Titipigan Mo ba an Imo Integridad?

“Ngada ha akon kamatay diri ko isasalikway tikang ha akon an akon pagkamaligdong [“integridad,” NW].”—JOB 27:5.

1, 2. Sugad han proyekto ha pagtukod hin balay, ano nga kalidad an kinahanglan pangalimbasogan naton, ngan ano nga mga pakiana an aton paghihisgotan?

 HANDURAWA nga nagkikita ka hin mga plano han balay. Nahipapausa ka ha pagkapraktikal han disenyo hito. Malipayon nga nahuhunahuna mo an mga kapulsanan hito para ha imo ngan ha imo pamilya. Kondi, diri ka ba mauyon nga ito nga mga plano ngan anoman nga imo ginhuhunahuna waray kapulsanan kon diri ka magtukod hin balay, mag-ukoy, ngan magmintinar hito?

² Sugad man, bangin maghunahuna kita nga an integridad importante nga kalidad nga mapulsanon gud ha aton ngan ha aton mga hinigugma. Kondi waray kapulsanan ito kon diri kita mangalimbasog nga magkaada ngan magtipig hito. Ha kalibotan yana, magasto an literal nga mga proyekto han pagtukod. (Luk. 14:28, 29) Sugad man, an panalinguha nga magkaada han integridad nagkikinahanglan hin panahon ngan pangalimbasog, kondi takos gud ito. Salit aton paghisgotan an tulo nga pakiana: Paonan-o kita magkakaada hin integridad? Paonan-o naton matitipigan an aton integridad sugad nga Kristiano? Ano an angay buhaton kon an usa ha pipira ka panahon waray magtipig han iya integridad?

Paonan-o Kita Magkakaada hin Integridad?

3, 4. (a) Ha ano nga mga paagi ginbubuligan kita ni Jehova nga magkaada hin integridad? (b) Paonan-o naton mapapatubo an integridad, sugad han ipinakita ni Jesus?

³ Natigamnan naton ha nauna nga artikulo nga ginpapasidunggan kita ni Jehova pinaagi ha paghatag ha aton hin katungod ha pagdesisyon kon karuyag ba naton magkaada hin integridad. Maopay na la nga diri kita niya ginpapasibay-an may kalabotan hito. Gintututdoan kita niya kon paonan-o magkakaada hinin presyoso nga kalidad, ngan hura nga naghahatag ha aton han iya baraan nga espiritu, nga nabulig ha aton ha pag-aplikar han iya katutdoan. (Luk. 11:13) Ginpapanalipdan pa ngani niya ha espirituwal adton nangangalimbasog nga maglakat uyon ha integridad.—Prob. 2:7.

⁴ Paonan-o kita gintututdoan ni Jehova basi magkaada hin integridad? Labaw ha ngatanan, pinaagi ha pagsugo han iya Anak, hi Jesus, nga kumanhi ha tuna. Nakita ha pagkinabuhi ni Jesus an hingpit nga pagkamasinugtanon. Hiya “nagmasinugtanon tubtob ha kamatayon.” (Fil. 2:8) Ha ngatanan nga ginbuhat ni Jesus, ginsugot niya an iya  langitnon nga Amay, bisan kon makuri gud ito. “Diri pagbuhaton an akon kaburut-on, kondi an imo,” siring niya kan Jehova. (Luk. 22:42) An kada usa ha aton sadang magpakiana ha kalugaringon, ‘Masinugtanon ba liwat ako?’ Pinaagi han pagkamasinugtanon nga may husto nga motibo, magkakaada kita hin integridad. Tagda an pipira nga kahimtang ha kinabuhi diin importante gud an pagkamasinugtanon.

5, 6. (a) Paonan-o pinabug-atan ni David an pagkaimportante han pagtipig han integridad bisan kon diri kita nakikita han iba? (b) An mga Kristiano yana naatubang ha ano nga pagsari ha integridad kon nag-uusahan?

