Determinado ha Pagpamatuod hin Bug-os
Determinado ha Pagpamatuod hin Bug-os
‘Hiya nagtugon ha amon nga magwali ha katawohan ngan magtestigo hin bug-os.’—BUH. 10:42.
1. Han nakikiistorya hi Pedro ha grupo nira Cornelio, ano nga sugo an iya pinabug-atan?
GINTIROK han Italyano nga opisyal han mga sundalo an iya mga paryente ngan kasangkayan ngan hito nga higayon nahitabo an makatirigamnan nga pagbag-o ha pakig-upod han Dios ha mga tawo. Inin may kahadlok ha Dios nga opisyal amo hi Cornelio. Ginsumatan hira ni apostol Pedro nga an mga apostol ginsugo nga ‘magwali ha katawohan ngan magtestigo hin bug-os’ mahitungod kan Jesus. Damu an maopay nga resulta han pagpamatuod ni Pedro. Ginkarawat han diri-turi nga mga Hentil an espiritu han Dios, nagpabawtismo, ngan nagin kwalipikado nga magin mga hadi ha langit kaupod ni Jesus. Mag-opay gud ini nga resulta han bug-os nga pagpamatuod ni Pedro!—Buh. 10:22, 34-48.
2. Paonan-o naton hinbaroan nga an sugo nga magpamatuod diri la para ha 12 nga apostol?
2 Nahitabo ito han 36 K.P. Mga duha ka tuig antes hito, usa nga nakontra gud ha Kristianidad, hi Saul nga taga-Tarso, an nagkaada hin eksperyensya nga nakagbag-o ha iya. Han tipakadto hiya ha Damasko, nagpakita ha iya hi Jesus ngan nagsiring: “Sulod ha bungto, ngan igsusumat ha imo kon ano an imo kinahanglan buhaton.” Pagkatapos, ginpasarig ni Jesus an disipulo nga hi Ananias, nga hi Saul magpapamatuod ha “mga Hentil, ngan ha mga kahadian, ngan ha mga anak ni Israel.” (Basaha an Buhat 9:3-6, 13-20.) Han pagkadto ni Ananias kan Saul, hiya nagsiring: “An Dios han aton mga ginikanan nagtungod ha imo . . . kay [magigin] testigo ka niya ha ngatanan nga mga tawo.” (Buh. 22:12-16) Paonan-o sinsero nga gintuman ni Saul, nga nagin hi Pablo, an sugo ha iya nga magpamatuod?
Bug-os nga Nagpamatuod Hiya!
3. (a) Ano nga asoy an paghihisgotan naton? (b) Ano an ginbuhat han mga tigurang ha Efeso han nakarawat nira an mensahe ni Pablo, ngan ano nga maopay nga ehemplo an ipinapakita hini?
3 Makapainteres gud kon detalyado nga pag-adman an ngatanan nga ginbuhat ni Pablo katapos hito, kondi paghihisgotan naton yana an usa la han iya pahayag han mga 56 K.P., nga igin-asoy ha Buhat kapitulo 20. Iya ini iginpahayag han ikatarapos han iya ikatulo nga pagbiyahe sugad nga misyonero. Hinaw-as hiya ha Mileto, ha baybayon han Dagat Aegean, ngan nagpasugo nga makigkita ha iya an mga tigurang ha kongregasyon han Efeso. An Efeso mga 50 ka kilometro an kahirayo, kondi mas hirayo an pagbaktas ha nagliliko-liko nga mga dalan. Mahahanduraw mo nga nalipay gud an mga tigurang ha Efeso han makarawat nira an mensahe ni Pablo. (Itanding an Proberbios 10:28.) Pero kinahanglan magplano hira para ha pagbiyahe ngadto ha Mileto. Kinahanglan ba magbakasyon ha trabaho an iba ha ira o sadhan anay an ira tindahan? Ito an ginbubuhat han damu nga Kristiano yana basi makatambong gud ha ngatanan nga sesyon han ira distrito nga kombensyon kada tuig.
