Mga Pakiana Tikang ha mga Magbarasa

Ha Nehemia 8:10, ginsugo an mga Judio nga ‘kumaon han matambok [“nga mga butang,” NW],’ samtang an Balaud ha Lebitiko 3:17 nasiring: “Diri kamo kumaon hin tambok.” Paonan-o ini magkakauyon?

Ha orihinal nga yinaknan, magkaiba an mga pulong nga iginhubad nga ‘matambok nga mga butang’ ha Nehemia 8:10, ngan an “tambok” ha Lebitiko 3:17. An Hebreo nga pulong nga cheʹlev nga iginhubad nga “tambok” ha Lebitiko 3:17, nagtutudlok ha tambok han hayop o han tawo. (Leb. 3:3; Huk. 3:22) Iginpapasabot ha konteksto han bersikulo 17 nga diri puydi kumaon an mga Israelita han tambok ha palibot han mga tinai ngan isol han ighahalad nga hayop o han tambok ha pig-i tungod kay “an ngatanan nga tambok . . . kan Jehova.” (Leb. 3:14-16) Salit an tambok han hayop nga ighahalad kan Jehova diri puydi kaunon.

Ha luyo nga bahin, an pulong nga iginhubad nga ‘matambok nga mga butang’ ha Nehemia 8:10, amo an mash·man·nimʹ, ngan usa la ka beses ini mababasa ha Hebreo nga Kasuratan. Ini nga pulong nagtikang ha berbo nga sha·menʹ, nga nangangahulogan “magin matambok, tumubo nga matambok.” An simple nga kahulogan han mga pulong nga may kalabotan hini nga berbo amo an kahuraan ngan kaopayan. (Itanding an Isaias 25:6.) Usa han mga pulong nga agsob magtikang hini nga berbo amo an nombre nga sheʹmen, kasagaran nga iginhuhubad nga “lana,” kaupod ha ekspresyon nga “lana nga olibo.” (Deut. 8:8, NW; Leb. 24:2) Sugad han paggamit ha Nehemia 8:10, an mash·man·nimʹ  baga hin nagtutudlok ha pagkaon nga may-ada damu nga lana ngan bangin ginsalaktan pa ngani hin karne nga may-ada gutiay nga tambok kondi diri puro nga tambok han hayop.

Bisan kon igindiri ha mga Israelita an pagkaon hin tambok han hayop, mahimo hira kumaon hin mamantika ngan marasa nga pagkaon. An iba hito, sugad han keyk nga hinimo tikang ha harina, ginluto diri pinaagi hin tambok han hayop, kondi hin lana han utanon, kasagaran nga lana hin olibo. (Leb. 2:7) Tungod hito, an Insight on the Scriptures nagsasaysay nga an ‘matambok nga mga butang’ nga gin-unabi “nagtutudlok ha mamantika nga bahin, diri magasa o mamara, kondi makaon-kaon, pati na an marasa nga pagkaon nga ginluto ha lana han utanon.”

Syempre, maaram an mga Kristiano nga an sugo nga diri kumaon hin tambok bahin hadto han Balaud. Kondi diri na hira ilarom hito nga Balaud, upod na an mga turumanon hito may kalabotan ha paghalad hin hayop.—Roma 3:20; 7:4, 6; 10:4; Kol. 2:16, 17.