⁵ Kinahanglan sugton naton hi Jehova bisan kon nag-uusahan kita. Maaram hi salmista David nga importante an integridad bisan nag-uusahan hiya. (Basaha an Salmo 101:2. a) Sugad nga hadi, pirme damu an iya kaupod. Damu ka beses nga ginatos, yinukot pa ngani an nagkikita ha iya. (Itanding an Salmo 26:12.) Importante an pagtipig han integridad ha sugad nga mga panahon, kay an hadi kinahanglan magpakita hin maopay nga susbaranan ha iya katawohan. (Deut. 17:18, 19) Kondi, hinbaroan ni David nga kon nag-uusahan hiya—ha ‘sulod han iya balay’—kinahanglan nga maglakat pa gihapon hiya uyon ha integridad. Kumusta man kita?

⁶ Ha Salmo 101:3, mababasa naton an ginsiring ni David: “Diri ako magbubutang hin bagay nga malamiri [“waray pulos,” NW] ha atubangan han akon mga mata.” Damu an higayon yana nga makita naton an mga butang nga waray pulos, labi na kon nag-uusahan kita. Damu an nagkakaproblema tungod ha pagkinita o pagbinasa hin maglaw-ay nga pasalida o barasahon. Masayon la masulay an usa ha pagkita hin nakakaaghat ha sekso, maglaw-ay pa ngani nga retrato o kiritaon. Kondi an pagbuhat ba hito nagpapakita hin pagsugot ha Dios nga naggiya kan David nga isurat ito nga mga pulong? An pornograpiya nakakadaot kay nakakaaghat ito han sayop ngan hakugnon nga mga hingyap, nakakahugaw han konsensya, nakakapabulag han mag-asawa, ngan nakakadaot han reputasyon han ngatanan nga nahidadabi.—Prob. 4:23; 2 Kor. 7:1; 1 Tes. 4:3-5.

7. Ano nga prinsipyo an makakabulig ha aton basi matipigan an integridad kon nag-uusahan kita?

⁷ Syempre, waray surugoon ni Jehova nga tinuod nga nag-uusahan. An aton Amay mahigugmaon nga nagbabantay ha aton. (Basaha an Salmo 33:11.) Nalilipay gud hi Jehova kon nakikita ka niya nga naato ha pagsulay! Ha imo pagbuhat hito, ginsusunod mo an pahamangno ni Jesus ha Mateo 5:28. Oo, magin determinado nga diri magkita han ngatanan nga makakasulay ha imo ha pagbuhat hin sayop. Ayaw isakripisyo an imo presyoso nga integridad tungod la han makaarawod nga pagkinita o pagbinasa hin pornograpiya!

8, 9. (a) Hi Daniel ngan an iya mga kaupod inatubang ha ano nga pagsari han ira integridad? (b) Paonan-o napapalipay han batan-on nga mga Kristiano yana hi Jehova ngan an ira mga igkasi-Kristiano?

 ⁸ Makakagtipig liwat kita han integridad pinaagi ha pagsugot kan Jehova kon kaupod naton an mga diri-tumuroo. Hunahunaa hi Daniel ngan an iya tulo nga kaupod. Mga batan-on hira han ginbihag ngadto ha Babilonya. Didto, nakaupod nira an mga diri-tumuroo nga gutiay la o waray hinbabaroan mahitungod kan Jehova, ngan hira nga upat nga Hebreohanon ginpirit nga kumaon han mga pagkaon nga igindidiri ha Balaud han Dios. Masayon la unta hira mangatadongan nga diri man ito maraot. Baman, diri makikita han ira mga kag-anak, han mga tigurang, ngan mga saserdote kon ano an ira bubuhaton. Hin-o an mahibabaro? Hi Jehova. Salit nagpabilin hira nga marig-on ngan ginsugot Hiya bisan pa han pagpirit ngan peligro.—Dan. 1:3-9.

⁹ Ha bug-os nga kalibotan, ginsusubad han batan-on nga mga Saksi ni Jehova ito nga determinasyon, marig-on nga ginsusunod an mga suruklan han Dios para ha mga Kristiano ngan iginsasalikway an nakakadaot nga pagsulay han mga kaupod. Kon kamo nga mga batan-on nagdudumiri nga mahidabi ha droga, kamadarahog, pagbuyayaw, imoralidad, ngan iba pa nga sayop nga buhat, nasugot kamo kan Jehova. Samtang ginbubuhat ito, gintitipigan niyo an iyo integridad. Nagpapahimulos kamo ngan napapalipay niyo hi Jehova ngan an mga igkasi-Kristiano!—Sal. 110:3.

