Apresyara an Naiiba nga Responsabilidad ni Jesus ha Katuyoan han Dios
Apresyara an Naiiba nga Responsabilidad ni Jesus ha Katuyoan han Dios
“Ako amo an dalan, ngan an kamatuoran, ngan an kinabuhi: waray bisan hin-o nga maabot ha Amay, kon diri maagi ha akon.”—JUAN 14:6.
1, 2. Kay ano nga sadang magin interesado kita ha pag-usisa han naiiba nga responsabilidad ni Jesus ha katuyoan han Dios?
HA BUG-OS nga kasaysayan, damu an nangangalimbasog nga magin iba kay ha mga tawo ha ira palibot, pero gutiay la an naglalampos. Mas gutiay pa an tinuod nga makakasiring nga naiiba hira ha makatirigamnan nga mga paagi. Kondi hi Jesu-Kristo, an Anak han Dios, naiiba ha damu nga paagi.
2 Kay ano nga sadang magin interesado kita ha naiiba nga responsabilidad ni Jesus? Tungod kay nahidadabi hito an aton relasyon mismo ha aton langitnon nga Amay, hi Jehova! Hi Jesus nagsiring: “Ako amo an dalan, ngan an kamatuoran, ngan an kinabuhi: waray bisan hin-o nga maabot ha Amay, kon diri maagi ha akon.” (Juan 14:6; 17:3) Usisahon naton an pipira nga paagi diin naiiba hi Jesus. Hito nga paagi mapaparig-on an aton apresasyon ha iya responsabilidad ha katuyoan han Dios.
An “Bugtong nga Anak”
3, 4. (a) Kay ano nga makakasiring kita nga naiiba an responsabilidad ni Jesus sugad nga bugtong nga Anak? (b) Kay ano nga naiiba an responsabilidad ni Jesus ha paglarang?
3 Hi Jesus diri la kay “anak han Dios,” sugad han igintawag ni Satanas ha iya han ginsusulay hiya. (Mat. 4:3, 6) Husto nga tinatawag hiya nga “bugtong nga Anak han Dios.” (Juan 3:16, 18) An Griego nga pulong nga iginhubad nga “bugtong” nangangahulogan nga “uusa la hito nga klase, amo la,” “an amo la nga membro han tulin o klase,” o “naiiba.” Pero hi Jehova may-ada ginatos ka milyon nga espirituhanon nga anak. Kay ano, kon sugad, nga hi Jesus an usa la nga membro “han tulin o klase”?
4 Naiiba hi Jesus tungod kay hiya la an direkta nga ginlarang han iya Amay. Ha pagkamatuod, hiya an suhag nga Anak salit hiya “an siyahan . . . han ngatanan nga mga binuhat.” (Kol. 1:15) Ngan hiya “an tinikangan han mga binuhat han Dios.” (Pah. 3:14) Naiiba liwat an responsabilidad han bugtong nga Anak ha paglarang. Diri hiya an Maglalarang, o an Nagpatikang han mga linarang, kondi gin-gamit hiya ni Jehova sugad nga representante o instrumento ha paglarang han iba pa nga mga butang. (Basaha an Juan 1:3. a) Hi apostol Pablo nagsurat: “Ha aton uusa la an Dios, nga Amay, nga tikang ha iya ginikan an ngatanan nga mga butang, ngan kita ha iya; ngan uusa la an Ginoo, nga hi Jesu-Kristo, nga tungod ha iya ginikan an ngatanan nga mga butang, ngan kita tungod ha iya.”—1 Kor. 8:6.
5. Paonan-o pinabubug-atan han Kasuratan an kaibahan ni Jesus?
5 Kondi, naiiba hi Jesus ha damu pa nga paagi. Ha Kasuratan, damu an titulo o tawag ha iya nga nagpapabug-at han iya naiiba nga responsabilidad ha katuyoan han Dios. Usisahon naton yana an lima pa hini nga tawag kan Jesus ha Kristiano Griego nga Kasuratan.
