Kay Ano nga Sadang Tipigan an Imo Integridad?

“Hukman mo ako, O Jehova, . . . sumala ha kamatinumanon [“integridad,” NW] ko.”—SAL. 7:8.

1, 2. Ha ano nga sitwasyon kasagaran nga nasasarihan an integridad han usa nga Kristiano?

 HANDURAWA inin tulo nga kahimtang: Usa nga batan-on nga lalaki an gintatamay han iba nga iya kaeskwela. Ira ginsusulay hiya nga masina, basi magbuyayaw o makig-away. Mabulos ba hiya, o magpapailob ngan mapahirayo? Usa nga bana nga nag-uusahan ha balay an nagsasaliksik ha Internet. Tigda la nga nakita niya ha iya kompyuter an malaw-ay nga paanunsyo. Masusulay ba hiya nga usisahon ito, o lilikyan gud niya ito? Usa nga Kristiano nga babaye an nakikiistorya ha iba nga kabugtoan han an iristorya naglilibak na ha usa nga bugto nga babaye ha kongregasyon. Maapi ba hiya, o iibahon niya an istorya?

² Bisan kon iba-iba ito nga sitwasyon, may-ada ito ginkakaparihoan. Ito ngatanan nagkikinahanglan hin pangalimbasog basi matipigan an integridad sugad nga Kristiano. Ginhuhunahuna mo ba an imo integridad samtang inaatubang mo an imo mga kabaraka, panginahanglan, ngan tumong ha kinabuhi? Adlaw-adlaw nga ginhuhunahuna han mga tawo an ira hitsura, kahimsog, problema ha pangabuhi, makalilipay ngan makasurubo nga panahon han pakigsangkay, o bangin an romantiko nga relasyon pa ngani. Bangin hatagan naton hin daku nga atensyon an sugad nga mga kabaraka. Kondi, ano gud an importante kan Jehova samtang gin-uusisa niya an aton kasingkasing? (Sal. 139:23, 24) An aton integridad.

3. Ano nga pribilehiyo an iginhahatag ha aton ni Jehova, ngan ano an paghihisgotan naton hini nga artikulo?

³ Hi Jehova, an Humaratag han “ngatanan nga maopay nga hatag ngan [han] ngatanan nga hingpit nga hatag,” nagtatagana ha kada usa ha aton hin magkalain-lain nga regalo. (Jak. 1:17) Ginregalohan kita niya hin lawas, hunahuna, kahimsog, ngan magkalain-lain nga abilidad. (1 Kor. 4:7) Kondi, diri kita ginpipirit ni Jehova nga magpakita hin integridad. Ginpapapili kita niya kon kukultibaron ba naton ini nga kalidad. (Deut. 30:19) Salit, kinahanglan usisahon naton kon ano an integridad. Aton paghihisgotan liwat an tulo nga hinungdan kon kay ano nga importante gud ini nga kalidad.

Ano an Integridad?

4. Ano an nahiuupod ha integridad, ngan ano an mahibabaroan naton ha balaud ni Jehova may kalabotan ha mga halad nga hayop?

⁴ Damu an diri sigurado kon ano an integridad. Pananglitan, kon an mga politiko naghahambog han ira integridad, agsob nga katangkod an karuyag nira ipasabot. Importante ito nga kalidad, kondi bahin la ito han integridad. Sugad han paggamit ha Biblia, an integridad nag-uupod han pagin kompleto, ngan pagkamaopay ha moral. An Hebreo nga mga pulong nga may kalabotan ha “integridad” nagtitikang ha pulong nga nangangahulogan hin maopay, bug-os, o waray sayop. Usa hini nga mga pulong an gin-gamit para ha mga halad kan Jehova. An halad nga hayop kakarawaton la niya kon maopay o bug-os ito. (Basaha an Lebitiko 22:19, 20.) Diri gud inuuyonan ni Jehova adton tinuyo nga nagbabalewaray han iya giya pinaagi ha paghalad hin piang, masakiton, o buta nga mga hayop.—Mal. 1:6-8.

5, 6. (a) Ano nga mga ehemplo an nagpapakita nga pinabibilhan gud naton an bug-os, o kompleto? (b) Kinahanglan ba magin hingpit an mga tawo basi makagtipig han integridad? Isaysay.

⁵ An pamiling ngan pagpabili han bug-os, o kompleto, diri talagsahon. Pananglitan, handurawa nga nabilngan han parakolekta hin libro an usa nga birilhon gud nga libro katapos hin maiha nga pagpinamiling, kondi nadiskobrehan niya nga kulang ito hin pipira nga importante nga pahina. Tungod kay nasubo, iginbalik niya ito ha estante. O handurawa an usa nga babaye nga naglalakat ha baybayon ngan namumurot hin mga buskay nga nadadara han balud ngada ha baybayon. Tungod kay nadani han magkalain-lain  nga klase ngan kaanyag hito, agsob hiya pumurot basi usisahon ito. Hain an iya dadad-on? Syempre, an bug-os pa ngan waray gipak. Sugad man, ginbibiling han Dios an mga tawo nga may-ada hini nga kalidad nga pagin bug-os o pagin kompleto.—2 Kron. 16:9.

