Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

• Paonan-o kita makakagyakan hin maopay han ‘putli nga yinaknan,’ an kamatuoran mahitungod ha Dios ngan ha iya mga katuyoan? (Sep. 3:9)

Pariho han iba nga yinaknan, basi makagyakan hin maopay han ‘putli nga yinaknan,’ kinahanglan kita mamati hin maopay, magsubad han mag-opay magyakan, magmemorya han pagkasunod-sunod han mga libro han Biblia ngan pipira nga teksto, mag-utro han aton hinbaroan, magbasa ha daku nga tingog, mag-usisa han gramatika, o surundon han kamatuoran, mangalimbasog nga mag-uswag, magkaada eskedyol han pag-aram, ngan magpraktis ha pagyakan hito.—8/15, pahina 21-25.

• Paonan-o masisiring nga kilala naton kon hin-o an Dios?

‘Jehova an iya ngaran,’ ngan karuyag niya nga kilalahon naton hiya hito nga ngaran. (Eks. 15:3) Hiya “an Dios han paghigugma ngan paghidait.” (2 Kor. 13:11) Hiya “an Dios han kaaram” ngan “kaluwasan.” (1 Sam. 2:3; Sal. 25:5) Magpapahirani an Dios ha mga nakilala gud ha iya.—9/1-E, pahina 4-7.

• Paonan-o an “tinulotulo nga lubid” naaplikar ha pag-asawa?

Simboliko nga pulong an “tinulotulo nga lubid.” (Ekles. 4:12) Kon iaplikar ito ha pag-asawa, nag-uupod ito han bana ngan asawa nga ginsisimbolohan han duha nga higot nga ginlulubid upod han ikatulo nga higot ha butnga, an Dios. Ha pagin kahiusa han Dios, an mag-asawa nagkakaada espirituwal nga karig-on ha paglampos han mga problema ngan pagin malipayon ha pag-asawa.—9/15, pahina 16.

• Ano an iginpapasabot han “pandoon han mga kamot” ha Hebreo 6:2?

Imbes nga iaplikar ha pagpili han Kristiano nga mga tigurang, posible nga nagpapasabot ito ha pagdoon han mga kamot basi maghatag han milagroso nga regalo han baraan nga espiritu. (Buh. 8:14-17; 19:6)—9/15, pahina 32.

• An maopay nga amay maaram nga an iya mga anak nagkikinahanglan hin ano?

An iba han ira panginahanglan amo an (1) iya gugma, (2) maopay nga susbaranan, (3) makalilipay nga pag-urupod, (4) edukasyon mahitungod ha Dios, (5) disiplina, (6) panalipod.—10/1-E, pahina 18-21.

• Paonan-o an mga paramangno mag-uuna ha pagpasidungog ha iba?

An usa nga paagi nga mabubuhat ito han tigurang amo an diri gud paghangyo ha iba nga buhaton an diri niya karuyag buhaton. Dugang pa, nagpapasidungog hiya pinaagi ha pagsaysay han hinungdan han iya mga ginhahangyo o iginpapabuhat.—10/15, pahina 22.

• Ano an pipira nga paagi ha pagtipig han ginkasabotan ha pag-asawa?

An duha amo an: (1) Unaha an imo relasyon ha imo asawa. (2) Likyi an ngatanan nga klase han pagin diri-tangkod. Maopay man o diri an iyo pag-asawa, kinahanglan maaram an imo padis nga determinado ka nga maglampos an iyo pag-asawa; makakabulig iton duha nga paagi.—11/1-E, pahina 18-21.

• Ano an hibabaroan han Kristiano nga tigurang ha paagi han paggamit hin tungkod han magbarantay nga Israelita?

An magbarantay nagamit hin hilaba nga tungkod o baston, ha pagtugway ha iya panon. Samtang an mga karnero nasulod o nagawas ha toril, ‘naagi ito ha ilarom han tungkod,’ salit naiihap niya. (Leb. 27:32) Sugad man, kinahanglan kilala gud han Kristiano nga magbarantay an panon han Dios ngan maaram han kahimtang han tagsa nga karnero nga iya ginbabantayan.—11/15, pahina 9.

• Paonan-o maipapakita han iroy nga gintatagad niya nga importante an kalimpyo?

Mahimo mahugawan an pagkaon ha iba-iba nga paagi, salit naghuhunaw hiya antes kumapot hito ngan gintatakluban ito pirme. Ginlilimpyohan niya pirme an balay basi diri magkaproblema tungod ha mga yatot ngan insekto. Gintitipigan liwat niya nga limpyo an mga bado ngan regular nga nakarigo. Uyon ha Biblia ito nga mga paagi.—12/1-E, pahina 9-11.