“An Pulong”
6. Kay ano nga husto an tawag kan Jesus nga “an Pulong”?
6 Basaha an Juan 1:14. Kay ano nga hi Jesus tinatawag nga “an Pulong” o Logos? Iginhuhulagway hini nga titulo an iya nagin responsabilidad tikang nga iniksister an iba nga intelihente nga mga linarang. Pinaagi hini nga Anak, naghatag hi Jehova hin mga impormasyon ngan instruksyon ha mga anghel, ngan nagpahayag han Iya mensahe ha katawohan ha tuna. Pinamatud-an ni Jesus nga hiya an Pulong o Tagapagyakan han Dios pinaagi han iya ginsiring ha mga Judio: “An akon pagtutdo, diri akon, kondi kanan han nagpakanhi ha akon. Kon hin-o an buot magbuhat han Iya kaburut-on, hiya mahibabaro han pagtutdo, kon iton tikang ha Dios, o kon ako nagyayakan han akon kalugaringon.” (Juan 7:16, 17) Bisan han binalik na hi Jesus ha kahimayaan ha langit, tinatawag pa gihapon hiya nga “An Pulong han Dios.”—Pah. 19:11, 13, 16.
7. Paonan-o naton masusubad an pagkamapainubsanon ni Jesus ha iya responsabilidad sugad nga “an Pulong”?
7 Hunahunaa la kon ano an iginpapasabot hini nga titulo. Bisan kon hi Jesus an pinakamaaramon ha ngatanan nga linarang ni Jehova, diri hiya nasarig ha iya kalugaringon nga kinaadman. Nagyayakan hiya uyon ha igintututdo han iya Amay. Pirme niya ginpapasidunggan hi Jehova imbes nga an iya kalugaringon. (Juan 12:50) Maopay gud hiya nga susbaranan nga sadang naton sundon! Kita liwat gintagan hin dungganon nga pribilehiyo ha ‘pagdara han maopay nga sumat han mag-opay nga bagay.’ (Roma 10:15) Pinaagi ha pag-apresyar han pagkamapainubsanon ni Jesus, malilikyan naton nga magyakan uyon ha aton kalugaringon nga opinyon. Kon iginsusumat naton an nagtatalwas han kinabuhi nga mensahe ha Kasuratan, diri naton karuyag nga magpasobra han nahisurat na.—1 Kor. 4:6.
“An Amen”
8, 9. (a) Ano an kahulogan han pulong nga “amen,” ngan kay ano nga hi Jesus gintawag nga “an Amen”? (b) Paonan-o gintuman ni Jesus an iya responsabilidad sugad nga “an Amen”?
8 Basaha an Pahayag 3:14. Kay ano nga hi Jesus tinatawag nga “an Amen”? An pulong nga “amen” tikang ha Hebreo nga nangangahulogan “matuman unta” o “sigurado.” Inin Hebreo nga pulong nga gintikangan hito nangangahulogan nga “magin maunungon” o “masasarigan.” Ginagamit liwat ini ha paghulagway han pagkamatinumanon ni Jehova. (Deut. 7:9; Isa. 49:7) Salit, ha ano nga paagi naiiba hi Jesus ha iya pagin “an Amen”? Tigamni an baton han 2 Korinto 1:19, 20: ‘An Anak han Dios nga hi Jesu-Kristo, nga iginwali ha iyo, waray magin Oo ngan Diri, kondi ha iya an Oo nagin Oo. Kay bisan ano kadamu an mga saad han Dios, ito nagin Oo pinaagi ha iya. Busa pinaagi ha iya ginsisiring an Amen ngadto ha himaya han Dios.’
9 Hi Jesus “an Amen” ha ngatanan nga saad han Dios. Pinaagi han iya hingpit nga pagkinabuhi ha tuna ngan han iya kamatayon sugad nga halad, napamatud-an ngan natuman an ngatanan nga saad ni Jehova nga Dios. Pinaagi han pagpabilin nga matinumanon, pinamatud-an liwat ni Jesus nga buwa an ginsiring ni Satanas nga durante han kakurian, pag-antos ngan pagsari, isasalikway an Dios han iya mga surugoon. (Job 1:6-12; 2:2-7) Ha ngatanan nga linarang han Dios, an suhag nga Anak la an nakahatag hin pinakamarig-on nga baton hito nga akusasyon. Dugang pa, hiya an naghatag hin gimaopayi nga pamatuod dapig ha iya Amay mahitungod han mas seryoso nga isyu kon hi Jehova gud ba an may katungod nga magmando ha uniberso.