⁶ Kondi, bangin maghunahuna ka kon an integridad ba nagkikinahanglan hin pagkahingpit. Tungod kay nadaot kita han sala ngan pagkadiri-hingpit, bangin hunahunaon naton nga sugad kita hin kulang nga libro o gipak nga buskay. Ito ba an imo inaabat usahay? Sarig nga hi Jehova diri naglalaom nga magin hingpit kita ha bug-os nga kahulogan. Diri gud hiya naglalaom hin labaw kay han mahihimo naton. a (Sal. 103:14; Jak. 3:2) Kondi, naglalaom hiya nga titipigan naton an aton integridad. May kaibahan ba an pagkahingpit ngan an integridad? Oo. Ha pag-ilustrar: Hinigugma han olitawo an daraga nga iya pakakasalan. Syempre, diri hiya naglalaom nga magigin hingpit hiya. Kondi, maaramon la nga laoman niya an daraga nga magin bug-os-kasingkasing nga nahigugma ha iya ngan ha iya la may-ada romantiko nga gugma. Sugad man, hi Jehova “maabugho nga Dios” nga nagkikinahanglan hin esklusibo nga debosyon. (Eks. 20:5) Diri hiya naglalaom ha aton nga magin hingpit, kondi naglalaom hiya nga hihigugmaon hiya ha bug-os nga kasingkasing, ngan hiya la an sisingbahon.

7, 8. (a) Ano nga susbaranan an ipinakita ni Jesus may kalabotan ha integridad? (b) Ano an kahulogan han integridad sumala ha Kasuratan?

⁷ Bangin nahinunumdoman naton an baton ni Jesus han ginpakianhan hiya kon ano an pinakaimportante ha ngatanan nga balaud. (Basaha an Markos 12:28-30.) Diri la kay ginbaton niya ito nga pakiana; ginbuhat niya ito. Ipinakita niya an gimaopayi nga susbaranan han paghigugma kan Jehova ha iya bug-os nga hunahuna, kasingkasing, kalag, ngan kusog. Ipinakita niya nga an integridad iginpapahayag, diri la ha mga pulong, kondi ha mag-opay nga buhat liwat nga may-ada putli nga motibo. Basi matipigan an aton integridad, kinahanglan sundon naton an mga pitad ni Jesus.—1 Ped. 2:21.

⁸ Salit, sumala ha Kasuratan, an integridad nangangahulogan hin bug-os-kasingkasing nga debosyon ha usa nga langitnon nga Persona, hi Jehova nga Dios, ngan ha iya iginpahayag nga kaburut-on ngan katuyoan. An pagtipig han integridad nangangahulogan nga ha aton adlaw-adlaw nga pagkinabuhi, mangangalimbasog kita labaw ha ngatanan nga lipayon hi Jehova nga Dios. An pinakaimportante ha Iya, pinakaimportante liwat ha aton kinabuhi. Aton paghisgotan an tulo nga hinungdan kon kay ano nga importante gud ito.

1. An Aton Integridad Ngan an Isyu han Pagkasoberano

9. Paonan-o an aton integridad nahidadabi ha isyu han pagkasoberano ha uniberso?

⁹ An pagkasoberano ni Jehova diri nadepende ha aton integridad. An iya pagkasoberano matadong, waray kataposan, ngan ha bug-os nga uniberso. Diri ito mababag-o anoman an sidngon o buhaton han bisan hin-o nga linarang. Kondi, an pagkasoberano han Dios ginpakaraot hinduro ha langit ngan ha tuna. Salit an iya pagmando kinahanglan mabindikar—mapamatud-an nga husto, matadong, ngan mahigugmaon—ha atubangan han ngatanan nga intelihente nga linarang. Sugad nga mga Saksi ni Jehova, karuyag naton isumat an pagkasoberano han Dios ha uniberso ha bisan hin-o nga mamamati. Kondi, paonan-o kita makakatindog hin marig-on nga nadapig ha iya pagkasoberano? Paonan-o naton maipapakita nga ginpipili naton hi Jehova sugad nga aton Soberano? Pinaagi ha pagtipig han aton integridad.