10. (a) Tungod ha ano nga sayop nga panhunahuna ha pornikasyon, iginkompromiso han iba nga batan-on an ira integridad? (b) Paonan-o an integridad nabulig ha aton nga makalikay ha peligro han pornikasyon?

¹⁰ Kinahanglan magin masinugtanon liwat kita kon nakikig-upod ha diri-kapariho hin sekso. Maaram kita nga igindidiri han Dios an pornikasyon. Kondi, an pagin masinugtanon masayon la mawara. Pananglitan, an iba nga batan-on nagbubuhat hin oral o anal sex o mutual masturbation, naghuhunahuna nga ini nga mga buhat diri gud maraot tungod kay diri man hira aktuwal nga nakikighilawas. Hinngangalimtan han sugad nga mga batan-on—o bangin iginbabalewaray nira—nga an pulong nga pornikasyon ha Biblia nag-uupod han ngatanan hito nga buhat, sayop nga paggawi nga tungod hito mahimo paiwason an usa ha kongregasyon. b Kondi, an mas maraot pa gud, ira iginbabalewaray an integridad. Tungod kay nangangalimbasog kita nga tipigan an aton integridad, diri kita nagbibiling hin pasangilan ha pagbuhat hin maraot. Diri kita nagsasari nga makasala nga waray la disiplina. Diri la an hudisyal nga disiplina tungod han pakasala an ginhuhunahuna naton. Lugod nagbubuhat kita han makakalipay kan Jehova, naglilikay han makakapasubo ha iya. Imbes nga magsari ha pakasala, nagpapahirayo kita pirme hito ngan ‘napalagiw tikang ha pakighilawas.’ (1 Kor. 6:18) Hito nga paagi iginpapakita naton nga may-ada kita putli nga integridad.

Paonan-o Naton Matitipigan an Aton Integridad?

11. Kay ano nga importante an tagsa nga buhat han pagkamasinugtanon? Iilustrar.

¹¹ Nagkakaada kita integridad pinaagi han pagin masinugtanon, salit natitipigan naton ito pinaagi  ha pagsugot pirme. An usa nga buhat han pagkamasinugtanon baga hin diri importante—gutiay la nga butang. Kondi an sugad nga masinugtanon nga mga buhat nakakadugang ha rekord han integridad paglabay han panahon. Ha pag-ilustrar: An usa nga hollow block baga hin diri-importante, kondi kon aton pagturotungbawon an damu hito, makakagtukod kita hin maopay nga balay. Salit pinaagi han padayon nga pagdugang ha aton mga buhat han pagkamasinugtanon, natitipigan naton an aton integridad.—Luk. 16:10.

12. Paonan-o nagpakita hi David hin susbaranan ha pagtipig han integridad bisan pa han pagmaltrato ngan kawaray-hustisya?

¹² Labi nga nakikita an aton integridad kon nagpapailob kita ha mga kakurian, pagmaltrato, o kawaray-hustisya. Tagda an susbaranan ni David ha Biblia. Sugad nga batan-on, gin-ilob niya an pagtimaraot han hadi nga sadang unta magrepresentar han awtoridad ni Jehova. Kondi, nawara ni Hadi Saul an pag-uyon ni Jehova ngan sobra nga nangabugho kan David, nga inuyonan han Dios. Pero hi Saul padayon nga nagmando ha pipira ka panahon ngan gin-gamit niya an kasundalohan han Israel ha paglanat ngan pag-atake kan David. Gintugotan ni Jehova nga magpadayon ini nga kawaray-hustisya ha pipira ka tuig. Nasina ba hi David ha Dios? Naghunahuna ba hiya nga waray pulos an pagpailob? Waray gud. Padayon nga gintahod gud niya an katungdanan ni Saul sugad nga dinihogan han Dios ngan waray bumulos han nagkaada hiya hin higayon.—1 Sam. 24:2-7.

13. Paonan-o naton matitipigan an aton integridad kon may makapasubo ha aton?

¹³ Maopay gud an susbaranan ni David para ha aton yana! Bahin kita han bug-os-kalibotan nga kongregasyon han diri-hingpit nga mga tawo ngan bisan hin-o ha ira mahimo makasayop ha aton o magin diri-maunungon pa ngani. Syempre, nagpapasalamat kita nga nabubuhi kita ha panahon diin an katawohan ni Jehova ha kabug-osan diri na gud madadaot. (Isa. 54:17) Kondi, paonan-o kita magios kon an usa nga bugto nakapasubo o nakasakit ha aton? Kon magdudumot kita ha igkasi-magsiringba, mamimeligro an aton integridad ha Dios. An paggawi han iba diri gud sadang magin pasangilan nga masina kita o diri magmatinumanon ha Dios. (Sal. 119:165) An pagpailob bisan pa han mga kakurian mabulig ha aton nga matipigan an aton integridad.