10. Paonan-o naton masusubad hi Jesus ha iya naiiba nga responsabilidad sugad nga “an Amen”?
10 Paonan-o naton masusubad hi Jesus ha iya naiiba nga responsabilidad sugad nga “an Amen”? Pinaagi han padayon nga pagkamatinumanon kan Jehova ngan pagsuporta ha iya pagkasoberano ha uniberso. Kon buhaton naton ito, matutuman naton an iya hangyo ha Proberbios 27:11: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway [“nagtatamay,” NW] ha akon.”
‘An Manlalaban han Bag-o nga Kauyonan’
11, 12. Kay ano nga naiiba an responsabilidad ni Jesus sugad nga Manlalaban?
11 Basaha an 1 Timoteo 2:5, 6. Hi Jesus amo an ‘uusa la nga manlalaban butnga han Dios ngan han mga tawo.’ Hiya “an manlalaban ha usa nga bag-o nga [kauyonan].” (Heb. 9:15; 12:24) Kondi, hi Moises tinatawag liwat nga manlalaban—an manlalaban han Balaud nga kauyonan. (Gal. 3:19) Kon sugad, kay ano nga naiiba an responsabilidad ni Jesus sugad nga Manlalaban?
12 An pulong ha orihinal nga yinaknan nga iginhubad nga “manlalaban,” usa nga termino nga may kalabotan ha balaud. Naaplikar ito kan Jesus sugad nga legal nga Manlalaban (o, sugad hin abogado) han bag-o nga kauyonan nga pinaagi hito natukod an bag-o nga nasud, ‘an Israel han Dios.’ (Gal. 6:16) Ini nga nasud ginkukompwesto han dinihogan-han-espiritu nga mga Kristiano, nga mga membro han “hadianon nga pagkasaserdote” ha langit. (1 Ped. 2:9; Eks. 19:6) An Balaud nga kauyonan, nga hi Moises an manlalaban, waray makagtukod hito nga nasud.
13. Ano an nahiuupod ha responsabilidad ni Jesus sugad nga Manlalaban?
13 Ano an nahiuupod ha responsabilidad ni Jesus sugad nga Manlalaban? Bueno, ginagamit ni Jehova an bili han dugo ni Jesus para ha mga gindadara ngada ha bag-o nga kauyonan. Hito nga paagi, legal nga iginpapahayag hira ni Jehova sugad nga matadong. (Roma 3:24; Heb. 9:15) Tungod hito gintatagad hira han Dios sugad nga takos sumulod ha bag-o nga kauyonan nga may paglaom nga magin mga hadi ngan saserdote ha langit. Hi Jesus, sugad nga ira Manlalaban, nabulig ha ira nga magpabilin nga limpyo ha atubangan han Dios.—Heb. 2:16.
14. Kay ano nga sadang apresyaron gud han ngatanan nga Kristiano, anoman an ira paglaom, an responsabilidad ni Jesus sugad nga Manlalaban?
14 Kumusta man an mga diri membro han bag-o nga kauyonan, adton naglalaom nga mabuhi ha waray kataposan ha tuna, diri ha langit? Bisan kon diri hira bahin han bag-o nga kauyonan, nagpapahimulos hira hito. Ginpapasaylo an ira mga sala ngan iginpapahayag hira nga matadong sugad nga kasangkayan han Dios. (Jak. 2:23; 1 Juan 2:1, 2) Langitnon man o tunan-on an aton paglaom, sadang apresyaron gud han tagsa ha aton an responsabilidad ni Jesus sugad nga Manlalaban han bag-o nga kauyonan.
“Hitaas nga Saserdote”
15. Kay ano nga naiiba an responsabilidad ni Jesus sugad nga Hitaas nga Saserdote kay ha ngatanan nga nag-alagad sugad nga hitaas nga saserdote?
15 Damu nga kalalakin-an an nag-alagad sugad nga hitaas nga saserdote ha naglabay, kondi naiiba gud an responsabilidad ni Jesus sugad nga Hitaas nga Saserdote. Kay ano? Hi Pablo nagsaysay: “Diri niya kinahanglan an paghalad hin mga halad ha ikinaadlaw, sugad hini nga higtaas nga mga saserdote, siyahan tungod ha iya kalugaringon nga mga sala, ngan ngahaw tungod ha mga sala han mga tawo: kay ini iya ginbuhat ha gihapon [“makausa la,” NW], han iya paghalad han iya kalugaringon. Kay an Kasugoanan nagtutungod ha mga tawo nga may kaluyahan, ha pagkahitaas nga saserdote; kondi an pulong han panumpa, nga inabot ha urhi han Kasugoanan, nagtutungod han Anak, nga ginhingpit ha waray kataposan.”—Heb. 7:27, 28. b