10. Ano an akusasyon ni Satanas may kalabotan ha integridad han mga tawo, ngan paonan-o mo ito babatunon?

¹⁰ Tagda kon paonan-o nahidadabi an imo integridad. Hi Satanas nagsiring nga waray tawo nga masuporta ha pagkasoberano han Dios, ngan waray mag-aalagad ha Iya tungod ha putli nga gugma. Ha atubangan han nagkakatirok nga mga espiritu nga linarang, an Yawa nagsiring kan Jehova: “Panit para ha panit, oo, an ngatanan nga gintatag-iya han tawo iya ihahatag para han iya kinabuhi.” (Job 2:4) Tigamni nga diri la an matadong nga hi Job an sayop nga gin-akusahan ni Satanas kondi  an katawohan liwat ha kabug-osan. Tungod hito tinatawag ha Biblia hi Satanas nga an “parasumbong han aton mga kabugtoan.” (Pah. 12:10) Iya gintatamay hi Jehova pinaagi ha pagsiring nga an mga Kristiano—upod na ikaw—diri magpapabilin nga matinumanon. Nasiring hi Satanas nga magtatraydor ka kan Jehova basi matalwas an imo kinabuhi. Ano an inaabat mo ha sugad nga mga akusasyon ha imo? Diri mo ba sasalingabuton an higayon nga pamatud-an nga buwaon hi Satanas? Pinaagi ha pagtipig han imo integridad, mahihimo mo gud ito.

11, 12. (a) Ano nga mga ehemplo an nag-iilustrar kon paonan-o nahidadabi ha isyu han integridad an aton mga desisyon kada adlaw? (b) Kay ano nga pribilehiyo an pagtipig han aton integridad?

¹¹ Tungod kay nahidadabi ha isyu an imo integridad, importante gud kon ano an imo paggawi ngan mga desisyon kada adlaw. Tagda utro an tulo nga kahimtang nga gin-unabi na. Paonan-o titipigan han batan-on, bana, ngan bugto nga babaye an ira integridad? An batan-on nga gintatamay han iya mga kaeskwela masusulay na unta nga bumulos ha ira, kondi nahinumdoman niya ini nga sagdon: “Diri kamo bumulos, mga hinigugma, kondi tagi niyo hin lugar an kasina han Dios; kay nahisurat na: Akon an pagbulos; ako an mabayad, siring [ni Jehova].” (Roma 12:19) Nagpahirayo hiya. An bana nga nagamit han Internet mahimo unta magkita hin maglaw-ay nga retrato nga nakakaaghat hin pakighilawas, kondi nahinumdoman niya an prinsipyo ha ginsiring ni Job: “Ako naghimo hin kauyonan ha akon mga mata; Dida hito, oonanhon ko in pagtan-aw ha usa nga uray?” (Job 31:1) Sugad man, an bana waray gud magkita han maglaw-ay nga retrato ngan naglikay hito sugad hin hilo. An babaye nga nakikiistorya ha grupo diin bangin makabati hiya hin nakakadaot nga paglibak, waray umapi hito tungod kay nahinumdoman niya an sagdon: ‘An tagsa-tagsa ha aton maglipay ha iya amyaw kon ano an makakaopay ngan makakaparig-on ha iya.’ (Roma 15:2) An paglibak nga bangin mahiistorya niya diri nagpaparig-on. Diri maopay an magigin epekto hito ha iya Kristiano nga bugto nga babaye; diri liwat ito makakalipay ha langitnon nga Amay. Salit ginpugngan niya an iya dila ngan ginbag-o an topiko.

 ¹² Ha tagsa hito nga kahimtang, an Kristiano nagpipili nga baga hin nasiring: ‘Hi Jehova an akon Magmarando. Bubuhaton ko an nakakalipay ha iya.’ Sugad ba liwat hito an imo ginbubuhat kon nagpipili ngan nagdidesisyon ka? Kon amo, tinuod nga nasugot ka ha makapadasig nga sagdon ha Proberbios 27:11: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga [nagtatamay] ha akon.” Daku gud nga pribilehiyo nga napapalipay naton an Dios! Diri ba takos gud han ngatanan nga aton pangalimbasog an pagtipig han aton integridad?

2. An Basihan han Paghukom han Dios

13. Paonan-o ipinapakita han ginsiring nira Job ngan David nga integridad an basihan ni Jehova ha paghukom ha aton?

¹³ Nasasabtan naton nga an integridad nabulig ha aton nga tumindog hin marig-on dapig ha pagkasoberano ni Jehova. Ito an basihan han paghukom han Dios ha aton. Nasabtan gud ito ni Job. (Basaha an Job 31:6.) Maaram hiya nga gintitimbang han Dios an ngatanan nga katawohan ha “matuod nga timbangan,” ngan ginagamit an Iya hingpit nga suruklan han hustisya basi matugkad an aton integridad. Hi David nagsiring liwat: “Hi Jehova naghuhukom ha mga katawohan: Hukman mo ako, O Jehova, sumala ha akon katadongan ngan sumala ha kamatinumanon [“integridad,” NW] ko. . . . Kay an Dios nga matadong [nag-uusisa] han mga hunahuna ngan mga kasingkasing.” (Sal. 7:8, 9) Maaram kita nga nakikita han Dios an tinuod nga pagkatawo, an simboliko nga ‘hunahuna ngan kasingkasing.’ Kondi, kinahanglan hinumdoman naton kon ano an iya ginbibiling. Sugad han ginsiring ni David, ginhuhukman kita ni Jehova sumala han aton integridad.

