maraot an aadi ha akon.” (Roma 7:21) Maaram gud hi Pablo kon ano hiya nga klase hin tawo ngan kon ano nga personalidad an karuyag niya nga magkaada. Kumusta man kita? Kinahanglan pakianhan liwat naton an aton kalugaringon: ‘Ano an aadi ha akon? Ano ako nga klase hin tawo? Ngan karuyag ko magkaada hin ano nga klase hin personalidad?’

 Ano an “Aadi ha Akon”?

Kon nag-aayad kita hin daan nga balay, diri igo an pagpintar han gawas hito kon may-ada dumog na nga mga biga ha sulod. Kon pabay-an naton an guba nga bahin han istraktura, mas damu pa an magigin problema hito ha urhi. Ha pariho nga paagi, diri igo an pagin matadong pagkit-on. Kinahanglan usisahon naton kon hin-o gud kita ngan kon ano an mga problema nga sadang sulbaron. Kay kon diri, mabalik utro an aton daan nga mga kinaiya. Salit, importante gud an pag-usisa ha kalugaringon. (2 Kor. 13:5) Kinahanglan hibaroan naton an diri mag-opay nga kinaiya ngan tadungon ito. Basi mahimo ito, hi Jehova nagtagana ha aton hin bulig.

Hi Pablo nagsurat: “An pulong han Dios buhi, ngan maabtik, ngan mamatarom pa kay han bisan ano nga kampilan nga duduha iton tarom, matarom kaopay nga sadang makagbahin han kalag ngan han espiritu, han kaluluthan ngan han mga utok, ngan madagmit makasabot ha mga hunahuna ngan mga tinguha han kasingkasing.” (Heb. 4:12) An mensahe han sinurat nga Pulong han Dios, an Biblia, makakaimpluwensya gud ha aton kinabuhi. Nadulot ito hin hilarom—ha simboliko nga paagi, tubtob ha utok han tul-an ha gisusuluri nga bahin hito. Iginpapahayag hito an aton panhunahuna ngan motibo, ngan iginbubuhayhag kon ano gud an aton tinuod nga pagkatawo kon itanding ha aton nakikita nga hitsura o paghunahuna ha aton kalugaringon. Daku gud nga bulig an Pulong han Dios basi masabtan naton an aton mga problema!

Kon nag-aayad kita hin daan nga balay, diri igo nga saliwnan la an nadaot na nga materyales. Kon maaram kita han hinungdan han kadaot hito, mahibabaro kita han paagi basi diri na mahitabo utro an sugad nga problema. Sugad man, an paglikay ha nagin hinungdan o nakadugang ha aton kaluyahan, diri la an paghibaro han aton diri maopay nga kinaiya, makakabulig ha aton nga mapugngan ito. Damu an nakakamolde han aton personalidad. Upod hito an aton kahimtang ha kinabuhi ngan ha pinansyal, palibot, kultura, mga kag-anak, kasangkayan, ngan relihiyon hadto. Ngan bisan an mga programa ha telebisyon ngan sine nga aton ginkikita, sugad man an iba nga kaliawan. Kon maaram kita han magraot nga impluwensya ha aton personalidad, malilikyan naton nga maapektohan hinduro hito.

Katapos han pag-usisa ha kalugaringon, bangin makasiring kita, ‘Amo na ako hini.’ Sayop ini nga pangatadongan. May kalabotan ha mga membro han kongregasyon ha Korinto nga hadto mga makihihilawason, homoseksuwal, parahubog, ngan iba pa nga sugad hito, hi Pablo nagsiring: “An iba ha iyo mga sugad hini [hadto]: Kondi mga lininisan [na] kamo . . . ha espiritu han aton Dios.” (1 Kor. 6:9-11) Ha bulig han espiritu ni Jehova, maglalampos liwat kita ha pagbuhat han kinahanglanon nga mga pagbag-o.

Tagda an kahimtang ni Markos a nga taga-Pilipinas. Mahitungod han iya eksperyensya, hiya nagsiring: “An akon mga kag-anak pirme nag-iinaway. Salit nagrebelde ako ha edad nga 19.” Naghikaraot hiya tungod han iya paghinuygo, pangawat, ngan pan-holdap. Nagplano pa ngani hiya ngan an iya mga kaupod ha pag-hijack hin eruplano, kondi waray ito madayon. Nagpadayon hiya ha magraot nga binuhatan bisan han may asawa na hiya. Inabot an panahon, naubos an ngatanan nga iya panag-iya tungod ha paghinuygo. Waray pag-iha katapos hito, inapi hi Marcos ha iya asawa ha pag-aram ha Biblia kaupod han mga Saksi ni Jehova. Han siyahan, inabat niya nga diri hiya takos nga magin Saksi.  Kondi, nakabulig ha iya an pag-aplikar han iya hinbabaroan ngan an pagtambong ha mga katirok basi bayaan an iya binuhatan hadto. Bawtismado na hiya yana ngan regular nga nagtututdo ha iba kon paonan-o liwat hira makakagbag-o.

