An Surugoon ni Jehova—“Ginsamad Tungod han Aton mga Pagtalapas”

“Hiya ginsamad tungod han aton mga pagtalapas, hiya [ginkastigo] tungod han aton mga [kasaypanan]; . . . pinaagi han iya mga labod kita nag-opay.”—ISA. 53:5.

1. Ano an sadang hinumdoman naton kon ginsasaurog naton an Memoryal, ngan ano nga tagna an mabulig ha aton ha paghinumdom hito?

 GINSASAUROG naton an Memoryal ha paghinumdom han kamatayon ni Kristo ngan han ngatanan nga natuman tungod han iya kamatayon ngan pagkabanhaw. Nagpapahinumdom ito ha aton han pagbindikar han pagkasoberano ni Jehova, pagbaraan han iya ngaran, ngan pagtuman han iya katuyoan, upod na an pagtalwas ha katawohan. Posible nga waray iba nga tagna ha Biblia nga naghuhulagway hin mas detalyado han halad ni Kristo ngan han natuman hito kay ha nakasurat ha Isaias 53:3-12. Hi Isaias nagtagna han pag-antos han Surugoon ngan nagsaysay han mga detalye han kamatayon ni Kristo ngan han mga bendisyon nga ihahatag hito ha iya dinihogan nga kabugtoan ngan ha iya ‘iba nga mga karnero.’—Juan 10:16.

2. Ano an pinamamatud-an han tagna ni Isaias, ngan ano an magigin epekto hito ha aton?

² Mga pito ka siglo antes matawo hi Jesus dinhi ha tuna, gin-giyahan ni Jehova hi Isaias ha pagtagna nga an Iya pinili nga Surugoon magigin matinumanon bisan kon sarihan tubtob ha kamatayon. Pinamamatud-an hini nga tagna an bug-os nga pagsarig ni Jehova ha pagkamaunungon han iya Anak. Samtang gin-uusisa naton ini nga tagna, mapupuno hin pagpasalamat an aton kasingkasing, ngan mapaparig-on an aton pagtoo.

 “Gintamay” Ngan Gintagad “Sugad nga Waray Pulos”

3. Kay ano nga sadang unta karawaton han mga Judio hi Jesus, kondi paonan-o nira gintagad hiya?

³ Basaha an Isaias 53:3. a Handurawa la kon ano an naeksperyensyahan han bugtong nga Anak han Dios han binayaan niya an malipayon nga pag-alagad kaupod han iya Amay ngan kinanhi ha tuna ha paghalad han iya kinabuhi basi matalwas an katawohan tikang ha sala ngan kamatayon! (Fil. 2:5-8) An katuyoan han iya halad amo an tinuod nga kapasayloan han mga sala, nga ginpadagawan han mga halad nga hayop ha Mosaiko nga Balaud. (Heb. 10:1-4) Diri ba sadang unta hiya karawaton ngan pasidunggan, bisan na man la han mga Judio nga nagpapamulat han iginsaad nga Mesias? (Juan 6:14) Lugod, an Kristo “gintamay” han mga Judio, ngan ira hiya “gintagad sugad nga waray pulos,” sumala ha igintagna ni Isaias. Hi apostol Juan nagsurat: “Kinanhi hiya ha iya kalugaringon nga tuna, kondi waray hiya karawata han iya kalugaringon nga katawhan.” (Juan 1:11, Maopay nga Sumat) Nagsiring hi apostol Pedro ha mga Judio: ‘An Dios han aton mga ginikanan naghimaya han iya Surugoon nga hi Jesus, nga iyo igintubyan ngan iginlirong ha atubangan ni Pilato, han iya pagbuot nga buhian hiya. Kondi iyo iginlirong an baraan ngan matadong.’—Buh. 3:13, 14.

4. Paonan-o hi Jesus nahibaro han sakít?

⁴ Nagtagna liwat hi Isaias nga hi Jesus “mahibabaro han sakít.” Durante han ministeryo ni Jesus, sigurado nga usahay nakapoy hiya, pero waray ginsiring nga nagkasakit hiya. (Juan 4:6) Kondi, nahibaro gud hiya han mga sakit hadton iya ginsangyawan. Nalooy hiya ha ira ngan gintambal an damu ha ira. (Mar. 1:32-34) Hito nga paagi gintuman ni Jesus ini nga tagna: “Ha waray ruhaduha hiya nagpas-an han aton mga kasamdong [“sakít,” NW], ngan nagdara han aton mga kasub-anan.”—Isa. 53:4a; Mat. 8:16, 17.