14. Ano an reaksyon han mga tawo nga may integridad ha mga pagbag-o ha organisasyon ngan doktrina?

¹⁴ Matitipigan liwat naton an integridad pinaagi han diri pagpinamiling hin sayop ngan diri pagpakaraot ha iba. Syempre, nangangahulogan ito hin pagin maunungon kan Jehova. Ginbibendisyonan niya an iya katawohan yana kay ha kakan-o pa man. Ha bug-os nga kasaysayan mas ginpapahitaas gud yana an putli nga pagsingba dinhi ha tuna. (Isa. 2:2-4) Kon may-ada mga pagbag-o ha esplikasyon han mga teksto ha Biblia o kon paonan-o sadang buhaton an mga butang, karuyag naton karawaton ito. Nalilipay kita nga makita an ebidensya nga nagtitikalamrag pa an espirituwal nga kahayag. (Prob. 4:18) Kon nakukurian kita nga masabtan an usa nga pagbag-o, nag-aampo kita kan Jehova nga buligan kita nga masabtan ito. Samtang yana, nagpapabilin kita nga masinugtanon ngan nagtitipig han aton integridad.

 Ano an Sadang Buhaton kon an Usa Diri Nagtitipig han Iya Integridad?

15. Hin-o la an makakagsalikway han imo integridad?

¹⁵ Sadang hunahunaon naton hin seryoso ito nga pakiana, diri ba? Sugad han hinbaroan naton ha nauna nga artikulo, importante gud an integridad. Kon waray hito, waray kita maopay nga relasyon kan Jehova ngan waray tinuod nga paglaom. Hinumdumi ini: Usa la nga tawo ha uniberso an makakagsalikway han imo integridad—ikaw. Nasabtan gud ni Job ito nga kamatuoran. Hiya nagsiring: “Ngada han akon kamatay diri ko isasalikway tikang ha akon an akon pagkamaligdong [“integridad,” NW]”! (Job 27:5) Kon pariho hito an imo determinasyon ngan kon magpapabilin ka nga duok kan Jehova, matitipigan mo gud an imo integridad.—Jak. 4:8.

16, 17. (a) Kon an usa nagbuhat hin seryoso nga sala, ano an sayop nga buhaton? (b) Ano an husto nga buhaton?

¹⁶ Kondi, an iba waray makagtipig han ira integridad. Sugad la han nahitabo hadto ha panahon han mga apostol, an iba nga Kristiano yana pauroutro nga nagbubuhat hin seryoso nga sala. Kon nahitabo ito ha imo, waray na ba paglaom an kahimtang? May-ada pa. Ano an mahimo buhaton? Aton anay paghisgotan an diri maopay buhaton. An tendensya han tawo amo an pagtago han sayop ha mga kag-anak, igkasi-Kristiano, o tigurang. Kondi, an Biblia nagpapahinumdom ha aton: “Hiya nga nagtatabon han iya mga pagtalapas diri mauswag; kondi bisan hin-o nga magsumat ngan bumaya hini makakakuha hin kalooy.” (Prob. 28:13) Adton nagtatabon han ira mga sala nakakahimo hin peligroso nga sayop kay waray bisan ano nga maitatago ha Dios. (Basaha an Hebreo 4:13.) An iba may-ada pa ngani doble nga pagkinabuhi, nag-aalagad kan Jehova samtang nagbubuhat hin seryoso nga sala. Waray integridad an sugad nga pagkinabuhi. Diri nalilipay hi Jehova ha pagsingba han mga tawo nga nagtatago hin seryoso nga sala. Ha kabaliktaran, an sugad nga pagkasalingkapaw nakakapasina ha iya.—Prob. 21:27; Isa. 1:11-16.