4. Ano an ginbuhat ni Pablo han nakadto hiya ha Efeso hin pipira ka tuig?
4 Ha imo paghunahuna, ano an ginbuhat ni Pablo ha Mileto ha sulod han tulo o upat ka adlaw tubtob ha pag-abot han mga tigurang? Kon ikaw hi Pablo, ano an imo bubuhaton? (Itanding an Buhat 17:16, 17.) Makakakuha kita hin ideya ha ginsiring ni Pablo ha mga tigurang tikang ha Efeso. Iginsumat niya an maiha na nga nabatasan niya, upod na an iya ginbuhat hadto ha Efeso. (Basaha an Buhat 20:18-21.) Tungod kay maaram hi Pablo nga waray makakariwa, hiya nagsiring: “Kamo ngahaw maaram tikang ha siyahan nga adlaw, nga nakanhi ako ha Asia . . . nagpapamatuod [ako hin bug-os].” Oo, determinado hiya ha pagtuman han sugo ni Jesus ha iya. Paonan-o niya gintuman ito ha Efeso? An usa nga paagi amo an iya pagpamatuod ha mga Judio ha mga lugar diin damu an tawo. Nagsiring hi Lukas nga han hi Pablo nakadto ha Efeso han 52-55 K.P., nagpahayag hiya ngan nangatadongan ha sinagoga. Han an mga Judio padayon nga ‘nagpakamatig-a’ ngan waray tumoo, nagpadayon la gihapon hi Pablo ha pagsangyaw ha iba, ha lain nga lugar han syudad. Hito nga paagi nagpamatuod hiya ha mga Judio ngan Griego didto hiton daku nga syudad.—Buh. 19:1, 8, 9.
5, 6. Kay ano nga makakasiguro kita nga han nagsangyaw hi Pablo ha kada balay nagpamatuod liwat hiya ha mga diri-tumuroo?
5 Pag-abot han panahon, an iba han nagin mga Kristiano nga nakaistorya ni Pablo ha Mileto, kwalipikado na sugad nga tigurang. Iginpahinumdom niya ha ira an paagi nga iya ginamit: “Waray ako paglikay ha panumat ha iyo han bisan ano nga bagay nga may kapulsanan, ngan ha panutdo ha iyo ha kadaygan, ngan tikang ha tagsa-tagsa nga balay.” Yana, nasiring an iba nga gin-uunabi la dinhi ni Pablo an iya pagmangno nga pagbisita ha mga tumuroo. Kondi, sayop ito. An iginsaysay nga ‘panutdo ha kadaygan ngan ha tagsa-tagsa nga balay’ naaplikar la ha pagsangyaw ha mga diri-tumuroo. Klaro ini ha iya sunod nga iginsaysay. Hiya nagsiring nga nagpamatuod hiya “ha mga Judio ngan mga Gresyahanon ha pagbasol ngadto ha Dios, ngan pagtoo ha aton Ginoo nga hi Jesu-Kristo.” Matin-aw nga hi Pablo nagpamatuod ha mga diri-tumuroo nga kinahanglan magbasol ngan tumoo kan Jesus.—Buh. 20:20, 21.
6 Ha detalyado nga pag-usisa han Kristiano Griego nga Kasuratan, usa nga eskolar an nagsiring mahitungod han Buhat 20:20: “Tulo ka tuig hi Pablo ha Efeso. Nagpakadto hiya ha tagsa nga balay, o nagsangyaw ha ngatanan nga tawo (bersikulo 26). Ini an kasuratanhon nga pamatuod han pagsangyaw ha tagsa nga balay ngan ha mga katirok ha publiko.” Literal man nga kinadto hiya ha tagsa nga balay, sumala hini nga eskolar, o waray, diri karuyag ni Pablo nga hingalimtan han mga tigurang ha Efeso kon paonan-o hiya nagpamatuod ngan kon ano an resulta hito. Hi Lukas nagsumat: ‘An ngatanan nga Judio ngan Gresyahanon nga naukoy ha Asia, nakabati han pulong han Ginoo.’ (Buh. 19:10) Kondi paonan-o nakabati an “ngatanan” ha Asia, ngan ano an iginpapasabot hini mahitungod han aton pagpamatuod?