Sugad hin “Hinampak han Dios”

5. Ano an paghunahuna han damu nga Judio han kamatayon ni Jesus, ngan kay ano nga nakadugang ini han iya pag-antos?

⁵ Basaha an Isaias 53:4b. Waray masabti han damu nga Judio ha panahon ni Jesus an hinungdan han iya pag-antos ngan kamatayon. Natuod hira nga ginsisirotan hiya han Dios, nga sugad hin gindadaot hiya hin mangil-ad nga sakít. (Mat. 27:38-44) Gin-akusahan hiya han mga Judio hin pagpasipara. (Mar. 14:61-64; Juan 10:33) Syempre diri hiya makasasala o parapasipara. Kondi tungod han iya daku nga gugma ha iya Amay, an paghunahuna nga mamamatay hiya tungod han akusasyon nga pagpasipara nakadugang gud han iya pag-antos sugad nga Surugoon ni Jehova. Bisan pa hito, disidido hiya nga sundon an kaburut-on han Dios.—Mat. 26:39.

6, 7. Ha ano nga paagi ‘ginkastigo’ ni Jehova an iya matinumanon nga Surugoon, ngan kay ano nga “nakalipay” ini ha Dios?

⁶ Nasasabtan naton kon kay ano nga igintagna ni Isaias nga an iba maghuhunahuna nga hi Kristo sugad hin “hinampak han Dios” kondi bangin mahipausa kita hini nga tagna: “Nakalipay kan Jehova an pagkastigo ha iya.” (Isa. 53:10, NW) Tungod kay nagsiring liwat an Dios nga, “Kitaa, an akon surugoon, nga . . . akon pinili, nga ikinalilipay han akon kalag,” paonan-o ‘nakalipay ha iya an pagkastigo kan Jesus’? (Isa. 42:1) Ha ano nga paagi masisiring nga nakalipay ini kan Jehova?

⁷ Basi masabtan ini nga tagna, sadang naton hinumdoman nga han gin-ayat ni Satanas an pagkasoberano  ni Jehova, ginruhaduhaan niya an pagkamaunungon han ngatanan nga surugoon han Dios ha langit ngan ha tuna. (Job 1:9-11; 2:3-5) Pinaagi han pagin matinumanon ni Jesus tubtob ha kamatayon, pinamatud-an gud niya nga buwa an akusasyon ni Satanas. Salit, bisan kon gintugotan ni Jehova nga patayon hi Kristo han iya mga kaaway, sigurado nga nasakit gud Hiya han nakita niya nga ginpapatay an iya pinili nga Surugoon. Kondi, nakalipay hinduro ha Dios an bug-os nga pagkamatinumanon han iya Anak. (Prob. 27:11) Dugang pa, malipayon gud Hiya tungod han mapapahimulsan han mabinasulon nga mga tawo pinaagi han kamatayon han iya Anak.—Luk. 15:7.

“Ginsamad Tungod han Aton mga Pagtalapas”

8, 9. (a) Paonan-o hi Jesus “ginsamad tungod han aton mga pagtalapas”? (b) Paonan-o ini pinamatud-an ni Pedro?

⁸ Basaha an Isaias 53:6. Pariho han nawawara nga mga karnero, an makasasala nga mga tawo nagpapatlaag ha pagpinamiling hin katalwasan tikang ha sakit ngan kamatayon nga napanunod kan Adan. (1 Ped. 2:25) Tungod kay diri-hingpit, bisan usa han mga tulin ni Adan diri makakapahiuli han iya nawara. (Sal. 49:7) Kondi, tungod han Iya daku nga gugma, “iginbutang ni Jehova dida ha iya [hinigugma nga Anak ngan pinili nga Surugoon] an karat-an naton ngatanan.” Pinaagi han pag-uyon ni Kristo nga hiya ‘pagsamaron tungod han aton mga pagtalapas’ ngan ‘kastiguhon tungod han aton mga kasaypanan,’ iya ginpas-an an aton mga sala ngan namatay tungod ha aton.