16. Kay ano nga naiiba gud an halad ni Jesus?
16 Hi Jesus hingpit nga tawo, an eksakto nga katugbang ni Adan antes hiya makasala. (1 Kor. 15:45) Tungod hito, hi Jesus la an tawo nga puydi maghalad hin hingpit ngan kompleto nga halad—an klase han halad nga diri na kinahanglan utruhon. Ha Mosaiko nga Balaud, an paghalad ginbubuhat ha kada adlaw. Kondi, ito ngatanan nga halad ngan pag-alagad han mga saserdote nagpadagaw la han pagbubuhaton ni Jesus. (Heb. 8:5; 10:1) Salit tungod han pagkaepektibo ngan pagkapermanente hito, naiiba gud an responsabilidad ni Jesus sugad nga Hitaas nga Saserdote.
17. Kay ano nga sadang naton apresyaron an responsabilidad ni Jesus sugad nga aton Hitaas nga Saserdote, ngan paonan-o naton ito bubuhaton?
17 Kinahanglan naton an pag-alagad ni Jesus sugad nga Hitaas nga Saserdote basi mabuligan kita nga magin matadong ha paniplatan han Dios. Pagkamaopay gud han aton Hitaas nga Saserdote! “Diri nga waray ta usa nga Hitaas nga Saserdote nga diri sadang makahimo hin pagbati ha aton mga kakurian; kondi hiya man ginsulay ha ngatanan nga paagi sugad ha aton, kondi waray sala.” (Heb. 4:15) Oo, an aton pag-apresyar hini nga kamatuoran magpapagios ha aton nga ‘diri na magkinabuhi tungod la ha aton, kondi tungod ha iya nga namatay para ha aton.’—2 Kor. 5:14, 15; Luk. 9:23.
An Igintagna nga “Binhi”
18. Ano an igintagna katapos makasala hi Adan, ngan ano an iginpahayag ha urhi may kalabotan hini nga tagna?
18 Ha Eden, han nawad-an na an tawo han ngatanan—maopay nga relasyon ha Dios, kalipayan, ngan Paraiso—nagtagna hi Jehova nga Dios hin usa nga Manluluwas. Gintawag hiya nga “binhi.” (Gen. 3:15, NW) Inin diri pa nakikilala nga Binhi nagin tema han damu nga tagna ha Biblia ha paglabay han panahon. Hiya magtitikang ha tulin ni Abraham, Isaak, ngan Jakob. Magtitikang liwat hiya ha tulin ni Hadi David.—Gen. 21:12; 22:16-18; 28:14; 2 Sam. 7:12-16.
19, 20. (a) Hin-o an iginsaad nga Binhi? (b) Kay ano nga masisiring nga gawas kan Jesus may-ada iba pa nga nagkukompwesto han igintagna nga binhi?
19 Hin-o an iginsaad nga Binhi? An baton hini mababasa ha Galasia 3:16. (Basaha.) Kondi, ha kataposan hito nga kapitulo, hi apostol Pablo nagsiring ha mga dinihogan: “Kon kamo kan Kristo, ha pagkamatuod mga katulinan kamo ni Abraham, ngan manurunod sugad ha saad.” (Gal. 3:29) Kay ano nga bisan kon hi Kristo an iginsaad nga Binhi, may-ada iba pa nga kaupod?
20 Minilyon an nag-aangkon nga katulinan hira ni Abraham, an iba nanagna pa ngani. Nag-aangkon gud an iba nga relihiyon nga an ira mga propeta nagtikang ha tulin ni Abraham. Kondi hira ba ngatanan amo an iginsaad nga Binhi? Diri. Sugad han iginpatin-aw han giniyahan nga hi apostol Pablo, diri ngatanan han katulinan ni Abraham makakag-angkon nga hira an iginsaad nga Binhi. An katulinan han iba nga mga anak ni Abraham waray gamita ha pagbendisyon ha katawohan. Pinaagi la kan Isaak maabot an binhi nga magdadara han mga bendisyon. (Heb. 11:18) Ha kataposan, usa la nga tawo, hi Jesu-Kristo—nga an katulinan tikang kan Abraham iginrekord ha Biblia—an siyahan nga bahin han igintagna nga binhi. c An iba pa nga ha urhi nagin ikaduha nga bahin han binhi ni Abraham gintatagad nga ikaduha tungod kay hira “kan Kristo.” Oo, naiiba gud an responsabilidad ni Jesus ha pagtuman hini nga tagna.