7. Ano an posible nga resulta han pagsangyaw ni Pablo gawas pa han direkta nga mga nasangyawan niya?
7 Tungod han pagsangyaw ni Pablo ha mga lugar nga damu an tawo ngan ha kada balay, damu an nakabati han iya mensahe. Karuyag ba sidngon nga an ngatanan nga nakabati han iya mensahe nagpabilin ha Efeso ngan waray bumalhin ha iba nga lugar basi magnegosyo, magin hirani ha mga paryente, o makalikay ha masamok nga kinabuhi ha daku nga syudad? Diri. Damu yana an nabalhin tungod han sugad nga mga hinungdan; bangin usa ka ha ira. Hito liwat nga panahon, an mga tawo ha iba nga lugar napakadto ha Efeso basi maglibang-liaw o magnegosyo. Salit bangin didto hira nakaistorya ni Pablo o didto hira nakabati han iya pagpamatuod. Ano an posible nga buhaton nira kon umuli na hira? Adton nagkarawat han kamatuoran magpapamatuod liwat. An iba bangin waray magin tumuroo, kondi posible gud nga igin-istorya nira an ira hinbatian ha Efeso. Tungod hini, an ira mga paryente, amyaw, o kustomer nakabati han kamatuoran ngan an iba bangin nagkarawat hito. (Itanding an Markos 5:14.) Ano an iginpapasabot hini mahitungod han posible nga resulta han imo pagpamatuod hin bug-os?
8. Paonan-o nakabati han kamatuoran an mga tawo ha bug-os nga distrito han Asia?
8 Mahitungod han ministeryo ni Pablo ha Efeso, nagsurat hiya nga ‘binuksan ha iya an daku nga ganghaan’ ngadto ha buruhaton. (1 Kor. 16:8, 9) Ano ito nga ganghaan, ngan paonan-o ito inabrihan para ha iya? Tungod han padayon nga ministeryo ni Pablo ha Efeso, nagsarang an maopay nga sumat. Tagda an Kolosas, Laodisea, ngan Hierapolis, tulo nga syudad nga hirani ha Efeso. Waray gud hi Pablo mahingadto, kondi nakaabot didto an maopay nga sumat. Tikang hito nga lugar hi Epapras. (Kol. 2:1; 4:12, 13) Nakabati ba hiya han nagpamatuod hi Pablo ha Efeso salit nagin Kristiano hiya? Waray espisipiko nga ginsisiring an Biblia. Kondi han iginsangyaw ni Epapras an kamatuoran ha ira lugar, bangin ginbuhat niya ito sugad nga representante ni Pablo. (Kol. 1:7) An mensahe mahitungod kan Kristo bangin nakaabot liwat ha mga syudad sugad han Piladelpia, Sardis ngan Tiatira han mga tuig nga nagsasangyaw hi Pablo ha Efeso.
9. (a) Ano an kinasingkasing nga hingyap ni Pablo? (b) Ano an tinuig nga teksto para ha 2009?
9 Salit, inuyon gud an mga tigurang ha Efeso ha ginsiring ni Pablo: “Waray ko pinangangaritan bisan ano, ngan waray ko pagpakamahala an akon kalugaringon nga kinabuhi, nga [matapos] ko la unta an akon paglakat hin malipayon, ngan an pagkaministro nga akon nakarawat tikang ha Ginoo nga hi Jesus, . . . ha pagtestigo han maopay nga sumat mahitungod han grasya han Dios.” Hini nga bersikulo ginkuha an makapadasig ngan makapaaghat nga teksto para ha tuig 2009: “Pagtestigo han maopay nga sumat.”—Buh. 20:24.
Bug-os nga Pagpamatuod Yana
10. Paonan-o kita nahibaro nga kinahanglan liwat kita magpamatuod hin bug-os?
10 An sugo nga ‘magwali ha katawohan ngan magtestigo hin bug-os’ diri la para ha mga apostol. Han an binanhaw nga hi Jesus nagpahayag ha nagkatirok nga mga 500 nga disipulo ha Galilea, hiya nagsugo: “Lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira han pagbantay han ngatanan nga mga bagay, nga akon iginsugo ha iyo.” Ini nga sugo para liwat ha ngatanan nga tinuod nga Kristiano yana uyon ha iginpapasabot ni Jesus: “Kitaa, ako upod ha iyo ha ngatanan nga mga adlaw tubtob ha kataposan han kalibotan.”—Mat. 28:19, 20.