⁹ Hi apostol Pedro nagsurat: “Tungod hini mga gintawag kamo: kay hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pagpitad: Nga amo hiya an nagdara han aton mga sala ha iya lawas ha ibabaw han kahoy, basi nga hi kita, nga nagkamamatay na ngadto ha mga sala, magkabubuhi unta kita ngadto ha katadongan.” Pagkatapos, iya ginkotar an tagna ni Isaias: “Ngan tungod ha iya mga kasamdan nagkatatambal kamo.” (1 Ped. 2:21, 24; Isa. 53:5) Pinaagi hini, nakahimo pakighiuli ha Dios an makasasala, uyon ha dugang nga ginsiring ni Pedro: “Ha makausa hi Kristo nag-antos [“namatay,” NW] tungod ha mga sala, an matadong tungod ha mga diri magtadong, basi nga madara kita niya ngadto ha Dios.”—1 Ped. 3:18.

“Sugad hin Nati nga Karnero nga Gintugwayan Ngadto ha Pangihawan”

10. (a) Ano an ginsiring ni Juan nga Parabaptis mahitungod kan Jesus? (b) Kay ano nga husto an ginsiring ni Juan?

¹⁰ Basaha an Isaias 53:7, 8. Han nakita ni Juan nga Parabaptis nga nagtitiarabot hi Jesus, hiya nagsinggit: “Kitaa, an Karnero han Dios nga nagkukuha han mga sala han kalibotan”! (Juan 1:29) Han gintawag ni Juan hi Jesus nga Karnero o Kordero, bangin nahinumdoman niya an ginsiring ni Isaias: “Sugad [hiya] hin nati nga karnero nga gintugwayan ngadto ha pangihawan.” (Isa. 53:7) “Hiya naghuho han iya kalag ngadto ha kamatayon,” nagtagna hi Isaias. (Isa. 53:12) Makapainteres nga ha gab-i han gintikangan ni Jesus an Memoryal han iya kamatayon, iya iginpasa an kopa han alaksiw ha 11 nga matinumanon nga apostol ngan nagsiring: “Ini an akon dugo nga nagpaparig-on han ginsaaran han Dios, an akon dugo nga gin-ula para han kadam-an, basi mapasaylo an mga sala.”—Mat. 26:28, Maopay nga Sumat.

11, 12. (a) An pagkadisidido ni Isaak nga ighalad hiya nagpapadagaw hin ano mahitungod han halad ni Kristo? (b) Ano an sadang hinumdoman naton mahitungod ha mas Harangdon nga Abraham, hi Jehova, kon nagsasaurog kita han Memoryal?

¹¹ Pariho kan Isaak, disidido hi Jesus nga ihalad hiya ha simboliko nga halaran han kaburut-on ni Jehova para ha iya. (Gen. 22:1, 2, 9-13; Heb. 10:5-10) Bisan kon kinaburut-on nga inuyon hi Isaak nga ihalad hiya, hi Abraham an nangalimbasog ha paghalad. (Heb. 11:17) Ha pariho nga paagi, kinaburut-on nga ginkarawat ni Jesus nga mamamatay hiya, kondi hi Jehova an may awtoridad ha kahikayan han lukat. Salit an halad han iya Anak usa nga kapahayagan han hilarom nga gugma han Dios ha katawohan.

¹² Hi Jesus mismo nagsiring: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi [magkaada hin] kinabuhi nga waray kataposan.” (Juan 3:16) Hi apostol Pablo nagsurat: ‘An Dios nagpahayag gud han iya kalugaringon nga gugma ha aton, amo  nga hi Kristo namatay tungod ha aton, samtang makasasala pa kita.’ (Roma 5:8) Salit, samtang ginpapasidunggan naton hi Kristo pinaagi ha paghinumdom han iya kamatayon, diri gud naton hingalimtan nga an naghimo han kahikayan ha paghalad amo an mas Harangdon nga Abraham, hi Jehova. Ginsasaurog naton an Memoryal para ha iya kadayawan.

An Surugoon “Magmamatadong han Kadam-an”

13, 14. Paonan-o ‘an kadam-an ginmatadong’ han Surugoon ni Jehova?