14. Kay ano nga diri gud naton hunahunaon nga tungod kay diri-hingpit ngan makasasala kita, diri na naton matitipigan an aton integridad?

¹⁴ Handurawa nga gin-uusisa ni Jehova nga Dios an binilyon nga kasingkasing han katawohan yana. (1 Kron. 28:9) Mationan-o kaagsob hiya makabiling hin nagtitipig han integridad? Talagsa gud la! Kondi, diri naton sadang hunahunaon nga tungod han aton pagkadiri-hingpit diri naton matitipigan an aton integridad. Ha kabaliktaran, sadang gud kita sumarig sugad kan David ngan Job, nga makikita ni Jehova nga nagtitipig kita han aton integridad, bisan pa han aton pagkadiri-hingpit. Hinumdumi, an pagkahingpit diri naggagarantiya nga matitipigan an aton integridad. Tulo la nga hingpit nga tawo an nabuhi ha tuna, ngan an duha, hira Adan ngan Eva, waray makagtipig hito. Kondi, minilyon nga diri-hingpit nga tawo an naglalampos ha pagbuhat hito. Maglalampos ka liwat.

3. Importante ha Aton Paglaom

15. Paonan-o ipinakita ni David nga importante an integridad ha aton paglaom ha tidaraon?

¹⁵ Tungod kay integridad an basihan han paghukom ha aton ni Jehova, importante ito ha aton paglaom ha tidaraon. Maaram hi David nga tinuod ini. (Basaha an Salmo 41:12. b) Naglaom gud hiya nga makakarawat niya an pag-uyon han Dios ha kadayonan. Pariho ha tinuod nga mga Kristiano yana, naglaom hi David nga mabubuhi hiya ha waray kataposan ngan padayon nga magigin mas duok gud kan Jehova nga Dios samtang nag-aalagad ha iya. Maaram hi David nga kinahanglan tipigan niya an iya integridad kon karuyag niya nga matuman ito nga paglaom. Sugad man, ginbubuligan, gintututdoan, ginigiyahan, ngan ginbibendisyonan kita ni Jehova samtang gintitipigan naton an aton integridad.

16, 17. (a) Kay ano nga determinado ka nga tipigan pirme an imo integridad? (b) Ano nga mga pakiana an paghihisgotan ha masunod nga artikulo?

¹⁶ Importante an paglaom ha aton kalipay yana. Makakahatag ito ha aton hin kalipay nga ginkikinahanglan naton basi malamposan an magkuri nga panahon. Makakapanalipod liwat ito ha aton panhunahuna. Hinumdumi nga ha Biblia, an paglaom iginpapariho ha helmet. (1 Tes. 5:8) Sugad la  nga an helmet nagpapanalipod ha ulo han sundalo ha girra, an paglaom nagpapanalipod han aton hunahuna tikang ha maraot, madulom nga panhunahuna nga igin-aaghat ni Satanas dida hinin mabubungkag na nga daan nga kalibotan. Waray gud pulos an kinabuhi kon waray kita paglaom. Kinahanglan tangkod nga usisahon naton an aton kalugaringon ngan tagdon hin maopay an kahimtang han aton integridad ngan an paglaom nga upod hito. Ayaw hingalimti nga pinaagi ha pagtipig han integridad, sinusuportahan mo an pagkasoberano ni Jehova ngan ginpapanalipdan an imo presyoso nga paglaom ha tidaraon. Hinaot tipigan mo pirme an imo integridad!

¹⁷ Tungod kay importante gud an integridad, kinahanglan tagdon naton an iba pa nga pakiana. Paonan-o kita magkakaada hin integridad? Ngan ano an mahimo buhaton kon an usa ha pipira ka panahon waray magtipig hito? Babatunon han masunod nga artikulo ini nga mga pakiana.

[Mga footnote]

Ano an Imo Baton?

• Ano an integridad?

• Paonan-o an integridad nahidadabi ha isyu han pagkasoberano ha uniberso?

• Kay ano nga integridad an basihan han aton paglaom?

[Mga Pakiana]

[Mga Retrato ha pahina 5]

Kada adlaw naatubang kita hin damu nga pagsari ha aton integridad