11. Kilala an mga Saksi ni Jehova tungod ha pagtuman han ano nga importante nga buruhaton?
11 Padayon nga gintutuman han madasigon nga mga Kristiano ito nga sugo pinaagi han maduruto nga “pagtestigo han maopay nga sumat.” Usa han nangunguna nga paagi ha pagbuhat nira hito amo an gin-unabi ni Pablo ha mga tigurang ha Efeso—an pagsangyaw ha kada balay. Ha usa nga libro han 2007 mahitungod han epektibo nga pagmisyonero, hi David G. Stewart, Jr. nagsiring: “An praktikal, mapulsanon nga buruhaton han mga Saksi ni Jehova mas epektibo gud ha pag-aghat ha mga membro nga makigbahin ha pagmisyonero kay ha diri-masabtan, iginbasar la ha teoriya nga [pag-inaghat tikang ha mga pulpito]. Para ha damu nga Saksi ni Jehova, makaruruyag gud nga buruhaton an pagsumat ha iba han ira gintotoohan.” Ano an resulta? “Han 1999, 2 tubtob 4 porsyento la han mga tawo nga akon ginpakianhan ha duha nga kapital han Este nga Europa an nagsiring nga ginkaistorya hira hin mga misyonero han Latter-day Saints o ‘Mormon.’ Sobra 70 porsyento an nagsiring nga personal nga nasangyawan hira han mga Saksi ni Jehova, agsob nga damu ka beses na.”
12. (a) Kay ano nga “damu ka beses” kita nagsasangyaw ha mga balay ha aton teritoryo? (b) Pagsaysay hin eksperyensya han usa nga nagbag-o an disposisyon ha aton mensahe.
12 Bangin ito liwat an isiring han mga tawo ha iyo lugar. Posible gud nga nakabulig ka hito. Samtang ‘personal nga nagsasangyaw’ ka ha mga tawo ha kada balay, iginkakaistorya ka hin kalalakin-an, kababayin-an ngan mga batan-on. An iba bangin diri namamati bisan kon “damu ka beses” na hira nga nasangyawan. An pipira bangin namamati hin madaliay samtang naghihisgot ka hin teksto o impormasyon ha Biblia. Kondi, ha iba pa nakagpamatuod ka hin maopay, ngan ginkarawat nira an mensahe. Ini ngatanan posible mahitabo samtang maduruto nga ‘nagtitestigo kita han maopay nga sumat.’ Sugad han bangin hinbabaroan mo, damu hinduro an diri interesado han ginsangyawan hira hin “damu ka beses,” kondi nagkaada hin pagbag-o. Bangin may-ada nahitabo ha ira o ha usa nga ira hinigugma nga nagpagios han ira hunahuna ngan kasingkasing nga karawaton an kamatuoran. Yana kabugtoan na naton hira. Salit, ayaw pag-undang bisan kon diri damu yana an imo nakakaistorya nga makinarawaton. Diri kita naglalaom nga an ngatanan makarawat han kamatuoran. Kondi naglalaom an Dios nga maduruto ngan madasigon nga magpapadayon kita ha pagpamatuod hin bug-os.
Mga Resulta nga Bangin Diri Naton Hinbabaroan
13. Ano an mahimo magin resulta han aton pagsangyaw nga bangin diri naton hinbabaroan?
13 An nagpahimulos han resulta han pagsangyaw ni Pablo diri la adton direkta nga nabuligan niya nga magin Kristiano; sugad liwat hito an aton kahimtang. Nangangalimbasog gud kita nga regular nga magsangyaw ha kada balay ngan magpamatuod ha mas damu pa nga tawo tubtob ha aton mahihimo. Igin-iistorya naton an maopay nga sumat ha mga amyaw, katrabaho, kaeskwela, ngan paryente. Maaram ba kita han ngatanan nga resulta hito? Ha pipira, bangin may-ada dayon maopay nga resulta. Ha iba nga kahimtang, an mga binhi han kamatuoran bangin diri tumubo ha pipira ka panahon kondi ha urhi bangin tumubo ito ha kasingkasing han usa. Bisan kon diri ito mahitabo, an aton mga nasasangyawan bangin mag-istorya ha iba mahitungod han aton ginsiring, gintotoohan, ngan paggawi. Oo, bangin diri-tinuyo nga mapatubo nira ito nga mga binhi ha makinarawaton nga kasingkasing.
14, 15. Ano an resulta han pagsangyaw han usa nga bugto?