¹³ Basaha an Isaias 53:11, 12. Mahitungod han iya pinili nga Surugoon, hi Jehova nagsiring: “An akon surugoon nga matadong magmamatadong han kadam-an.” Ha ano nga paagi? An ikatarapos han bersikulo 12 naghahatag hin ideya ha baton. “Ngan nag-ampo [an Surugoon] para han mga matinalapasnon.” Ngatanan han katulinan ni Adan natawo nga makasasala, o “matinalapasnon,” salit nakakarawat nira “an [bayad] han sala” nga amo an kamatayon. (Roma 5:12; 6:23) Kinahanglan makighiuli kan Jehova an makasasala nga tawo. Maopay gud an pagkahulagway han tagna ni Isaias ha kapitulo 53 kon paonan-o hi Jesus “nag-ampo” o nagin manlalaban han makasasala nga katawohan: “An pagbadlong [para ha] aton kamurayaw nakada ha iya; ngan pinaagi han iya mga labod kita nag-opay.”—Isa. 53:5.

¹⁴ Pinaagi han pagpas-an ni Kristo han aton mga sala ngan kamatay para ha aton, iya ‘ginmatadong an kadam-an.’ Hi Pablo nagsurat: “Kaburut-on han Amay nga dida ha iya [kan Kristo] mag-ukoy an kahuraan. Ngan pinaagi ha iya an pagpahiuli han ngatanan nga mga bagay ngadto ha iya, nga nahimo niya an kamurayawan pinaagi han dugo ha iya [pasakitan nga kahoy]; pinaagi ha iya, nasiring ako, bisan an mga bagay nga hahani ha tuna, bisan an mga bagay nga aadto ha mga langit.”—Kol. 1:19, 20.

15. (a) Hin-o “an mga bagay nga aadto ha mga langit” nga gin-unabi ni Pablo? (b) Hin-o la an takos makigbahin ha mga emblema ha Memoryal, ngan kay ano?

¹⁵ “An mga bagay nga aadto ha mga langit” nga iginpahiuli kan Jehova pinaagi han igin-ula nga dugo ni Kristo amo an mga dinihogan nga Kristiano, nga gintawag basi magmando kaupod ni Kristo ha langit. An mga Kristiano nga “mga angbit ha langitnon nga pagtawag” iginpahayag nga ‘matadong para ha kinabuhi.’ (Heb. 3:1; Roma 5:1, 18) Hito nga paagi hi Jehova nagin Amay nira sugad nga espirituwal nga mga anak. An baraan nga espiritu nagtitestigo nga hira “mga manurunod upod ni Kristo,” ngan gintawag basi magin mga hadi ngan saserdote ha iya langitnon nga Ginhadian. (Roma 8:15-17; Pah. 5:9, 10) Nagigin bahin hira han espirituwal nga Israel, ‘an Israel han Dios,’ ngan gindara hira ngada ha “bag-o nga kauyonan.” (Jer. 31:31-34; Gal. 6:16) Sugad nga mga membro han bag-o nga kauyonan, takos hira makigbahin ha mga emblema ha Memoryal, upod na an pula nga alaksiw, nga mahitungod hito hi Jesus nagsiring: “Ini nga irinman amo an bag-o nga testamento [“kauyonan,” NW] han akon dugo, nga iginbisibis tungod ha iyo.”—Luk. 22:20.

16. Ano “an mga bagay nga hahani ha tuna,” ngan ha ano nga paagi hira nagigin matadong ha paniplatan ni Jehova?

¹⁶ “An mga bagay nga hahani ha tuna” amo an iba nga mga karnero ni Kristo, nga may-ada paglaom nga mabuhi ha waray kataposan ha tuna. Binubuligan liwat hira han pinili nga Surugoon ni Jehova basi magin matadong ha paniplatan han Dios. Natoo hira han halad lukat ni Kristo ngan pinaagi hito “ira pinanmunakan an ira mga  higlawig nga panapton, ngan ito ginpabusag ha dugo han Kordero.” Salit iginpapahayag ni Jehova nga hira matadong, diri sugad nga espirituwal nga mga anak, kondi sugad nga mga sangkay, ngan iginhahatag ha ira an urusahon nga paglaom nga matalwas ha “daku nga kagol-anan.” (Pah. 7:9, 10, 14; Jak. 2:23) Tungod kay an iba nga mga karnero diri bahin han bag-o nga kauyonan ngan salit waray paglaom nga mabuhi ha langit, diri hira nakikigbahin ha mga emblema ha Memoryal kondi natambong hira sugad nga matinalahuron nga paraobserba.