¹⁷ Kon an usa nga Kristiano nahidadabi ha seryoso nga sala, matin-aw kon ano an husto nga buhaton. Panahon na ito ha pangaro hin bulig han mga tigurang. Hi Jehova nagpipili hin mga tigurang nga makakabulig hadton grabe an sakit ha espirituwal. (Basaha an Jakobo 5:14.) Ayaw tuguti an kahadlok ha posible nga disiplina o pagtadong nga magpugong ha imo nga magin mahimsog ha espirituwal. Pananglitan, tungod ba han madaliay nga kaul-ol han indyeksyon o operasyon, diri ka na la magpapatambal han makamaratay nga sakit?—Heb. 12:11.

18, 19. (a) Paonan-o ipinapakita han susbaranan ni David nga an integridad mahimo mahibalik? (b) Ano an imo determinasyon may kalabotan han imo integridad?

¹⁸ May-ada pa ba paglaom nga mag-opay utro an kahimsog? Mahibabalik ba an integridad kon nawara ito? Tagda utro an susbaranan ni David. Nagbuhat hiya hin seryoso nga sala. May kaipa nga nagkinita hiya ha asawa han iba, nag-adulteryo, ngan nagplano basi patayon an inosente nga bana. Hito nga panahon, diri gud masisiring nga hi David may integridad, diri ba? Kondi, waray na ba paglaom an iya kahimtang? Nagkinahanglan hiya hin marig-on nga disiplina ngan ginkarawat niya ito. Tungod han iya sinsero nga pagbasol, ginpasaylo hiya ni Jehova. Nahibaro hi David tikang ha disiplina ngan nahibalik an iya integridad pinaagi ha pagsugot ha Dios anoman an mahitabo. An kinabuhi ni David usa nga ehemplo han mababasa naton ha Proberbios 24:16: “An tawo nga matadong nahuhulog ha makapito, ngan mabangon liwat.” Ano an resulta? Tagda an ginsiring ni Jehova kan Salomon mahitungod kan David han hiya mamatay. (Basaha an 1 Hadi 9:4.) Nahinumdoman han Dios hi David sugad nga tawo nga may integridad. Oo, malilimpyohan gud ni Jehova an nagbabasol nga nakabuhat hin bisan seryoso nga mga sala.—Isa. 1:18.

¹⁹ Oo, magkakaada ka hin integridad pinaagi ha pagsugot ha Dios tungod ha gugma. Magpadayon nga maunungon ngan mapailubon, ngan kon makasala hin seryoso, magpakita hin tinuod nga pagbasol. Presyoso gud an integridad! Hinaot an tagsa ha aton magkaada han determinasyon ni David: “Kondi hi ako, maglalakat ako ha akon pagkahingpit [“integridad,” NW].”—Sal. 26:11.

[Mga footnote]

Ano an Imo Baton?

• Paonan-o ka magkakaada hin integridad?

• Ha ano nga mga paagi matitipigan mo an imo integridad?

• Paonan-o mahibabalik an integridad?

[Mga Pakiana]

[Retrato ha pahina 8]

“MAOPAY GUD ITO”

Ito an ginsiring han babaye nga lima ka bulan na nga burod sugad nga pagdayaw ha pagkabuotan ngan integridad han usa nga diri kakilala. Tikang hiya ha usa nga kapihan, ngan paglabay hin pipira ka oras nasantop niya nga nabayaan niya an iya pitaka didto. May-ada ito $2,000, mas damu gud nga kwarta kay ha kasagaran nga iya gindadara. “Nanluya ako,” siring niya han gin-interbyu hiya ha usa nga lokal nga pahayagan. Kondi, usa nga batan-on nga babaye an nakaagi han pitaka ngan ginbiling dayon an tag-iya hito. Tungod kay waray makabiling, iya gindara ito ha estasyon han polis, ngan nabilngan han polis an burod nga babaye. “Maopay gud ito nga buhat,” siring han mapasalamaton nga tag-iya. Kay ano nga nangalimbasog an batan-on nga babaye nga ibalik an kwarta? An pahayagan nagsiring nga sugad nga usa han mga Saksi ni Jehova, “may-ada hiya han sugad nga integridad tungod han igintututdo ha iya han iya relihiyon.”

[Retrato ha pahina 9]

Matitipigan han mga batan-on an ira integridad kon naatubang ha pagsari

[Retrato ha pahina 10]

May panahon nga waray makagtipig hi David han iya integridad, kondi naibalik niya ito