14 Pananglitan, tagdon naton an eksperyensya han mag-asawa nga hi Ryan ngan hi Mandi ha Florida, E.U.A. Ha gintatrabahoan ni Ryan, ginsangyawan niya an usa nga iya katrabaho nga Hindu. Gindayaw gud hito nga tawo an pamado ngan paagi han pakiistorya ni Ryan. Gin-istoryahan hiya ni Ryan mahitungod han pagkabanhaw ngan kahimtang han mga patay. Usa ka gab-i han Enero, nagpakiana ito nga tawo ha iya asawa nga hi Jodi kon ano an iya hinbabaroan mahitungod ha mga Saksi ni Jehova. Katoliko hi Jodi salit binaton hiya nga an iya la hinbabaroan ha mga Saksi amo an ira “pagsangyaw ha kada balay.” Tungod hito, nagsaliksik hi Jodi ha Internet mahitungod han “Jehovah’s Witnesses” ngan nakita niya an aton Web site nga www.watchtower.org. Mga tulo ka bulan nga ginbinasa ni Jodi an mga impormasyon didto upod na an Biblia ngan mga artikulo nga iya naruyagan.
15 Nahituman nga nagkakilala hira Jodi ngan Mandi tungod kay pariho hira nars. Nalipay hi Mandi ha pagbaton ha mga pakiana ni Jodi. Nag-iha an ira pag-inistorya mahitungod han tinatawag ni Jodi nga “tikang kan Adan tubtob ha Armagedon” nga paghisgot. Nag-aram hi Jodi han Biblia ngan waray pag-iha natambong na hiya ha mga katirok ha Kingdom Hall. Nagin diri-bawtismado nga magwarali hiya han Oktubre, ngan nabawtismohan han Pebrero. Hiya nagsurat: “Yana nga maaram na ako han kamatuoran, malipayon gud ngan tagbaw an akon kinabuhi.”
16. Ano an mahibabaroan naton ha eksperyensya han bugto ha Florida may kalabotan ha aton pangalimbasog ha pagsangyaw hin bug-os?
16 Waray maghunahuna hi Ryan nga an iya pagsangyaw ha usa nga tawo magriresulta ha pagkarawat han kamatuoran han iba nga tawo. Hinbaroan gud niya an resulta han iya pagin determinado ha pagpamatuod hin bug-os. Salit, bangin diri mo la hinbabaroan nga an imo pagsangyaw ha kada balay, ha trabaho, ha eskwelahan, o ha diri-pormal nga paagi nagriresulta ngay-an ha pakabati han iba han maopay nga sumat. Sugad la nga hi Pablo diri maaram han ngatanan nga maopay nga resulta han iya pagsangyaw ha distrito han Asia, bangin diri mo liwat hibaroan an ngatanan nga makalilipay nga resulta han imo pagsangyaw hin bug-os. (Basaha an Buhat 23:11; 28:23.) Kondi importante gud nga padayon nga buhaton mo ito!
17. Ano an determinado nga buhaton mo ha 2009?
17 Ha 2009, hinaot seryoso nga tumanon naton an sugo ha aton nga magsangyaw ha kada balay ngan ha iba pa nga paagi. Kon buhaton naton ito, masisiring liwat naton an pariho han ginsiring ni Pablo: “Waray ko pinangangaritan bisan ano, ngan waray ko pagpakamahala an akon kalugaringon nga kinabuhi, nga [matapos] ko la unta an akon paglakat hin malipayon, ngan an pagkaministro nga akon nakarawat tikang ha Ginoo nga hi Jesus, . . . ha pagtestigo han maopay nga sumat mahitungod han grasya han Dios.”
Ano an Imo Baton?
• Paonan-o nagpamatuod hin bug-os hira apostol Pedro ngan Pablo ngan an iba pa ha siyahan nga siglo?
• Kay ano nga an maopay nga resulta han aton pagsangyaw bangin sobra pa han aton nahuhunahuna?
• Ano an tinuig nga teksto ha 2009, ngan kay ano nga masisiring mo nga angayan ito?
[Mga Pakiana]
[Blurb ha pahina 19]
Ini an tinuig nga teksto ha 2009: “Pagtestigo han maopay nga sumat.”—Buh. 20:24.
[Retrato ha pahina 17]
Maaram an mga tigurang ha Efeso nga nabatasan na ni Pablo an pagsangyaw ha kada balay
[Retrato ha pahina 18]
Tubtob diin makakaabot an resulta han imo pagpamatuod hin bug-os?