Takos Gud Pasalamatan hi Jehova Ngan an Iya Nalilipayan nga Surugoon!

17. Paonan-o an pag-aram ha mga tagna ni Isaias mahitungod han Surugoon nakabulig ha aton nga iandam an aton hunahuna para ha Memoryal?

¹⁷ An pag-usisa ha mga tagna ni Isaias mahitungod ha Surugoon usa nga maopay nga paagi ha pag-andam han aton hunahuna para ha Memoryal han kamatayon ni Kristo. Nabuligan kita hito nga kitaon hin maopay “an tinikangan ngan maghiringpit han aton pagtoo.” (Heb. 12:2) Hinbaroan naton nga an Anak han Dios diri rebelyoso. Diri pariho kan Satanas, hi Jesus nalilipay ha pagtutdo ha iya ni Jehova, ngan nakilala ha Iya sugad nga an Soberano nga Ginoo. Nasabtan naton nga durante han ministeryo ni Jesus dinhi ha tuna, pinaid hiya ha mga tawo nga iya ginsangyawan, ngan gintambal an damu ha ira ha pisikal ngan ha espirituwal. Iginpapakita hito an iya pagbubuhaton sugad nga Mesianiko nga Hadi ha bag-o nga sistema kon ‘ipahamutang na niya an kasubayan [o hustisya] ha tuna.’ (Isa. 42:4) An iya kadasig ha pagsangyaw han Ginhadian, sugad nga “kapawa han mga Hentil,” nagpapahinumdom ha iya mga sumurunod nga madasigon nga magsangyaw han maopay nga sumat ha bug-os nga tuna.—Isa. 42:6.

18. Kay ano nga an tagna ni Isaias nagpapagios ha aton nga kinasingkasing nga magpasalamat kan Jehova ngan ha iya matinumanon nga Surugoon?

¹⁸ An tagna ni Isaias nagpapahilarom liwat han aton pagsabot ha daku nga sakripisyo ni Jehova han ginpakanhi niya ha tuna an iya hinigugma nga Anak basi mag-antos ngan mamatay para ha aton. Nalipay hi Jehova, diri ha pag-antos han iya Anak, kondi ha bug-os nga pagkamatinumanon ni Jesus tubtob ha kamatayon. Sadang liwat kita malipay pariho kan Jehova, ngan magpasalamat han ngatanan nga ginbuhat ni Jesus ha pagpamatuod nga buwaon hi Satanas ngan ha pagbaraan han ngaran ni Jehova. Hito nga paagi napamatud-an nga Hiya la an may-ada katungod nga magmando. Dugang pa, gintubos ni Jesus an aton mga sala ngan namatay para ha aton. Pinaagi hito, nagin posible para ha gutiay nga panon han iya dinihogan nga kabugtoan ngan ha iba nga mga karnero nga magin matadong ha paniplatan ni Jehova. Samtang nagkakatirok kita para ha Memoryal, hinaot kinasingkasing nga magpasalamat kita kan Jehova ngan ha iya matinumanon nga Surugoon.

[Footnote]

Sugad nga Repaso

• Ha ano nga paagi “nakalipay” kan Jehova an ‘pagkastigoha’ ha iya Anak?

• Paonan-o hi Jesus “ginsamad tungod han aton mga pagtalapas”?

• Paonan-o ‘an kadam-an ginmatadong’ han Surugoon?

• Paonan-o an pag-aram ha mga tagna mahitungod han Surugoon nag-aandam han imo hunahuna ngan kasingkasing para ha Memoryal?

[Mga Pakiana]

[Retrato ha pahina 26]

“Hiya gintamay, ngan amon hiya gintagad sugad nga waray pulos”

[Retrato ha pahina 28]

“Hiya naghuho han iya kalag ngadto ha kamatayon”

[Retrato ha pahina 29]

An ‘iba nga mga karnero’ natambong ha Memoryal sugad nga matinalahuron nga paraobserba