21. Ano an diri mo gud hingangalimtan ha paagi han pagtuman ni Jesus han iya naiiba nga responsabilidad ha katuyoan ni Jehova?
21 Ano an aton nahibaroan hinin halipot nga repaso han naiiba nga responsabilidad ni Jesus ha katuyoan ni Jehova? Tikang pa han ginlarang an bugtong nga Anak han Dios, naiiba gud hiya ngan waray kapariho. Kondi, inin naiiba nga Anak han Dios nga nagin hi Jesus pirme mapainubsanon nga nag-aalagad uyon ha kaburut-on han iya Amay, ngan diri gud nagtitinguha hin himaya para ha iya kalugaringon. (Juan 5:41; 8:50) Maopay gud hiya nga susbaranan para ha aton yana! Pariho kan Jesus, hinaot magin tumong naton nga ‘buhaton an ngatanan ha himaya han Dios.’—1 Kor. 10:31.
[Mga footnote]
a Juan 1:3, (NW): “An ngatanan nga butang nahimo pinaagi ha iya, ngan waray bisan usa nga butang nga nahimo nga diri pinaagi ha iya.”
b Sumala ha usa nga eskolar han Biblia, an pulong nga iginhubad nga “makausa la” nagpapahayag hin importante nga ideya may kalabotan ha Biblia nga “nagpapasabot hin pagkasigurado, pagin naiiba, o pagkawaray-kapariho han kamatayon ni Kristo.”
c Bisan kon an mga Judio ha siyahan nga siglo K.P. naghunahuna nga hira, sugad nga tinuod nga katulinan ni Abraham, an magigin pinili nga katawohan, naglaom hira ha pag-abot han usa nga tawo sugad nga an Mesias o Kristo.—Juan 1:25; 7:41, 42; 8:39-41.
Nahinunumdoman Mo Ba?
• Ano an imo nahibaroan mahitungod ha naiiba nga responsabilidad ni Jesus sumala ha mga titulo o tawag ha iya? (Kitaa an kahon.)
• Paonan-o mo masusubad an susbaranan han naiiba nga Anak ni Jehova?
[Mga Pakiana]
[Kahon/Retrato ha pahina 15]
Mga Titulo nga Naghuhulagway han Naiiba nga Responsabilidad ni Jesus ha Katuyoan han Dios
◼ An Bugtong nga Anak. (Juan 1:3) Hi Jesus la an direkta nga ginlarang han iya Amay.
◼ An Pulong. (Juan 1:14) Ginagamit ni Jehova an iya Anak sugad nga Tagapagyakan basi maghatag hin mga impormasyon ngan instruksyon ha iba nga mga linarang.
◼ An Amen. (Pah. 3:14) Pinaagi han hingpit nga pagkinabuhi ni Jesus ha tuna ngan han iya kamatayon sugad nga halad, napamatud-an ngan natuman an ngatanan nga saad ni Jehova nga Dios.
◼ An Manlalaban han Bag-o nga Kauyonan. (1 Tim. 2:5, 6) Sugad nga legal nga Manlalaban, ginpahinabo ni Jesus nga matukod an bag-o nga nasud, ‘an Israel han Dios,’ nga ginkukompwesto han mga Kristiano nga magigin mga membro han “hadianon nga pagkasaserdote” ha langit.—Gal. 6:16; 1 Ped. 2:9.
◼ An Hitaas nga Saserdote. (Heb. 7:27, 28) Hi Jesus la an tawo nga nakaghalad hin hingpit nga halad, nga diri na kinahanglan utruhon. Makakaglimpyo hiya ha aton tikang ha mga sala ngan makakatalwas ha aton tikang ha makamaratay nga mga epekto hito.
◼ An Iginsaad nga Binhi. (Gen. 3:15) Usa la nga tawo, hi Jesu-Kristo, an siyahan nga bahin han igintagna nga binhi. “Kan Kristo” na an ngatanan nga iba pa nga ha urhi nagin ikaduha nga bahin han binhi ni Abraham.—Gal. 3:29.