Karuyag Mo nga Magin Ano?

Ano an kinahanglan naton bag-ohon basi mapauswag an aton Kristiano nga mga kalidad? Hi Pablo nagsasagdon ha mga Kristiano: “Bumulag man kamo hini ngatanan: an kasina, an kapungot, an pagkamaraot, an paglibak, an maglaw-ay nga mga pulong ha iyo baba: Diri kamo magbinuwaay an usa kag usa, tungod kay nanlubas na kamo han daan nga [personalidad] upod ha iya mga buhat.” Hiya nagpadayon: ‘Manul-ot kamo han bag-o nga [personalidad], nga ginbag-o ha kinaadman sugad han dagway han nagbuhat ha iya.’—Kol. 3:8-10.

Kon sugad, an aton siyahan nga tumong amo an paghukas han daan nga personalidad ngan pagsul-ot han bag-o. Ano nga mga kalidad an kinahanglan naton kultibaron basi matuman ito? Hi Pablo nasiring: ‘Panul-ot kamo hin kasingkasing han pagpuangon, pagkalooy, pagpaubos, pagkaaghop, pagkamailob; mag-inantusay kamo ha usa kag usa, ngan magpinasayloay kamo ha usa kag usa, kon may-ada usa ka tawo nga may igsusumbong kontra ha iba; sugad nga an Ginoo nagpasaylo ha iyo, sugad man buhaton ini niyo. Ngan labaw pa hini nga mga bagay, manul-ot kamo han gugma, nga amo an hingpit nga higot han pagkaurosa.’ (Kol. 3:12-14) Kon mangalimbasog gud kita nga makultibar ini nga mga kalidad, mabulig ini ha aton nga magin “mas makaruruyag kan Jehova ngan ha mga tawo.” (1 Sam. 2:26, NW) Han nakanhi pa ha tuna hi Jesus, ipinakita gud niya an diosnon nga mga kalidad. Pinaagi ha pag-aram ngan pagsubad ha iya, magigin mas pariho kita ha iya sugad nga ‘magsurubad ha Dios.’—Efe. 5:1, 2.

An usa pa nga paagi basi masabtan kon ano an kinahanglan naton bag-ohon amo an pag-aram ha personalidad han mga tawohan ha Biblia, nga ginpapamalandong kon ano an makaruruyag ngan diri, mahitungod ha ira. Pananglitan, tagda hi Jose, an anak han patriarka nga hi Jakob. Bisan kon nakaeksperyensya hin kawaray-hustisya, natipigan niya an positibo nga disposisyon ngan maopay nga personalidad. (Gen. 45:1-15) Ha kabaliktaran, an anak ni Hadi David nga hi Absalon salingkapaw nga nagtagad ha mga tawo. Ngan gindayaw hiya tungod ha iya kagwapo. Kondi, ha pagkamatuod traydor ngan kriminal hiya. (2 Sam. 13:28, 29; 14:25; 15:1-12) Salit, an pakita la nga pagkabuotan ngan an pisikal nga kaanyag diri nakakahimo ha usa nga magin makaruruyag gud.

Maglalampos Kita

Basi kita magin mas maopay ngan makaruruyag ha paniplatan han Dios, kinahanglan pauswagon naton an aton tinuod nga personalidad. (1 Ped. 3:3, 4) Basi mabag-o an aton personalidad kinahanglan mahibaroan naton an aton diri mag-opay nga kinaiya ngan an mga hinungdan o nakadugang hito, ngan kultibaron an diosnon nga mga kalidad. Makakasarig ba kita nga maglalampos an aton pangalimbasog nga mag-uswag?

Oo, makakagbag-o kita ha bulig ni Jehova. Pariho han salmista, makakag-ampo kita: “Himoa ha akon, O Dios, an usa nga kasingkasing nga matalinis; Ngan pagbag-ohi ako hin matadong nga espiritu ha sakob nakon.” (Sal. 51:10) Mahimo kita maghangyo nga an espiritu han Dios gumios ha aton basi mapauswag an aton hingyap nga mas ipahiuyon an aton kinabuhi ha iya kaburut-on. Oo, maglalampos kita ha pagin mas makaruruyag ha paniplatan ni Jehova!

[Footnote]

[Retrato ha pahina 4]

Igo na ba an pagpintar ha gawas hini nga balay nga naguba han bagyo?

[Retrato ha pahina 5]

Nagigin pariho na ba kan Kristo an imo personalidad?